ಟ್ಯಾಂಗಿ ಅಂಡ್ ಸ್ಪೈಸಿ ಡಾನ್ ಡಾನ್ ಎಗ್ ಫ್ರೈ

ಹಾಯ್, ನನಗೆ ಫ್ರೆಂಡ್ಸ್ ಜೊತೆ ಜಾಲಿ ರೈಡ್ ಹೋಗುವುದು, ಟ್ರಕ್ಕಿಂಗ್, ವೀಕೆಂಡ್ ಮಸ್ತಿ ಮೋಜು ಇವುಗಳಷ್ಟೇ ಆಸಕ್ತಿ ಹೊಸ ರುಚಿಯ ಅಡುಗೆ ಮಾಡುವುದರಲ್ಲಿ. ನನ್ನ ಹೊಸ ರುಚಿ ಅಡುಗೆಯ ಪ್ರಯೋಗ ಮಾಡುವುದು ಹೆಂಡತಿ, ಫ್ರೆಂಡ್ಸ್ ಮೇಲೆ, ಪುಣ್ಯಕ್ಕೆ ಇದುವರೆಗೆ ನಾನು ಮಾಡಿದ ಅಡುಗೆ ತಿಂದು ಅವರಿಗೆ ಯಾರಿಗೂ ಏನೂ ಆಗಿಲ್ಲ, ನನಗೆ ಮಾತ್ರ ಅವರಿಂದ ಶಹಬ್ಬಾಸ್ ಗಿರಿ ದೊರೆಯುತ್ತದೆ. ಆದ್ದರಿಂದಲೇ ನನ್ನ ಹೊಸ- ಹೊಸ ರುಚಿಯ ಅಡುಗೆ ಪ್ರಯತ್ನಗಳು ಮುಂದುವರೆದಿದೆ.

ಮೊನ್ನೆ ನಾನು ಹೊಸ ಬಗೆಯಲ್ಲಿ ಮೊಟ್ಟೆ ಫ್ರೈ ಮಾಡಿದ್ದೆ, ಟೇಸ್ಟ್ ಸೂಪರ್ ಆಗಿ ಬಂದ ಕಾರಣ ಆ ರೆಸಿಪಿಯನ್ನು ನಿಮ್ಮೊಂದಿಗೂ ಹಂಚಿಕೊಳ್ಳಬೇಕೆನ್ನಿಸಿತ್ತು, ತುಂಬಾ ಸರಳವಾದ ಈ ಅಡುಗೆಗೆ ಡಾನ್ ಡಾನ್ ಮೊಟ್ಟೆ ಫ್ರೈ ಅಂತಲೂ ಹೆಸರಿಟ್ಟಿದ್ದೇನೆ. ಹೆಸರು ಇಷ್ಟವಾಗಲಿಲ್ಲವೆಂದರೆ ಬದಲಾಯಿಸಿಕೊಳ್ಳಿ, ಆದರೆ ರೆಸಿಪಿ ಟ್ರೈ ಮಾಡಿ ಖಂಡಿತ ನಿಮಗೆ ಇಷ್ಟವಾಗುವುದು.

Image courtesy: Deepak Naidu

ಬೇಕಾಗುವ ಸಾಮಾಗ್ರಿಗಳು
ಈರುಳ್ಳಿ 3-4
ಮೊಟ್ಟೆ 6
ಹುಣಸೆ ಹಣ್ಣಿನ ರಸ 2 ಚಮಚ
ಖಾರದ ಪುಡಿ ಅರ್ಧ ಚಮಚ
ಅರಿಶಿಣ ಪುಡಿ
ರುಚಿಗೆ ತಕ್ಕ ಉಪ್ಪು
ಸ್ವಲ್ಪ ಕೊತ್ತಂಬರಿ ಸೊಪ್ಪು(ಅಲಂಕರಿಸಲು)
2 ಚಮಚ ಎಣ್ಣೆ

ತಯಾರಿಸುವ ವಿಧಾನ:

* ಮೊಟ್ಟೆಯನ್ನು ಬೇಯಿಸಿ, ಅದರ ಸಿಪ್ಪೆ ಸುಲಿದು ಇಡಿ.

* ಈರುಳ್ಳಿಯನ್ನು ಚಿಕ್ಕದಾಗಿ ಕತ್ತರಿಸಿ, ತವಾಕ್ಕೆ 2 ಚಮಚ ಎಣ್ಣೆ ಹಾಕಿ ಬಿಸಿ ಮಾಡಿ, ಈಗ ಕತ್ತರಿಸಿದ ಈರುಳ್ಳಿ ಹಾಕಿ ಕಂದು ಬಣ್ಣ ಬರುವವರೆಗೆ ಫ್ರೈ ಮಾಡಿ.

*ನಂತರ ಹುಣಸೆ ಹಣ್ಣಿನ ರಸ ಹಾಕಿ ಖಾರದ ಪುಡಿ, ಅರಿಶಿಣ ಪುಡಿ, ಮತ್ತು ಉಪ್ಪು ಹಾಕಿ ಮಿಕ್ಸ್ ಮಾಡಿ ಮತ್ತೆ 3-4 ನಿಮಿಷ ಫ್ರೈ ಮಾಡಿ.

* ಈಗ ಬೇಯಿಸಿದ ಮೊಟ್ಟೆಯನ್ನು ಸಮ ಅರ್ಧ ಭಾಗವಾಗಿ ಕತ್ತರಿಸಿ, ತವಾದಲ್ಲಿ ಹಾಕಿ, ಫ್ರೈ ಮಾಡಿದ ಈರುಳ್ಳಿ ಸೌಟ್ ನಲ್ಲಿ ತೆಗೆದು ಮೊಟ್ಟೆಯ ಮೇಲೆ ಹಾಕಿ ಮತ್ತೆ 10 ನಿಮಿಷ ಕಡಿಮೆ ಉರಿಯಲ್ಲಿ ಬೇಯಿಸಿ.

* ನಂತರ ಕೊತ್ತಂಬರಿ ಸೊಪ್ಪಿನಿಂದ ಅಲಂಕರಿಸಿದರೆ ಡಾಂಗ್ ಡಾಂಗ್ ಎಗ್ ಫ್ರೈ ರೆಡಿ.