ಡ್ರೈ ಚಿಕನ್ ಸುಕ್ಕ ಮಾಡುವುದು ಬಲು ಸುಲಭ

Non Vegetarian

oi-Reena

By Hema S

Published: Saturday, May 19, 2012, 14:58 [IST]

ಈ ವೀಕೆಂಡ್ ಗೆ ನಾನ್ ವೆಜ್ ಅಡುಗೆ ಅದರಲ್ಲೂ ಚಿಕನ್ ಕರಿ, ಕಬಾಬ್ ಅಲ್ಲ ಬೇಡ, ಬೇರೆ ಏನೂ ಮಾಡಬಹುದು ಎಂದು ಆಲೋಚಿಸುತ್ತಿದ್ದರೆ ನನ್ನ ಸಲಹೆ ಚಿಕನ್ ಸುಕ್ಕಾ ಟ್ರೈ ಮಾಡಿ. ಚಿಕನ್ ಸುಕ್ಕ ರುಚಿಯ ಜೊತೆಗೆ ಮಾಡಲು ಬಲು ಸುಲಭ. ಇದನ್ನು ತಯಾರಿಸುವ ರೆಸಿಪಿ ನೋಡಿ ಇಲ್ಲಿದೆ.

ಬೇಕಾಗುವ ಸಾಮಾಗ್ರಿಗಳು:

* 1 ಕೆಜಿ ಚಿಕನ್ (ಸಾಧಾರಣ ಗಾತ್ರದಲ್ಲಿ ಚಿಕನ್ ತುಂಡುಗಳಿರಬೇಕು)
* 2 ಚಮಚ ಕೊತ್ತಂಬರಿ ಬೀಜ
* 1/2 ಚಮಚ ಮೆಂತೆ
* ಚಿಟಿಕೆಯಷ್ಟು ಅರಿಶಿಣ ಪುಡಿ
* 1 ಚಮಚೆಯಷ್ಟು ಕರಿಮೆಣಸಿನ ಪುಡಿ
* ಸ್ವಲ್ಪ ಜೀರಿಗೆ
* 1 ಚಮಚ ಗಸೆಗಸೆ
* 2 ಬೆಳ್ಳುಳ್ಳಿ ಎಸಳು
* ಹುರಿದ ಒಣ ಮೆಣಸಿನ ಕಾಯಿ 10-12
* ತುರಿದ ತೆಂಗಿನ ಕಾಯಿ (ಕಾಯಿ ಚಿಕ್ಕದಾಗಿದ್ದರೆ 1 ಇಲ್ಲದಿದ್ದರೆ 1/2 ಭಾಗ)
* ಸ್ವಲ್ಪ ಕರಿ ಬೇವಿನ ಎಲೆ
* ಒಂದು ದೊಡ್ಡ ಕತ್ತರಿಸಿದ ಈರುಳ್ಳಿ
* ತುಪ್ಪ 2 ಚಮಚ
* ರುಚಿಗೆ ತಕ್ಕ ಉಪ್ಪು

ತಯಾರಿಸುವ ವಿಧಾನ:

1. ಬಾಣಲೆಯಲ್ಲಿ ತುಪ್ಪ ಹಾಕಿ ಬಿಸಿ ಮಾಡಿ ಅದರಲ್ಲಿ ಕರಿಮೆಣಸಿನ ಪುಡಿ, ಅರಿಶಿಣ ಪುಡಿ, ಮೆಂತೆ, ಕೊತ್ತಂಬರಿ ಬೀಜ, ಗಸೆಗಸೆ, ಜೀರಿಗೆ, ಹಾಕಿ ಈ ವಸ್ತುಗಳು ಸ್ವಲ್ಪ ಕರಿಯುವ ವಾಸನೆ ಬರುವವರೆಗೆ ಹುರಿಯಬೇಕು. ನಂತರ ಈ ವಸ್ತುಗಳನ್ನು ಒಂದು ಪಾತ್ರೆಯಲ್ಲಿ ಹಾಕಿ ತಣ್ಣಗಾಗಲು ಬಿಡಬೇಕು.

2. ನಂತರ ಈ ವಸ್ತುಗಳನ್ನು ಹುರಿದ ಒಣ ಕೆಂಪು ಮೆಣಸಿನ ಕಾಯಿ ಮತ್ತು ಅರಿಶಿಣ ಹಾಕಿ ಪುಡಿ ಮಾಡಬೇಕು (ನೀರು ಸೇರಿಸಬಾರದು). ತೆಂಗಿನ ಕಾಯಿಯನ್ನು ನೀರು ಸೇರಿಸದೆ ಅರೆದು ಇಡಬೇಕು (ಪೇಸ್ಟ್ ರೀತಿ ಮಾಡಬೇಡಿ).

3. ನಂತರ ಈ ಪುಡಿಯನ್ನು ಚಿಕನ್ ಜೊತೆ ಮಿಶ್ರ ಮಾಡಿ ರುಚಿಗೆ ತಕ್ಕ ಉಪ್ಪು ಹಾಕಿ ಕಡಿಮೆ ಉರಿಯಲ್ಲಿ ಬೇಯಿಸಬೇಕು ( ಪೂರ್ತಿ ಬೇಯಿಸಬೇಡಿ). ಪಾತ್ರೆಯ ಬಾಯಿ ಮುಚ್ಚಬಾರದು.

4. ಈಗ ತೆಂಗಿನ ಕಾಯಿ ಹಾಕಿ, ಪಾತ್ರೆಯ ಬಾಯಿ ಮುಚ್ಚಿ 4-5 ಚಿಕನ್ ಬೇಯಿಸಬೇಕು. ಆಗ ಚಿಕನ್ ಸಂಪೂರ್ಣವಾಗಿ ಬೆಂದಿರುತ್ತದೆ.

5. ಈಗ ಬಾಣಲೆಯನ್ನು ಬಿಸಿ ಮಾಡಿ ಅದಕ್ಕೆ ತುಪ್ಪ ಹಾಕಿ ಅದರಲ್ಲಿ ಕರಿಬೇವಿನ ಎಲೆ ಮತ್ತು ಕತ್ತರಿಸಿದ ಈರುಳ್ಳಿ ಹಾಕಿ , ಈರುಳ್ಳಿ ಕಂದು ಬಣ್ಣಕ್ಕೆ ಬರುವವರೆಗೆ ಹುರಿದು ಅದನ್ನು ತಯಾರಾದ ಚಿಕನ್ ಜೊತೆ ಹಾಕಿ ಮಿಶ್ರ ಮಾಡಿದರೆ ಚಿಕನ್ ಸುಕ್ಕ ರೆಡಿ.