ಆಪತ್ ಬಾಂಧವ ಎಗ್ ಆಮ್ಲೆಟ್

Non Vegetarian

oi-Shami SK

By * ಸುಜಾತಾ ಕುಂದಾಪುರ

Published: Tuesday, February 23, 2010, 14:37 [IST]

ಕೋಳಿಮೊಟ್ಟೆ ಬಳಸಿ ನಾವು ತಯಾರಿಸಬಹುದಾದ ಅತಿಸುಲಭ ಅಡುಗೆ ಎಂದರೆ ಆಮ್ಲೆಟ್. ವಿಶೇಷವಾಗಿ ಬ್ರಹ್ಮಚಾರಿಗಳು, ಹೆಂಡತಿಯನ್ನು ತವರು ಮನೆಗೆ ಕಳಿಸಿದವರು, ಒಬ್ಬಂಟಿಗರು, ಹಾಸ್ಟೆಲ್ ಮತ್ತು ಕೊಠಡಿಗಳಲ್ಲಿ ವಾಸ ಮಾಡಿಕೊಂಡು ತಮ್ಮ ಆಹಾರ ತಾವೇ ಸಿದ್ಧಪಡಿಸಿಕೊಳ್ಳುವವರಿಗೆ ಆಮ್ಲೆಟ್ ವರದಾನ. ಆಪತ್ಬಾಂಧವ ಆಮ್ಲೆಟ್ಟನ್ನು ಚಕಚಕ ಮಾಡಿ ತಿಂದುಬಿಡಬಹುದು.

ಅಥವಾ ಸಮಯ ಮತ್ತು ಇಷ್ಟವಾಗುವ ಪರಿಕರಗಳಿದ್ದರೆ ಬಗೆಬಗೆ ರುಚಿಯ ಆಮ್ಲೆಟ್ಟುಗಳನ್ನು ಮಾಡಬಹುದು. ತೀರ ಸುಲಭವಾದ ಆಮ್ಲೆಟ್ ತಯಾರಿಕೆ ವಿಧಾನ ಹೀಗಿದೆ.

ಒಂದು ಸ್ಟೌವ್. ಗ್ಯಾಸ್ ಅಥವಾ ಇಲೆಕ್ಟ್ರಿಕ್. ಒಂದು ನಾನ್ ಸ್ಟಿಕಿ ತವ. ಮರದ ಸೌಟು. ರೆಡಿಮೇಡ್ ಪೆಪ್ಪರ್ ಮತ್ತು ಉಪ್ಪಿನ ಡಬ್ಬಿಗಳು. ಕೊಂಡು ತಂದ ತತ್ತಿಗಳನ್ನು ಮನೆಯಲ್ಲಿ ಒಂದು ವಾರಕ್ಕಿಂತ ಹೆಚ್ಚು ದಿನ ಇಡದಂತೆ ಬಳಸಿಬಿಡಬೇಕು.

ಒಲೆ ಹಚ್ಚಿ ತವದ ಮೇಲೆ ಒಂದು ಚಮಚ ಅಡುಗೆ ಎಣ್ಣೆ ಹಾಕಿ ಜಿಡ್ಡು ಎಲ್ಲಕಡೆ ಹರಡುವಂತೆ ಪ್ಯಾನ್ ಅಲ್ಲಾಡಿಸಿ. ಒಂದು ಬಾರಿಗೆ ಒಂದು ಮೊಟ್ಟೆಯಂತೆ ಒಡೆದು ತವದಲ್ಲಿ ಪಾಕಿ. ಬಿಳಿ ಪದಾರ್ಥ ಹರಡಿಕೊಳ್ಳುವಂತೆ ಪ್ಯಾನ್ ಅಲ್ಲಾಡಿಸಿ. ಹಳದಿ ಅಂಶ ಮಾತ್ರ ದ್ವೀಪದಲ್ಲಿನ ನಡುಗಡ್ಡೆಯೋಪಾದಿಯಲ್ಲಿ ತಟಸ್ಥವಾಗಿರಲಿ.

ಮೊಟ್ಟೆ ಸ್ವಲ್ಪ ಬೆಂದ ನಂತರ ಪೆಪ್ಪರ್ ಮತ್ತು ಉಪ್ಪಿನ ಪುಡಿ ಸಿಂಪಡಿಸಿ. ಬೇಕೆನಿಸಿದರೆ ಅರ್ಧ ಚಮಚ ಎಣ್ಣೆಯನ್ನು ಆಮ್ಲೆಟ್ ಸುತ್ತ ಮತ್ತೆ ಹಾಕಬಹುದು. ಎರಡೂ ಬದಿ ಚೆನ್ನಾಗಿ ಬೇಯಿಸಿದರೆ ಆಮ್ಲೆಟ್ಟಾಗುತ್ತದೆ. ಒಂದೇ ಬದಿ ಬೇಯಿಸಿ ಹೊರತೆಗೆದರೆ ಬುಲ್ಸ್ ಐ ಆಗುತ್ತದೆ. ಸಿಂಪಲ್. ದಿನದ 24 ಗಂಟೆಗಳ ಅವಧಿಯಲ್ಲಿ ಯಾವಾಗ ಹಸಿವಾಗುತ್ತದೋ ಆವಾಗ ಮಾಡಿಕೊಳ್ಳಲು ಇದು ಅನುಕೂಲ. ಜತೆಗೆ ತಿನ್ನಲು ಸ್ಲೈಸ್ ಮಾಡಿದ ಟೊಮೆಟೋ, ಹಸಿ ಮೆಂತ್ಯ ಸೊಪ್ಪಿನ ಎಲೆಗಳು ಇದ್ದರೆ ಊಟ ಭರ್ಜರಿ.