ಬಿರಿಯಾನಿ ಮರೆಸುವ ರುಚಿ.. ಕುಕ್ಕರ್‌ನಲ್ಲಿ ಮಾಡಿ ಅಣಬೆ ಪುಲಾವ್! ಸಖತ್ ಈಸಿ ರೆಸಿಪಿ

ನೀವು ಪ್ರತಿದಿನದ ಊಟದಲ್ಲಿ ಮಾಡುವ ಪಲಾವ್ (Pulao) ಅಥವಾ ಚಿತ್ರಾನ್ನಕ್ಕೆ ಬೇಸತ್ತಿದ್ದೀರಾ? ಹಾಗಿದ್ದರೆ, ಒಂದು ವಿಶೇಷ ಹಾಗೂ ರೆಸ್ಟೋರೆಂಟ್ ಶೈಲಿಯ ಖಾದ್ಯವನ್ನು ಸವಿಯುವ ಬಯಕೆಯಿದ್ದರೆ, ಅಣಬೆ ಪುಲಾವ್ (Mushroom Pulao) ನಿಮಗೆ ಅತ್ಯುತ್ತಮ ಆಯ್ಕೆ. ಅಣಬೆಗಳು ಬಾಯಲ್ಲಿ ನೀರೂರಿಸುವ ರುಚಿ ನೀಡುವುದು ಮಾತ್ರವಲ್ಲದೆ, ಪ್ರೋಟೀನ್ ಮತ್ತು ವಿಟಮಿನ್‌ಗಳಿಂದ ಸಮೃದ್ಧವಾಗಿರುವ ಆರೋಗ್ಯಕರ ಆಹಾರವೂ ಹೌದು. ಈ ಲೇಖನದಲ್ಲಿ ಮನೆಯಲ್ಲಿಯೇ ಕಡಿಮೆ ಸಮಯದಲ್ಲಿ ಸುಲಭವಾಗಿ ಅಣಬೆ ಪುಲಾವ್ ಮಾಡುವ ವಿಧಾನವನ್ನು ತಿಳಿಸಲಾಗಿದೆ.

ದೈನಂದಿನ ಬೇಸರ ಕಳೆಯಲ್ಲದೆ, ದಿಢೀರ್ ಎಂದು ಅತಿಥಿಗಳು ಬಂದಾಗ ಅಥವಾ ವಾರಾಂತ್ಯದಲ್ಲಿ ಕುಟುಂಬದೊಂದಿಗೆ ವಿಶೇಷ ಭೋಜನ ಸವಿಯಬೇಕೆಂದಾಗ ಈ ಅಣಬೆ ಪುಲಾವ್ ಪರ್ಫೆಕ್ಟ್ ಎನಿಸುತ್ತದೆ. ಮಕ್ಕಳಿಗೆ ಲಂಚ್ ಬಾಕ್ಸ್‌ಗೆ ಪ್ಯಾಕ್ ಮಾಡಲು ಇದು ಉತ್ತಮ ಆಯ್ಕೆ, ಏಕೆಂದರೆ ತಣ್ಣಗಾದ ಮೇಲೆಯೂ ಇದರ ರುಚಿ ಅಷ್ಟೇ ಅದ್ಭುತವಾಗಿ ಉಳಿಯುತ್ತದೆ. ರೈತಾ, ದಾಲ್ ಅಥವಾ ತಾಜಾ ಸಲಾಡ್‌ನೊಂದಿಗೆ ಬಡಿಸಿದರೆ, ಇದರ ರುಚಿ ಇನ್ನಷ್ಟು ಹೆಚ್ಚುತ್ತದೆ.

ಮನೆಯಲ್ಲಿಯೇ ಸುಲಭವಾಗಿ ಮತ್ತು ರುಚಿಕರವಾಗಿ ಅಣಬೆ ಪುಲಾವ್ ತಯಾರಿಸಲು ಬೇಕಾಗುವ ಸಾಮಗ್ರಿಗಳು ಮತ್ತು ಸರಳ ರೆಸಿಪಿ (Mushroom Pulao Recipe) ಇಲ್ಲಿದೆ.

ಅಣಬೆ ಪುಲಾವ್‌ಗೆ ಬೇಕಾಗುವ ಸಾಮಗ್ರಿಗಳು

• ಬಾಸ್ಮತಿ ಅಕ್ಕಿ
• ಅಣಬೆ (ಮಶ್ರೂಮ್)
• ಈರುಳ್ಳಿ
• ಟೊಮೆಟೊ
• ಹಸಿ ಬಟಾಣಿ
• ಶುಂಠಿ-ಬೆಳ್ಳುಳ್ಳಿ ಪೇಸ್ಟ್

ಮಸಾಲೆ ಪದಾರ್ಥಗಳು

• ಜೀರಿಗೆ
• ಪಲಾವ್ ಎಲೆ
• ಲವಂಗ
• ದಾಲ್ಚಿನ್ನಿ
• ಅರಿಶಿನ
• ಕೆಂಪು ಮೆಣಸಿನಕಾಯಿ ಪುಡಿ
• ಗರಂ ಮಸಾಲಾ
• ರುಚಿಗೆ ತಕ್ಕಷ್ಟು ಉಪ್ಪು
• ಎಣ್ಣೆ ಅಥವಾ ತುಪ್ಪ
• ಕೊತ್ತಂಬರಿ ಸೊಪ್ಪು
• ನೀರು

ಅಣಬೆ ಪುಲಾವ್ ತಯಾರಿಸುವ ವಿಧಾನ

- ಮೊದಲಿಗೆ, ಬಾಸ್ಮತಿ ಅಕ್ಕಿಯನ್ನು ಚೆನ್ನಾಗಿ ತೊಳೆದು, ಸುಮಾರು ಅರ್ಧ ಗಂಟೆಯವರೆಗೆ ನೀರಿನಲ್ಲಿ ನೆನೆಯಲು ಬಿಡಿ. ಹೀಗೆ ಮಾಡುವುದರಿಂದ ಪುಲಾವ್ ಅಕ್ಕಿ ಉದ್ದವಾಗಿ ಮತ್ತು ಉದುರು ಉದುರಾಗಿ ಮೂಡಿಬರುತ್ತದೆ.

- ಒಂದು ಕಡಾಯಿ ಅಥವಾ ಕುಕ್ಕರ್‌ನಲ್ಲಿ 2 ಚಮಚ ಎಣ್ಣೆ ಅಥವಾ ತುಪ್ಪವನ್ನು ಬಿಸಿ ಮಾಡಿ. ಎಣ್ಣೆ ಕಾದ ನಂತರ ಜೀರಿಗೆ, ಪಲಾವ್ ಎಲೆ, ಲವಂಗ, ಮತ್ತು ದಾಲ್ಚಿನ್ನಿ ಹಾಕಿ ಪರಿಮಳ ಬರುವವರೆಗೆ ಹುರಿಯಿರಿ.

- ನಂತರ ಹೆಚ್ಚಿದ ಈರುಳ್ಳಿ ಸೇರಿಸಿ, ಬಂಗಾರದ ಬಣ್ಣಕ್ಕೆ ತಿರುಗುವವರೆಗೆ ಬಾಡಿಸಿ. ಬಳಿಕ ಶುಂಠಿ-ಬೆಳ್ಳುಳ್ಳಿ ಪೇಸ್ಟ್ ಸೇರಿಸಿ ಹಸಿ ವಾಸನೆ ಹೋಗುವವರೆಗೆ ಹುರಿಯಿರಿ.

- ಈಗ ಹೆಚ್ಚಿದ ಅಣಬೆ ಮತ್ತು ಟೊಮೆಟೊಗಳನ್ನು ಹಾಕಿ ಮೃದುವಾಗುವವರೆಗೆ ಬೇಯಿಸಿ. ಅಣಬೆ ಸಂಪೂರ್ಣವಾಗಿ ನೀರು ಬಿಡುವವರೆಗೆ ಬೇಯಿಸುವುದು ಸೂಕ್ತ.

- ನಂತರ ಹಸಿ ಬಟಾಣಿ ಸೇರಿಸಿ. ಈಗ ಅರಿಶಿನ, ಮೆಣಸಿನಕಾಯಿ ಪುಡಿ ಮತ್ತು ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ ಎಲ್ಲವನ್ನೂ ಚೆನ್ನಾಗಿ ಮಿಕ್ಸ್ ಮಾಡಿ.

- ನೆನೆಸಿದ ಅಕ್ಕಿಯನ್ನು ನೀರಿನಿಂದ ಸೋಸಿ ಕಡಾಯಿಗೆ ಹಾಕಿ. ಅಕ್ಕಿ ಮುರಿಯದಂತೆ ನಿಧಾನವಾಗಿ ಮಸಾಲೆ ಜೊತೆ ಬೆರೆಸಿ. ನಂತರ 1 ಕಪ್ ಅಕ್ಕಿಗೆ 2 ಕಪ್ ಎಂಬ ಪ್ರಮಾಣದಲ್ಲಿ ನೀರನ್ನು ಸೇರಿಸಿ. ಹೆಚ್ಚುವರಿಯಾಗಿ, ಮೇಲೆ ಗರಂ ಮಸಾಲಾ ಉದುರಿಸಿ.

- ಪಾತ್ರೆಯನ್ನು ಮುಚ್ಚಿ ಅಕ್ಕಿ ಮೃದುವಾಗುವವರೆಗೆ ಕಡಿಮೆ ಉರಿಯಲ್ಲಿ ಬೇಯಿಸಿ. ಕುಕ್ಕರ್ ಬಳಸುವುದಾದರೆ, ಎರಡು ಸೀಟಿ ಬರುವವರೆಗೆ ಬೇಯಿಸಿ. ಪುಲಾವ್ ಸಿದ್ಧವಾದ ನಂತರ, ಅದರ ಮೇಲೆ ಸಣ್ಣಗೆ ಹೆಚ್ಚಿದ ಕೊತ್ತಂಬರಿ ಸೊಪ್ಪನ್ನು ಉದುರಿಸಿ ಅಲಂಕರಿಸಿ.

ರುಚಿ ಹೆಚ್ಚಿಸಲು ಈ ಟ್ರಿಕ್ ಬಳಸಿ

• ಎಣ್ಣೆಯ ಬದಲು ತುಪ್ಪ ಬಳಸಿದರೆ ಪುಲಾವ್ ಅದ್ಭುತವಾದ ಪರಿಮಳ ಮತ್ತು ರುಚಿ ನೀಡುತ್ತದೆ.

• ಒಗ್ಗರಣೆಗೆ ಸ್ವಲ್ಪ ಗೋಡಂಬಿಯನ್ನು ಸೇರಿಸಿದರೆ ಪುಲಾವ್‍ಗೆ ಶ್ರೀಮಂತ ರುಚಿ ದೊರೆಯುತ್ತದೆ.

• ಅಕ್ಕಿಯನ್ನು ಕನಿಷ್ಠ 20-30 ನಿಮಿಷ ನೆನೆಸುವುದರಿಂದ ಪುಲಾವಿನ ವಿನ್ಯಾಸ ಹೆಚ್ಚು ಉದುರು ಉದುರಾಗಿರುತ್ತದೆ.