ಹೆಸರುಬೇಳೆ ಬಳಸಿ ಪಕೋಡ ಮಾಡಿ ಸವಿಯಿರಿ! ಇಲ್ಲಿವೆ ಶೆಫ್ ಸ್ಟೈಲ್‌ನ ಈ 2 ಸಿಂಪಲ್ ವಿಧಾನಗಳು

ಶೆಫ್ ಸ್ಟೈಲ್‌ನಲ್ಲಿ ಮಾಡಿ ಗರಿಗರಿಯಾದ ಹೆಸರುಬೇಳೆ ಪಕೋಡಾ. ರುಚಿ ಮತ್ತು ಆರೋಗ್ಯದ ಸಮತೋಲನಕ್ಕೆ ಇಲ್ಲಿವೆ ಎರಡು ವಿಧಾನಗಳು. ಹೌದು, ಮಳೆಗಾಲವಿರಲಿ ಅಥವಾ ಚಳಿಗಾಲದ ಸಂಜೆಯಿರಲಿ, ಬಿಸಿ ಚಹಾದೊಂದಿಗೆ ಕುರುಕುಲಾದ ತಿಂಡಿ ಇದ್ದರೆ ಅದರ ಮಜವೇ ಬೇರೆ. ಹೆಸರುಬೇಳೆ ಪಕೋಡ (Moong Dal Pakoda) ಅಥವಾ ವಡೆಗಳು (Moong Dal Vada) ಎಲ್ಲರ ಅಚ್ಚುಮೆಚ್ಚಿನ ತಿಂಡಿಗಳಲ್ಲಿ ಸೇರಿವೆ.

ಈ ಲೇಖನದಲ್ಲಿ ಶೆಫ್‌ ಶೈಲಿಯ ಹೆಸರುಬೇಳೆ ಪಕೋಡಾವನ್ನು ಅತ್ಯಂತ ರುಚಿಯಾಗಿ ಹಾಗೂ ಆರೋಗ್ಯಕರವಾಗಿ ಮಾಡಲು ಎರಡು ವಿಶಿಷ್ಟ ವಿಧಾನಗಳನ್ನು ತಿಳಿಸಲಾಗಿದೆ. ಸಾಮಾನ್ಯವಾಗಿ ಹೆಸರುಬೇಳೆ ವಡೆಯನ್ನು (Moong Dal Pakora) ಎಣ್ಣೆಯಲ್ಲಿ ಕರಿದು ತಯಾರಿಸಲಾಗುತ್ತದೆ. ಆದರೆ, ಆರೋಗ್ಯ ಕಾಳಜಿ ಇರುವವರಿಗಾಗಿ ಈ ಒಂದು ಅದ್ಭುತ ಟ್ರಿಕ್ ಹಂಚಿಕೊಳ್ಳಲಾಗಿದೆ. 'ಪನಿಯಾರಂ' ಅಥವಾ 'ಪದ್ದು' ಪಾತ್ರೆಯಲ್ಲಿ ಅತಿ ಕಡಿಮೆ ಎಣ್ಣೆ ಬಳಸಿ ಪಕೋಡಾ ಮಾಡುವುದು. ಇದು ಸಾಂಪ್ರದಾಯಿಕ ವಿಧಾನಕ್ಕೆ ಆರೋಗ್ಯಕರ ಪರ್ಯಾಯ ಒದಗಿಸುತ್ತದೆ.

Photo Credit: ಸಂಗ್ರಹ ಚಿತ್ರ: ಇಂಟರ್ನೆಟ್

ಹೆಸರುಬೇಳೆ ಪಕೋಡಾಗೆ ಬೇಕಾಗುವ ಸಾಮಗ್ರಿಗಳು

• ಹೆಸರುಬೇಳೆ (ನೆನೆಸಿದ)
• ಹಸಿ ಮೆಣಸಿನಕಾಯಿ
• ಕೆಂಪು ಮೆಣಸಿನ ಪುಡಿ

ಮಸಾಲೆ ಪದಾರ್ಥಗಳು

• ಜೀರಿಗೆ
• ಧನಿಯಾ ಬೀಜ
• ಕಾಳುಮೆಣಸು
• ಕಸ್ತೂರಿ ಮೇಥಿ
• ಅಮಚೂರ್ ಪುಡಿ

ತರಕಾರಿಗಳು

• ಈರುಳ್ಳಿ
• ಶುಂಠಿ ತುರಿ
• ಕರಿಬೇವು
• ಪಾಲಕ್ ಸೊಪ್ಪು
• ಅರಿಶಿನ
• ಉಪ್ಪು
• ಅಡುಗೆ ಸೋಡಾ ಅಥವಾ ಈನೋ

Photo Credit: ಸಂಗ್ರಹ ಚಿತ್ರ: ಇಂಟರ್ನೆಟ್

ಹಿಟ್ಟು ತಯಾರಿಸುವ ವಿಧಾನ

- ಪಕೋಡಾಗಳು ಗರಿಗರಿಯಾಗಲು ಹಿಟ್ಟು ರುಬ್ಬುವ ವಿಧಾನ ಮುಖ್ಯ. ನೆನೆಸಿದ ಹೆಸರುಬೇಳೆಯನ್ನು ನೀರು ಸೋಸಿ, ರುಬ್ಬುವಾಗ ಸ್ವಲ್ಪವೂ ನೀರು ಸೇರಿಸಬೇಡಿ.

- ಬೇಳೆಯನ್ನು ಸಂಪೂರ್ಣ ನುಣ್ಣಗೆ ರುಬ್ಬದೆ ತರಿತರಿಯಾಗಿ ರುಬ್ಬಿಕೊಳ್ಳಿ. ಹೆಚ್ಚು ಗರಿಗರಿ ಅನುಭವಕ್ಕಾಗಿ, ಸ್ವಲ್ಪ ನೆನೆಸಿದ ಬೇಳೆಯನ್ನು ಹಾಗೆಯೇ ಹಿಟ್ಟಿನಲ್ಲಿ ಬೆರೆಸಿ. ಇದು ತಿನ್ನುವಾಗ ಕುರುಕುಲಾದ ಅನುಭವ ನೀಡುತ್ತದೆ.

- ಜೀರಿಗೆ, ಧನಿಯಾ ಮತ್ತು ಕಾಳುಮೆಣಸನ್ನು ಸ್ವಲ್ಪ ಜಜ್ಜಿ ಹಿಟ್ಟಿಗೆ ಸೇರಿಸಿ. ನಂತರ ಉಳಿದ ಎಲ್ಲಾ ಮಸಾಲೆ ಪದಾರ್ಥಗಳು, ಹೆಚ್ಚಿದ ತರಕಾರಗಳು ಮತ್ತು ರುಚಿಗೆ ತಕ್ಕಷ್ಟು ಉಪ್ಪು ಬೆರೆಸಿ ಗಟ್ಟಿಯಾದ ಹಿಟ್ಟು ಸಿದ್ಧಪಡಿಸಿ.

ಡೀಪ್ ಫ್ರೈ ಪಕೋಡಾ ವಿಧಾನ

- ಮೊದಲಿಗೆ ಸಾಂಪ್ರದಾಯಿಕ ಗರಿಗರಿ ಡೀಪ್ ಫ್ರೈ ಪಕೋಡಾ ವಿಧಾನ ತಿಳಿಯೋಣ. ಇದು ಎಲ್ಲರಿಗೂ ತಿಳಿದಿದೆ.

- ಇಲ್ಲಿ ಒಂದು ವಿಶಿಷ್ಟ 'ಡಬಲ್ ಫ್ರೈ' ತಂತ್ರವನ್ನು ಸೂಚಿಸಲಾಗಿದೆ. ಬಾಣಲೆಯಲ್ಲಿ ಎಣ್ಣೆ ಕಾಯಿಸಿ, ಹಿಟ್ಟನ್ನು ಸಣ್ಣ ಉಂಡೆಗಳಾಗಿ ಬಿಡಿ. ಮೊದಲು ಮಧ್ಯಮ ಉರಿಯಲ್ಲಿ ಪಕೋಡಾಗಳನ್ನು ಮೂರರಿಂದ ನಾಲ್ಕು ನಿಮಿಷ ಅರ್ಧಂಬರ್ಧ ಬೇಯಿಸಿ ಹೊರತೆಗೆಯಿರಿ.

- ಪಕೋಡಾ ಸೇವಿಸುವ ಸ್ವಲ್ಪ ಮುಂಚೆ, ಎಣ್ಣೆಯನ್ನು ಮತ್ತೊಮ್ಮೆ ಹೆಚ್ಚಿನ ಉರಿಯಲ್ಲಿ ಚೆನ್ನಾಗಿ ಕಾಯಿಸಿ, ಈ ಅರ್ಧ ಬೆಂದ ಪಕೋಡಾಗಳನ್ನು ಪುನಃ ಕರಿಯಿರಿ. ಇದರಿಂದ ಪಕೋಡಾಗಳು ಹೊರಗಿನಿಂದ ಅತಿ ಹೆಚ್ಚು ಗರಿಗರಿಯಾಗಿ ಮತ್ತು ಒಳಗಿನಿಂದ ಮೃದುವಾಗಿ ಉಳಿಯುತ್ತವೆ, ಅವುಗಳ ರುಚಿಯನ್ನು ಮತ್ತಷ್ಟು ಹೆಚ್ಚಿಸುತ್ತವೆ.

ಹೆಲ್ದಿ 'ಪನಿಯಾರಂ' (ಪದ್ದು) ಪಕೋಡಾ

- ಎಣ್ಣೆ ಕಡಿಮೆ ಬಳಸಲು ಬಯಸುವವರಿಗೆ ಇದು ಅತ್ಯುತ್ತಮ ಆಯ್ಕೆ. ಮೊದಲಿಗೆ, ಪನಿಯಾರಂ ಅಥವಾ ಪದ್ದುವಿನ ಪಾತ್ರೆಯ ಪ್ರತಿ ಗುಂಡಿಗೂ ಸ್ವಲ್ಪ ಎಣ್ಣೆ ಹಚ್ಚಿ, ಪಾತ್ರೆಯನ್ನು ಬಿಸಿ ಮಾಡಿ.

- ತಯಾರಿಸಿದ ಹಿಟ್ಟನ್ನು ಬಿಸಿ ಮಾಡಿದ ಗುಂಡಿಗಳಿಗೆ ಹಾಕಿ, ಮುಚ್ಚಳ ಮುಚ್ಚಿ, ಕಡಿಮೆ ಉರಿಯಲ್ಲಿ ಮೂರರಿಂದ ನಾಲ್ಕು ನಿಮಿಷ ಬೇಯಿಸಿ.

- ನಂತರ ಅವುಗಳನ್ನು ಮಗುಚಿ ಹಾಕಿ ಎರಡೂ ಬದಿ ಚೆನ್ನಾಗಿ ಬೇಯಿಸಿ. ಈ ವಿಧಾನವು ಪಕೋಡಾದ ವಿಶಿಷ್ಟ ರುಚಿ ನೀಡುವ ಜೊತೆಗೆ ಎಣ್ಣೆಯಂಶವನ್ನೂ ಕಡಿಮೆ ಮಾಡುತ್ತದೆ.

ಈ ಬಿಸಿಯಾದ ಹೆಸರುಬೇಳೆ ಪಕೋಡಾಗಳನ್ನು ಹಸಿರು ಪುದೀನಾ ಚಟ್ನಿ ಅಥವಾ ಖಾರವಾದ ಟೊಮೆಟೊ ಚಟ್ನಿಯೊಂದಿಗೆ ಸೇವಿಸಿ. ಈ ಶೈಲಿಯ ಹೆಸರುಬೇಳೆ ಪಕೋಡಾ ಅಥವಾ ವಡೆಗಳು ಮನೆಯವರೆಲ್ಲರ ಮನ ಗೆಲ್ಲುವಲ್ಲಿ ಖಂಡಿತ ಯಶಸ್ವಿಯಾಗುತ್ತವೆ.