ಹೋಟೆಲ್ ರುಚಿಯ ಅಕ್ಕಿ ರೊಟ್ಟಿ.. ಮುರಿಯದಂತೆ ಸಾಫ್ಟ್ ಆಗಿ ಮಾಡೋದು ಹೇಗೆ? ಹೊಸಬರಿಗೆ ಕೂಡ ಸುಲಭ

ಹೋಟೆಲ್ ಶೈಲಿಯ ಸಾಫ್ಟ್ ಅಕ್ಕಿ ರೊಟ್ಟಿ ಇನ್ಮುಂದೆ ನಿಮ್ಮ ಮನೆಯಲ್ಲೇ.. ಪರ್ಫೆಕ್ಟ್ ಅಕ್ಕಿ ರೊಟ್ಟಿ ಮಾಡುವ ರಹಸ್ಯ ಇಲ್ಲಿದೆ. ಹೌದು, ದಕ್ಷಿಣ ಭಾರತ, ಅದರಲ್ಲೂ ಕರ್ನಾಟಕದ ಮನೆಮಾತಾಗಿರುವ ಉಪಹಾರ ಅಂದರೆ ಅದು ಅಕ್ಕಿ ರೊಟ್ಟಿ. ರುಚಿಯ ಜೊತೆ ಆರೋಗ್ಯದ ಗುಣಗಳನ್ನೂ ಹೊಂದಿರುವ ಈ ಸಾಂಪ್ರದಾಯಿಕ ತಿಂಡಿ ತಯಾರಿಸುವುದು ನಿಜಕ್ಕೂ ಒಂದು ಕಲೆ. ಇತ್ತೀಚೆಗೆ, ಸಾಮಾಜಿಕ ಜಾಲತಾಣಗಳಲ್ಲಿ ಅಕ್ಕಿ ರೊಟ್ಟಿ (Akki Roti) ತಯಾರಿಸುವ ಅತಿ ಸುಲಭ ಮತ್ತು ರುಚಿಕರವಾದ ವಿಧಾನವೊಂದು ವ್ಯಾಪಕವಾಗಿ ವೈರಲ್ ಆಗಿದೆ.

ಅಕ್ಕಿ ಹಿಟ್ಟು, ಈರುಳ್ಳಿ ಹಾಗೂ ಇತರ ಪೋಷಕಾಂಶಭರಿತ ತರಕಾರಿಗಳನ್ನು ಉಪಯೋಗಿಸಿ ಮಾಡುವ ಅಕ್ಕಿ ರೊಟ್ಟಿ ಬೆಳಗಿನ ತಿಂಡಿ ಅಷ್ಟೇ ಅಲ್ಲದೆ, ಸಂಜೆಯ ಲಘು ಆಹಾರಕ್ಕೂ ಸೂಕ್ತವಾಗಿದೆ. ಹೋಟೆಲ್ ಶೈಲಿಯಲ್ಲೇ ಮನೆಯಲ್ಲಿ ಸುಲಭವಾಗಿ ಈ ರೊಟ್ಟಿ ತಯಾರಿಸಲು ಸಿದ್ಧತೆಗಳೇನು? ಮತ್ತು ಇದಕ್ಕೆ ಬೇಕಾದ ಅಗತ್ಯ ಸಾಮಗ್ರಿಗಳ ಪಟ್ಟಿ ಹಾಗೂ ಹಂತ-ಹಂತವಾದ (Akki Roti Recipe) ಪ್ರಕ್ರಿಯೆ ಇಲ್ಲಿದೆ.

ಅಕ್ಕಿ ರೊಟ್ಟಿಯು ಬರೀ ಮುಖ್ಯ ಪದಾರ್ಥ ಅಕ್ಕಿ ಹಿಟ್ಟಿನಿಂದಷ್ಟೇ ಅಲ್ಲದೆ, ಅದಕ್ಕೆ ಸೇರಿಸುವ ತರಕಾರಿಗಳಿಂದಲೂ ಪೌಷ್ಟಿಕಾಂಶಗಳ ಆಗರವಾಗಿ ರೂಪುಗೊಳ್ಳುತ್ತದೆ. ಕಡಿಮೆ ಎಣ್ಣೆ ಬಳಕೆ ಮತ್ತು ತರಕಾರಿಗಳ ಅಧಿಕ ನಾರಿನಂಶದಿಂದಾಗಿ, ತೂಕ ಇಳಿಸಲು ಬಯಸುವವರಿಗೆ ಇದು ಹೇಳಿ ಮಾಡಿಸಿದ ಆರೋಗ್ಯಕರ ಆಯ್ಕೆ. ಈ ರೆಸಿಪಿಯ ಪ್ರಮುಖ ಅಂಶವೆಂದರೆ, ರೊಟ್ಟಿಯನ್ನು ಇನ್ನಷ್ಟು ಮೃದು ಮತ್ತು ರುಚಿಯಾಗಿ ಮಾಡಲು ಅವರು ಕೆಲವು ಸರಳ ಸಲಹೆಗಳನ್ನು ನೀಡಲಾಗಿದೆ.

ಅಕ್ಕಿ ರೊಟ್ಟಿ ತಯಾರಿಸಲು ಅಗತ್ಯವಿರುವ ಸಾಮಗ್ರಿಗಳು

• ಅಕ್ಕಿ ಹಿಟ್ಟು - 1 ಕಪ್
• ಈರುಳ್ಳಿ - 1
• ಹಸಿ ಮೆಣಸಿನಕಾಯಿ - 1 / 2 (ಖಾರಕ್ಕೆ ತಕ್ಕಂತೆ)
• ಕ್ಯಾರೆಟ್ - ಸ್ವಲ್ಪ
• ಸೌತೆಕಾಯಿ - ಸ್ವಲ್ಪ
• ಎಲೆಕೋಸು - ಸ್ವಲ್ಪ
• ಕೊತ್ತಂಬರಿ ಸೊಪ್ಪು - ಸ್ವಲ್ಪ
• ಜೀರಿಗೆ - 1 ಚಮಚ
• ಉಪ್ಪು - ರುಚಿಗೆ ತಕ್ಕಷ್ಟು
• ನೀರು - ಹಿಟ್ಟು ಕಲಿಸಲು ಅಗತ್ಯವಿರುವಷ್ಟು
• ಎಣ್ಣೆ ಅಥವಾ ತುಪ್ಪ- ರೊಟ್ಟಿ ಸುಡಲು

ಅಕ್ಕಿ ರೊಟ್ಟಿ ತಯಾರಿಸುವ ಸುಲಭ ವಿಧಾನ

- ಮೊದಲಿಗೆ, ವಿಶಾಲವಾದ ಬೌಲ್ ಒಂದರಲ್ಲಿ ಒಂದು ಕಪ್ ಅಕ್ಕಿ ಹಿಟ್ಟನ್ನು ತೆಗೆದುಕೊಳ್ಳಿ. ಇದಕ್ಕೆ ಸಣ್ಣಗೆ ಹೆಚ್ಚಿದ ಈರುಳ್ಳಿ, ಹಸಿ ಮೆಣಸಿನಕಾಯಿ, ತುರಿದ ಕ್ಯಾರೆಟ್, ಸೌತೆಕಾಯಿ, ಎಲೆಕೋಸು ಹಾಗೂ ಕೊತ್ತಂಬರಿ ಸೊಪ್ಪನ್ನು ಸೇರಿಸಬೇಕು. ಈ ಎಲ್ಲಾ ತರಕಾರಿಗಳು ರೊಟ್ಟಿಗೆ ವಿಶಿಷ್ಟ ರುಚಿ ಮತ್ತು ಮೃದುತ್ವವನ್ನು ನೀಡುತ್ತವೆ.

- ಈಗ ಮಿಶ್ರಣಕ್ಕೆ ಜೀರಿಗೆ ಮತ್ತು ರುಚಿಗೆ ತಕ್ಕಷ್ಟು ಉಪ್ಪನ್ನು ಹಾಕಿ. ನಂತರ ಸ್ವಲ್ಪ ಸ್ವಲ್ಪವೇ ನೀರನ್ನು ಸೇರಿಸುತ್ತಾ ಹಿಟ್ಟನ್ನು ಚೆನ್ನಾಗಿ ಕಲಸಬೇಕು. ಮುಖ್ಯವಾಗಿ, ಅಕ್ಕಿ ರೊಟ್ಟಿಯ ಹಿಟ್ಟು ಚಪಾತಿ ಹಿಟ್ಟಿನಂತೆ ಗಟ್ಟಿಯಾಗಿರದೆ, ಕೈಯಿಂದ ಸುಲಭವಾಗಿ ತಟ್ಟಲು ಬರುವಷ್ಟು ಮೃದುವಾಗಿರಬೇಕು ಎಂಬುದನ್ನು ನೆನಪಿನಲ್ಲಿಡಿ.

- ಗ್ಯಾಸ್ ಒಲೆಯ ಮೇಲೆ ತವಾವನ್ನಿಟ್ಟು ಬಿಸಿ ಮಾಡಿ. ತವಾ ಚೆನ್ನಾಗಿ ಕಾದ ನಂತರ ಉರಿಯನ್ನು ಕಡಿಮೆ ಮಾಡಿಕೊಳ್ಳಿ. ಬಳಿಕ ಕೈಯನ್ನು ನೀರಿನಿಂದ ಒದ್ದೆ ಮಾಡಿಕೊಂಡು, ಕಲಸಿದ ಹಿಟ್ಟಿನ ಒಂದು ಭಾಗವನ್ನು ತೆಗೆದು ನೇರವಾಗಿ ತವಾವಿನ ಮೇಲೆ ಇರಿಸಿ, ವೃತ್ತಾಕಾರವಾಗಿ ಹಗುರವಾಗಿ ತಟ್ಟಬೇಕು. ಹೊಸದಾಗಿ ಮಾಡುವವರು ಬಟರ್ ಪೇಪರ್ ಅಥವಾ ಪ್ಲಾಸ್ಟಿಕ್ ಶೀಟ್ ಮೇಲೆ ತಟ್ಟಿ ನಂತರ ತವಾಕ್ಕೆ ವರ್ಗಾಯಿಸಬಹುದು.

- ರೊಟ್ಟಿಯ ಸುತ್ತಲೂ ಹಾಗೂ ಮಧ್ಯದಲ್ಲಿ ಸ್ವಲ್ಪ ಎಣ್ಣೆ ಅಥವಾ ತುಪ್ಪವನ್ನು ಹಾಕಿ. ಮಧ್ಯಮ ಉರಿಯಲ್ಲಿ ರೊಟ್ಟಿಯ ಎರಡೂ ಬದಿಗಳು ಹೊಂಬಣ್ಣ ಬರುವವರೆಗೆ ಚೆನ್ನಾಗಿ ಬೇಯಿಸಿ. ಒಂದು ವೇಳೆ ಹೆಚ್ಚು ಗರಿಗರಿಯಾದ ರೊಟ್ಟಿ ಬೇಕಿದ್ದರೆ, ಮತ್ತಷ್ಟು ಹೊತ್ತು ಬೇಯಿಸಿ ತೆಗೆಯಬಹುದು.

- ಬಿಸಿಬಿಸಿಯಾದ ಅಕ್ಕಿ ರೊಟ್ಟಿಯನ್ನು ರುಚಿಕರವಾದ ಕಾಯಿ ಚಟ್ನಿ, ಬೆಣ್ಣೆ, ಮೊಸರು ಅಥವಾ ಖಾರದ ಕೆಂಪು ಚಟ್ನಿಯೊಂದಿಗೆ ಬಡಿಸಿ. ಈ ಆರೋಗ್ಯಕರ ಉಪಹಾರವು ನಿಮ್ಮ ಹಸಿವನ್ನು ನೀಗಿಸುವುದಲ್ಲದೆ, ಇಡೀ ದಿನ ನಿಮ್ಮನ್ನು ಹುಮ್ಮಸ್ಸಿನಿಂದ ಇರಿಸುತ್ತದೆ.