ಅಕ್ಕಿ ನೆನೆಸುವಂತೆಯೇ ಇಲ್ಲ! ಸೌತೆಕಾಯಿಯಿಂದ ಮಾಡಿ ರುಚಿಕರ ಇಡ್ಲಿ.. ಹೊಟ್ಟೆ ತುಂಬುತ್ತೆ, ತೂಕ ಇಳಿಯುತ್ತೆ

ಅಕ್ಕಿ ನೆನೆಸುವ ಅವಶ್ಯಕತೆಯೇ ಇಲ್ಲ! ಇಡ್ಲಿಗೆ ಹೊಸ ಟ್ವಿಸ್ಟ್.. ಸೌತೆಕಾಯಿಯಿಂದ ಮಾಡಿ ರುಚಿಕರ ಇಡ್ಲಿ. ಮಕ್ಕಳಿಗೂ ದೊಡ್ಡವರಿಗೂ ಇಷ್ಟವಾಗುವ ಇಡ್ಲಿ ರೆಸಪಿಯ ಸೀಕ್ರೆಟ್ ವಿಧಾನ ಇಲ್ಲಿದೆ. ಹೌದು, ಬೆಳಗಿನ ಜಾವದ ಅವಸರದಲ್ಲಿ ಸಾಂಪ್ರದಾಯಿಕ ಅಕ್ಕಿ-ಬೇಳೆ ಇಡ್ಲಿ ತಯಾರಿಸುವುದು ಕೆಲವೊಮ್ಮೆ ಸವಾಲಿನ ಕೆಲಸ. ಅಕ್ಕಿ ನೆನೆಸಿ, ರುಬ್ಬಿ, ಹಿಟ್ಟು ಉದುರಲು (Fermentation) ಕಾಯುವ ಸಮಯದ ಕೊರತೆ ಹಲವರನ್ನು ಕಾಡುತ್ತದೆ.

ಇಂತಹ ಸಂದರ್ಭಗಳಲ್ಲಿ, ಪೌಷ್ಟಿಕಾಂಶ ಭರಿತ ಸೌತೆಕಾಯಿಯನ್ನು ಬಳಸಿಕೊಂಡು ಮಾಡುವ ದಿಢೀರ್ ಸೌತೆಕಾಯಿ ಇಡ್ಲಿ (Cucumber Idli) ಉತ್ತಮ ಮತ್ತು ಸುಲಭದ ಆಯ್ಕೆಯಾಗಿದೆ. ಈ ರೆಸಿಪಿ ನಿಮಗೆ ಆರೋಗ್ಯಕರ ಹಾಗೂ ರುಚಿಕರವಾದ ಇಡ್ಲಿಯನ್ನು ಕ್ಷಣಾರ್ಧದಲ್ಲಿ ಸಿದ್ಧಪಡಿಸಲು ನೆರವಾಗುತ್ತದೆ. ಸೌತೆಕಾಯಿಯನ್ನು ಸಾಮಾನ್ಯವಾಗಿ ಸಲಾಡ್ ಅಥವಾ ರಾಯತಕ್ಕೆ ಬಳಸುವ ನಾವು, ಅದರಿಂದ ಇಷ್ಟೊಂದು ಸ್ವಾದಿಷ್ಟವಾದ ಇಡ್ಲಿಯನ್ನು ಸಹ ಮಾಡಬಹುದು ಎಂಬುದು ಹಲವರಿಗೆ ಅಚ್ಚರಿಯ ವಿಷಯವಾಗಿರಬಹುದು. ಬನ್ನಿ, ಈ ಹೊಸ ಶೈಲಿಯ ಇಡ್ಲಿಯ ಬಗ್ಗೆ ಈಗ ತಿಳಿಯೋಣ.

ಸೌತೆಕಾಯಿಯ ಸಮೃದ್ಧ ನೀರಿನಂಶ ದೇಹಕ್ಕೆ ತಂಪು ನೀಡುತ್ತದೆ. ಈ ದಿಢೀರ್ ಸೌತೆಕಾಯಿ ಇಡ್ಲಿಯು ಜೀರ್ಣಕ್ರಿಯೆಗೆ ಸುಲಭವಾಗಿದ್ದು, ತೂಕ ಇಳಿಸಲು ಬಯಸುವವರಿಗೂ ಸೂಕ್ತವಾದ, ಪೌಷ್ಟಿಕಾಂಶ ಭರಿತ ಆಹಾರವಾಗಿದೆ. ಇಡ್ಲಿಗೆ ಬೇಕಾದ ಸಾಮಗ್ರಿಗಳು ಮತ್ತು ಮಾಡುವ ಸರಳ ವಿಧಾನ (Cucumber Idli recipe) ಇಲ್ಲಿದೆ.

ಇಡ್ಲಿಗೆ ಬೇಕಾದ ಸಾಮಗ್ರಿಗಳು

• ಸೌತೆಕಾಯಿ
• ರವೆ (ಚಿರೋಟಿ ಅಥವಾ ಉಪ್ಪಿಟ್ಟು ರವೆ)
• ಮೊಸರು
• ಹಸಿ ಶುಂಠಿ
• ಹಸಿ ಮೆಣಸಿನಕಾಯಿ
• ಕರಿಬೇವು
• ಕೊತ್ತಂಬರಿ ಸೊಪ್ಪು
• ಕಾಳುಮೆಣಸಿನ ಪುಡಿ
• ರುಚಿಗೆ ತಕ್ಕಷ್ಟು ಉಪ್ಪು
• ನೀರು
• ತೆಂಗಿನ ತುರಿ

ಒಗ್ಗರಣೆಗೆ

• ಎಣ್ಣೆ
• ಸಾಸಿವೆ
• ಉದ್ದಿನ ಬೇಳೆ
• ಕಡಲೆ ಬೇಳೆ
• ಇಂಗು
• ಒಣ ಮೆಣಸಿನಕಾಯಿ
• ಗೋಡಂಬಿ ಚೂರುಗಳು

ಸೌತೆಕಾಯಿ ಇಡ್ಲಿ ತಯಾರಿಸುವ ವಿಧಾನ

- ಮೊದಲಿಗೆ, ಸೌತೆಕಾಯಿಯನ್ನು ಚೆನ್ನಾಗಿ ತೊಳೆದು ಸಿಪ್ಪೆ ತೆಗೆಯಿರಿ. ನಂತರ ಅದನ್ನು ಸಣ್ಣದಾಗಿ ತುರಿದುಕೊಳ್ಳಿ. ತುರಿದ ಸೌತೆಕಾಯಿಯಲ್ಲಿ ಅತಿಯಾದ ನೀರಿನಂಶವಿದ್ದರೆ, ಅದನ್ನು ನಿಧಾನವಾಗಿ ಹಿಂಡಿ ಹೆಚ್ಚುವರಿ ನೀರನ್ನು ಸಂಗ್ರಹಿಸಿ. ಈ ನೀರನ್ನು ಹಿಟ್ಟು ಕಲಸುವಾಗ ಬಳಸಬಹುದು, ಆದ್ದರಿಂದ ಸುರಿಯಬೇಡಿ.

- ಒಂದು ಅಗಲವಾದ ಬೌಲ್‌ಗೆ ತುರಿದ ಸೌತೆಕಾಯಿ, ರವೆ, ಮೊಸರು ಮತ್ತು ಹಸಿ ತೆಂಗಿನ ತುರಿ ಸೇರಿಸಿ. ಕೊತ್ತಂಬರಿ ಸೊಪ್ಪು, ತುರಿದ ಶುಂಠಿ, ಹೆಚ್ಚಿದ ಮೆಣಸಿನಕಾಯಿ, ಕರಿಬೇವು, ಕಾಳುಮೆಣಸಿನ ಪುಡಿ ಹಾಗೂ ಉಪ್ಪು ಬೆರೆಸಿ.

- ಸಂಗ್ರಹಿಸಿದ ಸೌತೆಕಾಯಿ ನೀರು ಸೇರಿದಂತೆ ಒಂದು ಕಪ್ ನೀರು ಹಾಕಿ ಚೆನ್ನಾಗಿ ಕಲಸಿ. ಈ ಮಿಶ್ರಣವನ್ನು ಸುಮಾರು ಹದಿನೈದು ನಿಮಿಷ ನೆನೆಯಲು ಬಿಡಿ; ಇದರಿಂದ ರವೆಯು ನೀರನ್ನು ಹೀರಿ ಹಿಟ್ಟು ಸರಿಯಾದ ಹದಕ್ಕೆ ಬರುತ್ತದೆ.

- ಒಂದು ಸಣ್ಣ ಪ್ಯಾನ್‌ನಲ್ಲಿ ಎಣ್ಣೆ ಕಾಯಿಸಿ. ಅದಕ್ಕೆ ಸಾಸಿವೆ, ಇಂಗು, ಕಡಲೆ ಬೇಳೆ, ಉದ್ದಿನ ಬೇಳೆ, ಒಣ ಮೆಣಸಿನಕಾಯಿ ಹಾಕಿ. ಬೇಳೆಗಳು ಕೆಂಪಾದ ಮೇಲೆ ಗೋಡಂಬಿ ಚೂರುಗಳನ್ನು ಸೇರಿಸಿ ಹುರಿಯಿರಿ. ಈ ಘಮಘಮಿಸುವ ಒಗ್ಗರಣೆಯನ್ನು ಸಿದ್ಧಪಡಿಸಿದ ಇಡ್ಲಿ ಹಿಟ್ಟಿಗೆ ಸುರಿದು ಚೆನ್ನಾಗಿ ಮಿಕ್ಸ್ ಮಾಡಿ.

- ಇಡ್ಲಿ ಪಾತ್ರೆಯ ಪ್ಲೇಟ್‌ಗಳಿಗೆ ಎಣ್ಣೆ ಸವರಿ, ಸಿದ್ಧಪಡಿಸಿದ ಇಡ್ಲಿ ಮಿಶ್ರಣವನ್ನು ಸಾಚೆಯ ಗುಂಡಿಗಳಿಗೆ ಹಾಕಿ. ಪಾತ್ರೆಯಲ್ಲಿ ನೀರು ಕುದಿಯುತ್ತಿರುವಾಗ ಈ ಪ್ಲೇಟ್‌ಗಳನ್ನು ಒಳಗೆ ಇಟ್ಟು ಮುಚ್ಚಳ ಮುಚ್ಚಿ. ಸುಮಾರು ಹತ್ತು ನಿಮಿಷಗಳ ಕಾಲ ಹಬೆಯಲ್ಲಿ ಬೇಯಿಸಿ.

- ಇಡ್ಲಿ ಬೆಂದ ನಂತರ, ಹೊರತೆಗೆದು ಸ್ವಲ್ಪ ತಣ್ಣಗಾಗಲು ಬಿಡಿ. ನಂತರ ಚಮಚದ ಸಹಾಯದಿಂದ ಇಡ್ಲಿಗಳನ್ನು ಹೊರತೆಗೆಯಿರಿ. ಬಿಸಿಬಿಸಿ ಸೌತೆಕಾಯಿ ಇಡ್ಲಿಯನ್ನು ತೆಂಗಿನಕಾಯಿ ಚಟ್ನಿ ಅಥವಾ ಸಾಂಬಾರ್ ಜೊತೆ ಸವಿಯಲು ನೀಡಿ.

ಈ ಟ್ರಿಕ್ ನೆನಪಿರಲಿ!

* ಸೌತೆಕಾಯಿ ತುರಿಯನ್ನು ಹಿಂಡಿದ ನೀರನ್ನು ಇಡ್ಲಿ ಹಿಟ್ಟು ಕಲಸಲು ಉಪಯೋಗಿಸಿದಾಗ, ಇಡ್ಲಿ ತನ್ನ ನೈಸರ್ಗಿಕ ಸೌತೆಕಾಯಿ ರುಚಿಯನ್ನು ಉಳಿಸಿಕೊಳ್ಳುತ್ತದೆ.

* ಈ ಇಡ್ಲಿಗೆ ಅಡುಗೆ ಸೋಡಾ ಅಥವಾ ಈನೋ ಬಳಸುವ ಅಗತ್ಯವಿಲ್ಲ. ಏಕೆಂದರೆ, ರವೆ ಮತ್ತು ಸೌತೆಕಾಯಿಯ ಮಿಶ್ರಣವೇ ಇಡ್ಲಿಯನ್ನು ನೈಸರ್ಗಿಕವಾಗಿ ಮೃದುಗೊಳಿಸುತ್ತದೆ.

* ಮಕ್ಕಳಿಗೆ ನೀಡುವುದಾದರೆ, ಹಸಿ ಮೆಣಸಿನಕಾಯಿ ಪ್ರಮಾಣ ಕಡಿಮೆ ಮಾಡಿ, ಕಾಳುಮೆಣಸಿನ ಪುಡಿಯನ್ನು ಹೆಚ್ಚು ಬಳಸಬಹುದು.