ಅಕ್ಕಿ ಇಲ್ಲದ ಸೂಪರ್ ಇಡ್ಲಿ.. 100% ತೂಕ ಇಳಿಸಬಹುದು! ಮಧುಮೇಹಿಗಳಿಗೂ ಪರ್ಫೆಕ್ಟ್ ಈ ಇಡ್ಲಿ

ಬೆಳಗಿನ ಉಪಾಹಾರಕ್ಕೆ ಆರೋಗ್ಯಕರ ಹಾಗೂ ವಿಭಿನ್ನ ಆಯ್ಕೆ ಹುಡುಕುತ್ತಿರುವಿರಾ? ಅಕ್ಕಿ ಬಳಸದೆ, ಕೇವಲ ಹೆಸರು ಬೇಳೆಯಿಂದ ಸಿದ್ಧಪಡಿಸುವ ಹೆಸರು ಬೇಳೆ ಇಡ್ಲಿ (Moong Dal Idli) ಒಂದು ಉತ್ತಮ ಪರಿಹಾರ. ದಕ್ಷಿಣ ಭಾರತದ ಜನಪ್ರಿಯ ತಿನಿಸು ಇಡ್ಲಿ, ಸಾಮಾನ್ಯವಾಗಿ ಅಕ್ಕಿ ಮತ್ತು ಉದ್ದಿನ ಬೇಳೆಯಿಂದ ತಯಾರಾಗುತ್ತದೆ. ಆದರೆ, ತನ್ನದೇ ವಿಶಿಷ್ಟ ರುಚಿ ಹೊಂದಿರುವ ಈ ಹೆಸರು ಬೇಳೆ ಇಡ್ಲಿ, ಸಾಂಪ್ರದಾಯಿಕ ಇಡ್ಲಿಗಿಂತ ಭಿನ್ನವಾಗಿರುತ್ತದೆ.

ಹೆಸರು ಬೇಳೆ ಇಡ್ಲಿ ರುಚಿಕರ ಅಷ್ಟೇ ಅಲ್ಲ, ಸಾಂಪ್ರದಾಯಿಕ ಇಡ್ಲಿಗಿಂತಲೂ ಹೆಚ್ಚು ಪೌಷ್ಟಿಕವೂ ಹೌದು. ಇದು ಪ್ರೋಟೀನ್‌ನ ಉತ್ತಮ ಮೂಲವಾಗಿದ್ದು, ಸುಲಭವಾಗಿ ಜೀರ್ಣವಾಗುತ್ತದೆ. ತೂಕ ಇಳಿಸುವವರಿಗೆ ಮತ್ತು ಕಡಿಮೆ ಕಾರ್ಬೋಹೈಡ್ರೇಟ್ ಬೇಕೆನ್ನುವವರಿಗೆ ಇದು ಉತ್ತಮ. ಕ್ಯಾರೆಟ್ ಸೇರಿಸಿದರೆ ಪೌಷ್ಟಿಕಾಂಶದ ಮೌಲ್ಯ ಮತ್ತಷ್ಟು ಹೆಚ್ಚುತ್ತದೆ. ಹೆಸರು ಬೇಳೆ ಇಡ್ಲಿ ತಯಾರಿಸಲು ಬೇಕಾಗುವ ಪದಾರ್ಥಗಳು ಮತ್ತು ಸರಳ ವಿಧಾನ (Moong Dal Idli Recipe) ಇಲ್ಲಿದೆ.

ಹೆಸರು ಬೇಳೆ ಇಡ್ಲಿ ಏಕೆ ಉತ್ತಮ ಆಯ್ಕೆ?

ಹೆಸರು ಬೇಳೆ ಇಡ್ಲಿಯು ಸಂಪೂರ್ಣವಾಗಿ ಅಕ್ಕಿ ಇಲ್ಲದೆ ತಯಾರಿಸುವುದರಿಂದ, ಕಡಿಮೆ ಗ್ಲೈಸೆಮಿಕ್ ಸೂಚ್ಯಂಕ ಹೊಂದಿದೆ. ಇದು ಮಧುಮೇಹಿಗಳಿಗೆ ಉತ್ತಮವಾಗಿದೆ. ಹೆಸರು ಬೇಳೆ ಪ್ರೋಟೀನ್‌ಗಳಿಂದ ಸಮೃದ್ಧವಾಗಿದ್ದು, ಸ್ನಾಯುಗಳ ಬೆಳವಣಿಗೆಗೆ ಮತ್ತು ದೇಹದ ಒಟ್ಟಾರೆ ಆರೋಗ್ಯಕ್ಕೆ ನೆರವಾಗುತ್ತದೆ.

ಹೆಸರು ಬೇಳೆ ಸುಲಭವಾಗಿ ಜೀರ್ಣವಾಗುವ ಕಾಳುಗಳಲ್ಲಿ ಒಂದಾಗಿರುವುದರಿಂದ, ಇದನ್ನು ಬೆಳಗಿನ ಉಪಾಹಾರ ಅಥವಾ ರಾತ್ರಿ ಊಟಕ್ಕೂ ಸೇವಿಸಬಹುದು. ಒಗ್ಗರಣೆ ಮತ್ತು ಮೊಸರು ಸೇರಿಸುವುದರಿಂದ ಈ ಇಡ್ಲಿಗೆ ಸಾಂಪ್ರದಾಯಿಕ ಇಡ್ಲಿಗಿಂತ ಭಿನ್ನವಾದ, ಸಿಹಿ ಮತ್ತು ಖಾರದ ಸಮ್ಮಿಶ್ರ ರುಚಿ ದೊರೆಯುತ್ತದೆ.

ಹೆಸರು ಬೇಳೆ ಇಡ್ಲಿಗೆ ಬೇಕಾಗುವ ಪದಾರ್ಥಗಳು

• ಹೆಸರು ಬೇಳೆ
• ಕ್ಯಾರೆಟ್
• ಮೊಸರು
• ಶುಂಠಿ
• ಹಸಿ ಮೆಣಸಿನಕಾಯಿ
• ಕೊತ್ತಂಬರಿ ಸೊಪ್ಪು
• ಅರಿಶಿನ ಪುಡಿ
• ಸಾಸಿವೆ
• ಇಂಗು
• ಕರಿಬೇವು
• ಉಪ್ಪು
• ಅಡುಗೆ ಎಣ್ಣೆ
• ಸೋಡಾ

ಹೆಸರು ಬೇಳೆ ಇಡ್ಲಿ ತಯಾರಿಸುವ ವಿಧಾನ

- ಮೊದಲಿಗೆ ಒಂದು ಕಪ್ ಹೆಸರು ಬೇಳೆಯನ್ನು ಚೆನ್ನಾಗಿ ತೊಳೆದು ಸುಮಾರು ಎರಡು ಗಂಟೆ ನೆನೆಸಿಡಿ.

- ನಂತರ ನೀರು ಬಸಿದು, ಸ್ವಲ್ಪ ನೀರು ಸೇರಿಸಿ ನುಣ್ಣಗೆ ರುಬ್ಬುವ ಬದಲು ತರಿತರಿಯಾಗಿ ರುಬ್ಬಿಕೊಳ್ಳಿ. ಹೀಗೆ ಮಾಡುವುದರಿಂದ ಇಡ್ಲಿಗಳು ಹೆಚ್ಚು ಮೃದುವಾಗಿ ಬರುತ್ತವೆ.

- ರುಬ್ಬಿದ ಹಿಟ್ಟಿಗೆ ಮೊಸರು, ಶುಂಠಿ, ಹಸಿ ಮೆಣಸಿನಕಾಯಿ, ತುರಿದ ಕ್ಯಾರೆಟ್, ಮತ್ತು ಕತ್ತರಿಸಿದ ಕೊತ್ತಂಬರಿ ಸೊಪ್ಪು ಸೇರಿಸಿ ಚೆನ್ನಾಗಿ ಮಿಶ್ರಣ ಮಾಡಿ. ಹೆಚ್ಚು ಮೃದುವಾದ ಇಡ್ಲಿ ಬೇಕಿದ್ದರೆ ಬೇಕಿಂಗ್ ಸೋಡಾ ಸೇರಿಸಬಹುದು.

- ಒಗ್ಗರಣೆ ತಯಾರಿಸಲು, ಸಣ್ಣ ಬಾಣಲೆಯಲ್ಲಿ ಅಡುಗೆ ಎಣ್ಣೆ ಬಿಸಿ ಮಾಡಿ, ಸಾಸಿವೆ ಹಾಗೂ ಇಂಗು ಸೇರಿಸಿ.

- ಸಾಸಿವೆ ಚಿಟಪಟ ಅಂದಾಗ ಕರಿಬೇವು ಸೇರಿಸಿ ಒಲೆ ಆಫ್ ಮಾಡಿ. ಈ ಒಗ್ಗರಣೆಯನ್ನು ತಕ್ಷಣವೇ ಇಡ್ಲಿ ಹಿಟ್ಟಿಗೆ ಹಾಕಿ, ಚೆನ್ನಾಗಿ ಬೆರೆಸಿ. ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ ಮತ್ತೊಮ್ಮೆ ಮಿಶ್ರಣ ಮಾಡಿ.

- ಇಡ್ಲಿ ತಟ್ಟೆಗಳಿಗೆ ಎಣ್ಣೆ ಸವರಿ, ಸಿದ್ಧಪಡಿಸಿದ ಹಿಟ್ಟನ್ನು ಹಾಕಿ. ಇಡ್ಲಿ ಕುಕ್ಕರ್‌ನಲ್ಲಿ ಹತ್ತು ನಿಮಿಷ ಆವಿಯಲ್ಲಿ ಬೇಯಿಸಿ.

- ಇಡ್ಲಿ ಬೆಂದಿದೆಯೇ ಎಂದು ಪರೀಕ್ಷಿಸಲು ಟೂತ್‌ಪಿಕ್ ಅಥವಾ ಚಾಕು ಮಧ್ಯದಲ್ಲಿ ಚುಚ್ಚಿ ನೋಡಿ. ಸ್ವಚ್ಛವಾಗಿ ಹೊರಬಂದರೆ ಬೆಂದಿದೆ ಎಂದರ್ಥ.

- ಬಿಸಿಯಾದ ಈ ವಿಶೇಷ ಇಡ್ಲಿಯನ್ನು ನಿಮಗೆ ಇಷ್ಟವಾದ ಚಟ್ನಿ ಅಥವಾ ಸಾಂಬಾರ್‌ನೊಂದಿಗೆ ಸವಿಯಿರಿ. ಈ ರುಚಿಕರ ಇಡ್ಲಿಯ ವಿಶಿಷ್ಟ ಸವಿಯ ಅನುಭವ ಸದಾ ನಿಮ್ಮದಾಗುತ್ತದೆ.