ವಾವ್, ಹಸಿ ಮಾವಿನಕಾಯಿಯ ಸಲಾಡ್!

ಸಲಾಡ್ ಒಂದಿದ್ದರೆ ಸಾಕು ಊಟಕ್ಕೆ, ಹಪ್ಪಳ, ಸಂಡಿಗೆ ಇಲ್ಲದಿದ್ದರೂ ಊಟ ರುಚಿಯೆನಿಸುವುದು. ಅದರಲ್ಲೂ ಮಾವಿನಕಾಯಿಯ ಸಲಾಡ್ ಇದ್ದರೆ ಹೇಳಬೇಕೆ? ಒಂದು ಹಿಡಿ ಅನ್ನ ಹೆಚ್ಚೇ ಉಣ್ಣುತ್ತೇವೆ.

ಉಪ್ಪು, ಹುಳಿ, ಖಾರ ಮಿಶ್ರಿತ ಈ ಸಲಾಡ್ ತುಂಬಾ ರುಚಿಕರವಾಗಿದ್ದು ಮಾಡುವ ವಿಧಾನ ನೋಡಿ ಇಲ್ಲಿದೆ:

ಬೇಕಾಗುವ ಸಾಮಾಗ್ರಿಗಳು
* 1-2 ಹಸಿ ಮೆಣಸಿನಕಾಯಿ
* ಸ್ವಲ್ಪ ಕೊತ್ತಂಬರಿ ಸೊಪ್ಪು
* ಸ್ವಲ್ಪ ಖಾರದ ಪುಡಿ
* 1 ಹಸಿ ಮಾವಿನಕಾಯಿ
* 1 ಈರುಳ್ಳಿ
* ಚಿಟಿಕೆಯಷ್ಟು ಅರಿಶಿಣ
* ರುಚಿಗೆ ತಕ್ಕ ಉಪ್ಪು

ಮಾಡುವ ವಿಧಾನ:

* ಹಸಿ ಮಾವಿನಕಾಯಿಯನ್ನು ಚಿಕ್ಕ ತುಂಡುಗಳಾಗಿ ಕತ್ತರಿಸಿ.

* ನಂತರ ಈರುಳ್ಳಿಯನ್ನು ಚಿಕ್ಕದಾಗಿ ಕತ್ತರಿಸಿ ಹಾಕಿ, ನಂತರ ಅರಿಶಿಣ ಪುಡಿ ಹಾಗೂ ಸ್ವಲ್ಪ ಖಾರದ ಪುಡಿ ಹಾಕಿ , ಕತ್ತರಿಸಿದ ಹಸಿ ಮೆಣಸಿನಕಾಯಿ ಹಾಕಿ, ರುಚಿಗೆ ತುಪ್ಪ ಉಪ್ಪು ಸೇರಿಸಿ ಮಿಶ್ರಣ ಮಾಡಿ. ನಂತರ ಕೊತ್ತಂಬರಿ ಸೊಪ್ಪಿನಿಂದ ಅಲಂಕರಿಸಿದರೆ ಮಾವಿನಕಾಯಿಯ ಸಲಾಡ್ ರೆಡಿ.

ಸಲಹೆ:
* ಈ ಸಲಾಡ್ ಊಟ ಬಡಿಸುವ 2 ನಿಮಿಷ ಮುನ್ನ ತಯಾರಿಸಿ, ಇಲ್ಲದಿದ್ದರೆ ಮಾವಿನಕಾಯಿ ನೀಡು ಬಿಡುತ್ತದೆ.
* ಈ ಸಲಾಡ್ ಗೆ ಬೇಕಿದ್ದರೆ ಸ್ವಲ್ಪ ಸಕ್ಕರೆ ಸೇರಿಸಿ ಮಾಡಬಹುದು.
* ಮಾವಿನ ಕಾಯಿಯನ್ನು ಸಿಪ್ಪೆ ಸಹಿತ ಕತ್ತರಿಸಿ ಹಾಕಬಹುದು, ಸಿಪ್ಪೆ ಸ್ವಲ್ಪ ಕಹಿಯಾಗಿದ್ದರೆ ಸಿಪ್ಪೆ ತೆಗೆದು, ಅದರ ತಿರುಳಿನಿಂದ ಮಾತ್ರ ತಯಾರಿಸಬಹುದು.