ಈ ಚಟ್ನಿಯನ್ನು ತಿಂಗಳುಗಟ್ಟಲೆ ಇಟ್ಟರೂ ಹಾಳಾಗುವುದಿಲ್ಲ!

ಸಾಮಾನ್ಯವಾಗಿ ನಾವು ತಯಾರಿಸುವ ಚಟ್ನಿಯನ್ನು ತುಂಬಾ ಸಮಯದವರೆಗೆ ಇಡಲು ಸಾಧ್ಯವಿಲ್ಲ, ತೆಂಗಿನಕಾಯಿ ಚಟ್ನಿಯಾದರೆ ಒಂದೇ ದಿನದಲ್ಲಿ ಹಾಳಾಗುತ್ತದೆ, ಅದೇ ಒಣ ಮೆಣಸು ಹಾಗೂ ಹುಣಸೆ ಹಣ್ಣನ್ನು ಬಳಸಿ ಮಾಡಿದ ಚಟ್ನಿಯನ್ನು ಒಂದು ವಾರಗಳ ಇಡಬಹುದು. ಅದೇ ಕೊತ್ತಂಬರಿ ಸೊಪ್ಪಿನಿಂದ ಮಾಡಿದ ಚಟ್ನಿಯನ್ನು ತಿಂಗಳುಗಟ್ಟಲೆ ಇಡಬಹುದು!

ಕೊತ್ತಂಬರಿ ಸೊಪ್ಪಿನ ಚಟ್ನಿ ಆಂಧ್ರಶೈಲಿಯ ಅಡುಗೆಯಾಗಿದೆ. ಈ ಚಟ್ನಿಯನ್ನು ಅನ್ನದ ಜೊತೆ ತಿನ್ನಲು ಬಲುರುಚಿ. ಇದನ್ನು ಮಾಡುವ ವಿಧಾನ ನೋಡಿ ಇಲ್ಲಿದೆ:

ಬೇಕಾಗುವ ಪದಾರ್ಥಗಳು

ಕೊತ್ತಂಬರಿ ಸೊಪ್ಪು 200 ಗ್ರಾಂ
ಒಣ ಮಣಸು 5 (ಖಾರಕ್ಕೆ ತಕ್ಕಂತೆ)
ಸ್ವಲ್ಪ ಇಂಗು
ಸ್ವಲ್ಪ ಹುಣಸೆ ಹಣ್ಣು
ಎಣ್ಣೆ 1 ಚಮಚ
ಉದ್ದಿನ ಬೇಳೆ 2 ಚಮಚ
ಸಾಸಿವೆ 1 ಚಮಚ
ರುಚಿಗೆ ತಕ್ಕ ಉಪ್ಪು

ತಯಾರಿಸುವ ವಿಧಾನ

* ಬಾಣಲೆಗೆ ಒಂದು ಚಮಚ ಎಣ್ಣೆ ಹಾಕಿ ಉರಿ ಮೇಲೆ ಇಡಿ. ಎಣ್ಣೆ ಬಿಸಿಯಾದಾಗ ಒಣ ಮೆಣಸನ್ನು ಹಾಕಿ ಉರಿದು, ಒಣ ಮೆಣಸನ್ನು ತೆಗೆದು ಮತ್ತೊಂದು ಬಟ್ಟಲಿಗೆ ಹಾಕಿಡಿ.

* ಈಗ ಅದೇ ಎಣ್ಣೆಗೆ ಸಾಸಿವೆ, ಉದ್ದಿನ ಬೇಳೆ ಹಾಕಿ ಎರಡು ನಿಮಿಷ ಹುರಿದು, ಕೊತ್ತಂಬರಿ ಸೊಪ್ಪು ಮತ್ತು ಹುಣಸೆ ಹಣ್ಣು ಹಾಕಿ 5 ನಿಮಿಷ ಹುರಿಯಿರಿ. ಸೊಪ್ಪು ಸ್ವಲ್ಪ ಮೆತ್ತಗಾಗುವಾಗ ಸೌಟ್ ನಿಂದ ಕುಟ್ಟಿ ಪೇಸ್ಟ್ ರೀತಿ ಮಾಡಿ. ಉಪ್ಪು ಸೇರಿಸಿ, ನುಣ್ಣನೆ ಪೇಸ್ಟ್ ರೀತಿ ಆಗುವವರೆಗೆ ಕುಟ್ಟಿ, ನಂತರ ಇಂಗು ಸೇರಿಸಿ ಮಿಕ್ಸ್ ಮಾಡಿ. (ಇದನ್ನು ರುಬ್ಬಬಹುದು, ಆದರೆ ಸೌಟ್ ನಿಂದ ಕುಟ್ಟಿ ಪೇಸ್ಟ್ ರೀತಿ ಮಾಡಿದರೆ ರುಚಿ ಹೆಚ್ಚು).

* ಈಗ ಈ ಚಟ್ನಿಯನ್ನು ಗಾಳಿಯಾಡದ ಡಬ್ಬದಲ್ಲಿಟ್ಟು ಬೇಕಾದಾಗ ಬಳಸಿ.

ಈ ಚಟ್ನಿಯನ್ನು ತಿಂಗಳುಗಟ್ಟಲೆ ಇಟ್ಟು ಅನ್ನದ ಜೊತೆ ತಿನ್ನಬಹುದು.