ಊಟದ ರುಚಿ ಹೆಚ್ಚಿಸುವ ಶುಂಠಿ ತೊಕ್ಕು

ತೊಕ್ಕನ್ನು ಮಾವಿನ ತೊಕ್ಕು, ಹುಣಸೆ ತೊಕ್ಕು ಹೀಗೆ ಅನೇಕ ಬಗೆಯಲ್ಲಿ ತಯಾರಿಸಬಹುದಾಗಿದ್ದು, ಮಳೆಗಾಲದಲ್ಲಿ ಶುಂಠಿ ಹಾಕಿ ತಯಾರಿಸುವ ಆಹಾರ ತುಂಬಾ ಆರೋಗ್ಯಕರವಾಗಿರುವುದರಿಂದ ಇವತ್ತು ನಾವು ಶುಂಠಿ ತೊಕ್ಕು ಮಾಡುವ ವಿಧಾನ ತಿಳಿಯೋಣ:

ಬೇಕಾಗುವ ಸಾಮಗ್ರಿಗಳು
* 1 ಬಟ್ಟಲು ಶುಂಠಿ (ಸಣ್ಣಗೆ ಹೆಚ್ಚಿದ ಶುಂಠಿ)
* 2 ರಿಂದ 3 ದೊಡ್ಡ ಚಮಚ ಎಣ್ಣೆ
* ಸಾಸಿವೆ
* 2 ಹಸಿಮೆಣಸಿನಕಾಯಿ (ಕತ್ತರಿಸಿದ)
* 1 ಚಮಚ ಮೆಂತ್ಯದ ಪುಡಿ
* 2 ಚಮಚ ಖಾರದ ಪುಡಿ
* ಅರ್ಧ ಚಮಚ ಅರಿಶಿಣ ಪುಡಿ
* ಅರ್ಧ ಚಮಚ ಇಂಗು
* 1 ಬಟ್ಟಲು ಹುಣಸೆರಸ
* ರುಚಿಗೆ ತಕ್ಕಷ್ಟು ಉಪ್ಪು
* ಬೆಲ್ಲ
* ಕರಿಬೇವು

ತಯಾರಿಸುವ ವಿಧಾನ

1. ಬಾಣಲೆಗೆ 3 ದೊಡ್ಡ ಚಮಚ ಎಣ್ಣೆ ಹಾಕಿ ಅದು ಬಿಸಿಯಾದ ಮೇಲೆ ಸಾಸಿವೆ ಹಾಕಬೇಕು. ಸಾಸಿವೆ ಚಟಾಪಟ ಅಂದ ಮೇಲೆ ಸಣ್ಣಗೆ ಹೆಚ್ಚಿದ ಶುಂಠಿಯನ್ನು ಹಾಕಿ 2 ರಿಂದ 3 ನಿಮಿಷ ಮಾಡಬೇಕು.

2. ನಂತರ ಇದಕ್ಕೆ ಕತ್ತರಿಸಿದ 2 ಹಸಿಮೆಣಸಿನಕಾಯಿ, ಕರಿಬೇವು ಹಾಕಿ ಇದಕ್ಕೆ 1 ಚಮಚ ಮೆಂತ್ಯದ ಪುಡಿ, ಅರ್ಧ ಚಮಚ ಇಂಗು, ರುಚಿಗೆ ತಕ್ಕಷ್ಟು ಬೆಲ್ಲ, 1 ಬಟ್ಟಲು ಹುಣಸೆ ರಸ, 2 ಚಮಚ ಖಾರದ ಪುಡಿ, ಅರ್ಧ ಚಮಚ ಅರಿಶಿಣ ಪುಡಿ, ಹಾಕಿ ಚೆನ್ನಾಗಿ ಕುದಿಸಬೇಕು, ನಂತರ ರುಚಿಗೆ ತಕ್ಕ ಉಪ್ಪು ಹಾಕಿ ಸೌಟ್ ನಿಂದ ಆಗಾಗ ಆಡಿಸುತ್ತಾ ಇರಬೇಕು.

3. ಈ ರೀತಿ ಕುದಿಸಿದಾಗ ಎಣ್ಣೆ ಮೇಲೆ ತೇಲಲು ಪ್ರಾರಂಭಿಸುತ್ತದೆ. ಆಗ ಇದನ್ನು ಉರಿಯಿಂದ ತೆಗೆಯಬೇಕು.

ಈ ರೀತಿಯ ಶುಂಠಿ ತೊಕ್ಕನ್ನು ಅನ್ನ, ಚಪಾತಿ ಜೊತೆ ತಿನ್ನಲು ತುಂಬಾ ರುಚಿಕರವಾಗಿರುತ್ತದೆ.