ನಿಮ್ಮ ಮನೆಯಲ್ಲೆ ಮಾಡಿ ಘಮಘಮ ಸಾರಿನ ಪುಡಿ

ಪುಡಿಗಳು ಅಂಗಡಿಯಲ್ಲಿ ಸಿಗತ್ತೆ. ಆದರೆ, ಮನೆಯಲ್ಲೆ ಪುಡಿಯಿಂದ ಕುದಿಸಿದ ಸಾರಿನ ಗಮ್ಮತ್ತೇ ಬೇರೆ. ಇದರ ರುಚಿ ನಿಮಗೂ ಗೊತ್ತು. ಆದರೆ ಮೆಣಸಿನಕಾಯಿ, ದನಿಯ ಮುಂತಾದ ಪದಾರ್ಥ ಹುರಿದು ಕುಟ್ಟಿ ಪುಡಿ ಮಾಡಿ ಡಬ್ಬಕ್ಕೆ ತುಂಬಿಡುವುದಕ್ಕೆ ಮೈಬಗ್ಗಲ್ಲ. ಅಲ್ವಾ? ಕೆಲವರಿಗೆ ಸೊಂಟ ಬಗ್ಗತ್ತೆ ಆದರೆ ಟೈಮೇ ಸಿಗಲ್ಲಾರೀ..ಅಂತಾರೆ. ಓಕೆ. ಬರುವ ಶನಿ ಅಥವಾ ಭಾನುವಾರ ಟ್ರೈ ಮಾಡಿ.

ಬೇಕಾಗುವ ಸಾಮಗ್ರಿಗಳು:

1. ಕೊತ್ತಂಬರಿ ಬೀಜ1 ಕಪ್
2. 5-6 ಒಣ ಮೆಣಸಿನಕಾಯಿ
3. ಉದ್ದಿನ ಬೇಳೆ 1 ದೊಡ್ಡ ಚಮಚ
4. ತುರಿದ ಒಣ ಕೊಬ್ಬರಿ 1 ಕಪ್
5. ಚಕ್ಕೆ ಒಂದು ಚಿಕ್ಕ ತುಂಡು

ಮಾಡುವ ವಿಧಾನ:

1. ಕೊತ್ತಂಬರಿಬೀಜವನ್ನು 2 ನಿಮಿಷ ಮೈಕ್ರೋವೇವ್ ಅಥವಾ ಸ್ಟೌವ್ ಮೇಲೆ ಬಾಣಲೆಯಿಟ್ಟು ಹುರಿಯಬೇಕು.

2. ಕೆಂಪು ಮೆಣಸಿನಕಾಯಿ, ಚಕ್ಕೆ, ಕೊಬ್ಬರಿಯನ್ನು ಪ್ರತ್ಯೇಕವಾಗಿ ಹುರಿದಿಟ್ಟುಕೊಳ್ಳಬೇಕು.

3. ಉದ್ದಿನ ಬೇಳೆಯನ್ನು ಕಂದು ಬಣ್ಣ ಬರುವವರೆಗೆ ಹುರಿದುಕೊಳ್ಳಿ.

4. ನಂತರ ಇವೆಲ್ಲವನ್ನು ಮಿಕ್ಸಿಯಲ್ಲಿ ಹಾಕಿ ಸಣ್ಣಗೆ ಪುಡಿಯಾಗುವವರೆಗೆ ಗಡಗಡ ಮಾಡಿ. ಇದನ್ನು ಗಾಳಿ ನುಸುಳದಂತೆ ಡಬ್ಬದಲ್ಲಿ ಹಾಕಿ ಅದರ ಬಾಯನ್ನು ಮುಚ್ಚಿಡಿ. ಬೇಕೆಂದಾಗ ಬಳಸಿ ಸಾರು ಮಾಡಿ.