ಖಾರ ಹುಳಿ ಸಂಗಮದ ಹಸಿಮೆಣಸಿನಕಾಯಿ ತೊಕ್ಕು

ಬೇಕಾಗುವ ಸಾಮಾನುಗಳು

ಖಾರ ತಳಿಯ ಹಸಿ ಮೆಣಸಿನಕಾಯಿ 100 ಗ್ರಾಂ
ದೊಡ್ಡ ನಿಂಬೆಹಣ್ಣಿನ ಗಾತ್ರದಷ್ಟು ಹುಣಿಸೇಹಣ್ಣು
ಮೂರು ಟೀ ಚಮಚ ಪುಡಿ ಮಾಡಿದ ಬೆಲ್ಲ
ಸಾಸಿವೆ ಎರಡು ಚಮಚ, ಎಣ್ಣೆ ನಾಲಕ್ಕು ಚಮಚ
ಕೊತ್ತಂಬರಿ ಸೊಪ್ಪು ಒಂದು ಕಟ್ಟು
ರುಚಿಗೆ ಹೊಂದುವಷ್ಟು ಕಲ್ಲುಪ್ಪು, ಚಿಟಿಕೆ ಇಂಗು

ತಯಾರಿಕೆ ವಿಧಾನ

ತವದ ಮೇಲೆ ಅಥವಾ ಬಾಣಲೆಗೆ ಎಣ್ಣೆ ಹಾಕಿ ಕಾದ ನಂತರ ಸಾಸಿವೆ ಹಾಕಿರಿ. ಕುದುರೆ ಪಟಾಕಿ ಥರ ಸಿಡಿಸಿಡಿಸಿಡಿ ಎನ್ನಲಿ. ಇಡೀ ಹಸಿಮೆಣಸಿನಕಾಯಿಗಳನ್ನು ಹಾಕಿ ಚೆನ್ನಾಗಿ ಬಾಡಿಸಿ ನಂತರ ಅದಕ್ಕೆ ಬೆಲ್ಲ, ಕೊತ್ತಂಬರಿ ಸೊಪ್ಪು, ಹುಣಿಸೇಹಣ್ಣು ಮತ್ತು ಉಪ್ಪನ್ನು ಹಾಕಿ ಮತ್ತೆ ಸ್ವಲ್ಪ ಬಾಡಿಸಿ. ಕೊನೆಯಲ್ಲಿ ಇಂಗಿನ ಪುಟು ಹಾಕಿ ಚಮಚೆಯಲ್ಲಿ ಬೆರೆಸಿರಿ.

ಇದನ್ನು ಚೂರೂ ಕೂಡ ನೀರು ಹಾಕದೆ ತರಿತರಿಯಾಗಿ ಮಿಕ್ಸಿಯಲ್ಲಿ ರುಬ್ಬಿಕೊಳ್ಳಿ. ಖಾಲಿಯಾಗಿರುವ ಹಾರ್ಲಿಕ್ಸ್ ಬಾಟಲಿಯಲ್ಲಿ ಅಥವಾ ಗಾಳಿಯಾಡದ ಏರ್ ಟೈಟ್ ಸ್ಟೀಲ್ ಡಬ್ಬದಲ್ಲಿ ತುಂಬಿ ತಂಪುಪೆಟ್ಟಿಗೆಯಲ್ಲಿ ಇಡಿ. ಎಂಟು ದಿನ ಕಳೆದರೆ ತೊಕ್ಕು ಎಕ್ಸ್ ಪೈರ್ ಆಗುತ್ತದೆ. ಗಮನವಿರಲಿ.

ನಾಲಿಗೆ ಕೆಟ್ಟಿದೆ, ಅಡುಗೆ ಖಾರ ಇಲ್ಲ ಎಂದು ಗೊಣಗುವವರು ಈ ತೊಕ್ಕಿನ ಬಾಟಲಿಯನ್ನು ಊಟದ ತಟ್ಟೆಯ ಪಕ್ಕ ಇಟ್ಟುಕೊಳ್ಳುವುದು ಕ್ಷೇಮ. ದೋಸೆ, ರೊಟ್ಟಿ, ಚಪಾತಿ ಮತ್ತು ಮೊಸರನ್ನದೊಂದಿಗೆ ಚಪ್ಪರಿಸಿಕೊಂಡು ನೆಂಚಿಕೊಳ್ಳಲು ಚೆನ್ನಾಗಿರುತ್ತದೆ. ಕಚೇರಿಗೆ ನಿತ್ಯ ಊಟದ ಡಬ್ಬ ತೆಗೆದುಕೊಂಡು ಹೋಗುವವರು ಒಂದು ಸಣ್ಣ ಡಬ್ಬಿಯಲ್ಲಿ ತೊಕ್ಕನ್ನು ಹಾಕಿ ಟೇಬಲ್ ಡ್ರಾಯರ್ ನಲ್ಲಿ ಇಟ್ಟುಕೊಂಡು ತಿಂದರೆ ಸರಿ. ಖಾರ ನೆತ್ತಿಗೇರಿದರೆ ಊಟವಾದ ನಂತರ ತೇಲಿಬರುವ ಮಂಪರು ನಿದ್ದೆ ತಪ್ಪುತ್ತದೆ.