ಹುರಿಗಡಲೆ ಚಟ್ನಿ

ಬೇಕಾಗುವ ಪದಾರ್ಥಗಳು :

ಹುರಿಗಡಲೆ - 100 ಗ್ರಾಂ
ಈರುಳ್ಳಿ - 2
ನಿಂಬೆಹಣ್ಣು - ಅರ್ಧ ಹೋಳು
ಸಕ್ಕರೆ 2 ಚಮಚ
ಒಣ ಮೆಣಸಿನ ಕಾಯಿ ಪುಡಿ - 4 ಚಮಚ
ಜೀರಿಗೆ - 2 ಚಮಚ
ಸಾಸಿವೆ - 2 ಚಮಚ
ಕೊತ್ತಂಬರಿ ಸೊಪ್ಪು 1 ಪುಟ್ಟ ಕಟ್ಟು
ಕರಿ ಬೇವು - 4 ಕಡ್ಡಿ
ಒಂದು ಚಿಟಿಕೆಯಷ್ಟು ಅರಿಶಿನ
ರುಚಿಗೆ ತಕ್ಕಷ್ಟು ಉಪ್ಪು.

ಮಾಡುವ ವಿಧಾನ : ಮೊದಲು ಹುರಿಗಡಲೆಯನ್ನು ಮಿಕ್ಸಿಗೆ ಹಾಕಿ ಪುಡಿ ಮಾಡಿಟ್ಟುಕೊಳ್ಳಿ. ಈರುಳ್ಳಿ ಕೊತ್ತಂಬರಿ, ಕರಿಬೇವನ್ನು ಸಣ್ಣಗೆ ಹೆಚ್ಚಿಟ್ಟುಕೊಳ್ಳಿ, ಹುರಿಗಡಲೆ ಪುಡಿ ಒಂದು ಬಟ್ಟಲಿದ್ದರೆ, ಎರಡು ಬಟ್ಟಲು ನೀರು ಹಾಕಿ ಕಲಸಿಟ್ಟುಕೊಳ್ಳಬೇಕು.

ಒಲೆಯ ಮೇಲೆ ಒಂದು ಪಾತ್ರೆಯಲ್ಲಿ ಖಾದ್ಯ ತೈಲ ಹಾಕಿ ಕಾಯಲು ಇಡಿ. ಎಣ್ಣೆ ಕಾದ ನಂತರ, ಈರುಳ್ಳಿ ಹಾಕಿ. ಈರುಳ್ಳಿ ಎಣ್ಣೆಯಲ್ಲಿ ಕುದಿಯುವಾಗ ಕರಿಬೇವು, ಕೊತ್ತಂಬರಿ ಸೊಪ್ಪು ಹಾಕಿ. ಆನಂತರ ಅದಕ್ಕೆ ಸ್ವಲ್ಪ ಅರಿಶಿನ ಪುಡಿ ಹಾಕಿ, ಮೇಲೆ ಮೆಣಸಿನಕಾಯಿ ಪುಡಿ, ಸಕ್ಕರೆ, ಉಪ್ಪು ಹಾಕಿ ಸ್ವಲ್ಪ ನೀರು ಹಾಕಿ ಕುದಿಸಿ ಕೆಳಗಿಡಿ. ಒಗ್ಗರಣೆ ತಣ್ಣಗಾದ ಮೇಲೆ ನೀರಿನಲ್ಲಿ ಕಲೆಸಿಟ್ಟ ಹುರಿಗಡಲೆ ಹಿಟ್ಟಿಗೆ ಹಾಕಿ ಜೊತೆಗೆ ನಿಂಬೆ ರಸ ಹಿಂಡಿ ಚೆನ್ನಾಗಿ ಕಲೆಸಿ. ಚಟ್ನಿ ರೆಡಿ.