ಪಾಕಶಾಲೆ: ತರಕಾರಿ ಕುರ್ಮಾದ ಮರ್ಮಾ

ಕರ್ನಾಟಕದಲ್ಲಿ ಈಗ ಮಳೆರಾಯನ ಪ್ರತಾಪ ಅಧಿಕವಾಗಿ ಕಚಗುಳಿ ಇಡುವಂಥಾ ತಣ್ಣನೆ ಚಳಿ ಅನುಭವವೂ ಇದೆ. ಚಳಿಯನ್ನು ನೀಗಿಕೊಳ್ಳಲು, ಮೈಯನ್ನು ಬೆಚ್ಚಗಾಗಿಸಿಕೊಳ್ಳಲು ಬಿಸಿಬಿಸಿ ರೊಟ್ಟಿ, ಚಪಾತಿಯೊಂದಿಗೆ ತರಕಾರಿ ಕುರ್ಮಾ ಜೊತೆಗಿದ್ದರೆ ಸಾಕು.

*ಶ್ರೀರಕ್ಷಾ, ಬೆಂಗಳೂರು

ಬೇಕಾಗುವ ಪದಾರ್ಥಗಳು:
ಆಲೂಗಡ್ಡೆ: 3 (ಸಿಪ್ಪೆ ತೆಗೆಯಬೇಕು)
ಬಟಾಣಿ: ¼ ಕಪ್ಪು
ಕ್ಯಾರೆಟ್: 2
ಹಸಿ ಹುರುಳಿಕಾಯಿ: 10 (ಸಣ್ಣಗೆ ಹೆಚ್ಚಿಕೊಳ್ಳಬೇಕು)
ಉಪ್ಪು: ರುಚಿಗೆ ತಕ್ಕಷ್ಟು
ಮೊಸರು:½ ಕಪ್ಪು
ಯಾವುದಾದರೂ ಹಿಟ್ಟು: 1ಟೇಬಲ್ ಚಮಚ
ಬೆಣ್ಣೆ: 1 ಟೇಬಲ್ ಚಮಚ

ರುಬ್ಬಿಕೊಳ್ಳುವ ಪದಾರ್ಥಗಳು:
ಕೊಬ್ಬರಿ: ¼ ಕಪ್ಪು
ಗಸಗಸೆ: 1 ಟೇಬಲ್ ಚಮಚ
ಬೇಯಿಸದ ಗೋಡಂಬಿ: 8
ಈರುಳ್ಳಿ: ½
ಬೆಳ್ಳುಳ್ಳಿ: 1
ಹಸಿ ಮೆಣಸಿನಕಾಯಿ: 3 (ಖಾರ ಹೆಚ್ಚ್ಚಿಗೆ ಬೇಕೆನ್ನುವವರು ಇನ್ನೊಂದು)
ಕೊತ್ತಂಬರಿ ಸೊಪ್ಪು: ½ ಹಿಡಿ

ರುಬ್ಬಿಕೊಳ್ಳಬೇಕಾದ ಪದಾರ್ಥಗಳನ್ನೆಲ್ಲಾ ಕೆಲ ನಿಮಿಷಗಳ ಕಾಲ ನೀರಿನಲ್ಲಿ ನೆನಸಿ ನಂತರ ಮಿಕ್ಸರ್ ಅಥವಾ ಒರಳು ಕಲ್ಲಿನಲ್ಲಿ ನುಣ್ಣಗೆ ರುಬ್ಬಿಕೊಳ್ಳಿ.

ಕುರ್ಮಾ ಮಾಡುವ ವಿಧಾನ:
ಎಲ್ಲ ತರಕಾರಿಗಳನ್ನು ಸಮಗಾತ್ರದಲ್ಲಿ ಹೆಚ್ಚಿಕೊಳ್ಳಿ. ಒಂದು ಕಪ್ ನೀರಿನಲ್ಲಿ ಎಲ್ಲ ತರಕಾರಿಗಳನ್ನು ಚೆನ್ನಾಗಿ ಕುದಿಸಿ. ಉಪ್ಪು, ಹಿಟ್ಟು, ರುಬ್ಬಿಕೊಂಡ ಮಸಾಲೆ ಮತ್ತು ಮೊಸರನ್ನು ಸೇರಿಸಿ ಚೆನ್ನಾಗಿ ಕಲಸಿ. ಸಣ್ಣ ಉರಿಯಲ್ಲಿ ಕೆಲ ನಿಮಿಷಗಳ ಕಾಲ ಹಾಗೆ ಇಡಿ. ತರಕಾರಿಗಳೆಲ್ಲಾ ಚೆನ್ನಾಗಿ ಬೆಂದು ಮಸಾಲೆ ವಾಸನೆ ಮೂಗಿಗೆ ಅಡರುತ್ತಿದ್ದಂತೆ ಬೆಣ್ಣೆಯನ್ನು ಸೇರಿಸಿ. ಒಂದೆರಡು ನಿಮಿಷ ಬೇಯಿಸಿದ ನಂತರ ತರಕಾರಿ ಕುರ್ಮಾ ಸಿದ್ಧವಾದಂತೆ. ಇದನ್ನು ಅನ್ನ, ಚಪಾತಿ ಅಥವಾ ರೊಟ್ಟಿಯೊಂದಿಗೆ ನಂಜಿಕೊಂಡು ತಿನ್ನಬಹುದು. ತರಕಾರಿ ಪಲ್ಯಗಳ ಬದಲಾಗಿ ಕುರ್ಮಾವನ್ನೂ ಬಳಸಬಹುದು.