ಚಳಿಗಾಲದಲ್ಲಿ ಒಮ್ಮೆ ಈ ರೀತಿ ಚಿಕನ್ ಪೆಪ್ಪರ್ ರಸಂ ಮಾಡಿ! ಶೀತ, ನೆಗಡಿ ಮಾಯ.. ರುಚಿ ಬೇರೆಯೇ ಲೆವೆಲ್

ಚಳಿಗಾಲದಲ್ಲಿ ಒಮ್ಮೆ ಈ ರೀತಿ ರಸಂ ಮಾಡಿ ನೋಡಿ! ರುಚಿ ಬೇರೆಯೇ ಲೆವೆಲ್ ನಲ್ಲಿರುತ್ತದೆ. ಹೌದು, ಪ್ರಸ್ತುತ ಚಳಿಗಾಲ ಶುರುವಾಗಿದೆ. ಕೆಲವು ಸ್ಥಳಗಳಲ್ಲಿ ಮಳೆ ಸುರಿಯುತ್ತಿದ್ದು, ಹವಾಮಾನ ತೀವ್ರ ಶೀತದಿಂದ ಕೂಡಿದೆ. ಜೊತೆಗೆ, ಮಂಜು ಸಹ ದಟ್ಟವಾಗಿ ಆವರಿಸುತ್ತಿದೆ. ಇಂತಹ ಸಮಯದಲ್ಲಿ ಅನೇಕರು ಶೀತದ ಸಮಸ್ಯೆಯಿಂದ ಬಳಲುವ ಸಾಧ್ಯತೆಯಿದೆ. ನಿಮ್ಮ ಮನೆಯಲ್ಲೂ ಯಾರಾದರೂ ಶೀತದಿಂದ ತೊಂದರೆ ಅನುಭವಿಸುತ್ತಿದ್ದರೆ, ಅವರಿಗೆ ಚಿಕನ್ ಪೆಪ್ಪರ್ ರಸಂ (chicken pepper rasam) ಮಾಡಿ ಕೊಡಿ.

ಇದು ಮಳೆಯ ವಾತಾವರಣದಲ್ಲಿ ದೇಹಕ್ಕೆ ಆಹ್ಲಾದಕರ ಅನುಭವ ನೀಡುತ್ತದೆ. ಅಲ್ಲದೆ, ಶೀತದಿಂದ ಉತ್ತಮ ಪರಿಹಾರ ಒದಗಿಸುತ್ತದೆ. ಬಿಸಿಬಿಸಿ ಅನ್ನದೊಂದಿಗೆ ಚಿಕನ್ ಪೆಪ್ಪರ್ ರಸಂ ಸೇವಿಸಿದರೆ ಅದರ ರುಚಿ ಅದ್ಭುತವಾಗಿರುತ್ತದೆ. ಈ ಚಿಕನ್ ಪೆಪ್ಪರ್ ರಸಂ ತಯಾರಿಸುವುದು ಕೂಡ ಸುಲಭ. ಈ ಲೇಖನದಲ್ಲಿ ನಾವು ಚಿಕನ್ ಪೆಪ್ಪರ್ ರಸಂ (chicken pepper rasam recipe) ಹೇಗೆ ಮಾಡಬೇಕು ಎಂಬುವುದನ್ನು ವಿವರವಾಗಿ ತಿಳಿಸಿದ್ದೇವೆ. ಇದನ್ನು ನೀವು ಒಮ್ಮೆ ಮನೆಯಲ್ಲಿ ತಯಾರಿಸಿ, ರುಚಿ ನೋಡಿ.

Photo Credit: ಸಂಗ್ರಹ ಚಿತ್ರ

ಚಿಕನ್ ಪೆಪ್ಪರ್ ರಸಂಗೆ ಬೇಕಾಗುವ ಸಾಮಗ್ರಿಗಳು

ರಸಂ ಪುಡಿಗೆ ಬೇಕಾಗುವ ಸಾಮಗ್ರಿಗಳು

• ಮೆಣಸು - 1 ಚಮಚ
• ಜೀರಿಗೆ - 1 ಚಮಚ
• ಕೊತ್ತಂಬರಿ - 1 ಚಮಚ
• ಕರಿಬೇವು - 5 ರಿಂದ 6 ಎಲೆಗಳು

ಟೊಮ್ಯಾಟೋ ಪೇಸ್ಟ್‌ಗೆ ಬೇಕಾಗುವ ಸಾಮಗ್ರಿಗಳು

• ಹಣ್ಣಾದ ಟೊಮ್ಯಾಟೊ - 3
• ಅರಿಶಿನ ಪುಡಿ - 1/2 ಚಮಚ.

ರಸಂಗೆ ಬೇಕಾಗುವ ಸಾಮಗ್ರಿಗಳು

• ಚಿಕನ್ - 250 ಗ್ರಾಂ
• ಎಣ್ಣೆ - 4 ಚಮಚ
• ಜೀರಿಗೆ - 1 ಚಮಚ
• ಬೆಳ್ಳುಳ್ಳಿ - 7 ರಿಂದ 8 ಎಸಳು
• ಒಣ ಮೆಣಸಿನಕಾಯಿ - 1
• ಹಸಿಮೆಣಸಿನಕಾಯಿ - 2
• ಕರಿಬೇವಿನ ಎಲೆಗಳು - 2 ಕಟ್ಟು
• ಅರಿಶಿನ ಪುಡಿ - 1/2 ಚಮಚ
• ಉಪ್ಪು - ರುಚಿಗೆ ತಕ್ಕಷ್ಟು
• ಹುಣಸೆಹಣ್ಣಿನ ರಸ - 1/2 ಕಪ್
• ನೀರು - 3 ಕಪ್
• ಕೊತ್ತಂಬರಿ ಸೊಪ್ಪು - ಸ್ವಲ್ಪ

Photo Credit: ಸಂಗ್ರಹ ಚಿತ್ರ

ಚಿಕನ್ ಪೆಪ್ಪರ್ ರಸಂ ಮಾಡುವ ಸರಳ ವಿಧಾನ

- ಮೊದಲಿಗೆ, ಬಾಣಲೆಯನ್ನು ಬಿಸಿ ಮಾಡಿ, ಅದಕ್ಕೆ ಮೆಣಸು, ಜೀರಿಗೆ, ಕೊತ್ತಂಬರಿ ಮತ್ತು ಕರಿಬೇವಿನ ಎಲೆಗಳನ್ನು ಹಾಕಿ ಚೆನ್ನಾಗಿ ಹುರಿಯಿರಿ.

- ನಂತರ ಇದನ್ನು ತಣ್ಣಗಾಗಿಸಿ, ಮಿಕ್ಸರ್ ಜಾರ್‌ಗೆ ಹಾಕಿ ಪುಡಿ ಮಾಡಿ. ಒಂದು ತಟ್ಟೆಯಲ್ಲಿ ಹಾಕಿ ಪಕ್ಕಕ್ಕಿಡಿ.

- ಬಳಿಕ ಅದೇ ಮಿಕ್ಸರ್ ಜಾರ್‌ನಲ್ಲಿ, ಟೊಮ್ಯಾಟೋಗಳನ್ನು ತುಂಡುಗಳಾಗಿ ಕತ್ತರಿಸಿ ಹಾಕಿ, ಅರಿಶಿನ ಪುಡಿ ಸೇರಿಸಿ ನುಣ್ಣಗೆ ರುಬ್ಬಿ ಪಕ್ಕಕ್ಕೆ ಇಡಿ.

- ಈಗ ಒಂದು ಬಾಣಲೆಯಲ್ಲಿ ಎಣ್ಣೆ ಬಿಸಿ ಮಾಡಿ. ಅದಕ್ಕೆ ಜೀರಿಗೆ ಮತ್ತು ಕರಿಬೇವಿನ ಎಲೆಗಳನ್ನು ಹಾಕಿ ಒಗ್ಗರಣೆ ನೀಡಿ. ಅದಕ್ಕೆ ಜಜ್ಜಿದ ಬೆಳ್ಳುಳ್ಳಿ ಮತ್ತು ಒಣ ಮೆಣಸಿನಕಾಯಿ ಸೇರಿಸಿ ಹುರಿಯಿರಿ.

- ಇದಾದ ನಂತರ ಚಿಕನ್ ತುಂಡುಗಳನ್ನು ಸೇರಿಸಿ ಚೆನ್ನಾಗಿ ಹುರಿಯಿರಿ. ಹಾಗೆಯೇ ಅರಿಶಿನ ಪುಡಿ, ರುಚಿಗೆ ತಕ್ಕಷ್ಟು ಉಪ್ಪು ಮತ್ತು ಹುರಿದು ಪುಡಿ ಮಾಡಿದ ರಸಂ ಪುಡಿಯನ್ನು ಸೇರಿಸಿ 2-3 ನಿಮಿಷಗಳ ಕಾಲ ಕಲಸಿ.

- ಅದಕ್ಕೆ ರುಬ್ಬಿದ ಟೊಮ್ಯಾಟೋ ಪೇಸ್ಟ್ ಮತ್ತು ಹುಣಸೆಹಣ್ಣಿನ ರಸವನ್ನು ಸೇರಿಸಿ, 3 ಕಪ್ ನೀರು ಹಾಕಿ ಕುದಿಸಿ. ಕುದಿ ಬಂದ ನಂತರ ಮುಚ್ಚಳ ಮುಚ್ಚಿ 10 ನಿಮಿಷಗಳ ಕಾಲ ಕಡಿಮೆ ಉರಿಯಲ್ಲಿ ಚಿಕನ್ ಚೆನ್ನಾಗಿ ಬೇಯಲು ಬಿಡಿ.

- 10 ನಿಮಿಷಗಳ ನಂತರ ಮುಚ್ಚಳ ತೆಗೆದು, ಕೊತ್ತಂಬರಿ ಸೊಪ್ಪನ್ನು ಚಿಮುಕಿಸಿ ಕಲಸಿ ಇಳಿಸಿ. ಈಗ ರುಚಿಕರವಾದ ಚಿಕನ್ ಮಿಲಗು ಅಥವಾ ಪೆಪ್ಪರ್ ರಸಂ (chicken milagu rasam) ಸಿದ್ಧ.