ನೇಪಾಳಿ ಸ್ಪೆಷಲ್ ಚಿಕನ್ ಚೋಲಿಯಾ.. ಮಸಾಲೆ ಪ್ರಿಯರಿಗೆ ಹಬ್ಬ! ಮಾಡೋದು ಹೇಗೆ?

ರೆಸ್ಟೋರೆಂಟ್ ಸ್ಟೈಲ್ ಚಿಕನ್ ಚೋಲಿಯಾ! ಪಾರ್ಟಿಗಳಿಗೆ, ಸ್ನ್ಯಾಕ್ಸ್‌ಗೆ ಈ ಚಿಕನ್ ಡಿಶ್ ಮಾಡಿ ನೋಡಿ. ಮಸಾಲೆ ಪ್ರಿಯರಿಗೆ ಇದೊಂದು ಅದ್ಭುತ ಟ್ರೀಟ್. ಹೌದು, ಚೋಲಿಯಾ ಎಂಬುದು ನೇಪಾಳದ ನೆವಾರಿ ಸಮುದಾಯದ ಅತ್ಯಂತ ಜನಪ್ರಿಯ (Nepali dish) ಮತ್ತು ಸಾಂಪ್ರದಾಯಿಕ ಅಡುಗೆ. ಅದರಲ್ಲೂ ಚಿಕನ್ ಚೋಲಿಯಾ (chicken cholia) ತನ್ನ ವಿಶಿಷ್ಟ ರುಚಿಯಿಂದಾಗಿ ವಿಶ್ವದಾದ್ಯಂತ ಜನಪ್ರಿಯತೆಯನ್ನು ಗಳಿಸಿದೆ. ಇದು ಕೇವಲ ಒಂದು ಖಾದ್ಯವಾಗಿರದೆ, ನೇಪಾಳಿ ಸಂಸ್ಕೃತಿಯ ಪ್ರಮುಖ ಭಾಗವಾಗಿದೆ.

ಚಳಿಗಾಲದಲ್ಲಿ ತುಸು ಖಾರವಾದ ಮತ್ತು ಬಿಸಿಬಿಸಿಯಾದ ಏನನ್ನಾದರೂ ಸವಿಯಬೇಕೆನಿಸಿದಾಗ ಚಿಕನ್ ಚೋಲಿಯಾ ಅತ್ಯುತ್ತಮ ಆಯ್ಕೆಯಾಗಿದೆ. ಇದನ್ನು ಅನ್ನಕ್ಕಿಂತ ಹೆಚ್ಚಾಗಿ ಅಕ್ಕಿ ಅವಲಕ್ಕಿ ಅಥವಾ ಇನ್ನಿತರ ಲಘು ಪಾನೀಯಗಳೊಂದಿಗೆ ಸೈಡ್ ಡಿಶ್ ಆಗಿ ಸವಿಯಲು ಬಹಳ ಸೂಕ್ತವಾಗಿದೆ. ಮನೆಯಲ್ಲೇ ರೆಸ್ಟೋರೆಂಟ್ ಶೈಲಿಯ ಚಿಕನ್ ಚೋಲಿಯಾವನ್ನು (chicken cholia recipe) ಸುಲಭವಾಗಿ ಹೇಗೆ ತಯಾರಿಸಬೇಕು ಎಂಬುದನ್ನು ಇಲ್ಲಿ ತಿಳಿಸಲಾಗಿದೆ.

ಚಿಕನ್ ಚೋಲಿಯಾ ತಯಾರಿಸಲು ಬೇಕಾದ ಸಾಮಗ್ರಿಗಳು

• ಮೂಳೆರಹಿತ ಚಿಕನ್ - 500 ಗ್ರಾಂ
• ಅರಿಶಿನ ಪುಡಿ - 1 ಸ್ಪೂನ್
• ಶುಂಠಿ - 2 ಇಂಚು
• ಬೆಳ್ಳುಳ್ಳಿ - 8 ಎಸಳು
• ಹಸಿಮೆಣಸು - 4
• ಟೊಮ್ಯಾಟೊ - 2
• ಖಾರದ ಪುಡಿ - 2 ಸ್ಪೂನ್
• ಜೀರಿಗೆ ಪುಡಿ - 1 ಸ್ಪೂನ್
• ಧನಿಯಾ ಪುಡಿ - 1 ಸ್ಪೂನ್
• ನಿಂಬೆ ರಸ - 2 ಸ್ಪೂನ್
• ಕೊತ್ತಂಬರಿ ಸೊಪ್ಪು - ಸ್ವಲ್ಪ
• ಉಪ್ಪು - ರುಚಿಗೆ ತಕ್ಕಷ್ಟು
• ಟಿಮೂರ್ - ಅರ್ಧ ಸ್ಪೂನ್ (ನೇಪಾಳಿ ಅಡುಗೆಗಳಲ್ಲಿ ಬಳಸುವ ವಿಶೇಷ ಮಸಾಲೆ)
• ಸಾಸಿವೆ ಎಣ್ಣೆ - 4 ಸ್ಪೂನ್
• ಮೆಂತ್ಯ - 1 ಸ್ಪೂನ್
• ಒಣಮೆಣಸು - 2
• ಅರಿಶಿನ ಪುಡಿ - ಒಂದು ಚಿಟಿಕೆ

ಚಿಕನ್ ಚೋಲಿಯಾ ತಯಾರಿಸುವ ವಿಧಾನ

- ಮೊದಲು ಚಿಕನ್ ಅನ್ನು ಚೆನ್ನಾಗಿ ತೊಳೆದು ನೀರು ಹೋಗುವಂತೆ ನೋಡಿಕೊಳ್ಳಿ. ಇದಕ್ಕೆ ಸ್ವಲ್ಪ ಉಪ್ಪು ಮತ್ತು ಅರಿಶಿನ ಪುಡಿ ಹಚ್ಚಿ ಸುಮಾರು 15 ನಿಮಿಷಗಳ ಕಾಲ ಪಕ್ಕಕ್ಕಿಡಿ. ಚೋಲಿಯಾದ ನಿಜವಾದ ರುಚಿ ಬರಲು ಚಿಕನ್ ಅನ್ನು ಬೇಯಿಸುವುದಕ್ಕಿಂತ ಗ್ರಿಲ್ ಮಾಡುವುದು ಮುಖ್ಯ.

- ನಿಮ್ಮ ಬಳಿ ಬಾರ್ಬೆಕ್ಯೂ ಗ್ರಿಲ್ ಇದ್ದರೆ, ಕಲ್ಲಿದ್ದಲಿನ ಮೇಲೆ ಚಿಕನ್ ತುಂಡುಗಳನ್ನು ಎರಡೂ ಬದಿಗಳಲ್ಲಿ ಕಪ್ಪಾದ ಗುರುತುಗಳು ಬರುವವರೆಗೆ ಮತ್ತು ಚೆನ್ನಾಗಿ ಬೆಂದು ಸ್ಮೂಕಿ ಪರಿಮಳ ಬರುವವರೆಗೆ ಹುರಿಯಿರಿ.

- ಗ್ರಿಲ್ ಇಲ್ಲದಿದ್ದರೆ, ಒಂದು ಪ್ಯಾನ್‌ನಲ್ಲಿ ಸ್ವಲ್ಪ ಎಣ್ಣೆ ಹಾಕಿ ಹೆಚ್ಚಿನ ಉರಿಯಲ್ಲಿ ಚಿಕನ್ ತುಂಡುಗಳನ್ನು ಹುರಿಯಿರಿ, ಅದು ಹೊಗೆಯಾಡುವಂತಾಗಬೇಕು.

- ನಂತರ ಹುರಿದ ಚಿಕನ್ ಅನ್ನು ಸಣ್ಣ ತುಂಡುಗಳಾಗಿ ಕತ್ತರಿಸಿ ಒಂದು ದೊಡ್ಡ ಪಾತ್ರೆಯಲ್ಲಿ ಹಾಕಿ.

- ಟೊಮ್ಯಾಟೊಗಳನ್ನು ನೇರವಾಗಿ ಒಲೆಯ ಮೇಲೆ ಸುಟ್ಟುಕೊಳ್ಳಿ. ಸಿಪ್ಪೆ ಕಪ್ಪಾದ ನಂತರ ತೆಗೆದು, ಟೊಮ್ಯಾಟೊವನ್ನು ನುಣ್ಣಗೆ ಪೇಸ್ಟ್ ಮಾಡಿ ಅಥವಾ ಸಣ್ಣ ತುಂಡುಗಳಾಗಿ ಕತ್ತರಿಸಿ. ಈ ಟೊಮ್ಯಾಟೊ ಪೇಸ್ಟ್ ಅಥವಾ ತುಂಡುಗಳನ್ನು ಚಿಕನ್ ಮಿಶ್ರಣಕ್ಕೆ ಸೇರಿಸಿ.

- ಈಗ ಚಿಕನ್ ಪಾತ್ರೆಯಲ್ಲಿ ಸಣ್ಣಗೆ ಹೆಚ್ಚಿದ ಶುಂಠಿ, ಬೆಳ್ಳುಳ್ಳಿ, ಹಸಿಮೆಣಸು, ಹುರಿದ ಜೀರಿಗೆ ಪುಡಿ, ಧನಿಯಾ ಪುಡಿ, ಖಾರದ ಪುಡಿ, ಉಪ್ಪು, ಟಿಮೂರ್ ಅಥವಾ ಕಾಳುಮೆಣಸಿನ ಪುಡಿ ಸೇರಿಸಿ. ನಿಂಬೆ ರಸವನ್ನು ಹಿಂಡಿ, ಎಲ್ಲವನ್ನೂ ಚೆನ್ನಾಗಿ ಮಿಕ್ಸ್ ಮಾಡಿ. ಈಗ ಒಗ್ಗರಣೆ ತಯಾರಿಸಿ.

- ಒಗ್ಗರಣೆಗಾಗಿ ಸಣ್ಣ ಕಡಾಯಿಯಲ್ಲಿ ಸಾಸಿವೆ ಎಣ್ಣೆಯನ್ನು ಹೊಗೆ ಬರುವವರೆಗೆ ಕಾಯಿಸಿ. ಎಣ್ಣೆ ಚೆನ್ನಾಗಿ ಕಾದ ನಂತರ ಉರಿ ಕಡಿಮೆ ಮಾಡಿ ಮೆಂತ್ಯೆ ಹಾಕಿ.

- ಮೆಂತ್ಯೆ ಚೆನ್ನಾಗಿ ಕಪ್ಪಾಗಿ ಹುರಿದ ನಂತರ ಒಣಮೆಣಸು ಮತ್ತು ಒಂದು ಚಿಟಿಕೆ ಅರಿಶಿನ ಪುಡಿ ಸೇರಿಸಿ. ತಕ್ಷಣವೇ ಈ ಬಿಸಿ ಒಗ್ಗರಣೆಯನ್ನು ಮಸಾಲೆ ಬೆರೆಸಿದ ಚಿಕನ್ ಮಿಶ್ರಣದ ಮೇಲೆ ಸುರಿಯಿರಿ.

- ಒಗ್ಗರಣೆ ಹಾಕಿದ ತಕ್ಷಣ ಸೌಟು ಬಳಸಿ ಸಂಪೂರ್ಣ ಮಿಶ್ರಣವನ್ನು ಚೆನ್ನಾಗಿ ಕಲಸಿ. ಕೊನೆಯಲ್ಲಿ ಸಣ್ಣಗೆ ಹೆಚ್ಚಿದ ಕೊತ್ತಂಬರಿ ಸೊಪ್ಪಿನಿಂದ ಅಲಂಕರಿಸಿ.

- ಈ ಚಿಕನ್ ಚೋಲಿಯಾವನ್ನು (Chicken Choliya) ತಕ್ಷಣವೇ ಸವಿಯಬಹುದು ಅಥವಾ ಮಸಾಲೆಗಳು ಚೆನ್ನಾಗಿ ಹಿಡಿಯಲು ಒಂದು ಗಂಟೆ ಕಾಲ ಪಕ್ಕಕ್ಕಿಡಬಹುದು.