ಬಿಹಾರಿ ಶೈಲಿಯ ಬದನೆ ಬಡಿ ಮಾಡಿ ನೋಡಿ! ಅನ್ನ, ಚಪಾತಿಗೆ ಕಿಕ್ ನೀಡುತ್ತೆ.. ಅಡುಗೆ ಬರಲ್ಲ ಅನ್ನೋರು ಮಾಡಬಹುದು!

ಒಮ್ಮೆ ಈ ರೀತಿ ಬಿಹಾರಿ ಶೈಲಿಯ ಬದನೆಕಾಯಿ ಕರಿ ಮಾಡಿ ನೋಡಿ! ಅನ್ನ, ಚಪಾತಿಗೆ ಸೂಪರ್ ಕಾಂಬಿನೇಷನ್. ಬದನೆಕಾಯಿ ಇಷ್ಟಪಡದವರೂ ಈ ಮಸಾಲಾ ಕರಿ ಸವಿದು ಫಿದಾ ಆಗ್ತಾರೆ. ಮಾಡುವ ಸುಲಭ ವಿಧಾನ ಇಲ್ಲಿದೆ. ಹೌದು, ಲಿಟ್ಟಿ-ಚೋಖಾ ಮಾತ್ರವಲ್ಲ, ಬಿಹಾರದ ಈ ಬೈಂಗನ್ ಬಡಿ ರೆಸಿಪಿ ಕೂಡ ಅಷ್ಟೇ ಫೇಮಸ್. ಬದನೆಕಾಯಿ ಮತ್ತು ಉದ್ದಿನಬೇಳೆ ಸಂಡಿಗೆಯಿಂದ ಮಾಡುವ ಈ ರುಚಿಕರ ಕರಿ (Brinjal Curry) ಬಗ್ಗೆ ಇಲ್ಲಿದೆ ಮಾಹಿತಿ.

'ಬೈಂಗನ್ ಬಡಿ' ಎನ್ನುವುದು ಬದನೆಕಾಯಿ ಹಾಗೂ ಬಿಸಿಲಿನಲ್ಲಿ ಒಣಗಿಸಿದ ಉದ್ದಿನಬೇಳೆ ಸಂಡಿಗೆಯ (ಬಡಿ) ಜೊತೆ ಸಿದ್ಧಪಡಿಸುವಂತಹ ವಿಶೇಷ ಮಸಾಲೆಯುಕ್ತ ಖಾದ್ಯ. ಸಾಮಾನ್ಯವಾಗಿ ಬದನೆಕಾಯಿ ಇಷ್ಟಪಡದವರು ಸಹ ಈ ಬಿಹಾರಿ ಶೈಲಿಯ ಮಸಾಲೆಯ ರುಚಿಗೆ ಮಾರುಹೋಗುವುದು ಖಚಿತ. ಬಿಹಾರದ ಪಾಕಪದ್ಧತಿಯಲ್ಲಿ ಸಾಸಿವೆ ಎಣ್ಣೆ ಮತ್ತು ಸಾಸಿವೆ ಮಸಾಲೆಗೆ ಹೆಚ್ಚಿನ ಪ್ರಾಮುಖ್ಯತೆ ನೀಡಲಾಗುತ್ತದೆ. ಇದು ಈ ಕರಿಗೆ ಅದ್ಭುತ ರುಚಿಯನ್ನು ನೀಡುತ್ತದೆ.

Photo Credit: ಸಂಗ್ರಹ ಚಿತ್ರ: ಇಂಟರ್ನೆಟ್

ಈ ಸ್ವಾದಿಷ್ಟಕರ 'ಬೈಂಗನ್ ಬಡಿ' ಕರಿಯು ಬಿಸಿಬಿಸಿ ಅನ್ನ ಅಥವಾ ರೊಟ್ಟಿಯೊಂದಿಗೆ ಅತ್ಯಂತ ರುಚಿಕರವಾಗಿರುತ್ತೆ. ಈ ರೆಸಿಪಿ ತಯಾರಿಸಲು ಬೇಕಾಗುವ ಅಗತ್ಯ ಸಾಮಗ್ರಿಗಳು ಮತ್ತು ತಯಾರಿಸುವ ಸರಳ ವಿಧಾನ (Bihari Style Traditional Baingan Badi Recipe) ತಿಳಿಯೋಣ ಬನ್ನಿ.

ಬದನೆಕಾಯಿ ಕರಿಗೆ ಬೇಕಾಗುವ ಸಾಮಗ್ರಿಗಳು

• ಬದನೆಕಾಯಿ
• ಉದ್ದಿನಬೇಳೆ ಸಂಡಿಗೆ
• ಸಾಸಿವೆ ಎಣ್ಣೆ
• ಸಾಸಿವೆ ಕಾಳು
• ಜೀರಿಗೆ
• ಕಾಳುಮೆಣಸು
• ಬೆಳ್ಳುಳ್ಳಿ
• ಹಸಿ ಮೆಣಸಿನಕಾಯಿ ಅಥವಾ ಒಣಮೆಣಸಿನಕಾಯಿ
• ಈರುಳ್ಳಿ
• ಟೊಮೆಟೊ
• ಅರಿಶಿನ ಪುಡಿ
• ಮೆಂತ್ಯ ಕಾಳು
• ಉಪ್ಪು

ಬದನೆಕಾಯಿ ಕರಿ ತಯಾರಿಸುವ ವಿಧಾನ

- ಮೊದಲಿಗೆ, ಬದನೆಕಾಯಿಯನ್ನು ಮಧ್ಯಮ ಗಾತ್ರದ ತುಂಡುಗಳಾಗಿ ಕತ್ತರಿಸಿ ನೀರಿನಲ್ಲಿ ನೆನೆಸಿಡಿ.ಇದು ಬದನೆಕಾಯಿ ಕಪ್ಪಾಗುವುದನ್ನು ತಡೆಯುತ್ತದೆ.

- ನಂತರ, ಒಂದು ಬಾಣಲೆಯಲ್ಲಿ ಸ್ವಲ್ಪ ಸಾಸಿವೆ ಎಣ್ಣೆ ಹಾಕಿ ಉದ್ದಿನಬೇಳೆ ಸಂಡಿಗೆಯನ್ನು ಹದವಾಗಿ ಹುರಿಯಿರಿ. ಹುರಿದ ಸಂಡಿಗೆಯನ್ನು ಉಗುರು ಬೆಚ್ಚಗಿನ ನೀರಿನಲ್ಲಿ ಸುಮಾರು ಹತ್ತು ನಿಮಿಷಗಳ ಕಾಲ ನೆನೆಸಿಡಿ, ಇದರಿಂದ ಅದು ಮೃದುವಾಗಿ ಬೇಗ ಬೇಯಲು ಸಹಾಯವಾಗುತ್ತದೆ.

- ಅದೇ ಬಾಣಲೆಗೆ ಮತ್ತಷ್ಟು ಎಣ್ಣೆ ಮತ್ತು ಮೇಥಿ ಕಾಳುಗಳನ್ನು ಸೇರಿಸಿ. ಮೇಥಿ ಕಾಳು ಸಿಡಿದ ನಂತರ, ಕತ್ತರಿಸಿದ ಬದನೆಕಾಯಿ ತುಂಡುಗಳನ್ನು ಹಾಕಿ ಸುಮಾರು ಅರ್ಧ ಬೇಯುವವರೆಗೆ ಹುರಿಯಿರಿ.

- ಬದನೆಕಾಯಿ ಅರ್ಧ ಬೆಂದ ನಂತರ, ಅವುಗಳನ್ನು ಪ್ರತ್ಯೇಕ ತಟ್ಟೆಗೆ ತೆಗೆದಿಟ್ಟುಕೊಳ್ಳಬೇಕು.

- ಬಿಹಾರಿ ಮಸಾಲೆ ತಯಾರಿಸಲು, ಒಂದು ಮಿಕ್ಸರ್ ಜಾರ್‌ಗೆ ಬೆಳ್ಳುಳ್ಳಿ, ಸಾಸಿವೆ ಕಾಳುಗಳು, ಜೀರಿಗೆ, ಕಾಳುಮೆಣಸು ಮತ್ತು ಮೆಣಸಿನಕಾಯಿಯನ್ನು ಹಾಕಿ, ಸ್ವಲ್ಪ ನೀರು ಸೇರಿಸಿ ನುಣ್ಣಗೆ ಪೇಸ್ಟ್ ಮಾಡಿ. ಈ ಸಾಸಿವೆ ಕಾಳುಗಳಿಂದ ತಯಾರಿಸಿದ ಮಸಾಲೆಯೇ ಈ ಕರಿಗೆ ವಿಶಿಷ್ಟವಾದ ರುಚಿ ಮತ್ತು ಪರಿಮಳವನ್ನು ನೀಡುತ್ತದೆ.

- ಈಗ ಮತ್ತೆ ಬಾಣಲೆಯಲ್ಲಿ ಎಣ್ಣೆ ಬಿಸಿ ಮಾಡಿ, ಹಸಿಮೆಣಸಿನಕಾಯಿ ಮತ್ತು ಸಣ್ಣಗೆ ಹೆಚ್ಚಿದ ಈರುಳ್ಳಿಯನ್ನು ಕೆಂಪಾಗುವವರೆಗೆ ಹುರಿಯಿರಿ.

- ನಂತರ, ಸಿದ್ಧಪಡಿಸಿದ ಮಸಾಲಾ ಪೇಸ್ಟ್ ಮತ್ತು ಹೆಚ್ಚಿದ ಟೊಮೆಟೊಗಳನ್ನು ಸೇರಿಸಿ. ಟೊಮೆಟೊ ಮೃದುವಾಗಿ, ಮಸಾಲೆಯಿಂದ ಎಣ್ಣೆ ಬಿಡಲು ಪ್ರಾರಂಭಿಸುವವರೆಗೆ ಚೆನ್ನಾಗಿ ಬೇಯಿಸಿ.

- ಮಸಾಲೆ ಚೆನ್ನಾಗಿ ಬೆಂದ ನಂತರ, ಹುರಿದ ಬದನೆಕಾಯಿ ಹಾಗೂ ನೀರಿನಲ್ಲಿ ನೆನೆಸಿದ ಸಂಡಿಗೆಯನ್ನು (ನೆನೆಸಿದ ನೀರಿನ ಸಮೇತ) ಸೇರಿಸಿ. ರುಚಿಗೆ ತಕ್ಕಷ್ಟು ಉಪ್ಪು ಮತ್ತು ಅರಿಶಿನ ಪುಡಿ ಹಾಕಿ ಚೆನ್ನಾಗಿ ಕಲಸಿರಿ.

- ಅಗತ್ಯವಿದ್ದರೆ ಇನ್ನರ್ಧ ಕಪ್ ನೀರು ಸೇರಿಸಿ ಕಡಿಮೆ ಉರಿಯಲ್ಲಿ ಮುಚ್ಚಳ ಮುಚ್ಚಿ ಸುಮಾರು ಹತ್ತು ನಿಮಿಷಗಳ ಕಾಲ ಬೇಯಿಸಿ. ಮಸಾಲೆ ಬದನೆಕಾಯಿ ಮತ್ತು ಸಂಡಿಗೆಯೊಳಗೆ ಚೆನ್ನಾಗಿ ಇಳಿದ ನಂತರ ಒಲೆಯಿಂದ ಕೆಳಗಿಳಿಸಿ.

ಮಸಾಲೆಯುಕ್ತ ಮತ್ತು ಹಳ್ಳಿ ಶೈಲಿಯ ಅಡುಗೆ ಇಷ್ಟಪಡುವವರಿಗೆ 'ಬೈಂಗನ್ ಬಡಿ' ಒಂದು ಅತ್ಯುತ್ತಮ ಆಯ್ಕೆ. ಇದರಲ್ಲಿರುವ ಉದ್ದಿನಬೇಳೆ ಸಂಡಿಗೆಯು ಕರಿಗೆ ವಿಶಿಷ್ಟವಾದ 'ಕ್ರಂಚಿ' ಸವರಿ ರುಚಿಯನ್ನು ಒದಗಿಸುತ್ತದೆ. ಇದನ್ನು ಗರಿಗರಿಯಾದ ರೊಟ್ಟಿ ಅಥವಾ ಬಿಸಿಬಿಸಿ ಅನ್ನದೊಂದಿಗೆ ತುಪ್ಪ ಸೇರಿಸಿ ಸವಿದರೆ ಅದರ ರುಚಿ ಮತ್ತಷ್ಟು ಡಬಲ್ ಆಗುತ್ತೆ. ಇದು ಮಧ್ಯಾಹ್ನದ ಊಟಕ್ಕೆ ಪೌಷ್ಟಿಕ ಮತ್ತು ತೃಪ್ತಿಕರವಾದ ರೆಸಿಪಿ.