ಈ ರೀತಿಯಲ್ಲಿ ಜೋಳದ ದೋಸೆ ಟ್ರೈ ಮಾಡಿದ್ದೀರಾ?

ದೋಸೆಯನ್ನು ನೂರಕ್ಕಿಂತ ಅಧಿಕ ಬಗೆಯಲ್ಲಿ ತಯಾರಿಸಬಹುದು. ದೋಸೆ ಮಾಡಲು ಬಳಸುವ ಸಾಮಾಗ್ರಿಗಳಲ್ಲಿ ಹಾಗೂ ಅದನ್ನು ಮಾಡುವ ವಿಧಾನದಲ್ಲಿ ದೋಸೆಯ ರುಚಿ ಅಡಗಿದೆ. ಇಲ್ಲಿ ನಾವು ಜೋಳ ದೋಸೆಯ ಬಗ್ಗೆ ಹೇಳಿದ್ದೇವೆ.

ಇದರಲ್ಲಿ ಜೋಳವನ್ನು ಅಕ್ಕಿ ಜೊತೆ ಹಾಕಿ ಅರೆಯುವುದಿಲ್ಲ, ಅದರ ಬದಲು ಜೋಳವನ್ನು ಬೇಯಿಸಿ ತಯಾರಿಸಲಾಗುವುದು. ಆ ಜೋಳದ ದೋಸೆಯ ರೆಸಿಪಿ ನೋಡೋಣ ಬನ್ನಿ:

ಬೇಕಾಗುವ ಸಾಮಾಗ್ರಿಗಳು:

* ಜೋಳ ಅರ್ಧ ಕಪ್ (ಬೇಯಿಸಿದ)
* ಅಕ್ಕಿ 2 ಕಪ್
* ಏಲಕ್ಕಿ 2
* ಈರುಳ್ಳಿ 2(ಕತ್ತರಿಸಿದ್ದು)
* ಹಸಿಮೆಣಸಿನ ಕಾಯಿ 2
* ಟೊಮೆಟೊ 2 (ಕತ್ತರಿಸಿದ್ದು)
* ರುಚಿಗೆ ತಕ್ಕ ಉಪ್ಪು
* ಎಣ್ಣೆ 1 ಕಪ್
* ಕೊತ್ತಂಬರಿ ಸೊಪ್ಪು

ತಯಾರಿಸುವ ವಿಧಾನ:

1. ಅಕ್ಕಿಯನ್ನು 5-6 ಗಂಟೆ ಕಾಲ ನೀರಿನಲ್ಲಿ ನೆನೆ ಹಾಕಬೇಕು. ನಂತರ ಅದಕ್ಕೆ ರುಚಿಗೆ ತಕ್ಕ ಉಪ್ಪು, ಏಲಕ್ಕಿ ಹಾಕಿ ನುಣ್ಣನೆ ರುಬ್ಬಬೇಕು.

2. ಒಂದು ಬಟ್ಟಲಿನಲ್ಲಿ ಜೋಳ, ಚಿಕ್ಕದಾಗಿ ಕತ್ತರಿಸಿದ ಟೊಮೆಟೊ, ಚಿಕ್ಕದಾಗಿ ಕತ್ತರಿಸಿದ ಹಸಿಮೆಣಸಿನ ಕಾಯಿ, ಚಿಟಿಕೆಯಷ್ಟು ಉಪ್ಪು, ಸ್ವಲ್ಪ ಕೊತ್ತಂಬರಿ ಸೊಪ್ಪುಹಾಕಿ ಚೆನ್ನಾಗಿ ಮಿಶ್ರಣ ಮಾಡಬೇಕು.

3. ಈಗ ತವಾವನ್ನು ಬಿಸಿ ಮಾಡಿ ಅದಕ್ಕೆ ಸೌಟ್ ನಿಂದ ಒಂದು ಸೌಟ್ ನಷ್ಟು ದೋಸೆ ಹಿಟ್ಟು ತೆಗೆದುಕೊಂಡು ದೋಸೆ ಹುಯ್ಯಬೇಕು. ದೋಸೆ ಸ್ವಲ್ಪ ಬೆಂದಾಗ ಅದರ ಮೇಲೆ ಸ್ವಲ್ಪ ಜೋಳದ ಮಿಶ್ರಣವನ್ನು ತೆಗೆದುಕೊಂಡು ಹರಡಬೇಕು. ನಂತರ ಬೆಂದ ದೋಸೆಯನ್ನು ಮಡಚಿ ತಟ್ಟೆಯಲ್ಲಿ ಹಾಕಬೇಕು.
ಬಿಸಿಬಿಸಿಯಾದ ಈ ದೋಸೆಯನ್ನು ಚಟ್ನಿ ಜೊತೆ ಸವೆಯಿರಿ ತುಂಬಾ ರುಚಿಕರವಾಗಿರುತ್ತದೆ.