ಮಜ್ಜಿಗೆ ಹುಲ್ಲಿನ ತಂಬುಳಿ

Breakfast

-Staff

By Staff

Published: Friday, November 28, 2008, 18:35 [IST]

ಪರಿಮಳಯುಕ್ತ ಹಾಗೂ ಅರೋಗ್ಯಕರ ಮಜ್ಜಿಗೆಹುಲ್ಲಿನ(Lemon grass)ತಂಬುಳಿ.

*ತೇಜಸ್ವಿನಿ ಹೆಗಡೆ, ಬೆಂಗಳೂರು

ವಿಶೇಷವಾಗಿ ಇದೊಂದು ಔಷಧೀಯ ಸಸ್ಯ. ಉತ್ತರಕನ್ನಡದ ಕಡೆ ನಿಂಬೇಹುಲ್ಲಿಗೆ ಮಜ್ಜಿಗೆಹುಲ್ಲೆಂದು ಕರೆಯುತ್ತಾರೆ. ಇಂಗ್ಲೀಷಿನಲ್ಲಿ ಇದಕ್ಕೆ Lemon grass ಎನ್ನುವರು. ಒಂದು ವಿಶಿಷ್ಟವಾದ ಪರಿಮಳವನ್ನು ಹೊಂದಿರುವ ಮಜ್ಜಿಗೆಹುಲ್ಲನ್ನು ಪ್ರಮುಖವಾಗಿ ಅಜೀರ್ಣ ಹಾಗೂ ಶೀತ ಬಾಧೆಗೆ ಉಪಯೋಗಿಸುತ್ತಾರೆ. ಇದನ್ನು ಸೇವಿಸಿದರೆ ಜೀರ್ಣಶಕ್ತಿ ವೃದ್ಧಿಸುತ್ತದೆ. ಸುಲಭವಾಗಿ ಮನೆಯಂಗಳದಲ್ಲೇ ಬೆಳೆಸಬಹುದಾದಂತಹ ಈ ಮಜ್ಜಿಗೆಹುಲ್ಲು ಆಯುರ್ವೇದ ಔಷಧಿಯ ತಯಾರಿಕೆಯಲ್ಲೂ ತುಂಬಾ ಮಹತ್ವದ ಸ್ಥಾನವನ್ನು ಪಡೆದಿದೆ.

ನಿಂಬೇಹುಲ್ಲಿನ ಉಪಯೋಗಗಳು ಹಲವಾರು.
* ಇದರ ಕಷಾಯಮಾಡಿ ಕುಡಿದರೆ ಶೀತ, ಕೆಮ್ಮು, ಅಲರ್ಜಿಕ್ ಜ್ವರ, ಅಜೀರ್ಣದಿಂದ ಬರುವ ಜ್ವರ ಮುಂತಾದ ಸಣ್ಣಪುಟ್ಟ ಖಾಯಿಲೆಗಳು ಹೇಳದೇ ಕೇಳದೆ ನಾಪತ್ತೆ.
* ಸಣ್ಣ ಮಕ್ಕಳಿಗೆ ಹೊಟ್ಟೆನೋವು ಬಂದರೆ ನಿಂಬೇಹುಲ್ಲಿನ ಸಣ್ಣಚೂರಿಗೆ ಸ್ವಲ್ಪ ನೀರನ್ನು ಹಾಕಿ ಕುದಿಸಿ ಕುಡಿಸಿದರೆ ಹೊಟ್ಟೆನೋವು ಮಾಯ.
* ನಿಂಬೇಹುಲ್ಲಿನಿಂದ ತಯಾರಿಸುವ ಎಣ್ಣೆಗೆ ಬಹು ಬೇಡಿಕೆ. ಈ ಎಣ್ಣೆಯನ್ನು ಸುಗಂಧ ದೃವ್ಯಗಳಲ್ಲಿಯೂ ಬಳಸುತ್ತಾರೆ. ಅದೂ ಅಲ್ಲದೇ ಇದರ ಎಣ್ಣೆಯನ್ನು ತಲೆನೋವು, ನರಕ್ಕೆ ಸಂಬಂಧಪಟ್ಟ ಖಾಯಿಲೆಗಳಲ್ಲೂ ಮಸಾಜ್ ಮಾಡಲು ಉಪಯೋಗಿಸುತ್ತಾರೆ.
* ಕೆಲವೆಡೆ ಇದನ್ನು ಚಹಾ ತಯಾರಿಸುವಾಗ ವಿಶೇಷ ಸ್ವಾದವನ್ನು ಪಡೆಯಲೂ ಬಳಸುವುದುಂಟು.

ಕಷಾಯ ಮಾಡುವ ವಿಧಾನ :
ಒಂದು ನಿಂಬೇಹಣ್ಣಿಗೆ 5 ನಿಂಬೇಹುಲ್ಲನ್ನು ಸಣ್ಣ ಚೂರಗಳನ್ನಾಗಿಸಿ ಹಾಕಿ ಅದಕ್ಕೆ ಒಂದು ಚಮಚ ಜೀರಿಗೆಯನ್ನು ಬೆರೆಸಿ 6 ಲೋಟ ನೀರನ್ನು ಹಾಕಿ ಹದಿನೈದು ನಿಮಿಷ ಕೊತಕೊತ ಕುದಿಸಬೇಕು. ಆರಿದ ನಂತರ ಅದಕ್ಕೆ ಬೆಲ್ಲ ಅಥವಾ ಉಪ್ಪನ್ನು ಸೇರಿಸಿ ಕುಡಿಯಬೇಕು. ಬೆಲ್ಲ ಅಥವಾ ಉಪ್ಪು ಹಾಕದೆಯೂ ಸೇವಿಸಬಹುದು. ಹಾಕಿದರೆ ಹೆಚ್ಚು ರುಚಿಕರ.

ಮಜ್ಜಿಗೆಹುಲ್ಲಿನ ಕುರಿತು ಹೆಚ್ಚಿನ ಮಾಹಿತಾಗಿ ಹಾಗೂ ಅದರ ಇನ್ನಿತರ ಉಪಯೋಗಗಳನ್ನು ತಿಳಿಯಲು ಈ ಕೆಳಗಿನ ಲಿಂಕ್‌ಗಳಿಗೆ ಭೇಟಿ ಕೊಡಬಹುದು.

http://en.wikipedia.org/wiki/Cymbopogon
http://www.miniperfumebottle.com/lemon_grass_oil.html
5 ಜನಕ್ಕೆ ಬಾಳೆ ಹಾಕುವ ಅಂದಾಜಿದ್ದರೆ ಮಜ್ಜಿಗೆ ಹುಲ್ಲು ತಂಬುಳಿ ತಯಾರಿಸಲು ಬೇಕಾಗುವ ಸಾಮಗ್ರಿಗಳು ಮತ್ತು ಪ್ರಮಾಣ:
ಶುಂಠಿ : ಸಣ್ಣ ಚೂರು
ಮಜ್ಜಿಗೆಹುಲ್ಲು(ನಿಂಬೇಹುಲ್ಲು) : 3 ಹುಲ್ಲು
ತೆಂಗಿನಕಾಯಿ ತುರಿ : 1/4 ಭಾಗ
ಕಡೆದ ಮಜ್ಜಿಗೆ : 2 ಲೋಟ
ಉಪ್ಪು : ರುಚಿಗೆ ತಕ್ಕಷ್ಟು.

ಮಾಡುವ ವಿಧಾನ:
*ಮೊದಲು ಶುಂಠಿ ಹಾಗೂ ಮಜ್ಜಿಗೆ ಹುಲ್ಲನ್ನು ಸಣ್ಣ ಸಣ್ಣ ಚೂರುಗಳನ್ನಾಗಿ ಕತ್ತರಿಸಿಕೊಳ್ಳಬೇಕು.
*ಇದಕ್ಕೆ ಕಾಯಿತುರಿಯನ್ನು ಹಾಕಿ ರುಬ್ಬಿ ಚೆನ್ನಾಗಿ ಗಾಳಿಸಬೇಕು(ಸೋಸಬೇಕು).

*ಸೋಸಿ ರಸಹಿಂಡಿ ತೆಗೆದ ಮಿಶ್ರಣಕ್ಕೆ ಕಡೆದ ಮಜ್ಜಿಗೆ ಹಾಗೂ ಉಪ್ಪನ್ನು ಹಾಕಿ ಬೇಕಷ್ಟು ಪ್ರಮಾಣದಲ್ಲಿ ನೀರನ್ನು ಬೆರೆಸಬೇಕು. ಈಗ ಪರಿಮಳಯುಕ್ತ, ಸ್ವಾದಭರಿತ ಹಾಗೂ ಆರೋಗ್ಯಕರ ತಂಬುಳಿ ಸೇವಿಸಲು ತಯಾರು.