ಬಿಸಿ ಬಿಸಿ ಆಲೂ ದೋಸೆ ಟೇಸ್ಟ್ ಮಾಡಿ ನೋಡಿ

Breakfast

oi-Sumalatha N

By Sumalatha N

Published: Tuesday, August 9, 2011, 10:50 [IST]

ಸಾದಾ ದೋಸೆ ತಿಂದು ಬೇಜಾರಾಗಿದ್ದವರು ಇದೀಗ ಆಲೂ ದೋಸೆ ತಿಂದು ನಾಲಗೆಗೆ ಹೊಸ ರುಚಿ ತೋರಿಸಬಹುದು. ಬೇಗನೆ ಮಾಡಿ ಮುಗಿಸಬಹುದಾದ ಆಲೂ ದೋಸೆ ಬೆಳಗ್ಗಿನ ತಿಂಡಿಗೂ ಸರಿ, ಮಧ್ಯಾಹ್ನದ ಲಂಚ್ ಬಾಕ್ಸ್ ಗೂ ಕಟ್ಟಬಹುದು. ಮಕ್ಕಳು ಸಾಯಂಕಾಲ ಶಾಲೆಯಿಂದ ಬಂದ ನಂತರ ಬಿಸಿ ಬಿಸಿಯಾಗಿ ಆಲೂ ದೋಸೆ ಹಾಕಿಕೊಡಬಹುದು. ಅದರಲ್ಲೂ ಈ ಚಳಿಯಲ್ಲಿ ಆಲೂ ದೋಸೆಯನ್ನ ತಿನ್ನುತ್ತಿದ್ದರೆ ರುಚಿ ದುಪ್ಪಟ್ಟು.

ಸಾಮಾನ್ಯವಾಗಿ ಮನೆಯಲ್ಲೇ ಸಿಗುವ ಸಾಮಾನುಗಳಿಂದಲೇ ತಯಾರಿಸಬಹುದಾದ ಆಲೂ ದೋಸೆಯನ್ನ ಯಾವ ಸಮಯದಲ್ಲಿ ಬೇಕಾದರೂ ಮಾಡಿ ತಿನ್ನಬಹುದು.

ಬೇಕಾಗುವ ಸಾಮಾನುಗಳು:
* ಬೇಯಿಸಿದ 3 ದೊಡ್ಡ ಆಲೂಗಡ್ಡೆಗಳು
* 1 ಈರುಳ್ಳಿ
* 1 ಕಪ್ ಕತ್ತರಿಸಿದ ಸಬ್ಬಕ್ಕಿ ಸೊಪ್ಪು
* 1 ಕಪ್ ಕತ್ತರಿಸಿದ ಕೊತ್ತಂಬರಿ
* ಕಪ್ಪು ಮೆಣಸಿನ ಪುಡಿ ಅಥವಾ ಸಣ್ಣದಾಗಿ ಕತ್ತರಿಸಿದ ಹಸಿರು ಮೆಣಸಿನ ಕಾಯಿ ಅಥವಾ ಕೆಂಪು ಮೆಣಸಿನ ಪುಡಿ
* 1 ಚಮಚ ಜೀರಿಗೆ ಪುಡಿ
* 2 ಚಮಚ ಅಕ್ಕಿ ಹಿಟ್ಟು
* 4 ಚಮಚ ಗೋಧಿ ಹಿಟ್ಟು
* 1-2 ಮೊಟ್ಟೆ
* ರುಚಿಗೆ ಉಪ್ಪು, ಎಣ್ಣೆ, ನೀರು

ಮಾಡುವ ವಿಧಾನ: ಮೇಲೆ ತಿಳಿಸಿದ ಎಲ್ಲ ಪದಾರ್ಥಗಳನ್ನು ಒಂದು ಪಾತ್ರೆಗೆ ಹಾಕಿ ಕಲೆಸಿಕೊಳ್ಳಬೇಕು. ದೋಸೆ ಹಿಟ್ಟಿನಂತೆ ಚೆನ್ನಾಗಿ ಕಲಸಬೇಕು. ಹದಕ್ಕೆ ತಕ್ಕಂತೆ ನೀರು ಬೆರೆಸಿಕೊಳ್ಳಬೇಕು. ಈ ಮಿಶ್ರಣದ ರುಚಿಯನ್ನು ಒಮ್ಮೆ ಪರೀಕ್ಷಿಸಬೇಕು. ತವೆಯನ್ನು ಕಾಯಿಸಿ ದೋಸೆ ಹಾಕುವ ರೀತಿಯಲ್ಲೇ ಈ ಮಿಶ್ರಣವನ್ನು ಹಾಕಬೇಕು. ಎರಡೂ ಕಡೆ ಬೇಯಿಸಿದ ನಂತರ ಸ್ಪೆಷಲ್ ಆಲೂ ದೋಸೆ ತಿನ್ನಲು ತಯಾರಾಗುತ್ತದೆ.

ಇಷ್ಟು ಬೇಗ ಮಾಡಿ ಮುಗಿಸಬಹುದಾದ ಆಲೂ ಸ್ಪೆಷಲ್ ದೋಸೆಯನ್ನ ನೀವೂ ತಯಾರಿಸಿ ನೋಡಿ...