12 ಮಸಾಲೆದೋಸೆ ಮಸಾಲೆದೋಸೆ 12

Breakfast

oi-Staff

By Staff

Published: Tuesday, May 25, 2010, 15:29 [IST]

ಇವತ್ತು ದಟ್ಸ್ ಕನ್ನಡ ಅಡುಗೆ ಭಟ್ಟರು ಎದ್ದೇಳುವುದೇ ತಡವಾಯಿತು. ಕ್ಷಮಿಸಿ. ಇವತ್ತು ಮುಕ್ಕೋಟಿ ದ್ವಾದಶಿ, ಬೆಳಗ್ಗೆ ಬೆಳಗ್ಗೆನೇ ಅಡಿಗೆ ಸಿದ್ಧವಾಗಬೇಕಾಗಿತ್ತು. ನಮ್ಮ ಅಡುಗೆ ರುಚಿ ವಿಭಾಗಕ್ಕೆ ತಪ್ಪದೆ ಬರುವವರು ಈ ರೆಸಿಪಿಯ ಪ್ರಿಂಟ್ ಔಟ್ ತೆಗೆದುಕೊಂಡು ನಿಧಾನವಾಗಿ ಮಾಡಿ. ಮೈಸೂರು ಮಸಾಲೆದೋಸೆಯನ್ನು ತ್ರಯೋದಶಿಯಂದೂ ಮಾಡಬಹುದು !

ಬೇಕಾದ ಸಾಮಾಗ್ರಿ:

ಅಕ್ಕಿ -1 ಲೋಟ ತುಂಬ
ಅಕ್ಕಿ ನುಚ್ಚು - 1/4 ಲೋಟ
ಉದ್ದಿನಬೇಳೆ ಕಾಲು ಲೋಟ
ಮೆಂತ್ಯ - ಅರ್ಧ ಚಮಚ
ತೊಗರಿ ಬೇಳೆ -1 ಚಮಚ
ಸಣ್ಣ ರವೆ- ಒಂದೂವರೆ ಚಮಚ
ಉಪ್ಪು -1 ಚಮಚ
ಸಕ್ಕರೆ-ಅರ್ಧ ಚಮಚ

ಅಕ್ಕಿ ಮೆಂತ್ಯ ಮತ್ತು ಎರಡು ರೀತಿಯ ಬೇಳೆಗಳನ್ನು ಒಟ್ಟಿಗೆ 2 ರಿಂದ 3 ಗಂಟೆ ಕಾಲ ನೀರಿನಲ್ಲಿ ನೆನೆಸಿಡಿ (ಅಥವಾ ಹಿಂದಿನ ದಿನ ರಾತ್ರಿ ನೆನೆಸಿ ಇಟ್ಟರೆ ಒಳ್ಳೆಯದು) ಅಕ್ಕಿ ನುಚ್ಚನ್ನು ಪ್ರತ್ಯೇಕವಾಗಿ 1 ಗಂಟೆ ನೀರಿನಲ್ಲಿ ನೆನೆಸಿದರೆ ಸಾಕು.ನೆಂದ ಎಲ್ಲಾ ಪದಾರ್ಥಗಳನ್ನು ನುಣ್ಣಗೆ, ಗಟ್ಟಿಯಾಗಿ ರುಬ್ಬಿಕೊಳ್ಳಿ. ನಿಮ್ಮ ಮನೆಯಲ್ಲಿ ಯಾವ ಬ್ರ್ಯಾಂಡ್ ಮಿಕ್ಸಿ ಇದೆ? ಕುತೂಹಲ. ದೋಸೆ ಹಿಟ್ಟು ಇಡ್ಲಿ ಹಿಟ್ಟು ರುಬ್ಬುವುದಕ್ಕೆ ಮಿಕ್ಸಿ ಸಾಕಾಗುವುದಿಲ್ಲ. ತಂತಾನೆ ನಿಧಾನವಾಗಿ ರುಬ್ಬಿಕೊಳ್ಳುವ ಒಳ್ಳೆ ಬ್ರಾಂಡಿನ ಗ್ರೈಂಡರ್ ಇರಲಿ. ರುಬ್ಬುವಾಗಲೇ ರುಚಿಗೆ ತಕ್ಕಷ್ಟು ಕಲ್ಲುಪ್ಪು ಬೆರೆಸುವುದನ್ನು ಮರೆಯಬೇಡಿ.

ಮಾರನೆ ದಿನ ದೋಸೆ ಮಾಡುವ ಒಂದು ಗಂಟೆ ಮುನ್ನ ರವೆ ಮತ್ತು ಸಕ್ಕರೆ ಸೇರಿಸಿ.ತೆಳ್ಳಗೆ ದೋಸೆಯನ್ನು ರಂಗೋಲಿಯಂತೆ ಹಂಚಿನ ಮೇಲೆ ಹರಡಿ. ದೋಸೆ ತವಾ ಸ್ವಚ್ಛವಾಗಿರಲಿ. ದರ್ಶಿನಿಗಳಲ್ಲಿ ಬಳಸುವ ಪೊರಕೆ ಇಲ್ಲದಿದ್ದರೆ ಚಿಂತೆಯಿಲ್ಲ . ಕುಂಬಳಕಾಯಿ ಅಥವಾ ತೆಂಗಿನ ತೊಟ್ಟು ಇದ್ದರಾಯ್ತು. ಸಾಕಷ್ಟು ತುಪ್ಪ ಹಾಕಿ, ಒಂದು ಕಡೆ ಮಾತ್ರ ಗರಿಗರಿಯಾಗುವಂತೆ ದೋಸೆಯನ್ನು ಬೇಯಿಸಿ.

ಒಂದು ಚಮಚ ಆಲೂಗೆಡ್ಡೆ ಮಸಾಲೆಯನ್ನು ಅದರೊಳಗಿರಿಸಿ, ಸ್ವಲ್ಪ ಬೆಣ್ಣೆಯನ್ನು ಸವರಿ. ತ್ರಿಕೋಣಾಕಾರದಲ್ಲಿ ಮಡಚಿ, ಬಿಸಿಬಿಸಿಯಾದ ದೊಸೆಯನ್ನು ತೆಂಗಿನಕಾಯಿ ಚಟ್ನಿ ಮತ್ತು ಸಾಂಬಾರಿನೊಂದಿಗೆ ಬಡಿಸಿ. ಈ ವಿಧಾನ ಮತ್ತಪ ಪ್ರಮಾಣದಿಂದ ವಿಧಾನದಿಂದ ಸುಮಾರು 12 ದೋಸೆಗಳನ್ನು ತಯಾರಿಸಬಹುದು. ದೋಸೆ ಮಾಡುವುದಕ್ಕೆ ಸೊಂಟ ಬಗ್ಗಬೇಕು. ತೊಂದರೆ ಆದರೂ ಪರವಾಗಿಲ್ಲ. ಮಾಡಿದ್ದನ್ನು ನಗುನಗುತ್ತಾ ಮೆಲ್ಲುವ ಜನ ಇದ್ದರೆ ಮಾಡಿದವರಿಗೂ ಸುಖ, ತಿಂದವರಿಗೂ ತೃಪ್ತಿ.

ಇನ್ನೊಂದು ವಿಧಾನ:

ಈರುಳ್ಳಿ ಚಟ್ನಿ ಅಥವಾ ತೆಂಗಿನಕಾಯಿ ಚಟ್ನಿ ಸವರಿ, ನಂತರ ಮಸಾಲೆಯನ್ನು ದೋಸೆಯೊಳಗಿರಿಸಿ, ನಂತರ ಬಡಿಸಿರಿ. ತೆಂಗಿನಕಾಯಿ ಕೆಂಪು ಚಟ್ನಿ ಸವರಿ, ಸ್ವಲ್ಪ ನಿಂಬೆರಸದ ಅನ್ನವನ್ನು ಮಸಾಲೆಯೊಂದಿಗೆ ದೋಸೆಯೊಳಗಿರಿಸಿ, ಬಿಸಿಬಿಸಿಯಾಗಿ ಬಡಿಸಿ.