ಗರ್ಭಾವಸ್ಥೆಯಲ್ಲಿ ಸೆಕ್ಸ್ ಹಾಗೂ ಪರಾಕಾಷ್ಠೆ ಕ್ರಿಯೆಯ ಸುಖ ಪಡೆಯಬಹುದಾ?

ಗರ್ಭಾವಸ್ಥೆಯಲ್ಲಿನ ಸೆಕ್ಸ್ ಪರಾಕಾಷ್ಠೆ ಹೇಗಿರುತ್ತದೆ?

ಗರ್ಭಿಣಿ ಮಹಿಳೆಯರು ಸೆಕ್ಸ್‌ನಲ್ಲಿ ತೊಡಗುವುದು ಸರಿಯಲ್ಲ, ಈ ಅವಧಿಯಲ್ಲಿ ಲೈಂಗಿಕ ಸುಖ ಅನುಭವಿಸುವುದು ತಪ್ಪು ಎಂಬುದು ಕೆಲವರ ಭಾವನೆಯಾಗಿದೆ. ಮಹಿಳೆ ಗರ್ಭಿಣಿಯಾಗಿರುವಾಗ ಅವಳು ಹೇಗೆ ಲೈಂಗಿಕ ಪರಾಕಾಷ್ಠೆ ತಲುಪಬಲ್ಲಳು ಎಂಬ ಗೊಂದಲ ಅನೇಕರಲ್ಲಿದೆ. ಆದರೆ ಇದು ಸಂಪೂರ್ಣ ತಪ್ಪು ತಿಳುವಳಿಕೆಯಾಗಿದೆ. ವಾಸ್ತವದಲ್ಲಿ ಗರ್ಭಿಣಿ ಮಹಿಳೆಯು ಮಿಲನ ಕ್ರಿಯೆಯಲ್ಲಿ ತೊಡಗುವುದರಿಂದ ಇತರ ಮಹಿಳೆಯರಿಗಿಂತಲೂ ಹೆಚ್ಚು ಸೆಕ್ಸ್ ಸುಖ ಅನುಭವಿಸಬಹುದು ಎಂಬುದು ನಿಜ ಸಂಗತಿಯಾಗಿದೆ.

ಲೈಂಗಿಕ ಪರಾಕಾಷ್ಠೆ ಅನುಭವಿಸಲು ಸಾಧ್ಯ

ಹೌದು. ಮಹಿಳೆ ಗರ್ಭಿಣಿಯಾಗಿರುವಾಗ ಅವಳು ಹೆಚ್ಚಿನ ಲೈಂಗಿಕ ಪರಾಕಾಷ್ಠೆ ಅನುಭವಿಸಲು ಸಾಧ್ಯ. ಆದರೆ ಗರ್ಭಾವಸ್ಥೆಯಲ್ಲಿ ಸೆಕ್ಸ್‌ನಲ್ಲಿ ತೊಡಗುವ ಮುಂಚೆ ಕೆಲ ಮುಂಜಾಗರೂಕತಾ ಕ್ರಮಗಳನ್ನು ಅನುಸರಿಸಬೇಕಾದ್ದು ಅಗತ್ಯವಾಗಿದೆ. ಗರ್ಭಾಶಯದಲ್ಲಿ ಬೆಳೆಯುತ್ತಿರುವ ಮಗುವಿನ ಹಿತದೃಷ್ಟಿಯಿಂದ ಈ ಕ್ರಮಗಳನ್ನು ಕೈಗೊಳ್ಳಬೇಕಾಗುತ್ತದೆ. ಆರೋಗ್ಯದ ದೃಷ್ಟಿಯಿಂದ ಯಾವುದೇ ಸಮಸ್ಯೆಗಳಿಲ್ಲದಿದ್ದರೆ ಗರ್ಭಾವಸ್ಥೆಯಲ್ಲಿ ಸೆಕ್ಸ್ (ಮಹಿಳೆಯರಲ್ಲಿ ಸ್ಖಲನ ಸುಖವೂ ಸೇರಿದಂತೆ) ನಡೆಸಬಹುದು ಎಂದು ವೈದ್ಯರು ಸಲಹೆ ನೀಡುತ್ತಾರೆ. ಗರ್ಭಾವಸ್ಥೆಯ ಸ್ಖಲನದ ಬಗೆಗಿನ ಪ್ರಮುಖ ಅಂಶಗಳನ್ನು ಇಲ್ಲಿ ತಿಳಿಸಲಾಗಿದೆ.

ಗರ್ಭಾವಸ್ಥೆಯಲ್ಲಿ ಸೆಕ್ಸ್ ಸುಖ ಸುರಕ್ಷಿತವೆ?

ವೈದ್ಯರ ಪ್ರಕಾರ ಆರೋಗ್ಯವಂತ ಗರ್ಭಿಣಿಯರು ಮಿಲನ ಕ್ರಿಯೆಯಲ್ಲಿ ಭಾಗವಹಿಸಬಹುದಾಗಿದೆ. ಆದರೆ ಇದು ಹೆರಿಗೆ ಕ್ರಿಯೆ ಆರಂಭವಾಗುವ ಮುನ್ನ ಮಾತ್ರ ಅನ್ವಯಿಸುತ್ತದೆ. ಒಮ್ಮೆ ನೀರು ಹೊರಹೋಗಲಾರಂಭಿಸಿದರೆ ಅಥವಾ ಹೆರಿಗೆ ಕ್ರಿಯೆ ಆರಂಭವಾದರೆ ಸೆಕ್ಸ್‌ನಲ್ಲಿ ತೊಡಗುವಂತಿಲ್ಲ. ಅಧಿಕ ರಕ್ತಸ್ರಾವದ ಲಕ್ಷಣಗಳು, ಅವಧಿಪೂರ್ವ ಹೆರಿಗೆ ಸಾಧ್ಯತೆ ಅಥವಾ ಇನ್ನಾವುದೇ ಸಮಸ್ಯೆ ಇದ್ದಲ್ಲಿ ಸೆಕ್ಸ್ ನಡೆಸುವುದು ಅಥವಾ ಸ್ಖಲಿಸುವುದು ಸೂಕ್ತವಲ್ಲ ಎಂಬುದು ವೈದ್ಯರ ಸಲಹೆಯಾಗಿದೆ.

ಆರೋಗ್ಯದ ಮೇಲಾಗುವ ಪರಿಣಾಮವೇನು?

ಗರ್ಭಾವಸ್ಥೆಯಲ್ಲಿರುವ ಮಹಿಳೆ ಲೈಂಗಿಕವಾಗಿ ಸ್ಖಲಿಸಿದಾಗ ಅದು ಗರ್ಭಕೋಶದ ಸಂಕೋಚನೆಗೆ ಕಾರಣವಾಗುತ್ತದೆ. ಸೆಕ್ಸ್‌ನಿಂದಾಗಿ ದೇಹದಲ್ಲಿ ಆಕ್ಸಿಟೋಸಿನ್ ಪ್ರಮಾಣ ಹೆಚ್ಚಾಗುವ ಕಾರಣದಿಂದ ಗರ್ಭಾಶಯ ಸಂಕೋಚನೆಯಾಗುತ್ತದೆ. ಆದರೆ ಹಾಗಂತ ಇದು ಅವಧಿ ಪೂರ್ವ ಹೆರಿಗೆಗೆ ಕಾರಣವಾಗುವುದಿಲ್ಲ. ಸ್ಖಲನ ಸಂದರ್ಭದಲ್ಲಿ ಗರ್ಭಾಶಯದ ಸಂಕೋಚನವು ಸಹಜ ಕ್ರಿಯೆಯಾಗಿದ್ದು ಇದರಿಂದ ಹೆರಿಗೆ ಪ್ರಕ್ರಿಯೆ ಆರಂಭವಾಗಲಾರದು. ಸ್ಖಲನದ ಪರಾಕಾಷ್ಠೆಯ ಸಂದರ್ಭದಲ್ಲಿ ಆಕ್ಸಿಟೋಸಿನ್ ಪ್ರಮಾಣ ಒಮ್ಮೆಲೆ ಹೆಚ್ಚಾದರೂ ಮುಂದಿನ ಒಂದೆರಡು ನಿಮಿಷಗಳಲ್ಲಿಯೇ ಇದು ಸಹಜ ಪ್ರಮಾಣಕ್ಕೆ ಬರುತ್ತದೆ. ಹೀಗಾಗಿ ಇದು ಬಹಳ ಹೊತ್ತಿನವರೆಗೆ ದೇಹದಲ್ಲಿ ಪರಿಚಲನೆಯಾಗಲಾರದು.

ಭ್ರೂಣದ ಮೇಲೆ ಪರಿಣಾಮವೇನು?

ಗರ್ಭಕೋಶದಲ್ಲಿ ಮಗು ಮೃದುವಾದ ಅಮ್ನಿಯಾಟಿಕ್ ಚೀಲದಲ್ಲಿರುತ್ತದೆ. ಇದು ಮಗುವಿಗೆ ಯಾವುದೇ ಅಪಾಯವಾಗದಂತೆ ರಕ್ಷಿಸುವ ವ್ಯವಸ್ಥೆಯಾಗಿದೆ. ಹೀಗಾಗಿ ಸೆಕ್ಸ್ ಸಂದರ್ಭದ ಕ್ರಿಯೆಗಳಿಂದ ಮಗುವಿಗೆ ಯಾವುದೇ ಅಪಾಯವಾಗಲಾರದು.

ಗರ್ಭಾವಸ್ಥೆಯಲ್ಲಿ ಸ್ಖಲನ ಪರಾಕಾಷ್ಠೆ ಹೆಚ್ಚೇಕೆ?

ಗರ್ಭಿಣಿಯಾಗಿರುವಾಗ ಮಹಿಳೆ ಸಾಮಾನ್ಯಕ್ಕಿಂತ ಹೆಚ್ಚು ಸೆಕ್ಸ್ ಸುಖದ ಉತ್ತುಂಗ ತಲುಪಬಹುದು. ಇದಕ್ಕೆ ಕಾರಣವೂ ಇದೆ. ಗರ್ಭಾವಸ್ಥೆಯಲ್ಲಿ ಜನನಾಂಗಗಳಲ್ಲಿ ರಕ್ತ ಪರಿಚಲನೆ ಹೆಚ್ಚಾಗಿರುವುದು ಇದಕ್ಕೆ ಕಾರಣ. ಇದರಿಂದ ದೇಹದಲ್ಲಿ ಉತ್ತೇಜನದ ಸೂಕ್ಷ್ಮತೆ ಹೆಚ್ಚಾಗಿ ಸ್ಖಲನದ ತೀವ್ರತೆ ಹಾಗೂ ಪರಾಕಾಷ್ಠೆಯ ಸುಖ ಹೆಚ್ಚಿರುತ್ತದೆ.

ವೈದ್ಯರ ಸಲಹೆ ಅಗತ್ಯವೆ?

ಪ್ರತಿಯೊಬ್ಬರ ದೇಹ ರಚನೆ ವಿಭಿನ್ನವಾಗಿರುವುದರಿಂದ ಆರೋಗ್ಯವೂ ಭಿನ್ನವಾಗಿರುತ್ತದೆ. ಗರ್ಭಿಣಿಯಾಗಿರುವಾಗ ಸೆಕ್ಸ್ ನಡೆಸುವ ಬಗ್ಗೆ ನಿಮಗೆ ಸಂದೇಹಗಳಿದ್ದಲ್ಲಿ ಅಥವಾ ಈ ಮುಂಚೆ ಗರ್ಭಿಣಿಯಾದಾಗ ಸೆಕ್ಸ್‌ನಿಂದ ಹೆರಿಗೆಯಲ್ಲಿ ತೊಂದರೆ ಆಗಿದ್ದಲ್ಲಿ, ಗರ್ಭಾವಸ್ಥೆಯ ಸೆಕ್ಸ್ ನಡೆಸುವ ಮುನ್ನ ಅಥವಾ ಸ್ವ ರತಿಯಲ್ಲಿ ತೊಡಗುವ ಮುನ್ನ ಡಾಕ್ಟರನ್ನು ಕಾಣುವುದು ಒಳಿತು.