ಹೊಟ್ಟೆಯಲ್ಲಿ ಮಗು ಒದ್ದರೆ ಏನು ಅರ್ಥ?

Pre Natal

oi-Reena

By Hema S

Published: Friday, December 9, 2011, 13:20 [IST]

ಪ್ರತಿಯೊಂದು ಹೆಣ್ಣು ಮಗಳು ತಾಯ್ತನದ ಸುಖವನ್ನು ಅನುಭವಿಸ ಬಯಸುತ್ತಾಳೆ. ಗರ್ಭಿಣಿಯಾಗಿರುವ ಸಮಯ ಅವಳ ಜೀವನದ ಮಹತ್ವದ ಘಟ್ಟಗಳಲ್ಲಿ ಒಂದು. ಗರ್ಭಿಣಿಯಾದಾಗ ವಾಂತಿ, ತಲೆ ಸುತ್ತು ಹೀಗೆ ಅನೇಕ ಸಮಸ್ಯೆಗಳು ಕಂಡು ಬಂದರೂ ಮಗುವಿನ ಇರುವಿಕೆಯ ಅನುಭವ ಅಂದರೆ ಹೊಟ್ಟೆಯಲ್ಲಿ ಮಗು ಒದೆಯಲು ಪ್ರಾರಂಭಿಸುವಾಗ ಅವಳಿಗೆ ಆಗುವ ಆನಂದದ ಮುಂದೆ ಪ್ರಪಂಚದ ಎಲ್ಲಾ ಸುಖ ಮತ್ತು ಸಂತೋಷಗಳು ನಗಣ್ಯ.

ಮಗು ಹೊಟ್ಟೆಯಲ್ಲಿ ಒದೆಯುವಾಗ ಮೊದಮೊದಲು ಗ್ಯಾಸ್ ಸಮಸ್ಯೆ ಇರಬಹುದು ಎಂದು ಭಾವಿಸುತ್ತಾರೆ ಆದರೆ ನಿಧಾನಕ್ಕೆ ಅದು ಮಗುವಿನ ಕದಲಿಕೆ ಎಂಬುದು ಮನವರಿಕೆಯಾಗುತ್ತದೆ. ಮಗು ಈ ರೀತಿ ಒದೆಯುವುದರಿಂದ ಮಗುವಿನ ಆರೋಗ್ಯವಾಗಿದೆ ಎಂದು ತಿಳಿಯಬಹುದು.

ಮಗುವಿನ ಕದಲಿಕೆ ಯಾವಾಗ ಪ್ರಾರಂಭವಾಗುತ್ತದೆ?

* ಮಗು ಒದೆಯುವ ಅನುಭವ 16-22 ವಾರಗಳ ಒಳಗೆ ಅನುಭವಕ್ಕೆ ಬರುತ್ತದೆ, ಮಗುವಿನ ಕದಲಿಕೆ 7 ವಾರಗಳಲ್ಲಿಯೆ ಪ್ರಾರಂಭವಾದರೂ ಅದು ಅಷ್ಟಾಗಿ ಅನುಭವಕ್ಕೆ ಬರುವುದಿಲ್ಲ.

* ಚೊಚ್ಚಲ ಗರ್ಭಿಣಿಯರಿಗೆ ಮಗು ಒದೆಯಲು ಪ್ರಾರಂಭಿಸುವಾಗ ಮೊದಮೊದಲು ಗೊತ್ತಾಗುವುದಿಲ್ಲ.

* ಕ್ರಮೇಣ ಮಗು ಬಲವಾಗಿ ಒದೆಯಲು ಪ್ರಾರಂಭಿಸಿದಾಗ ತಾಯಿ ಆ ಸುಖವನ್ನು ಆನಂದಿಸುತ್ತಾಳೆ.

ದಿನಕ್ಕೆ ಎಷ್ಟು ಬಾರಿ ಒದೆಯುತ್ತದೆ?

ಈ ಪ್ರಶ್ನೆಗೆ ನಿಖರ ಉತ್ತರ ಹೇಳಲು ಸಾಧ್ಯವಾಗುವುದಿಲ್ಲ, ಆದರೆ ಮಗು ಆಗಾಗ್ಗೆ ಒದೆಯುತ್ತಿದ್ದರೆ ಮಗು ಚಟುವಟಿಕೆಯಿಂದ ಇದ್ದು ಸಾಧಾರಣ ಹೆರಿಗೆಯಾಗುವ (ನಾರ್ಮಲ್ ಡೆಲಿವರಿ)ಸಾಧ್ಯತೆ ಹೆಚ್ಚು. ಮಗು ಎರಡನೇ ತ್ರೈಮಾಸಿಕದಲ್ಲಿ ಒಂದು ದಿನಾ ಆಗಾಗ್ಗೆ ಒದೆಯುತ್ತಿದ್ದರೆ ಮರುದಿನ ಅಷ್ಟಾಗಿ ಒದೆಯದೆ ಇರಬಹುದು, ಆದರೆ 6 ತಿಂಗಳ ನಂತರ ಮಗು ಆಗಾಗ್ಗೆ ಒದೆಯುತ್ತದೆ.

ಒಂದು ವೇಳೆ ಮಗು ಈ ರೀತಿ ಒದೆಯುವುದನ್ನು ಕಡಿಮೆ ಮಾಡಿದರೆ ಮಗುವಿಗೆ ಏನೊ ಸಮಸ್ಯೆ ಇದೆ ಎಂದು ಅರ್ಥ. ತಕ್ಷಣ ವೈದ್ಯರನ್ನು ಸಂಪರ್ಕಿಸಬೇಕು.
ಹೊಟ್ಟೆಯಲ್ಲಿ ಮಗು ಹೆಚ್ಚು ಒದ್ದಷ್ಟು ಅದು ಆರೋಗ್ಯವಾಗಿರುವ ಲಕ್ಷಣ.