ಗರ್ಭಾವಸ್ಥೆಗೂ ಮುನ್ನ ತೂಕ ನೋಡಿಕೊಳ್ಳಿ

Pre Natal

oi-Sumalatha

By Sumalatha

Published: Thursday, September 15, 2011, 14:41 [IST]

ನೀವು ಮಗುವನ್ನು ಪಡೆಯಲು ತಯಾರಾಗುತ್ತಿದ್ದೀರ ಎಂದಾದರೆ ನಿಮ್ಮ ತೂಕದ ಬಗ್ಗೆಯೂ ಹೆಚ್ಚು ಗಮನವಹಿಸಬೇಕು. ಗರ್ಭ ಧರಿಸುವ ಮುನ್ನ ಅತಿಯಾದ ತೂಕ ಅಥವಾ ಅತಿ ಕಡಿಮೆ ತೂಕ ಗರ್ಭಧಾರಣೆಗೆ ತೊಂದರೆ ತಂದೊಡ್ಡಬಹುದು ಮತ್ತು ತಾಯಿ ಹಾಗೂ ಮಗುವಿನ ಬೆಳವಣಿಗೆ ಮೇಲೂ ಪರಿಣಾಮ ಬೀರಬಹುದು.

ನಿಮ್ಮ ಎತ್ತರಕ್ಕೆ ತಕ್ಕಂತೆ ತೂಕವನ್ನು ಕಳೆದುಕೊಳ್ಳಲು ಅಥವಾ ಪಡೆದುಕೊಳ್ಳಲು ಪ್ರಯತ್ನಿಸಿದರೆ ಗರ್ಭಧಾರಣೆ ಮತ್ತು ಹೆರಿಗೆ ಸಮಯದಲ್ಲಿ ಉಂಟಾಗಬಹುದಾದ ಹಲವು ತೊಂದರೆಗಳಿಂದ ದೂರ ಉಳಿಯಬಹುದು.

ಆದರೆ ಗರ್ಭವತಿಯಾದ ನಂತರ ತೂಕ ಕಡಿಮೆಮಾಡಿಕೊಳ್ಳಲು ಡಯಟ್ ಅಥವಾ ವ್ಯಾಯಾಮ ನಡೆಸಬಾರದು. ವೈದ್ಯರನ್ನು ಸಂಪರ್ಕಿಸಿ ಸೂಕ್ತ ಸಲಹೆ ಪಡೆದುಕೊಂಡು ಮುಂದುವರೆಯಬೇಕು.

ಗರ್ಭಧಾರಣೆ ಸಮಯದಲ್ಲಿ ತೂಕದ ಪ್ರಭಾವ ಹೇಗೆ?

* ಅತಿ ಹೆಚ್ಚು ತೂಕ: ಮಗುವನ್ನು ಪಡೆಯಲು ಬಯಸುವ ಮಹಿಳೆಯ ತೂಕ ಅತಿಯಾಗಿದ್ದರೆ ಗರ್ಭಧಾರಣೆ ಕಷ್ಟವಾಗಬಹುದು ಅಥವಾ ಏರೊತ್ತಡ, ಮಧುಮೇಹದ ತೊಂದರೆ ಉಂಟುಮಾಡಬಹುದು. ಗರ್ಭಧರಿಸುವ ಮಹಿಳೆಯರು ತಮ್ಮ ಡಯಟ್ ಬಗ್ಗೆ ಹೆಚ್ಚು ಗಮನವಹಿಸಬೇಕು. ತೂಕ ಕಡಿಮೆ ಮಾಡಿಕೊಳ್ಳುವತ್ತ ಹೆಚ್ಚು ಗಮನ ವಹಿಸಿ ಆಹಾರ ಸೇವಿಸಬೇಕು.

ಇದರಿಂದ ಹೆರಿಗೆ ಸಮಯದಲ್ಲಿ ಸಿಸೆರಿಯನ್ ಆಗುವ ಸಾಧ್ಯತೆಯನ್ನು ಕಡಿಮೆಗೊಳಿಸಬಹುದು. ಆದ್ದರಿಂದ ಗರ್ಭಧಾರಣೆಗೆ ಮುನ್ನ ಡಯಟ್ ನೊಂದಿಗೆ ಅವಶ್ಯಕ ವ್ಯಾಯಾಮ ಮಾಡಿದರೆ ಗರ್ಭಧಾರಣೆ ಮತ್ತು ಹೆರಿಗೆ ಸುಸೂತ್ರವಾಗಲು ಸಹಾಯ ಮಾಡುತ್ತದೆ.

* ಅತಿ ಕಡಿಮೆ ತೂಕ: ಕೇವಲ ತೂಕ ಹೆಚ್ಚಿದ್ದರೆ ಮಾತ್ರ ಗರ್ಭಧಾರಣೆಗೆ ತೊಂದರೆ ಉಂಟಾಗುವುದಿಲ್ಲ, ತೂಕ ಕಡಿಮೆ ಇದ್ದರೂ ಸಮಸ್ಯೆಯೇ. ಮಗುವಿನ ಬೆಳವಣಿಗೆ ತಾಯಿಯ ಆರೋಗ್ಯದ ಮೇಲೆ ಅವಲಂಬಿತವಾಗಿದೆ. ಆದರೆ ಪೋಷಕಾಂಶಗಳ ಕೊರತೆ ಮಹಿಳೆಯಲ್ಲಿ ದುರ್ಬಲತೆ ಉಂಟು ಮಾಡಿ ,ಅವಧಿಗೆ ಮುನ್ನವೇ ಹೆರಿಗೆ ಅಥವಾ ಅತಿ ಕಡಿಮೆ ತೂಕದ ಮಗುವಿನ ಜನನವಾಗಲು ಕಾರಣವಾಗುತ್ತದೆ.

ಆದ್ದರಿಂದ ಗರ್ಭಧಾರಣೆ ಮುನ್ನ ಮತ್ತು ನಂತರ, ತೂಕದ ಅಭಾವದಿಂದ ಬಳಲುತ್ತಿದ್ದವರು ಅತ್ಯಂತ ಪೌಷ್ಠಿಕಾಂಶವಿರುವ ಆಹಾರ ಸೇವನೆ ಮಾಡುವುದು ತುಂಬಾ ಮುಖ್ಯ.