ಗರ್ಭಾವಸ್ಥೆಯಲ್ಲಿ ಪಿತ್ತ ನಿವಾರಣೆ ಹೇಗೆ?

Pre Natal

oi-Sumalatha N

By Sumalatha N

Published: Monday, August 22, 2011, 17:08 [IST]

ಗರ್ಭಿಣಿಯಾದವರಿಗೆ ಆರೋಗ್ಯದಲ್ಲಿ ಏರುಪೇರಾಗುವುದು ಸಹಜ. ಅದರಲ್ಲೂ ಬೆಳಗಿನ ಜಾವ ಪಿತ್ತ, ವಾಕರಿಕೆ, ಸುಸ್ತು, ತಲೆ ಮತ್ತು ಬೆನ್ನು ನೋವು ಕಾಣಿಸಿಕೊಂಡು ತೊಂದರೆ ಕೊಡುವುದು ಸಾಮಾನ್ಯ. ಇದಕ್ಕಾಗಿ ಹೆಚ್ಚು ಮಾತ್ರೆಗಳನ್ನು ಸೇವಿಸಿದರೆ ಅದು ಮಗುವಿನ ಆರೋಗ್ಯದ ಮೇಲೆ ಕೆಟ್ಟ ಪರಿಣಾಮ ಬೀರಬಹುದು. ಆದ್ದರಿಂದ ಗರ್ಭಾವಸ್ಥೆ ಸಮಯದಲ್ಲಿ ಸುಲಭವಾಗಿ ಪಿತ್ತ ಓಡಿಸುವ ಕೆಲವು ನೈಸರ್ಗಿಕ ವಿಧಾನಗಳನ್ನು ಅನುಸರಿಸಿದರೆ ಮಗುವಿಗೂ ಒಳ್ಳೆಯದು.

ಪಿತ್ತ ಕಡಿಮೆ ಮಾಡುವ ನೈಸರ್ಗಿಕ ವಿಧಾನವನ್ನು ಇಲ್ಲಿ ತಿಳಿದುಕೊಳ್ಳಿ:

1. ಶುಂಠಿ: ಗರ್ಭಾವಸ್ಥೆ ಸಮಯದಲ್ಲಿ ಪಿತ್ತವನ್ನು ಹೋಗಲಾಡಿಸುವ ಸುಲಭ ವಿಧಾನವೆಂದರೆ ಶುಂಠಿ ಬಳಕೆ. ಶುಂಠಿ ಕಷಾಯ ಅಥವಾ ಶುಂಠಿ ಟೀ ಮಾಡಿ ಕುಡಿಯಬಹುದು. ಶುಂಠಿಯನ್ನು ಕತ್ತರಿಸಿ ನೀರಿನಲ್ಲಿ 10 ನಿಮಿಷ ಕುದಿಸಿ ಅದಕ್ಕೆ ಕೆಲವೇ ಹನಿ ನಿಂಬೆರಸ ಮತ್ತು ಸಕ್ಕರೆ ಮಿಶ್ರಣ ಮಾಡಿ ಕುಡಿದರೆ ಗರ್ಭಿಣಿಯರಲ್ಲಿ ಪಿತ್ತ ನಿವಾರಣೆ ಆಗುತ್ತದೆ.

2. ನಿಂಬೆ: ನಿಂಬೆಹಣ್ಣನ್ನು ಮೂಸುತ್ತಿದ್ದರೆ ತಲೆಸುತ್ತು, ಪಿತ್ತ ಹಾಗೂ ವಾಕರಿಕೆಯನ್ನು ತಡೆಯುತ್ತದೆ. ತುಂಬಾ ಸುಸ್ತಾದಾಗಲೂ ನಿಂಬೆ ಮೂಸಿದರೆ ಮರಳಿ ಚೈತನ್ಯ ನೀಡುತ್ತದೆ.

3. ಆಗಾಗ್ಗೆ ಅಲ್ಪಾಹಾರವಿರಲಿ: ಮೂರು ಹೊತ್ತಿನ ಊಟವನ್ನು ಹೊರತುಪಡಿಸಿ, ನಿಮ್ಮ ಹೊಟ್ಟೆ ಖಾಲಿ ಎನಿಸಿದಾಗಲೆಲ್ಲಾ ಅಲ್ಪಾಹಾರ ಸೇವಿಸುತ್ತಿರಿ. ಇದು ತಲೆಸುತ್ತು ಮತ್ತು ಪಿತ್ತವನ್ನು ಕಡಿಮೆಗೊಳಿಸಿ ಜೀರ್ಣಕ್ರಿಯೆ ಸಮಪ್ರಮಾಣದಲ್ಲಿರುವಂತೆ ನೋಡಿಕೊಳ್ಳುತ್ತದೆ.

4. ವಿಟಮಿನ್ ಬಿ 6: ಹೆರಿಗೆಗೆ ಮುನ್ನ ಅವಶ್ಯಕವಿರುವ ವಿಟಮಿನ್ ಪಟ್ಟಿಯಲ್ಲಿ ವಿಟಮಿನ್ ಬಿ 6 ಹೆಚ್ಚಿರಲಿ. ಗರ್ಭಾವಸ್ಥೆ ಸಮಯದಲ್ಲಿ ವಿಟಮಿನ್ ಬಿ 6 ದೇಹಕ್ಕೆ ಹೆಚ್ಚು ದೊರಕಿದಷ್ಟೂ ಆರೋಗ್ಯ ಸಂಬಂಧಿ ತೊಂದರೆ ಕಡಿಮೆ. ವಿಟಮಿನ್ ಬಿ 6 ಹೆಚ್ಚಿರುವ ಆಹಾರ: ಸೊಯಾಬೀನ್, ಹಸಿರು ಬಟಾಣಿ, ಹೂಕೋಸು, ದವಸಧಾನ್ಯಗಳು ಮತ್ತು ಚಿಕನ್ ಸೇವನೆ ಮಾಡಿದರೆ ವಿಟಮಿನ್ ಬಿ 6 ಹೆಚ್ಚಿನ ಪ್ರಮಾಣದಲ್ಲಿ ಸಿಗುತ್ತದೆ.

5. ಮೆಣಸು ಪುದೀನಾ ಟೀ: ಪುದೀನಾ ಮತ್ತು ಮೆಣಸನ್ನು ಸೇರಿಸಿ ಟೀ ಮಾಡಿ ಕುಡಿದರೆ ತಲೆಸುತ್ತು, ಪಿತ್ತ, ವಾಕರಿಕೆ ಕಡಿಮೆಯಾಗಿ ತಕ್ಷಣವೇ ಆರಾಮ ಒದಗಿಸುತ್ತದೆ.

ಗರ್ಭಾವಸ್ಥೆಯಲ್ಲಿ ಇಂತಹ ಸಣ್ಣ ಪುಟ್ಟ ತೊಂದರೆಗಳು ಕಾಣಿಸಿಕೊಳ್ಳುವುದು ಸಾಮಾನ್ಯ. ಆದರೆ ಅವುಗಳನ್ನು ಆಗಲೇ ನಿವಾರಿಸಿಕೊಂಡರೆ ಮುಂದೆ ಹುಟ್ಟುವ ಮಗು ಆರೋಗ್ಯಕರವಾಗಿ ಹುಟ್ಟುತ್ತದೆ.