ಕೋವಿಡ್-19 ಲಸಿಕೆ: ಲಸಿಕೆ ಹಾಕಿಸಿಕೊಂಡವರ ಸಂಪರ್ಕಕ್ಕೆ ಮಕ್ಕಳು ಬರುವುದು ಸುರಕ್ಷಿತನಾ?

ಲಸಿಕೆ ಹಾಕಿಕೊಂಡ ಇತರ ಜನರನ್ನು ಭೇಟಿ ಮಾಡಲು ಮಕ್ಕಳಿಗೆ ಅವಕಾಶ ನೀಡಬಹುದೇ?

ಕೊರೋನಾ ಲಸಿಕೆ ಹಾಕೊಂಡಿದ್ದೇವೆ ಎಂದರೆ ವ್ಯಕ್ತಿಯು ವೈರಸ್ ವಿರುದ್ಧ ರೋಗನಿರೋಧಕ ಶಕ್ತಿಯನ್ನು ಬೆಳೆಸಿಕೊಳ್ಳುತ್ತಾನೆ ಎಂದರ್ಥವೇ ಹೊರತು ಅವರು ವೈರಸ್ ಸೋಂಕಿಗೆ ಒಳಗಾಗುವುದೇ ಇಲ್ಲ ಅಥವಾ ಅವರ ಹತ್ತಿರ ವೈರಸ್ ಬರುವುದಿಲ್ಲ ಎಂದಲ್ಲ. ಲಸಿಕೆ ಪಡೆದ ನಂತರವೂ ವ್ಯಕ್ತಿಯು ಯಾವುದೇ ರೋಗಲಕ್ಷಣಗಳನ್ನು ತೋರಿಸದೇ ವೈರಸ್ ಗೆ ತುತ್ತಾಗಿರಬಹುದು. ಇದಲ್ಲದೆ, ಯಾವುದೇ ಲಸಿಕೆ ವೈರಸ್ ವಿರುದ್ಧ ಸಂಪೂರ್ಣ ರಕ್ಷಣೆ ನೀಡುತ್ತದೆ ಎಂದು ಸಾಬೀತಾಗಿಲ್ಲ. ಪ್ರಸ್ತುತ ನೀಡಲಾಗುವ ಲಸಿಕೆಯ ಪರಿಣಾಮಕಾರಿತ್ವವು ಸುಮಾರು 80% ರಿಂದ 90% ರವರೆಗೆ ಇದೆ ಅಷ್ಟೇ.

ಎರಡನೆಯದಾಗಿ, ವೈರಸ್ ಎಲ್ಲಿಯಾದರೂ ಇರಬಹುದು. ಆಡುವಾಗ ಅಥವಾ ಇತರ ಚಟುವಟಿಕೆಯಲ್ಲಿ ತೊಡಗಿರುವಾಗ ಮಕ್ಕಳಿಗೆ ಸುಲಭವಾಗಿ ಅಂಟಿಕೊಳ್ಳಬಹುದು. ಆದ್ದರಿಂದ, ಸದ್ಯಕ್ಕೆ ಸಾಮಾಜಿಕ ದೂರವನ್ನು ಕಾಪಾಡಿಕೊಳ್ಳುವುದು, ನಿಯಮಿತವಾಗಿ ಕೈ ತೊಳೆಯುವುದನ್ನು ಅಭ್ಯಾಸ ಮಾಡುವುದು, ಮಾಸ್ಕ್ ಧರಿಸುವುದು ಮತ್ತು ಒಂದೇ ಮನೆಯಲ್ಲಿ ಒಟ್ಟಿಗೆ ವಾಸಿಸದ ಜನರಿಂದ ದೂರವಿರುವುದು ಉತ್ತಮ.

ನಿಮ್ಮ ಮಕ್ಕಳು ಎಷ್ಟು ಸಮಯ ಅಂತರವನ್ನು ಕಾಪಾಡಿಕೊಳ್ಳಬೇಕು?

ಇತರರಿಗೆ ಲಸಿಕೆ ಹಾಕಿದಾಗ ಮಕ್ಕಳು ಸಾಮಾಜಿಕ ದೂರವನ್ನು ಕಾಪಾಡಿಕೊಳ್ಳುವುದು ಬಹಳ ಮುಖ್ಯ. ಜನರಿಗೆ ನೀಡಲಾಗುವ ಲಸಿಕೆಗಳು ವೈರಸ್‌ನಿಂದ ಜೀವನಪೂರ್ತಿ ರಕ್ಷಣೆ ನೀಡುವುದೆಂದು ಖಚಿತವಿಲ್ಲ. ಕೊರೋನಾಕ್ಕೆ ಸರಿಯಾದ ಲಸಿಕೆ ಹಾಗೂ ವೈದ್ಯಕೀಯ ಚಿಕಿತ್ಸೆ ಇನ್ನೂ ಅಭಿವ್ಋದ್ಧಿಯ ಹಂತದಲ್ಲಿ ಇರುವುದರಿಂದ ಮಕ್ಕಳ ವಿಚಾರದಲ್ಲಿ ಯಾವುದೇ ಆತುರದ ನಿರ್ಧಾರ ಬೇಡ. ಆದ್ದರಿಂದ ಅಲ್ಲಿ ತನಕ ಕೊರೋನಾದ ಮಾರ್ಗಸೂಚಿಗಳನ್ನು ಅನುಸರಿಸುವುದು ಮುಖ್ಯ. ಲಸಿಕೆಯು ಲಸಿಕೆ ಪಡೆದುಕೊಂಡವರನ್ನಷ್ಟೇ ರಕ್ಷಿಸುತ್ತದೆ ಹೊರತು ಅವರ ಸುತ್ತ ಮುತ್ತಲಿನ ಜನರನ್ನಲ್ಲ.

ಲಸಿಕೆ ಹಾಕಿಕೊಂಡ ವ್ಯಕ್ತಿಯು ವೈರಸ್‌ ಹರಡಬಹುದು:

ಕೊರೋನಾ ವೈರಸ್ ಗಾಳಿ ಮತ್ತು ವಿವಿಧ ಮೇಲ್ಮೈಗಳಲ್ಲಿ ಹಲವಾರು ದಿನಗಳವರೆಗೆ ಬದುಕಬಲ್ಲದು. ಸೋಂಕಿತ ವ್ಯಕ್ತಿಯೊಂದಿಗೆ ಮಾತನಾಡುವಾಗ ಅಥವಾ ಕಲುಷಿತ ಜಾಗವನ್ನು ಸ್ಪರ್ಶಿಸುವ ಮೂಲಕ ಲಸಿಕೆ ಹಾಕಿಕೊಂಡ ವ್ಯಕ್ತಿಯು ವೈರಸ್‌ನೊಂದಿಗೆ ಸಂಪರ್ಕಕ್ಕೆ ಬಂದರೆ, ಅವರು ವೈರಸ್‌ನ್ನು ತಮ್ಮ ಮೂಗಿನ ಮೂಲಕ ಸಾಗಿಸಬಹುದು. ಲಸಿಕೆ ಹಾಕಿದರಿಂದ ಅವರು ಯಾವುದೇ ರೋಗಲಕ್ಷಣಗಳನ್ನು ಬೆಳೆಸಿಕೊಳ್ಳದಿರಬಹುದು ಆದರೆ ಅವರು ಇತರರಿಗೆ ರವಾನಿಸಬಹುದು.