ಸಿಸೇರಿಯನ್ ನಂತರ ತೊಂದರೆ ಖಚಿತ

ಸಾಮಾನ್ಯ ಹೆರಿಗೆಯಾಗಿ ತಾಯಿ-ಮಗು ಕ್ಷೇಮವಾಗಿ ಬಂದರೆ ಸಾಕು ಎಂದು ಮನೆಯವರು ಬಯಸುತ್ತಾರೆ. ಆದರೆ ಕೆಲವೊಮ್ಮೆ ಹೆರಿಗೆಯ ಸಂದರ್ಭದಲ್ಲಿ ತುಂಬಾ ಕಷ್ಟವಾದರೆ ಶಸ್ತ್ರ ಚಿಕಿತ್ಸೆ ಅನಿವಾರ್ಯ.

ಆದರೆ ಸಾಮಾನ್ಯ ಹೆರಿಗೆಯಲ್ಲಿ 36 ಗಂಟೆ ಅಥವಾ ಅದಕ್ಕಿಂತ ಸ್ವಲ್ಪ ಕಡಿಮೆ ಕಾಲ ನೋವು ಅನುಭವಿಸಬೇಕಾಗುತ್ತದೆ. ಆದ್ದರಿಂದ ಅದನ್ನು ಸಹಿಸಲು ಸಾಧ್ಯವಿಲ್ಲವೆಂದು ಅನೇಕ ಜನರು ಸಿಸೇರಿಯನ್ ನಿಂದ ಹೆರಿಗೆ ಆಗಲು ಬಯಸುತ್ತಾರೆ. ಈ ರೀತಿ ಹೆರಿಗೆಗೆ ಸಿಸೇರಿಯನ್ ವಿಧಾನವನ್ನು ಬಳಸುವುದರ ಒಳಿತು ಕೆಡಕುಗಳ ಬಗ್ಗೆ ತಿಳಿದುಕೊಳ್ಳೋಣ.

ಸಾಮಾನ್ಯ ಹೆರಿಗೆಯಲ್ಲಿ ಅಧಿಕ ಕಾಲ ನೋವನ್ನು ಸಹಿಸ ಬೇಕಾಗುತ್ತದೆ, ಆದರೆ ಹೆರಿಗೆ ಆದ ಸ್ವಲ್ಪ ದಿನದಲ್ಲಿ ಮೊದಲಿನಂತೆ ಕೆಲಸವನ್ನು ಮಾಡಬಹುದಾಗಿದೆ.

ಆದರೆ ಸಿಸೇರಿಯನ್ ನಂತರ ತುಂಬಾ ತೊಂದರೆ ಎದುರಾಗುತ್ತದೆ, ಹೆಚ್ಚಿನ ವಿಶ್ರಾಂತಿಯನ್ನು ತೆಗೆದು ಕೊಳ್ಳಬೇಕಾಗುತ್ತದೆ. ಅಲ್ಲದೆ ದಿನ ನಿತ್ಯದ ಕಾರ್ಯ ಚಟುವಟಿಕೆಗಳಿಗೂ ಸಾಕಷ್ಟು ತೊಂದರೆ ಉಂಟಾಗುವುದು.

ಇದರಲ್ಲಿ ದೇಹದ ಪೋಷಣೆಯ ಬಗ್ಗೆ ಗಮನಕೊಡುವುದಕ್ಕಿಂತ ಗಾಯವನ್ನು ಒಣಗಿಸುವುದರ ಬಗ್ಗೆ ಹೆಚ್ಚಿನ ಗಮನವನ್ನು ಕೊಡಬೇಕಾಗುತ್ತದೆ. ಅಲ್ಲದೆ ಸಾಮಾನ್ಯ ಹೆರಿಗೆಗೆ ಹೋಲಿಸಿದರೆ ಇದಕ್ಕೆ ತಗುಲುವ ವೆಚ್ಚ ಕೂಡ ಅಧಿಕ.

ಆದ್ದರಿಂದ ಸಾಮಾನ್ಯ ಹೆರಿಗೆಯಲ್ಲಿ ಹೆಚ್ಚಿನ ನೋವು ತಿನ್ನಬೇಕಾಗುತ್ತದೆ ಎಂದು ಶಸ್ತ್ರ ಚಿಕಿತ್ಸೆಯ ವಿಧಾನವನ್ನು ಅನುಸರಿಸದೆ, ಹೆರಿಗೆಯಲ್ಲಿ ತುಂಬಾ ಕಷ್ಟವಾದಾಗ ಮಾತ್ರ ಈ ರೀತಿಯ ಹೆರಿಗೆಯನ್ನು ಮಾಡಿಕೊಳ್ಳುವುದು ಒಳ್ಳೆಯದು.