ನಿಮ್ಮ ಮಗುವಿನ ಇಚ್ಛಾಶಕ್ತಿ ಬಲವಾಗಿದ್ದರೆ ಪೋಷಕರಿಗೆ ತಲೆನೋವು ಗ್ಯಾರಂಟಿ!

ಪ್ರತಿಯೊಬ್ಬ ತಂದೆ-ತಾಯಿಗೂ ತನ್ನ ಮಗುವನ್ನು ಸ್ಟ್ರಾಂಗ್ ಆಗಿ ಬೆಳೆಸಬೇಕು. ಆ ಮಗುವಿನಲ್ಲಿ ನಾಯಕತ್ವದ ಗುಣಗಳು ಇರಬೇಕು. ಎಂತಹ ಪರಿಸ್ಥಿತಿಯಲ್ಲೂ ಆತ ಜಗ್ಗಬಾರದು ಎನ್ನುವ ಆಸೆಯಂತೂ ಖಂಡಿತ ಇದ್ದೇ ಇರುತ್ತದೆ. ಕೆಲವೊಂದು ಸಲ ಏನಾಗುತ್ತೆ ಅಂದರೆ ಮಕ್ಕಳನ್ನು ನಾವು ಸ್ಟ್ರಾಂಗ್ ಆಗಿ ಬೆಳೆಸೋದಕ್ಕೆ ಹೋಗಿ ಪಚೀತಿಗೆ ಸಿಲುಕುತ್ತೇವೆ. ಯಾಕಂದ್ರೆ ಅವರು ಹುಟ್ಟು ಹಠಮಾರಿಗಳಾಗಿ ಬದಲಾಗುತ್ತಾರೆ. ಅಷ್ಟಕ್ಕು ನಿಮ್ಮ ಮಗುವನ್ನು ಬಲವಾದ ಇಚ್ಛಾಶಕ್ತಿಯುಳ್ಳ ಮಗುವನ್ನು ಬೆಳೆಸೋದು ಹೇಗೆ? ಇದರಿಂದ ಪೋಷಕರಿಗೆ ಯಾವ ರೀತಿಯ ಸವಾಲು ಎದುರಾಗಲಿದೆ ಅನ್ನೋದನ್ನು ತಿಳಿಯೋಣ.

1. ಅವರ ಕಾಲ ಮೇಲೆ ನಿಲ್ಲುತ್ತಾರೆ
ಮಕ್ಕಳಿಗೆ ಚಿಕ್ಕಂದಿನಿಂದಲೇ ಹಿಂಜರಿಕೆ ಅನ್ನೋದು ಬರಲೇಬಾರದು. ಹೀಗಾಗಿ ಪೋಷಕರು ಚಿಕ್ಕಂದಿನಲ್ಲೇ ಮಕ್ಕಳಲ್ಲಿ ಬಲವಾದ ಇಚ್ಛಾಶಕ್ತಿಯನ್ನು ತುಂಬಬೇಕು. ಹೀಗಾದಾಗ ಅವರು ನಡೆಯುವ ದಾರಿಯಲ್ಲಿ ಯಾವುದೇ ರೀತಿ ಅಡೆ-ತಡೆಗಳು ಬಂದರೂ ಕೂಡ ಅವರು ಅದನ್ನು ಮೆಟ್ಟಿ ನಿಲ್ಲುತ್ತಾರೆ. ಯಾವ ಕಾರಣಕ್ಕೂ ಮುಂದಿಟ್ಟ ಹೆಜ್ಜೆಯನ್ನು ಹಿಂದಕ್ಕಿಡೋದಿಲ್ಲ. ಇನ್ನೂ ಕೆಲವೊಂದು ಸಲ ಬಲವಾದ ಇಚ್ಛಾಶಕ್ತಿ ಇರುವವರು ಹಠಮಾರಿಗಳಾಗುವ ಸಾಧ್ಯತೆಯಿದೆ. ಹೀಗಾಗಿ ಪೋಷಕರು ಈ ಬಗ್ಗೆ ಕೂಡ ಗಮನ ಹರಿಸೋದು ಮುಖ್ಯ.

2. ಮಕ್ಕಳು ವಿವರಣೆ ಕೇಳುತ್ತಾರೆ
ನಿಮ್ಮ ಮಗುವನ್ನು ನೀವು ಬಲವಾದ ಇಚ್ಛಾಶಕ್ತಿಯಿಂದ ಬೆಳೆಸಿದರೆ ಕೆಲವೊಂದು ಸವಾಲುಗಳನ್ನು ಪೋಷಕರು ಕೂಡ ಎದುರಿಸಬೇಕಾಗುತ್ತದೆ. ನಿಮ್ಮ ಮಕ್ಕಳು ಯಾವುದೇ ವಿಚಾರವಾದರೂ ಅಷ್ಟೊಂದು ಸುಲಭವಾಗಿ ಕಾಂಪ್ರಮೈಸ್ ಆಗೋದಿಲ್ಲ. ಪ್ರತಿಯೊಂದಕ್ಕೂ ನೀವು ವಿವರಣೆ ಕೊಡಲೇಬೇಕು. ಪೋಷಕರ ಬಳಿ ತಪ್ಪು-ಸರಿಗಳ ಬಗ್ಗೆ ಪ್ರಶ್ನೆ ಮಾಡುತ್ತಾರೆ. ಇದಕ್ಕೆಲ್ಲಾ ಉತ್ತರಿಸೋದಕ್ಕೆ ಪೋಷಕರು ಸಿದ್ಧರಾಗಿರಬೇಕು.

3. ಅವರ ಅಭಿಪ್ರಾಯಗಳನ್ನು ವ್ಯಕ್ತ ಪಡಿಸುತ್ತಾರೆ
ನಿಮ್ಮ ಮಗುವಿನಲ್ಲಿ ಉತ್ತಮ ನಾಯಕತ್ವದ ಗುಣಗಳು ಬೆಳೆಯಬೇಕೆಂದು ನೀವು ಇಷ್ಟ ಪಡುತ್ತೀರಿ. ಅವರನ್ನು ಬಲವಾದ ಇಚ್ಛಾಶಕ್ತಿಯುಳ್ಳ ಮಗುವನ್ನಾಗಿ ಕೂಡ ನೀವು ಬೆಳೆಸುತ್ತೀರಿ. ಇಂತಹ ಮಕ್ಕಳು ಮನೆಯ ಹೊರಗಡೆ ಮಾತ್ರವಲ್ಲ ಮನೆಯ ಒಳಗಡೆ ಕೂಡ ತಮ್ಮ ಅಭಿಪ್ರಾಯವನ್ನು ವ್ಯಕ್ತ ಪಡಿಸೋದಕ್ಕೆ ಇಷ್ಟ ಪಡುತ್ತಾರೆ. ಇವರನ್ನು ನೀವು ಸುಮ್ಮನಿರು ಎಂದು ಬಾಯಿ ಮುಚ್ಚಿಸೋದಕ್ಕೆ ಖಂಡಿತ ಸಾಧ್ಯವಿಲ್ಲ. ಒಂದು ವಿಚಾರದ ಬಗ್ಗೆ ನಿಖರವಾಗಿ ಅಲೋಚಿಸಿ ತಮ್ಮ ಅಭಿಪ್ರಾಯ ಹೇಳುತ್ತಾರೆ. ಇದನ್ನು ಪೋಷಕರು ಎದುರಿಸಲೇಬೇಕು.

4. ಬಲವಾದ ಇಚ್ಛಶಕ್ತಿಯುಳ್ಳವರಿಗೆ ತಾಳ್ಮೆ ಕಡಿಮೆ ಇರುತ್ತದೆ
ಯಾರಲ್ಲಿ ಬಲವಾದ ಇಚ್ಛಾಶಕ್ತಿ ಇರುತ್ತದೆಯೋ ಅವರಿಗೆ ತಾಳ್ಮೆ ಕಡಿಮೆ. ಇಂತಹ ಮಕ್ಕಳು ಹೆಚ್ಚು ಆಲೋಚನೆ ಮಾಡೋದಿಲ್ಲ. ಬದಲಾಗಿ ಆತುರದಲ್ಲಿ ನಿರ್ಧಾರ ತೆಗೆದುಕೊಳ್ಳುತ್ತಾರೆ. ಅವರು ತಮ್ಮ ನಿರ್ಧಾರದಿಂದ ಮುಂದೆ ಯಾವ ರೀತಿಯ ಪರಿಣಾಮಗಳಾಗುತ್ತೋ ಅನ್ನೋದ್ರ ಬಗ್ಗೆ ಚಿಂತಿಸೋದಕ್ಕೆ ಹೋಗೋದಿಲ್ಲ. ಹೀಗಾಗಿ ಇಂತಹ ಸಮಯದಲ್ಲಿ ಪೋಷಕರು ಅವರಿಗೆ ತಾಳ್ಮೆಯಿಲ್ಲ ಎಂದು ಅವರನ್ನು ದೂಷಿಸೋದಕ್ಕೆ ಹೋಗಬಾರದು. ಬದಲಾಗಿ ಶಾಂತಿಯಿಂದ ಅವರ ತಪ್ಪಿನ ಬಗ್ಗೆ ಅವರಲ್ಲಿ ಅರಿವು ಮೂಡಿಸಬೇಕು.

5. ಅವರು ತಮ್ಮ ನಿಯಮಗಳನ್ನೇ ಮಾಡುತ್ತಾರೆ
ನಿಮ್ಮ ಬಲವಾದ ಇಚ್ಛಾಶಕ್ತಿಯುಳ್ಳ ಮಗು ಅದರದ್ದೇ ಆದ ನಿಯಮಗಳನ್ನು ಮಾಡಿಕೊಳ್ಳುತ್ತದೆ. ಬೇರೆಯವರಿಗಾಗಿ ಕಾಯೋದಿಲ್ಲ. ಯಾವ ನಿಯಮ ಅವರಿಗೆ ಸರಿ ಹೊಂದುತ್ತದೆಯೋ ಅಂತಹ ನಿಯಮಗಳನ್ನು ಮಾತ್ರ ಅವರು ಪಾಲಿಸುತ್ತಾರೆ. ಹೀಗಾಗಿ ಪೋಷಕರು ಇಂತಹ ಮಕ್ಕಳನ್ನು ತಮ್ಮ ಚೌಕಟ್ಟಿನೊಳಗಡೆ ಇಟ್ಟುಕೊಳ್ಳೋದಿಕ್ಕೆ ಆಗೋದಿಲ್ಲ.

ಪೋಷಕರು ಮಾಡಬೇಕಾದುದು ಇಷ್ಟೇ, ನಿಮ್ಮ ಮಕ್ಕಳ ಮುಕ್ತ ಚಿಂತನೆ ಮತ್ತು ನಾವೀನ್ಯತೆಯನ್ನು ಉತ್ತೇಜಿಸಬೇಕು. ನಿಮ್ಮ ಮಗುವಿಗೆ ತಮ್ಮದೇ ಆದ ನಿರ್ಧಾರಗಳನ್ನು ಮತ್ತು ಆಯ್ಕೆಗಳನ್ನು ಮಾಡಲಿ. ನೀವು ಅವರಿಗೆ ಮಾರ್ಗದರ್ಶಕರಾಗಿ ಇದ್ದರಷ್ಟೇ ಸಾಕು. ಅದನ್ನು ಬಿಟ್ಟು ನೀವು ಅವರ ಆಲೋಚನೆಗೆ ಅಡ್ಡಿಯಾದರೆ ಅದರಿಂದ ಅವರಿಗೆ ಕಿರಿಕಿರಿ ಉಂಟಾಗಬಹುದು.

6. ಶಿಕ್ಷೆ ಕೊಟ್ಟು ಅವರನ್ನು ಬದಲಾಯಿಸಲು ಸಾಧ್ಯವಿಲ್ಲ
ಸಾಮಾನ್ಯ ಮಕ್ಕಳನ್ನು ನೀವು ಶಿಕ್ಷೆ ಕೊಟ್ಟು ದಾರಿಗೆ ತರಬಹುದು. ಆದರೆ ಬಲವಾದ ಇಚ್ಛಾಶಕ್ತಿಯುಳ್ಳ ಮಕ್ಕಳು ಶಿಕ್ಷೆ ಕೊಟ್ಟರೆ ಬಗ್ಗುವವರಲ್ಲ. ಅವರು ಮಾಡಿದ್ದು ತಪ್ಪು ಎಂದು ಅವರಿಗೆ ಅನ್ನಿಸೋವರೆಗೂ ಅವರು ನಿಮ್ಮ ಮಾತನ್ನು ಕೇಳೋದೇ ಇಲ್ಲ. ಹೀಗಾಗಿ ಅವರ ಜೊತೆಗೆ ಸಂವಹನ ನಡೆಸಿ. ಸಮಸ್ಯೆಗೆ ಪರಿಹಾರ ಕಂಡುಕೊಳ್ಳುವುದು ಉತ್ತಮ.

ಪೋಷಕರು ಮಕ್ಕಳಿಗೆ ಬಲವಾದ ಇಚ್ಛಾಶಕ್ತಿಯನ್ನು ತುಂಬುವುದು ಮಾತ್ರವಲ್ಲದೇ ಇದರ ಜೊತೆಗೆ ಅಂತಹ ಮಕ್ಕಳನ್ನು ನಿಭಾಯಿಸೋದು ಹೇಗೆ ಅನ್ನೋದನ್ನು ಕೂಡ ಕಲಿತಿರಬೇಕು. ಇಲ್ಲದಿದ್ದರೆ ಇದರಿಂದ ನೀವು ಸಮಸ್ಯೆ ಎದುರಿಸಬೇಕಾದಿತು.