ಮಕ್ಕಳಲ್ಲಿ ಮಂಕಿಪಾಕ್ಸ್ ಲಕ್ಷಣಗಳೇನು? ತಡೆಗಟ್ಟಲು ಮುನ್ನೆಚ್ಚರಿಕೆ ಕ್ರಮಗಳೇನು?

ಮಕ್ಕಳಲ್ಲಿ ರೋಗ ಲಕ್ಷಣಗಳು ಚಿಕನ್‌ಪಾಕ್ಸ್‌ನಂತೆಯೇ ಇರುತ್ತದೆ

ಮಕ್ಕಳಲ್ಲಿ ಮಂಕಿ ವೈರಸ್‌ ಚಿಕನ್‌ಪಾಕ್ಸ್‌ನಂತೆ ಹೆಚ್ಚಿನ ಸಂಖ್ಯೆಯಲ್ಲಿ ಕಂಡು ಬರುವ ಸಾಧ್ಯತೆ ಕಡಿಮೆ ಎಂದು ತಜ್ಞರು ಹೇಳುತ್ತಿದ್ದಾರೆ.

ಮಂಕಿಪಾಕ್ಸ್‌ ಬಗ್ಗೆ ಆತಂಕ ಬೇಡ

ಆರೋಗ್ಯ ತಜ್ಞರು 'ಮಂಕಿಪಾಕ್ಸ್‌ ಕುರಿತು ಜನರು ತುಂಬಾ ಆತಂಕ ಪಡಬೇಕಾಗಿಲ್ಲ, ಇದು ಕೋವಿಡ್ 19ನಂಥ ಕಾಯಿಲೆ ಅಲ್ಲ' ಎಂದು ಹೇಳುತ್ತಿದ್ದಾರೆ. ಮಂಕಿಪಾಕ್ಸ್‌ನಿಂದ ಆರೋಗ್ಯ ಸ್ಥಿತಿ ಗಂಭೀರವಾಗುವ `ಸಾಧ್ಯತೆ ಶೇ.1ರಷ್ಟಿದೆ.

ಮಂಕಿಪಾಕ್ಸ್‌ ಲಕ್ಷಣಗಳೇನು?

ಮಂಕಿಪಾಕ್ಸ್‌ ಪ್ರಮುಖ ಲಕ್ಷಣವೆಂದರೆ ಜ್ವರ ಹಾಗೂ ಮೈಕೈ ನೋವು. ಈ ಮಂಕಿಪಾಕ್ಸ್‌ ತಗುಲಿದಾಗ ಪ್ರಮುಖವಾಗಿ ದುಗ್ಧರಸ ಗ್ರಂಥಿಯ ಊತ ಕಂಡುಬರುವುದು. ನಂತರ ಮುಖ ಹಾಗೂ ಕುತ್ತಿಗೆ ಭಾಗದಲ್ಲಿ ಗುಳ್ಳೆಗಳು ಏಳುವುದು, ಪ್ರಾರಂಭದಲ್ಲಿ ಚುಕ್ಕಿ-ಚುಕ್ಕಿಯಾಗಿ ಕಾಣುವ ಗುಳ್ಳೆಗಳು ದೊಡ್ಡದಾಗಿ ಕೀವು ತುಂಬಿಕೊಳ್ಳುವುದು. ನಂತರ ಒಣಗಿ ಬಿದ್ದು ಹೋಗುತ್ತೆ. ಈ ರೋಗ ಲಕ್ಷಣಗಳು 2-4 ವಾರಗಳ ಇರುತ್ತದೆ.

ಮಕ್ಕಳಲ್ಲಿ ನೀರಿನಂಶ ಕಡಿಮೆಯಾಗದಂತೆ ನೋಡಿಕೊಳ್ಳಿ

ಮಂಕಿ ವೈರಸ್‌ ತಗುಲಿ 3-4 ದಿನಗಳಲ್ಲಿ ಲಕ್ಷಣಗಳು ಕಂಡು ಬರುವುದು, ಮಕ್ಕಳಿಗೆ ಬಂದರೆ ಮಕ್ಕಳು ಬೇಗನೆ ಸುಸ್ತಾಗುತ್ತಾರೆ. ಮಕ್ಕಳಲ್ಲಿ ತಲೆನೋವಿನ ಸಮಸ್ಯೆ ಕಂಡು ಬರುವುದು ಕಡಿಮೆ, ಆದರೆ ಇತರ ಲಕ್ಷಣಗಳು ಕಂಡು ಬರುವುದು. ಮಕ್ಕಳ ದೇಹದಲ್ಲಿ ನೀರಿನಂಶ ಕಡಿಮೆಯಾಗದಂತೆ ನೋಡಿಕೊಳ್ಳುವುದು ಮುಖ್ಯವಾಗಿದೆ.

ಮಂಕಿಪಾಕ್ಸ್ ತಡೆಗಟ್ಟಲು ಮುನ್ನೆಚ್ಚರಿಕೆ ಕ್ರಮಗಳೇನು?

* ಪ್ರಮುಖವಾಗಿ ಕೈಗಳ ಸ್ವಚ್ಛತೆ ಕಡೆ ಗಮನ ನೀಡಬೇಕು(ಆಗಾಗ ಸೋಪು ಹಚ್ಚಿ ಕೈ ತೊಳೆಯಿರಿ)

* ಪ್ರಾಣಿಗಳಿಂದ ಮನುಷ್ಯರಿಗೆ ಹರಡುವುದನ್ನು ತಡೆಗಟ್ಟಲು ಸೋಂಕು ತಗುಲಿರುವ ಪ್ರಾಣಿಗಳನ್ನು ಬರಿಗೈಯಲ್ಲಿ ಮುಟ್ಟುವುದು ಅವುಗಳನ್ನು ಆರೈಕೆ ಮಾಡುವುದು ಮಾಡಬೇಡಿ.

* ಮಾಂಸವನ್ನು ಚೆನ್ನಾಗಿ ಬೇಯಿಸಿ ತಿನ್ನಿ

* ವೈರಸ್‌ ತಗುಲಿರುವ ವ್ಯಕ್ತಿ ಅಥವಾ ವ್ಯಕ್ತಿಯ ಮೈ ಮೇಲೆ ಗುಳ್ಳೆಗಳು ಕಾಣಿಸಿಕೊಂಡರೆ ಅಂತರ ಕಾಯ್ದುಕೊಳ್ಳಿ.

* ಅವರ ಮಲ, ಮೂತ್ರ, ದೇಹದ ದ್ರವ ತಾಗದಂತೆ ಎಚ್ಚರವಹಿಸಿ.