ಅಧಿಕ ಮಾರ್ಕ್ಸ್ ಬಂದರೆ ಮಾತ್ರ ಉತ್ತಮ ಭವಿಷ್ಯವೇ?

Kids

oi-Reena

By Hema S

Updated: Monday, May 6, 2013, 15:29 [IST]

ಇಂದು ಎಸ್. ಎಸ್ . ಎಲ್. ಸಿ ಮತ್ತು ಪಿ. ಯು. ಸಿ ಮಕ್ಕಳ ಫಲಿತಾಂಶ ತಿಳಿಯುವ ದಿನ. ವಿದ್ಯಾರ್ಥಿಗಳಲ್ಲಿ ಮಾತ್ರವಲ್ಲ, ಪೋಷಕರಲ್ಲಿ ಫಲಿತಾಂಶ ತಿಳಿಯುವ ಕಾತರ. ಕೆಲವರಿಗೆ ಪಾಸಾಗುತ್ತೇನೆ ಎಂಬ ದೃಢ ವಿಶ್ವಾಸ , ಆದರೆ ಮಾರ್ಕ್ಸ್ ಎಷ್ಟು ದೊರೆಯಬಹುದೆಂಬ ಗೊಂದಲ, ಇನ್ನು ಕೆಲವರಿಗೆ ಪಾಸಾದರೆ ಸಾಕು ಎನ್ನುವ ಮನೋಭಾವ. ಅಂತೂ ಎಲ್ಲರ ಕುತೂಹಲಕ್ಕೆ ಇವತ್ತು ತೆರೆ ಬೀಳಲಿದೆ.

ಪ್ರತೀವರ್ಷ ಫಲಿತಾಂಶ ಬಂದಾಗ ಪಾಸ್ ಆಗಲಿಲ್ಲವೆಂದೂ, ಯೋಚಿಸಿದಷ್ಟು ಮಾರ್ಕ್ಸ್ ಬಂದಿಲ್ಲವೆಂದೋ ಪ್ರಾಣಕ್ಕೆ ಅಪಾಯ ತಂದುಕೊಳ್ಳುವ ಕೆಲವು ಮಕ್ಕಳನ್ನು ನೋಡುತ್ತೇವೆ. ಆದ್ದರಿಂದ ಇವತ್ತು ಪೋಷಕರು ತಮ್ಮ ಮಕ್ಕಳ ಕಡೆ ಸ್ವಲ್ಪ ಹೆಚ್ಚಿನ ಗಮನ ಕೊಡುವುದು ಒಳ್ಳೆಯದು. ಪೋಷಕರು ಅಷ್ಟೇ ಮಕ್ಕಳಿಗೆ ಒಳ್ಳೆಯ ಮಾರ್ಕ್ಸ್ ಬರದಿದ್ದರೆ ಅವರನ್ನು ಬೈಯ್ಯುವುದು, ಹೊಡೆಯುವುದು ಮಾಡದಿರುವುದು ಒಳ್ಳೆಯದು. ಒಳ್ಳೆಯ ಅಂಕ ದೊರೆಯಲಿಲ್ಲವೆಂದು ಮಕ್ಕಳು ಮಾನಸಿಕವಾಗಿ ನೊಂದಿರುತ್ತಾರೆ, ಇದರ ಜೊತೆಗೆ ಪೋಷಕರ ವಾಕ್ ಪ್ರಹಾರವನ್ನು ಸಹಿಸಿಕೊಳ್ಳಲು ಆ ಮನಸ್ಸು ಸಿದ್ಧವಿರುವುದಿಲ್ಲ. ಒಳಿತು-ಕೆಡುಕಗಳ ಬಗ್ಗೆ ಯೋಚನೆ ಮಾಡುವ ಬುದ್ದಿಯೂ ಈ ಹದಿಹರೆಯದ ಪ್ರಾಯದ ಮಕ್ಕಳಲ್ಲಿ ಇರುವುದಿಲ್ಲ.

ತುಂಬಾ ಫೀಸ್ ತೆತ್ತು, ಮಕ್ಕಳಿಗೆ ಏನು ಬೇಕೋ ಅದನ್ನೆಲ್ಲಾ ತೆಗೆದುಕೊಟ್ಟು ಓದಲು ಕಳುಹಿಸಿರುತ್ತೀರಿ. ನಿಮ್ಮ ಮಕ್ಕಳು ಒಳ್ಳೆಯ ಅಂಕ ತೆಗೆಯಬೇಕೆಂಬ ಆಸೆ ಪೋಷಕರಲ್ಲಿರುವುದು ಸಹಜ. ಆದರೆ ಮಕ್ಕಳು ಒಳ್ಳೆಯ ಅಂಕ ತೆಗೆಯದಿದ್ದರೆ ಅದಕ್ಕಾಗಿ ದುಃಖಿಸಿಕೊಂಡು ಕೂರುವ ಬದಲು, ಅವರ ಆಸಕ್ತಿ ತಿಳಿದು, ಅವರನ್ನು ಪ್ರೋತ್ಸಾಹಿಸುವುದು ಒಳ್ಳೆಯದು.

ಉತ್ತಮ ಅಂಕ ತೆಗೆದರೆ ಮಾತ್ರ ಒಳ್ಳೆಯ ಹುದ್ದೆ ಸಿಗುತ್ತದೆ ಎಂದು ಹೇಳಲು ಸಾಧ್ಯವಿಲ್ಲ. ಒಳ್ಳೆಯ ಕಮ್ಯೂನಿಕೇಷನ್ ಸ್ಕಿಲ್, ತಾಂತ್ರಿಕ ಕೌಶಲ್ಯ, ಪ್ರತಿಭೆಯಿದ್ದರೆ, ಬದುಕುವ ಛಲವಿದ್ದರೆ ಕೆಲಸ ಸಿಗುವುದು ಕಷ್ಟವೇನಲ್ಲ, ಆದ್ದರಿಂದ ಅದರತ್ತ ಮಕ್ಕಳನ್ನು ತಯಾರು ಮಾಡಿ. ಆದ್ದರಿಂದ ಮಾರ್ಕ್ಸ್ ಹೆಚ್ಚು ತೆಗೆದಿಲ್ಲ ಅಂತ ಬೈಯಲು ಹೋಗಬೇಡಿ, ಈಗ ಬೈಯುವುದರಿಂದ ನಿಮ್ಮ ಮಗನ/ಮಗಳ ಅಂಕವೇನು ಹೆಚ್ಚುವುದಿಲ್ಲ, ನೆನಪಿರಲಿ.