ಮಕ್ಕಳ ಬೆಳವಣಿಗೆ ಮೊಂಡ ಮಾಡುತ್ತೆ ಟಿವಿ

Kids

oi-Reena

By Hema S

Published: Thursday, December 1, 2011, 10:23 [IST]

ದೂರದರ್ಶನ ಮಕ್ಕಳ ಮೇಲೆ ಬೀರುತ್ತಿರುವ ಒಳಿತು-ಕೆಡಕು ಬಗ್ಗೆ ಸಾಕಷ್ಟು ನಡೆಯುತ್ತಲೇ ಇದೆ. ದೂರದರ್ಶನ ಮನರಂಜನೆ ಜೊತೆಗೆ ಮಾಹಿತಿಯನ್ನು ನೀಡುತ್ತದೆ. ಹಾಗಂತ ಮಕ್ಕಳು ಹೆಚ್ಚು ಟಿವಿ ನೋಡುವ ಅಭ್ಯಾಸ ಬೆಳೆಸಿಕೊಂಡರೆ ಅದು ಅವರ ದೈಹಿಕ ಮತ್ತು ಮಾನಸಿಕ ಆರೋಗ್ಯದ ಮೇಲೆ ವ್ಯತಿರಿಕ್ತ ಪರಿಣಾಮವನ್ನು ಬೀರುತ್ತದೆ.

ಮಕ್ಕಳು ಟಿವಿ ಚಟವನ್ನು ಬೆಳೆಸಿಕೊಳ್ಳಲು ಪೋಷಕರೆ ಪ್ರತ್ಯಕ್ಷವಾದ ಕಾರಣ. ಮಕ್ಕಳು ಗಲಾಟೆ ಮಾಡದೆ ಇರಲಿ ಎಂದು ತಂದು ಟಿವಿ ಮುಂದೆ ಕೂರಿಸುತ್ತಾರೆ, ಮುಂದೆ ಅದೇ ಮಕ್ಕಳಿಗೆ ಅಭ್ಯಾಸವಾಗಿ ಬಿಡುತ್ತದೆ. ಟಿವಿಯಿಂದಾಗಿ ಇತರ ಮಕ್ಕಳೊಂದಿಗೆ ಆಡಲು ಹೋಗುವುದಿಲ್ಲ, ಪಾಠದತ್ತ ಹೆಚ್ಚಿನ ಗಮನ ಹರಿಸುವುದಿಲ್ಲ ಇವೆಲ್ಲವೂ ಮಕ್ಕಳನ್ನು ಸೋಮಾರಿಗಳನ್ನಾಗಿ ಮಾಡುತ್ತದೆ.

ಮಕ್ಕಳ ಟಿವಿ ನೋಡುವ ಅಭ್ಯಾಸವನ್ನು ಕಡಿಮೆ ಮಾಡುವ ಬಗ್ಗೆ ತೀವ್ರವಾಗಿ ಯೋಚಿಸುತ್ತಿದ್ದರೆ ಈ ಕೆಳಗಿನ ಸಲಹೆಗಳನ್ನು ಪಾಲಿಸಬಹುದು.

1. ಮಗು ಹಠ ಮಾಡುವಾಗ, ಊಟ ಮಾಡದಿದ್ದಾಗ ಟಿವಿ ತೋರಿಸಿ ಸಮಧಾನ ಮಾಡುವ ಅಥವಾ ತಿನ್ನಿಸುವ ಅಭ್ಯಾಸವನ್ನು ಬೆಳೆಸಬಾರದು. ಹೀಗೆ ಮಾಡಿದರೆ ಮಗು ಬೆಳದಂತೆ ಟಿವಿ ನೋಡುವ ಅಭ್ಯಾಸ ಕೂಡ ಹೆಚ್ಚಾಗುತ್ತದೆ.

2. ಊಟದ ಸಮಯದಲ್ಲಿ ಟಿವಿಯನ್ನು ಆಫ್ ಮಾಡಬೇಕು. ರಾತ್ರಿ ಊಟದ ಸಮಯದಲ್ಲಿ ಆ ದಿನದ ತಮ್ಮ ಅನುಭವಗಳನ್ನು, ಸಂತೋಷಗಳನ್ನು ಹಂಚಿ ಕೊಳ್ಳುವುದರಿಂದ ಮನೆಯವರ ನಡುವೆ ಸಂಬಂಧ ಮತ್ತಷ್ಟು ಗಟ್ಟಿಯಾಗುತ್ತದೆ. ಅದರ ಬದಲು ಟಿವಿಗೆ ಮಾತನಾಡಲು ಅವಕಾಶಕೊಟ್ಟರೆ ಮನೆಯವರಿಗೆ ತಮ್ಮ ಭಾವನೆಗಳನ್ನು ಪರಸ್ಪರ ಹಂಚಿಕೊಳ್ಳಲು ಅವಕಾಶನೆ ಇರುವುದಿಲ್ಲ.

2. ಟಿವಿಯಲ್ಲಿ ಹಿಂಸೆಯನ್ನು ವೈಭವೀಕರಿಸಿ ತೋರಿಸುವ ಸಿನಿಮಾಗಳು ಮಕ್ಕಳ ಮನಸ್ಸಿನ ಮೇಲೆ ಕೆಟ್ಟ ಪರಿಣಾಮವನ್ನು ಬೀರುತ್ತದೆ ಎಂದು ಸಮೀಕ್ಷೆಯಿಂದ ತಿಳಿದು ಬಂದಿದೆ. ಅಂತಹ ಸಿನಿಮಾ ಅಥವಾ ಕಾರ್ಯಕ್ರಮವಿರುವ ಚಾನಲ್ ಗಳನ್ನು ಹಾಕದಂತೆ ಬ್ಲಾಕ್ ಮಾಡಬೇಕು.

3. ಪೋಷಕರು ಮಕ್ಕಳ ಬೆಡ್ ರೂಂನಲ್ಲಿ ಟಿವಿ ಕೊಡಿಸುವುದು ಪ್ರತಿಷ್ಠೆ ಸಂಕೇತ ಎಂದು ಭಾವಿಸಿದರೆ ತಪ್ಪಾದೀತು. ಹಾಗೆ ಮಾಡಿದರೆ ಮಕ್ಕಳು ಟಿವಿ ಚಟವನ್ನು ಹೆಚ್ಚು ಬೆಳೆಸಿಕೊಂಡು, ಅದು ಓದು, ವ್ಯಕ್ತಿತ್ವದ, ಮತ್ತು ದೈಹಿಕ ಆರೋಗ್ಯ ಹಾಳು ಮಾಡುತ್ತದೆ.

4. ಮಕ್ಕಳು ಅತಿ ಹೆಚ್ಚು ಟಿವಿ ನೋಡುತ್ತಿದ್ದಾರೆ ಎಂದು ಅನಿಸಿದ ತಕ್ಷಣ ಸ್ಪೋರ್ಟ್ಸ್ ಕ್ಲಬ್ ಸೇರಿಸಬೇಕು, ಕ್ರೀಡೆಯಲ್ಲಿ ಆಸಕ್ತಿ ಇಲ್ಲ ಅಂದರೆ ಸಂಗೀತ, ಡ್ಯಾನ್ಸ್ ಮುಂತಾದ ಕ್ಲಾಸ್ ಗೆ ಸೇರಿಸಬೇಕು.

5. ಮಕ್ಕಳ ಟಿವಿ ನೋಡುವ ಚಟಕ್ಕೆ ಪೋಷಕರೆ ಕಾರಣ, ಕೆಲಸದಿಂದ ಸುಸ್ತಾಗಿ ಬಂದಾಗ ಮಕ್ಕಳು ನಮಗೆ ತೊಂದರೆ ಕೊಡದ ಹಾಗೆ ಏನಾದರೂ ಮಾಡುತ್ತಿರಲಿ ಎಂಬ ಮನೋಭಾವವೆ ಇವೆಕ್ಕೆಲ್ಲಾ ಕಾರಣ. ಹಾಗೆ ಮಾಡದೆ ಮಕ್ಕಳನ್ನು ಬೇರೆ ಮಕ್ಕಳೊಂದಿಗೆ ಆಡುವಂತೆ ಪ್ರೋತ್ಸಾಹಿಸಿ ಅವರ ಗಮನವನ್ನು ಅದರತ್ತ ತಿರುಗಿಸ ಬೇಕು. ಹೀಗೆ ಮಾಡಿ ಮಕ್ಕಳ ಟಿವಿ ನೋಡುವ ಅಭ್ಯಾಸಕ್ಕೆ ಕಡಿವಾಣ ಹಾಕಬಹುದು.