ಮಕ್ಕಳ ಕೆಮ್ಮು ನಿವಾರಣೆಗೆ ಮನೆ ಮದ್ದು

ಎರಡು ವಾರಗಳಿಗಿಂತ ಮೇಲ್ಪಟ್ಟು ಕೆಮ್ಮು ಇದ್ದರೆ ಅದು ಅಪಾಯಕಾರಿ ರೋಗಗಳ ಲಕ್ಷಣ ಕೂಡ ಆಗಿರಬಹುದು. ಆಗ ತಕ್ಷಣವೆ ವೈದ್ಯರನ್ನು ಸಂಪರ್ಕಿಸಬೇಕಾಗುತ್ತದೆ. ಆದರೆ ಮಕ್ಕಳಿಗೆ ಜ್ವರವಿಲ್ಲದೆ 2-3 ದಿನದಿಂದ ಕೆಮ್ಮು ಮಾತ್ರ ಕಾಣಿಸಿಕೊಂಡರೆ, ಈ ಕೆಳಗಿನ ಸಲಹೆಗಳನ್ನು ಪಾಲಿಸಿ ಕೆಮ್ಮನ್ನು ನಿವಾರಣೆ ಮಾಡಬಹುದು.

1. ಮಕ್ಕಳಿಗೆ ಕೆಮ್ಮು ಬಂದರೆ ಸ್ವಟರ್ ಹೀಗೆ ಬೆಚ್ಚಗಿನ ಉಡುಪುಗಳನ್ನು ಧರಿಸಬೇಕು. ಏಕೆಂದರೆ ಥಂಡಿ ಗಾಳಿಗೆ ಮೈ ಒಡ್ಡಿದರೆ ಕೆಮ್ಮು ಮತ್ತಷ್ಟು ಜಾಸ್ತಿಯಾಗುವುದು.

2. ಅಮೃತಾಂಜನ ಅಥವಾ ಜಂಡೂಬಾಂಬ್ ಅನ್ನು ಮಕ್ಕಳು ಮಲಗುವ ಮುಂಚೆ ಎದೆಗೆ, ಕಿವಿ ಹತ್ತಿರ, ಬೆನ್ನಿಗೆ ಸವರ ಬೇಕು. ಇದರಿಂದ ಮಕ್ಕಳಿಗೆ ಉಸಿರಾಡಲು ತೊಂದರೆ ಉಂಟಾಗುವುದಿಲ್ಲ.

3. ಮಕ್ಕಳಿಗೆ ಕುಡಿಯಲಿಕ್ಕೆ ಬಿಸಿ ನೀರು ಕೊಡಬೇಕು, ವೈದ್ಯರ ಸಲಹೆ ಪಡೆದು ಹರ್ಬಲ್ ಟಿ ಸಹ ಕೊಡಬಹುದು.

4. ಈ ಸಂದರ್ಭದಲ್ಲಿ ಸಾಕಷ್ಟು ನೀರು ಮತ್ತು ತರಕಾರಿ ಸೂಪ್ ಕುಡಿಸಬೇಕು. ಏಕೆಂದರೆ ಶೀತ ಅಥವಾ ಕೆಮ್ಮು ಬಂದಾಗ ದೇಹದಲ್ಲಿ ನೀರಿನಂಶ ಕಡಿಮೆಯಾಗುತ್ತದೆ. ಅದರಿಂದಾಗಿ ದೇಹದ ಶಕ್ತಿ ಕುಂದುತ್ತದೆ. ಆದರೆ ನೀರಿನಂಶ ದೇಹಕ್ಕೆ ಸೇರಿದಾಗ ದೇಹದ ಸುಸ್ತು ಸ್ವಲ್ಪ ಕಡಿಮೆಯಾಗುತ್ತದೆ.

5. ಹಾಲು ಕುಡಿದ ಬಳಿಕ ಮಕ್ಕಳು ಜಾಸ್ತಿ ಕೆಮ್ಮಿದರೆ ಹಾಲನ್ನು ಸ್ವಲ್ಪ ದಿನಗಳವರೆಗೆ ಕುಡಿಯಲು ಕೊಡಬೇಡಿ. ಹಾಲಿನಿಂದ ಅಲರ್ಜಿಯಾಗಿ ಕೆಮ್ಮು ಜಾಸ್ತಿಯಾಗಬಹುದು.

6. ಮಕ್ಕಳು ಒಂದು ವರ್ಷಕ್ಕಿಂತ ದೊಡ್ಡವರಾಗಿದ್ದರೆ 2 ಕರಿಮೆಣಸನ್ನು ಪುಡಿ ಮಾಡಿ, ಅದನ್ನು 1/2 ಚಮಚ ಜೇನಿನೊಂದಿಗೆ ಬೆರೆಸಿ ಕುಡಿಸಿದರೆ ಕೆಮ್ಮು ಕಡಿಮೆಯಾಗುತ್ತದೆ.