ಅವಳಿ ಮಕ್ಕಳಿಗೆ ಎದೆಹಾಲುಣಿಸುವಾಗ ಎದುರಾಗುವ ಸವಾಲುಗಳೇನು? ಏನು ಮಾಡಿದರೆ ಒಳ್ಳೆಯದು

ಅವಳಿ ಮಕ್ಕಳಾದಾಗ ಡಬಲ್‌ ಖುಷಿ ಮಾತ್ರವಲ್ಲ ಚಾಲೆಂಜ್‌ ಕೂಡ ಡಬಲ್ ಆಗಿರುತ್ತದೆ. ಒಂದು ಮಗುವಿನ ಆರೈಕೆ ಮಾಡಿದಷ್ಟು ಸುಲಭವಲ್ಲ ಎರಡು ಮಕ್ಕಳ ಆರೈಕೆ ಮಾಡುವುದು. ಅವಳಿ ಮಕ್ಕಳಾದಾಗ ಎದುರಾಗುವ ಪ್ರಮುಖ ಸಮಸ್ಯೆಯೆಂದರೆ ಎದೆಹಾಲುಣಿಸುವುದು. 6 ತಿಂಗಳವರೆಗೆ ಮಕ್ಕಳನ್ನು ನೋಡಿಕೊಳ್ಳುವುದು ಅಂತೂ ತುಂಬಾನೇ ಕಷ್ಟ. ಅವಳಿ ಮಕ್ಕಳಿರುವವರು ಎದುರಿಸುವ ಸವಾಲುಗಳು ಹಾಗೂ ಯಾವ ಟಿಪ್ಸ್ ಸಹಾಯಕ್ಕೆ ಬರುತ್ತದೆ ಎಂದು ಹೇಳುವುದಾದರೆ

ಎರಡು ಮಗುವಿಗೆ ಒಟ್ಟಿಗೆ ಹಾಲುಣಿಸಬಹುದೇ?
ಎರಡು ಮಕ್ಕಳಿಗೆ ಒಟ್ಟಿಗೆ ಹಾಲುಣಿಸುವುದು ಸುಲಭವಲ್ಲ, ಇದಕ್ಕೆ ಗಂಡ ಅಥವಾ ಮನೆಯವರ ಸಹಾಯ ಬೇಕಾಗುತ್ತದೆ. ಎರಡು ಮಕ್ಕಳಿಗೆ ಒಟ್ಟಿಗೆ ಹಾಲುಣಿಸುವಾಗ ಬೆನ್ನುನೋವು, ಸೊಂಟ ನೋವು ಕಾಣಿಸಿಕೊಳ್ಳಬಹುದು, ಆದ್ದರಿಂದ ಇಬ್ಬರಿಗೆ ಒಟ್ಟಿಗೆ ಹಾಲುಣಿಸುವ ಬದಲಿಗೆ ಒಬ್ಬರಿಗೆ ಹಾಲುಣಿಸಿದ ಬಳಿಕ ಮತ್ತೊಬ್ಬರಿಗೆ ಉಣಿಸಿ.

ಒಂದು ಮಗುವಿಗೆ ಹಾಲುಣಿಸಿದರೆ ಮತ್ತೊಂದು ಮಗುವಿಗೆ ಹಾಲು ಸಾಲದೇ ಹೋಗುವುದೇ?
ಈ ಸಂಶಯ ತಾಯಿಗೆ ಕಾಡುವುದು ಸಹಜ. ಒಂದು ಸ್ತನದ ಹಾಲುಣಿಸಿದರೆ ಆ ಮಗುವಿಗೆ ಹಾಲು ಸಾಕಾಗುವುದಿಲ್ಲ ಎಂದು ಕೂಡ ಅನಿಸುವುದು. ನೀವು ಮಗುವಿಗೆ ಹಾಲುಣಿಸುವಾಗ ಇನ್ನೊಂದು ಮಗುವಿಗೆ ಸಾಕಾಗುವುದಿಲ್ಲ ಎಂದು ಭಾವಿಸಬೇಡಿ, ಮಗು ಎದೆ ಹಾಲು ಹೀರಿ ಕುಡಿದಂತೆ ಎದೆಹಾಲು ಉತ್ಪತ್ತಿಯಾಗುವುದು, ಇದರಿಂದಾಗಿ ಆ ಮಗುವಿಗೂ ಎದೆ ಹಾಲು ಸಾಕಾಗುವುದು.

ಹಾಲನ್ನು ಪಂಪ್‌ ಮಾಡಿಡಿ
ಹಸಿವಿನಿಂದ ಎರಡು ಮಗು ಒಟ್ಟಿಗೆ ಅಳಲಾರಂಭಿಸುತ್ತದೆ, ಆವಾಗ ಯಾರಿಗೆ ಹಾಲುಣಿಸಬೇಕೆಂಬ ಗೊಂದಲ ಮೂಡುವುದು. ಮಕ್ಕಳು ನಿದ್ದೆ ಮಾಡಿರುವ ಸಮಯದಲ್ಲಿ ಎದೆಹಾಲನ್ನು ಪಂಪ್‌ ಮಾಡಿಡಿ. ಹೀಗೆ ಮಾಡಿಟ್ಟರೆ ಇಬ್ಬರು ಜೊತೆಗೆ ಎದ್ದು ಹಾಲಿಗಾಗಿ ಅಳುವಾಗ ಒಂದು ಮಗುವಿಗೆ ಪಂಪ್ ಮಾಡಿಟ್ಟ ಹಾಲನ್ನು ನೀಡಬಹುದು, ಮತ್ತೊಂದು ಮಗುವಿಗೆ ಎದೆ ಹಾಲನ್ನು ನೀಡಬಹುದು.

ಫಾರ್ಮುಲಾ ಹಾಲನ್ನು ಕೊಡಿ
ಮಕ್ಕಳಿಗೆ ಎದೆಹಾಲು ಸಾಕಾಗುತ್ತಿಲ್ಲ ಎಂದು ನಿಮಗನಿಸಿದರೆ ನೀವು ಫಾರ್ಮುಲಾ ಹಾಲನ್ನು ನೀಡಲಾರಂಭಿಸಿ, ಇದರಿಂದ ಮಕ್ಕಳ ಹಸಿವು ನಿಯಂತ್ರಣಕ್ಕೆ ಬರುತ್ತದೆ. ಮಕ್ಕಳ ತಜ್ಞರು ನಿಮಗೆ ಯಾವ ಪ್ರಮಾಣದಲ್ಲಿ ಫಾರ್ಮುಲಾ ಮಿಲ್ಕ್ ನೀಡಬೇಕೆಂದು ಹೇಳುತ್ತಾರೆ ಅದರಂತೆ ನೀಡಿ.

ಇತರ ಆಹಾರ ನೀಡಬಹುದೇ?
ಮಗುವಿಗೆ ರಾಗಿ ಮಣ್ಣಿ ಅಥವಾ ಹಣ್ಣನ್ನು ಬೇಯಿಸಿ ನೀಡುವುದು , ಅನ್ನವನ್ನು ರುಬ್ಬಿ ನೀಡುವುದು ಈ ರೀತಿಯ ಆಹಾರವನ್ನು 6 ತಿಂಗಳಿಗಿಂತ ಮುಂಚೆ ನೀಡಲೇಬೇಡಿ, 6 ತಿಂಗಳವರೆಗೆ ಬರೀ ಎದೆಹಾಲು ಹಾಘೂ ಫಾರ್ಮುಲಾ ಮಿಲ್ಕ್ ಅಷ್ಟೇ ನೀಡಿ, 6 ತಿಂಗಳ ನಂತರ ನೀವು ರಾಗಿಮಣ್ಣಿ ಅಥವಾ ಮತ್ತಿತರ ಆಹಾರ ನೀಡಲು ಪ್ರಾರಂಭಿಸಬಹುದು.

ನೀವು ನಿಮ್ಮ ಆಹಾರಕ್ರಮದ ಕಡೆಗೆ ಗಮನಹರಿಸಬೇಕು
ಎರಡು ಮಕ್ಕಳಿಗೆ ಹಾಲುಣಿಸುವುದರಿಂದ ನೀವು ಆಹಾರವನ್ನು ಚೆನ್ನಾಗಿ ತಿನ್ನಬೇಕು, ಪೌಷ್ಠಿಕಾಂಶ ಅಧಿಕವಿರುವ ಆಹಾರ ಸೇವಿಸಿ. ಹೀಗೆ ಸೇವಿಸುವುದರಿಂದ ಎದೆಹಾಲಿನ ಉತ್ಪತ್ತಿ ಕೂಡ ಹೆಚ್ಚಾಗುವುದು, ಆವಾಗ ಮಕ್ಕಳಿಗೆ ಎದೆಹಾಲಿನ ಕೊರತೆ ಉಂಟಾಗುವುದಿಲ್ಲ.