ಮಗುವಿಗೆ ಎಣ್ಣೆ ಮಸಾಜ್ ಒಳ್ಳೆಯದೇ?

ಒಂಬತ್ತು ತಿಂಗಳ ನಂತರ ಪ್ರಪಂಚಕ್ಕೆ ಕಾಲಿಡುವ ಆ ನವಜಾತ ಶಿಶು ನಿಮ್ಮ ಸಂತೋಷದ ಹುಟ್ಟಿಗೆ ಕಾರಣವಾಗುತ್ತದೆ. ಆಗತಾನೇ ಜನಿಸಿದ ಆ ಮಗುವಿನ ಮೃದುವಾದ ತ್ಚಚೆ ಹೊಸ ಅನುಭವವನ್ನು ನೀಡುತ್ತದೆ. ಮಹಿಳೆ, ತಾಯಿಯಾದ ಸಾರ್ಥಕ್ಯವನ್ನು ಇಲ್ಲಿ ಕಾಣುತ್ತಾಳೆ.

ಇಂತಹ ಅಭೂತಪೂರ್ವ ನವಜಾತ ಶಿಶುವಿನ ಮೃದುವಾದ ತ್ಚಚೆಗೆ ಯಾವುದೇ ರೀತಿಯ ತೊಂದರೆಯಾಗದಂತೆ ತಾಯಿಯಾದವಳು ನೋಡಿಕೊಳ್ಳುತ್ತಾಳೆ. ಆದರೆ ಕೆಲವು ಭಾರತೀಯ ಸಂಪ್ರದಾಯದ ಪ್ರಕಾರ ಮಾಡುವ ಮಗುವಿನ ಆರೈಕೆ, ಆ ಮಗುವಿಗೆ ಅಗತ್ಯವಿಲ್ಲದೇ ಇರಬಹುದು ಅದೇ ನವಜಾತ ಶಿಶುವಿಗೆ ಮಾಡುವ ಮಸಾಜ್ / ಅಂಗವರ್ಧನ!

ನಿಮ್ಮ ಹಿಂದಿನವರು ಮಗುವಿನ ಬೆಳವಣಿಗೆಗೆ ಮಸಾಜ್ ಸಹಾಯಕ ಎಂದಿರುವ ಕಾರಣಕ್ಕೆ, ನೀವು ಸಹ ನಿಮ್ಮ ಮಗುವಿಗೆ ನೀವೇ ಸ್ವತಃ ಮಸಾಜ್ ಮಾಡುವ ಪ್ರಕ್ರಿಯೆಯಲ್ಲಿ ತೊಡಗಬಹುದು. ಆದರೆ ನಾವು ಕೆಲವು ವೈದ್ಯರು ಮತ್ತು ಮಕ್ಕಳ ತಜ್ಞರ ಬಳಿ ನವಜಾತ ಶಿಶುವಿಗೆ ಮಸಾಜ್ ಮಾಡುವ ಅಗತ್ಯಗಳನ್ನು ಪ್ರಶ್ನಿಸಿದಾಗ ಅವರು ಉತ್ತರಿಸಿದ್ದು ಹೀಗೆ.

ನಿಜವಾಗಿಯೂ ನವಜಾತ ಶಿಶುವಿಗೆ ಮಸಾಜ್ ನ ಅಗತ್ಯವಿದೆಯೇ? ಈ ಪದ್ಧತಿ ಎಷ್ಟು ಮುಖ್ಯ?

ಮಸಾಜ್ ಎನ್ನುವುದು ವಯಕ್ತಿಕ ನಿರ್ಧಾರ. ಆದರೆ ವೈಜ್ಞಾನಿಕ ಸಂಶೋಧನೆಗಳ ಪ್ರಕಾರ ಈ ಮಸಾಜ್ ನವಜಾತ ಶಿಶುವಿಗೆ ಅಗತ್ಯವಿಲ್ಲ. ಇದು ಕೇವಲ ಭಾರತ ಮತ್ತು ಏಷ್ಯಾದ ಇತರ ರಾಷ್ಟ್ರಗಳಲ್ಲಿರುವ ಸಂಪ್ರದಾಯವಷ್ಟೇ!

ಇದು ಮಕ್ಕಳ ದೇಹಕ್ಕೆ ತೊಂದರೆಮಾಡಬಲ್ಲದೇ?

ಮಕ್ಕಳಿಗೆ ಮಸಾಜ್ ಮಾಡುವ ಆಯಾ ಅಥವಾ ಸಹಾಯಕಿಯರು ಕೇವಲ ಹಣಕ್ಕಾಗಿಯೇ ಈ ಕೆಲಸಮಾಡುವವರಾಗಿದ್ದರೆ ಅವರು ನಿಮ್ಮ ಮಗುವಿನ ಮಸಾಜ್ ಸರಿಯಾಗಿ ಮಾಡದೇ ಇದರಿಂದ ಮಗುವಿಗೆ ನೋವನ್ನುಂಟು ಮಾಡಬಹುದು. ಅಲ್ಲದೇ ಅವರು ಸಾಕಷ್ಟು ಮನೆಗಳಲ್ಲಿ ಕೆಲಸ ಮಾಡುವುದರಿಂದ ಸೋಂಕು ಉಂಟಾಗುವ ಸಾಧ್ಯತೆಗಳೂ ಹೆಚ್ಚು. ಆದರಿಂದ ಈ ವಿಷಯದಲ್ಲಿ ಸಾಕಷ್ಟು ಮುಂಜಾಗ್ರತೆವಹಿಸಬೇಕು.

ಮಗುವಿಗೆ ಮಸಾಜ್ ಯಾರು ಮಾಡಬೇಕು?

ಮಸಾಜ್ ಮಾಡುವುದು ಮಗುವಿನ ದೇಹದ ವಿಶ್ರಾಂತಿಗಾಗಿ. ಆದ್ದರಿಂದ ಮಕ್ಕಳ ಬಗ್ಗೆ ಮಾನಸಿಕ ಬಾಂಧವ್ಯವನ್ನು ಬೆಳೆಸಿಕೊಂಡಿರುವ ಪಾಲಕರೇ ಮಸಾಜ್ ನ್ನು ಮಾಡಬೇಕು.

ಮಸಾಜ್ ಮಾಡಲು ಸರಿಯಾದ ಕ್ರಮ ಯಾವುದು?

ಮಕ್ಕಳಿಗೆ ಮಸಾಜ್ ಮಾಡುವಾಗ ಹೆಚ್ಚು ಒತ್ತಡವನ್ನು ಹಾಕಬಾರದು. ಅಥವಾ ಅಲಂಕಾರಿಕ ಎಣ್ಣೆಗಳು ಅಥವಾ ಹಿಟ್ಟಿನ ಅಗತ್ಯವಿಲ್ಲ. ನಿಮ್ಮ ಬೆರಳುಗಳ ಮೂಲಕ ಮೃದುವಾಗಿ ಮಗುವಿನ ಮಸಾಜ್ ಮಾಡಿ.

ಮಗುವಿಗೆ ಎಷ್ಟು ವರ್ಷದವರೆಗೆ ಮಸಾಜ್ ಮಾಡಬೇಕು?

ನಿಮ್ಮ ಮಗು ಮಸಾಜ್ ನ್ನು ಇಷ್ಟಪಡುವಷ್ಟು ವರ್ಷ ಅವರಿಗೆ ಮಸಾಜ್ ಮಾಡಬಹುದು. ಅಥವಾ ಮಸಾಜ್ ನಿಮ್ಮ ಮಗುವಿಗೆ ಇಷ್ಟವಾಗದಿದ್ದರೆ ಕೆಲವೇ ದಿನಗಳಲ್ಲಿ ಮಸಾಜ್ ಮಾಡುವುದನ್ನು ನಿಲ್ಲಿಸಬಹುದು.