ಮಗುವಿನ ತ್ವಚೆಗೆ ಗುಳ್ಳೆಯಾದರೆ ಏನು ಮಾಡಬೇಕು?

Baby

oi-Sumalatha

By Sumalatha

Published: Friday, September 23, 2011, 11:46 [IST]

ಮಗುವಿನ ಮುದ್ದು ಮೈ ಮೇಲೆ ಗುಳ್ಳೆಗಳೆದ್ದರೆ ತಾಯಂದಿರಿಗೆ ಕಳವಳ. ಮೃದು ತ್ವಚೆ ಎಲ್ಲಿ ಕಳೆಗುಂದುತ್ತದೋ ಎಂಬ ಭಯ. ಆದರೆ ಈ ಕುರಿತು ಭಯ ಪಡಬೇಕಿಲ್ಲ. ಮಕ್ಕಳ ಗಲ್ಲ, ಕೆನ್ನೆ, ಹಣೆ, ಮೈ ಮೇಲೆ ಕೆಂಪುಗುಳ್ಳೆಗಳೇಳುವುದನ್ನು ವಾಸಿ ಮಾಡುವ ಸುಲಭ ವಿಧಾನ ಇಲ್ಲಿವೆ. ಇದನ್ನು ಅನುಸರಿಸಿ ಮಗುವಿನ ಮೃದು ತ್ವಚೆಯನ್ನು ಉರಿಯಿಂದ ಮುಕ್ತಗೊಳಿಸಬಹುದು.

ಮಗುವಿನ ಮೈಮೇಲಿನ ಗುಳ್ಳೆಯನ್ನು ಹೋಗಲಾಡಿಸುವುದು ಹೀಗೆ:

1. ಬಿಸಿ ನೀರಿನ ಸ್ನಾನ: ಮಗುವಿಗೆ ಬಿಸಿ ನೀರಿನ ಸ್ನಾನ ಮಾಡಿಸಿ ಗುಳ್ಳೆಗಳಿದ್ದ ಜಾಗಕ್ಕೆ ಆಂಟಿ ಬ್ಯಾಕ್ಟೀರಿಯಲ್ ಸೋಪ್ ಅಥವಾ ಕ್ರೀಂ ಹಚ್ಚಿ ಆ ಗುಳ್ಳೆಗಳು ಬೇರೆಡೆ ಹರಡದಂತೆ ತಡೆಯಬಹುದು.

2. ಕೊಬ್ಬರಿ ಎಣ್ಣೆ: ಮಗುವಿಗೆಂದು ಸಿಗುವ ಎಲ್ಲ ಬಗೆಯ ಕ್ರೀಂ ಮತ್ತು ಲೋಷನ್ ಗಳನ್ನು ಹಚ್ಚಬಾರದು. ಯಾವುದಾದರೂ ಒಂದನ್ನು ಉಪಯೋಗಿಸಬೇಕು. ಗುಳ್ಳೆಗಳಿಗೆ ಕೊಬ್ಬರಿ ಎಣ್ಣೆ, ತುಪ್ಪವನ್ನು ಹಚ್ಚಿ ನಯವಾಗಿ ಉಜ್ಜಬಹುದು.

3. ಎಳನೀರು: ಎಳನೀರಿನಿಂದ ಕೆಂಪು ಗುಳ್ಳೆಗಳ ಮೇಲೆ ನಯವಾಗಿ ಉಜ್ಜಿದರೆ ಅಥವಾ ತೊಳೆದರೆ ಗುಳ್ಳೆ ಕಡಿಮೆಯಾಗುತ್ತದೆ. ಮತ್ತು ಉರಿಯನ್ನೂ ಕಡಿಮೆ ಮಾಡುತ್ತದೆ.

4. ಬಟ್ಟೆ: ತುಂಬಾ ಗಡುಸಾದ ಬಟ್ಟೆಗಳನ್ನು ಮಗುವಿಗೆ ಧರಿಸಬಾರದು. ಇದು ಮಗುವಿನ ಮೃದು ತ್ವಚೆಯ ಮೇಲೆ ಅಲರರ್ಜಿ ಉಂಟು ಮಾಡಬಹುದು. ಮತ್ತು ಕೆಂಪು ಗುಳ್ಳೆಗಳೇಳಲು ಪ್ರಚೋದಿಸಬಹುದು. ಕಾಟನ್ ಮತ್ತು ಮೃದು ಬಟ್ಟೆಗಳನ್ನು ತೊಡಿಸಬಹುದು.

5. ಪೌಡರ್: ಮಗುವಿಗೆಂದೇ ಇರುವ ಪೌಡರ್ ಬಳಸಿ ಗುಳ್ಳೆಗಳು ಬರದಂತೆ ತಡೆಯಬಹುದು. ಗುಳ್ಳೆಗಳು ಈಗಾಗಲೇ ಇದ್ದರೆ ಅದರ ಮೇಲೆ ಪೌಡರ್ ಹಾಕಿ ಉರಿಯನ್ನು ಕಡಿಮೆಮಾಡಬಹುದು. ಇದು ಕ್ರಿಮಿ ಮತ್ತು ಇನ್ನಿತರ ಚರ್ಮ ಸೋಂಕು ಮಗುವಿನ ಮೈಯ್ಯಿಗೆ ತಗುಲದಂತೆ ತಡೆಯುತ್ತದೆ.

6. ಮೇಕಪ್ : ಮಗುವಿನ ತ್ವಚೆಯ ಮೇಲೆ ಮೇಕಪ್ ಸಾಧನಗಳನ್ನು ಬಳಸಬೇಡಿ. ಇದು ಮೃದು ತ್ವಚೆಯ ಮೇಲೆ ಗಂಭೀರ ಪರಿಣಾಮ ಬೀರಬಹುದು.

7. ಚಿಕಿತ್ಸೆ: ಈ ಯಾವುದೇ ಚಿಕಿತ್ಸೆ ಫಲಕಾರಿಯಾಗದಿದ್ದ ಪಕ್ಷದಲ್ಲಿ ಮಕ್ಕಳ ತಜ್ಞರನ್ನು ತಕ್ಷಣವೇ ಭೇಟಿ ಮಾಡಿ ಸೂಕ್ತ ಸಲಹೆ ಪಡೆದುಕೊಳ್ಳುವುದು ಒಳ್ಳೆಯದು.