ನಿಮ್ಮ ಮಗುವಿನ ಮೃದು ಕೂದಲ ಪೋಷಣೆ ಹೀಗಿರಲಿ

Baby

oi-Sumalatha

By Sumalatha

Published: Thursday, September 22, 2011, 17:32 [IST]

ಮಗುವಿನ ಕೂದಲು ತುಂಬಾ ಮೃದು. ಆದ್ದರಿಂದ ಅದರ ಪೋಷಣೆ ಬಗ್ಗೆ ತಾಯಂದಿರು ಹೆಚ್ಚಿನ ಜಾಗ್ರತೆ ವಹಿಸಬೇಕು. ಮಗುವಿನ ಕೂದಲು ತೆಳುವಿರಲಿ, ದಟ್ಟವಾಗಿರಲಿ, ಮೃದುವಿರಲಿ, ಗಟ್ಟಿಯಿರಲಿ ಅದಕ್ಕೆ ಸೂಕ್ತ ಪೋಷಣೆ ಬೇಕೇ ಬೇಕು. ಮಕ್ಕಳ ಕೂದಲಿನ ಪೋಷಣೆಗೆ ಕೆಲವು ಸಲಹೆಗಳನ್ನು ಇಲ್ಲಿ ನೀಡಲಾಗಿದೆ.

ಮಗುವಿನ ಕೂದಲಿನ ಪೋಷಣೆ ಹೀಗಿರಲಿ:

1. ನಿಮ್ಮ ಮಗುವಿಗೆ ಕಡಿಮೆ ಕೂದಲು ಅಥವಾ ಕೂದಲು ಇಲ್ಲದಿದ್ದರೆ, ವಾರದಲ್ಲಿ ಎರಡು ಬಾರಿ ಶಾಂಪೂ ಬಳಸಿ ತಲೆಗೆ ಸ್ನಾನ ಮಾಡಿಸಿ. 3-4 ಬಾರಿ ತಲೆಗೆ ಸ್ನಾನ ಮಾಡಿಸಿದರೆ ಚರ್ಮ ಒಣಗಬಹುದು. ಹೊರಗೆ ಹೋಗುವಾಗ ತಲೆಗೆ ಟೊಪ್ಪಿ ಅಥವಾ ಮೃದುವಾದ ಸ್ಕಾರ್ಫ್ ಧರಿಸುವುದನ್ನು ಮರೆಯಬೇಡಿ.

2. ನಿಮ್ಮ ಮಗುವಿನ ಕೂದಲಲ್ಲಿ ಹೊಟ್ಟು ಅಥವಾ ಧೂಳು ಕಾಣಿಸಿಕೊಂಡರೆ ತಲೆ ಸ್ನಾನ ಮಾಡಿಸುವ ಮುನ್ನ ಸ್ವಲ್ಪ ಆಲಿವ್ ಎಣ್ಣೆಯಿಂದ ಮೃದುವಾಗಿ ಮಸಾಜ್ ಮಾಡಿ.

3. ಮಕ್ಕಳಿಗೆಂದೇ ಇರುವ ಶಾಂಪುಗಳನ್ನು ಮಾತ್ರ ಬಳಕೆ ಮಾಡಿ. ಇದರಲ್ಲಿ ಯಾವುದೇ ಕೆಮಿಕಲ್ ಇರುವುದಿಲ್ಲ ಮತ್ತು ಮಗುವಿನ ಕಣ್ಣುಗಳು ಸ್ನಾನ ಮಾಡುವಾಗ ಉರಿಯದಂತಿರಲು ಟಿಯರ್ ಫ್ರೀ ಶಾಂಪು ಬಳಸಿರಿ.

4. ತಲೆಗೆ ಸ್ನಾನ ಮಾಡಿಸಿದ ನಂತರ ದೊಡ್ಡ ಹಲ್ಲನ್ನು ಹೊಂದಿರುವ ಬಾಚಣಿಕೆಯಲ್ಲಿ ಮೃದುವಾಗಿ ಬಾಚಬೇಕು. ಮಗುವಿಗೆಂದೇ ಪ್ರತ್ಯೇಕ ಬಾಚಣಿಕೆ ಇರಲಿ.

5. ಮಗುವಿನ ತಲೆಯ ಚರ್ಮ ತುಂಬಾ ಮೃದು ಮತ್ತು ಸೂಕ್ಷ್ಮ. ತಲೆ ಉಜ್ಜುವಾಗ ಮತ್ತು ಬಾಚುವಾಗ ಆದಷ್ಟು ಜಾಗರೂಕತೆಯಿಂದ, ಮೃದುವಾಗಿ ಉಜ್ಜಬೇಕು.

6. ಮಗುವಿನ ಕೂದಲಿನ ಸಿಕ್ಕನ್ನು ನಿಮ್ಮ ಬೆರಳುಗಳಿಂದಲೇ ಮೃದುವಾಗಿ ಬಿಡಿಸಿ. ಇದರಿಂದ ಮಗುವಿಗೆ ನೋವಾಗುವುದನ್ನು ತಪ್ಪಿಸಬಹುದು. ಸ್ವಲ್ಪ ಎಣ್ಣೆ ಅಥವಾ ಮಗುವಿನ ಕೂದಲಿಗೆಂದೇ ಇರುವ ಮಾಯಿಶ್ಚರೈಸರ್ ಅನ್ನು ಸಿಕ್ಕು ಬಿಡಿಸಲು ಉಪಯೊಗಿಸಬಹುದು.

7. ಮೊದಲು ಮಗುವಿನ ತಲೆಯ ಹಿಂಭಾಗ ಬಾಚಿ ನಂತರ ಮುಂಭಾಗವನ್ನು ಬಾಚಬೇಕು.

8. ಮಗುವಿನ ತೆಳುಗೂದಲನ್ನು ಆಗಾಗ್ಗೆ ಬಾಚುತ್ತಿರಿ. ಕೂದಲು ಸ್ವಲ್ಪ ತೇವವಿದ್ದಂತೆಯೇ ಸಿಕ್ಕು ಬಿಡಿಸುವುದು ಉತ್ತಮ. ಒಣಗಿದ ನಂತರ ಸಿಕ್ಕು ಬಿಡಿಸಿದರೆ ಕಷ್ಟವೆನಿಸಬಹುದು.

9. ಕೂದಲು ದಟ್ಟವಾಗಿ ಬೆಳೆಯಬೇಕೆಂದರೆ ಬೇಬಿ ಆಯಿಲ್ ನಿಂದ ಚೆನ್ನಾಗಿ ಮಸಾಜ್ ಮಾಡಬೇಕು. ಮಸಾಜ್ ಮಾಡಿದ ನಂತರ ಬುಡದಿಂದ ತುದಿಯವರೆಗೂ ಕೂದಲನ್ನು ಮೃದುವಾಗಿ ಬಾಚಬೇಕು. ಕೂದಲನ್ನು ಆಗಾಗ್ಗೆ ಸ್ವಲ್ಪ ಕತ್ತರಿಸುವುದೂ ಕೂದಲು ಬೆಳೆಯಲು ಸಹಾಯ ಮಾಡುತ್ತದೆ.