ಮುದ್ದು ಕಂದನಿಗೆ ಮೊಬೈಲ್ ಮಾರಕವಾದೀತು!

Published: Monday, September 12, 2011, 13:08 [IST]

ಮಹಿಳೆಯರು ಗರ್ಭಾವಸ್ಥೆ ಸಮಯದಲ್ಲಿ ಮೊಬೈಲನ್ನು ಹೆಚ್ಚು ಬಳಕೆ ಮಾಡುತ್ತಿದ್ದರೆ ಹುಟ್ಟುವ ಮಕ್ಕಳಲ್ಲಿ ಕೆಟ್ಟ ವರ್ತನೆ ಉಂಟಾಗುವ ಸಾಧ್ಯತೆ ಹೆಚ್ಚು ಎಂದಿದೆ ಇತ್ತೀಚಿನ ಅಧ್ಯಯನ.

ಹಾಗೆಯೇ ಅತಿ ಚಿಕ್ಕವಯಸ್ಸಿನಲ್ಲಿಯೇ ಮೊಬೈಲ್ ಮತ್ತು ಇನ್ನಿತರ ಸಾಧನಗಳನ್ನು ಹೆಚ್ಚು ಬಳಸುವ ಮಕ್ಕಳ ನಡವಳಿಕೆಯಲ್ಲೂ ಕ್ರಮೇಣ ವ್ಯತಿರಿಕ್ತ ಬದಲಾವಣೆ ಕಾಣಿಸಿಕೊಳ್ಳುವ ಸಾಧ್ಯತೆ ಶೇಕಡಾ 50 ರಷ್ಟಿದೆ ಎಂದೂ ತಿಳಿಸಿದೆ.

ಗರ್ಭದಲ್ಲಿರುವ ಮಗುವಿನ ಮೇಲೆ ಮೊಬೈಲ್ ಬಳಕೆ ಶೇಕಡಾ 30 ರಷ್ಟು ಪರಿಣಾಮ ಬೀರಿ, ಮಗು ಏಳನೇ ವಯಸ್ಸಿಗೆ ಬಂದಾಗ ಪರಿಣಾಮ ಗೋಚರಿಸುತ್ತದೆ ಎಂದಿದೆ ಅಧ್ಯಯನ.

ಈ ಅಧ್ಯಯನ ಕೈಗೊಂಡಿದ್ದ ಕ್ಯಾಲಿಫೋರ್ನಿಯಾ ವಿಶ್ವವಿದ್ಯಾಲಯದ ಲೀಕ್ ಖೀಫೆಟ್ ಅವರ ಪ್ರಕಾರ, ಗರ್ಭಿಣಿಯಾಗಿದ್ದಾಕೆ ಹೆಚ್ಚು ಸೆಲ್ ಫೋನ್ ಬಳಸುತ್ತಿದ್ದರೆ ಅದು ಗರ್ಭದಲ್ಲಿರುವ ಮಗುವಿನ ಮೇಲೆ ಪರಿಣಾಮ ಬೀರಿ, ಮಗು ಏಳನೇ ವಯಸ್ಸಿಗೆ ಕಾಲಿಟ್ಟ ನಂತರ ಅದು ಕೆಟ್ಟ ನಡವಳಿಕೆಯನ್ನು ತೋರ್ಪಡಿಸುವ ಸಾಧ್ಯತೆ ಇದೆ ಎಂದು ತಿಳಿಸಿದ್ದಾರೆ.

ಭ್ರೂಣದಲ್ಲಿದ್ದಾಗ ಅಥವಾ ಚಿಕ್ಕವಯಸ್ಸಿನಲ್ಲಿ ಎಲೆಕ್ಟ್ರಾನಿಕ್ ಸಾಧನಗಳ ಬಳಕೆಗೆ ಒಳಗಾಗುವ ಮಗುವಿನ ನಡವಳಿಕೆಯಲ್ಲಿ ಕ್ರಮೇಣ ಬದಲಾವಣೆ ಉಂಟಾಗುತ್ತದೆ ಎಂದು ಡೈಲಿ ಮೇಲ್ ವರದಿ ಮಾಡಿದೆ.

ಆದರೆ ಮಗುವಿನ ನಡವಳಿಕೆ, ತಾಯಿ ಮತ್ತು ಮಗುವಿನ ಜೀವನ ಶೈಲಿಯ ಮೇಲೆ ಅವಲಂಬಿತವಾಗಿದೆ, ಮೊಬೈಲ್ ಬಳಕೆಯಲ್ಲಲ್ಲ ಎಂದು ಬ್ರಿಟನ್ ವಿಜ್ಞಾನಿಗಳು ವಾದಿಸಿದ್ದಾರೆ.