ಹುಟ್ಟುಹಬ್ಬದ ಕೇಕ್ ತಿಂದು ಬಾಲಕಿ ಸಾವು..! ಕೇಕ್‌ನಲ್ಲಿತ್ತು ಕೃತಕ ಸಿಹಿ ಸಾಕ್ರರಿನ್..!

ಇತ್ತೀಚಿಗೆ ಆಹಾರಗಳ ಸೇವಿಸಿದ ಬಳಿಕ ಅಸ್ವಸ್ಥರಾಗುವುದು, ಜೀವ ಕಳೆದುಕೊಳ್ಳುವಂತಹ ಪ್ರಕರಣಗಳು ಹೆಚ್ಚಾಗುತ್ತಿವೆ. ಕಳೆದ ಒಂದು ತಿಂಗಳ ಹಿಂದೆಯೂ ಇಂತಹದೊಂದು ಘಟನೆ ನಡೆದಿತ್ತು. ಹುಟ್ಟುಹಬ್ಬಕ್ಕೆ ಬೇಕರಿಯಿಂದ ಕೇಕ್ ತರಿಸಿ ತಿಂದಿದ್ದ ಬಾಲಕಿಯೊಬ್ಬಳು ಮೃತಪಟ್ಟಿದ್ದಳು. ಪಂಜಾಬ್‌ನ ಪಟಿಯಾಲದಲ್ಲಿ ನಡೆದಿದ್ದ ಘಟನೆ ಇಡೀ ದೇಶವನ್ನು ಬೆಚ್ಚಿ ಬೀಳಿಸಿತ್ತು.

ಹುಟ್ಟುಹಬ್ಬದಂದು ಆಕೆ ಸಂತಸದಿಂದ ಸೇವಿಸಿದ್ದ ಚಾಕೊಲೆಟ್ ಕೇಕ್ ಆಕೆಯ ಜೀವನ ತೆಗೆದಿತ್ತು. 10 ವರ್ಷದ ಬಾಲಕಿ ಮಾನ್ವಿ ಆಸ್ಪತ್ರೆಗೆ ದಾಖಲಾಗಿ ಬಳಿಕ ಮೃತಪಟ್ಟಿದ್ದಳು, ಆದರೆ ಈಗ ಈ ಕೇಕ್‌ನಲ್ಲಿ ಯಾವ ಅಂಶ ಆಕೆಯ ಸಾವಿಗೆ ಕಾರಣವಾಗಿತ್ತು ಎಂಬ ಮಾಹಿತಿ ಹೊರಬಿದ್ದಿದೆ.

ಪಂಜಾಬ್‌ನ ಪಟಿಯಾಲದಲ್ಲಿ ನಡೆದಿದ್ದ ಘಟನೆಗೆ ಕೇಕ್‌ನಲ್ಲಿದ್ದ ಅಂಶವೇ ಕಾರಣ ಎಂದು ವರದಿ ಹೇಳಿದೆ. ಆಕೆ ಸೇವಿಸಿದ್ದ ಕೇಕ್‌ನಲ್ಲಿ ಕೃತಕ ಸಿಹಿ ಪತ್ತೆಯಾಗಿದೆ ಎಂದು ಲ್ಯಾಬ್ ವರದಿ ತಿಳಿಸಿದೆ. ಮಾರ್ಚ್ 24 ರಂದು ಬಾಲಕಿಯ ಹುಟ್ಟುಹಬ್ಬಕ್ಕೆ ಪಟಿಯಾಲಾದ ಬೇಕರಿಯಿಂದ ಆನ್‌ಲೈನ್‌ನಲ್ಲಿ ಆರ್ಡರ್ ಮಾಡಿದ ಚಾಕೊಲೇಟ್ ಕೇಕ್ ಅನ್ನು ಮನೆಯವರು ಎಲ್ಲರು ಸೇವಿಸಿದ್ದರು.

ಈ ರೀತಿ ಕೇಕ್ ಸೇವಿಸಿದ್ದ ಬಳಿಕ ಎಲ್ಲರು ಅಸ್ವಸ್ಥರಾಗಿದ್ದಾರೆ. ಆದರೆ ಹುಟ್ಟುಹಬ್ಬವೆಂದು ತುಸು ಹೆಚ್ಚು ಕೇಕ್ ತಿಂದಿದ್ದ ಮಾನ್ವಿ ಆಸ್ಪತ್ರೆಯಲ್ಲಿ ಗಂಭೀರ ಸ್ಥಿತಿಗೆ ತಲುಪಿದ್ದಳು. ಆದರೆ ಆಕೆ ಮೃತಪಟ್ಟಿದ್ದಳು.

ಬಳಿಕ ಈ ಪ್ರಕರಣ ಸದ್ದು ಮಾಡಿತ್ತು. ಕೇಕ್‌ನ ಮಾದರಿಯನ್ನು ಪರೀಕ್ಷೆಗಾಗಿ ಸಂಗ್ರಹಿಸಿ ಲ್ಯಾಬ್‌ಗೆ ಕಳುಹಿಸಲಾಗಿತ್ತು. ಈಗ ಈ ವರದಿ ಬಂದಿದ್ದು, ವರದಿಯಲ್ಲಿ ಹೆಚ್ಚಿನ ಪ್ರಮಾಣದ ಸ್ಯಾಕ್ರರಿನ್, ಕೃತಕ ಸಿಹಿಯಾಗಿ ಬಳಸಿರುವುದು ದೃಢಪಟ್ಟಿದೆ. ಈ ಸಾಕ್ರರಿನ್ ಎಲ್ಲಾ ಬೇಕರಿ ಪದಾರ್ಥಗಳಲ್ಲೂ ಬಳಸುತ್ತಾರೆ, ಆದರೆ ಸಣ್ಣ ಪ್ರಮಾಣದ ಸಾಕ್ರರಿನ್ ನಿಮ್ಮ ರಕ್ತದಲ್ಲಿರುವ ಸಕ್ಕರೆ ಪ್ರಮಾಣವನ್ನು ವೇಗವಾಗಿ ಹೆಚ್ಚಿಸಬಹುದು. ಇದು ಸಕ್ಕರೆಗಿಂತ ಹೆಚ್ಚು ಸಿಹಿಯಾಗಿರುತ್ತದೆ. ಅಲ್ಲದೆ ಸಕ್ಕರೆಗಿಂತ ಕಡಿಮೆ ಪ್ರಮಾಣದಲ್ಲಿ ಬಳಸಿದರೆ ಸಾಕಾಗುತ್ತದೆ. ಹೀಗಾಗಿ ಬೇಕರಿಗಳಲ್ಲಿ ಹಾಗೂ ಹೋಟೆಲ್‌ಗಳಲ್ಲಿ ಸಿಹಿಗಾಗಿ ಸಕ್ಕರೆಯ ಬದಲು ಈ ಸಾಕ್ರರಿನ್ ಬಳಸಲಾಗುತ್ತದೆ.

ಸದ್ಯದಲ್ಲೇ ಬೇಕರಿ ವಿರುದ್ಧ ಕ್ರಮ ಜರುಗಿಸಿ ದಂಡ ವಿಧಿಸುವ ಸಾಧ್ಯತೆ ಇದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಬೇಕರಿ ಮಾಲೀಕರ ವಿರುದ್ಧ ಈಗಾಗಲೇ ಎಫ್‌ಐಆರ್ ಸಹ ದಾಖಲಾಗಿದೆ. ಈ ಮೊದಲು ಆಕೆ ಹುಟ್ಟುಹಬ್ಬ ಆಚರಿಸಿಕೊಂಡಿದ್ದ ವಿಡಿಯೋ ಸಿಕ್ಕಾಪಟ್ಟೆ ವೈರಲ್ ಆಗಿತ್ತು. ಅಲ್ಲಿ ಕೇಕ್ ಕತ್ತರಿಸಿ ಸಿಹಿಯಾದ ಕೇಕ್ ಸೇವಿಸುತ್ತಿರುವುದು ವಿಡಿಯೋದಲ್ಲಿ ಸೆರೆಯಾಗಿತ್ತು. ಈ ಸಂಭ್ರಮ ಮುಗಿದ ಕೆಲವೇ ನಿಮಿಷಗಳಲ್ಲಿ ಮನೆಯವರು ಒಬ್ಬೊಬ್ಬರಾಗಿ ಅಸ್ವಸ್ಥರಾಗಿದ್ದರು. ಅದರಲ್ಲೂ ಮೃತಪಟ್ಟ ಮಾನ್ವಿ ಹೊಟ್ಟೆ ನೋವಿನ ಕಾರಣ ರೂಮು ಸೇರಿ ಮಲಗಿದ್ದಳು. ಆದರೆ ಆಕೆ ಎಚ್ಚರಗೊಳ್ಳದ ಹಿನ್ನೆಲೆ ಆಸ್ಪತ್ರೆಗೆ ಕರೆದೊಯ್ಯಲಾಗಿತ್ತು. ಆದರೆ ಚಿಕಿತ್ಸೆ ಫಲಿಸದೆ ಆಕೆ ಮೃತಪಟ್ಟಿದ್ದಳು.

ಏನಿದು ಸಾಕ್ರರಿನ್?

ಕಡಿಮೆ ಕ್ಯಾಲೋರಿ ಹೊಂದಿರುವ ಕಾರಣಕ್ಕೆ ಈ ರಾಸಾಯನಿಕಯುಕ್ತ ಕೃತಕ ಸಿಹಿ ಬಳಕೆಯಲ್ಲಿದೆ. ಇದು ಸಕ್ಕರೆಗೆ ಪರ್ಯಾಯ ಸಿಹಿಯಾಗಿದೆ. ಇದೊಂದೆ ಅಲ್ಲ ಆಸ್ಪರ್ಟೇಮ್, ಅಸೆಸಲ್ಫೇಮ್ ಪೊಟ್ಯಾಸಿಯಂ, ಸುಕ್ರಲೋಸ್, ನಿಯೋಟೇಮ್ ಮತ್ತು ಅಡ್ವಾಂಟೇಮ್ ಸಂಯೋಜಕ ಸಕ್ಕರೆಗೆ ಬದಲಿ ಕೃತಕ ಸಿಹಿಕಾರಕಗಳಾಗಿವೆ. ಇವು ನಾವು ಬಳಸುವ ಪ್ರತಿಯೊಂದು ಬೇಕರಿ ಉತ್ಪನ್ನಗಳು, ಸಿಹಿ ತಿಂಡಿಗಳು, ಕೇಕ್ ಸೇರಿದಂತೆ ಎಲ್ಲಾ ಸಿಹಿ ಉತ್ಪನ್ನದಲ್ಲಿ ಸೇರಿರಬಹುದು. ಕೆಲವು ಕಡೆ ಈ ಕೃತಕ ಸಿಹಿ ಬಳಸದೆಯೂ ಆರೋಗ್ಯಯುತವಾದ ತಿಂಡಿ ತಿನಿಸು ಸಿಗುತ್ತದೆ. ಆದರೆ ಬಹುಪಾಲು ಮಂದಿ ಕಡಿಮೆ ಕ್ಯಾಲೋರಿ ಹಾಗೂ ಸಕ್ಕರೆಗೆ ಹೋಲಿಸಿದರೆ ಕಡಿಮೆ ದರದಲ್ಲಿ ಹೆಚ್ಚು ಸಿಹಿ ನೀಡುವ ಕೃತಕ ಸಿಹಿಯನ್ನೇ ಬಳಸುತ್ತಾರೆ.