ಮೇ1, ಕಾರ್ಮಿಕರ ದಿನ: ಕೊರೊನಾ ಹಾವಳಿಯಿಂದ ಕಾರ್ಮಿಕರ ರಕ್ಷಣೆಯಾಗಬೇಕಾಗಿದೆ

ಕಾರ್ಮಿಕ ದಿನಾಚರಣೆಯ ಆರಂಭ

ಮೊಟ್ಟ ಮೊದಲಿಗೆ 1886ರ ಮೇ1ರಂದು ಅಮೆರಿಕದಲ್ಲಿ ಕಾರ್ಮಿಕ ದಿನವನ್ನು ಆಚರಿಸಲಾಯಿತು. ಇಂದು ಒಬ್ಬ ಕಾರ್ಮಿಕನ ಕೆಲಸದ ಅವಧಿ 8 ಗಂಟೆ ಅಂತ ಇದೆ. ಈ ನಿಯಮ ಅಂದು ನಡೆದ ಸಭೆಯಲ್ಲಿ ನಿರ್ಧರಿಸಿ ತೆಗೆದುಕೊಂಡ ಕಾರ್ಮಿಕ ನಿಯಮವಾಗಿದೆ.

ಇಂದು ಕಾರ್ಮಿಕ ವರ್ಗದ ರಕ್ಷಣೆಗೆ ಹಲವಾರು ಕಾರ್ಮಿಕ ಸಂಘಟನೆಗಳಿವೆ. ಆದರೆ ಕಾರ್ಮಿಕ ಸಂಘಟನೆಯೊಂದು ಶಕ್ತವಾಗಿ ರೂಪುಗೊಳ್ಳುವ ಮುಂಚೆ ಕಾರ್ಮಿಕರನ್ನು 12-16 ಗಂಟೆ ದುಡಿಸಿಕೊಳ್ಳುತ್ತಿದ್ದರು. ಯಾವುದೇ ಸೌಲಭ್ಯಗಳಿಲ್ಲದೆ ಕಡಿಮೆ ವೇತನಕ್ಕೆ ಜನರು ಹೆಚ್ಚು ಕಾಲ ದುಡಿಯಬೇಕಿತ್ತು. ಕಂಪನಿಗಳು ಕಾರ್ಮಿಕರನ್ನು ಗುಲಾಮರ ರೀತಿ ದುಡಿಸಿಕೊಳ್ಳುತ್ತಿತ್ತು.

ಇದನ್ನು ವಿರೋಧಿಸಿ ಅನೇಕ ಕಾರ್ಮಿಕ ಸಂಘಗಳು ಮುಷ್ಕರಕ್ಕೆ ಕರೆ ನೀಡಿದ್ದವು. ಈ ಸಂದರ್ಭದಲ್ಲಿ ಅಮೆರಿಕದ ಚಿಕಾಗೊನ ಮಾರುಕಟ್ಟೆಯಲ್ಲಿ ಬಾಂಬ್​ನ್ನು ಸ್ಪೋಟಿಸಲಾಯಿತು. ಇದರಿಂದ ಕಾರ್ಮಿಕರು ಮತ್ತು ಪೊಲೀಸರ ನಡುವೆ ಸಂಘರ್ಷ ಏರ್ಪಟ್ಟಿತು. ಈ ಸಂಘರ್ಷದಲ್ಲಿ ಅನೇಕ ಮಂದಿ ಸಾವನ್ನಪಿದ್ದರಲ್ಲದೆ, ನೂರಕ್ಕೂ ಹೆಚ್ಚು ಮಂದಿ ಗಾಯಗೊಂಡರು.

ಕಾರ್ಮಿಕರ ಬಲಿದಾನ

ಈ ಹತ್ಯಾಕಾಂಡವನ್ನು ವಿಶ್ವದ ಇತರ ಕಾರ್ಮಿಕ ಸಂಘಟನೆಗಳು ವಿರೋಧಿಸಿದೆವು. ಕಾರ್ಮಿಕರ ಮೇಲಾದ ದೌರ್ಜನ್ಯ ವಿರೋಧಿಸಿ 1889ರಲ್ಲಿ ಪ್ಯಾರಿಸಿನಲ್ಲಿ ಅಂತರಾಷ್ಟ್ರೀಯ ಸಮಾಜವಾದಿ ಸಮ್ಮೇಳನ ಮಾಡಲಾಯಿತು. ಮಾರುಕಟ್ಟೆಯ ಗೋಲಿಬಾರ್​ನಲ್ಲಿ ಮೃತರಾದ ಕಾರ್ಮಿಕರ ನೆನಪಿಗಾಗಿ ಮೇ ಒಂದನ್ನು ಅಂತರರಾಷ್ಟ್ರೀಯ ಕಾರ್ಮಿಕರ ದಿನವನ್ನಾಗಿ ಆಚರಿಸಲು ಸಮ್ಮೇಳನದಲ್ಲಿ ನಿರ್ಧರಿಸಲಾಯಿತು.

ಭಾರತದಲ್ಲಿ ಕಾರ್ಮಿಕ ದಿನಾಚರಣೆ

ಭಾರತದಲ್ಲಿ ಕಾರ್ಮಿಕ ದಿನಾಚರಣೆಯನ್ನು ಮೊದಲಿಗೆ ಆಚರಿಸಿದ್ದು ಲೇಬರ್ ಕಿಸಾನ್ ಪಾರ್ಟಿ ಆಫ್ ಹಿಂದುಸ್ತಾನ್. 1923ರ ಮೇ1ರಂದು ಚೆನ್ನೈನಲ್ಲಿ 'ಲೇಬರ್ ಕಿಸಾನ್ ಪಾರ್ಟಿ ಆಫ್ ಹಿಂದುಸ್ತಾನ್' ಅಡಿಯಲ್ಲಿ ಕಾರ್ಮಿಕ ದಿನವನ್ನು ಆಚರಿಸಲಾಯಿತು. ಆ ಸಮಯದಲ್ಲಿ ಇದನ್ನು 'ಮದ್ರಾಸ್ ಡೆ' ಎಂದು ಕರೆಯಲಾಗುತ್ತಿತು.

ಭಾರತದಲ್ಲಿ 1949ರಲ್ಲಿ ಕಾರ್ಮಿಕ ಬದುಕಿನ ಸುಧಾರಣೆಗಾಗಿ ಕನಿಷ್ಠ ಕೂಲಿ ಕಾಯ್ದೆ ಜಾರಿಗೆ ತರಲಾಯಿತು. ಆದರೆ ಅದು ಪರಿಪೂರ್ಣವಾಗಿ ಜಾರಿಗೆ ಬಂದಿದೆ ಎಂದು ಹೇಳಲು ಸಾಧ್ಯವಿಲ್ಲ.

ಕಾರ್ಮಿಕರಿಗೆ ಸಿಗಬೇಕಾಗಿದೆ ಭದ್ರತೆ

ಕಾರ್ಮಿಕರನ್ನು 13-15 ತಾಸು ದುಡಿಸಿಕೊಳ್ಳುವ ಕಂಪನಿಗಳಿವೆ. ಅವರಿಗೆ ಸಿಗಬೇಕಾಗಿದ್ದ ಎಷ್ಟೋ ಸೌಲಭ್ಯಗಳು ಇನ್ನೂ ಸಿಗುತ್ತಿಲ್ಲ. ಇಂತಹ ಶೋಷಣೆ ವಿರುದ್ಧ ಕಾರ್ಮಿಕರು ಒಟ್ಟಾಗಿ ಹೋರಾಡಬೇಕು. ಕಾರ್ಮಿಕ ಒಕ್ಕೂಟಗಳಲ್ಲಿ ಐಕ್ಯತೆ ಕಾಪಾಡಿಕೊಂಡು ಹೋರಾಟ ಮಾಡಲು ಸದಾ ಶ್ರಮಿಸಬೇಕು. ಆಗ ಮಾತ್ರ ಶೋಷಣೆ ನಿಲ್ಲಲು ಸಾಧ್ಯ. ಕಾರ್ಮಿಕರಿಗೆ ನ್ಯಾಯ ದೊರೆಯುತ್ತದೆ. ಇದು ಕಾರ್ಮಿಕರು ಒಟ್ಟಾಗಿ ಇದ್ದರೆ ಮಾತ್ರ ಸಾಧ್ಯ.

ಇದೀಗ ಕೋವಿಡ್ 19 ಎಂಬ ಸಾಮಾಜಿಕ ಪಿಡುಗು ಇಡೀ ವಿಶ್ವದಲ್ಲಿ ಸಾಕಷ್ಟು ಆರ್ಥಿಕ ಸಂಕಷ್ಟ ತಂದೊಡ್ಡಿದೆ. ಎಷ್ಟೋ ಕಾರ್ಮಿಕರು ಕೆಲಸ ಕಳೆದುಕೊಳ್ಳುವ ಭಯದಲ್ಲಿದ್ದಾರೆ. ಈ ಸಂದರ್ಭದಲ್ಲಿ ಕಾರ್ಮಿಕ ಸಂಘಟನೆಗಳು ಒಟ್ಟಾಗಿ ಕಾರ್ಮಿಕರಿಗೆ ಭದ್ರತೆ ಒದಗಿಸುವಂತಾಗಲಿ.

ದೇಶದ ಅಭಿವೃದ್ಧಿಗೆ ಬೆವರು ಹರಿಸುತ್ತಿರುವ ಪ್ರತಿಯೊಬ್ಬ ಕಾರ್ಮಿಕರಿಗೆ ಕಾರ್ಮಿಕ ದಿನಾಚರಣೆಯ ಶುಭಾಶಯಗಳು...