ಇಂತಹ ಜನರೂ ಜಗತ್ತಿನಲ್ಲಿ ಇದ್ದಾರೆಯೇ? ಅಚ್ಚರಿಯಾಗುತ್ತಿದೆ!!

ಇವರಾರು?

ಯನೋಮಾಮಿ ಎಂಬ ಹೆಸರಿನ ಈ ಬುಡಕಟ್ಟು ಜನಾಂಗ ಅಮೇಜಾನ್ ಅರಣ್ಯದ ನಡುವೆ ಇರುವ ಸುಮಾರು 200-250 ಹಳ್ಳಿಗಳಲ್ಲಿ ವಾಸವಾಗಿದ್ದಾರೆ. ಇತರ ಪದ್ದತಿಗಳಲ್ಲಿ ಉಳಿದ ಬುಡಕಟ್ಟು ಜನಾಂಗದಂತೆ ಜೀವಿಸುವ ಇವರು ಮರಣಾನಂತರ ಮೃತರ ಶರೀರದ ಬೂದಿಯನ್ನು ಸೇವಿಸುವ ಪದ್ಧತಿಯಿಂದ ವಿಶಿಷ್ಟರಾಗಿದ್ದಾರೆ. ಮೃತ ವ್ಯಕ್ತಿ ಸಂಬಂಧಿಕನೇ ಆಗಬೇಕೆಂದಿಲ್ಲ, ಊರಿನಲ್ಲಿ ಯಾರು ಸತ್ತರೂ ಉಳಿದವರಿಗೆಲ್ಲಾ ಸೂಪ್ ಹಬ್ಬ!

ಇವರ ನಂಬಿಕೆ ಏನು?

ಈ ಜನಾಂಗದವರು ಸಾವನ್ನು ನಂಬುವುದಿಲ್ಲ. ಬದಲಿಗೆ ವೈರಿಗುಂಪಿನವರು ಪ್ರೇತಾತ್ಮವೊಂದನ್ನು ಈ ಗುಂಪಿನಲ್ಲಿ ಯಾರನ್ನಾದರೂ ಕೊಲ್ಲಲು ಕಳುಹಿಸಿದ್ದಾರೆ ಎಂದು ನಂಬುತ್ತಾರೆ. ಅಂದರೆ ಸಾವಿಗೆ ಎದುರಾಳಿ ಪಡೆಯ ಪ್ರೇತಾತ್ಮವೇ ಕಾರಣ. ಇದಕ್ಕೆ ಪರಿಹಾರವೆಂದರೆ ಮೃತನಾದ ತಕ್ಷಣ ಮೃತದೇಹವನ್ನು ಸುಟ್ಟುಬಿಡುವುದು.

ಹಾಗಾದರೆ ಬೂದಿಯನ್ನು ಸೇವಿಸುವುದೇಕೆ?

ಬೂದಿಯನ್ನು ಸೇವಿಸುವ ಮೂಲಕ ಮೃತರ ಆತ್ಮ ಕುಡಿದವರ ಶರೀರದಲ್ಲಿ ಅಹವಾನೆಗೊಂಡು ಜನಾಂಗದಲ್ಲಿ ಈಗ ಜೀವಂತರಿರುವ ಹಾಗೂ ಅವರಿಗೆ ಹುಟ್ಟುವ ಮುಂದಿನ ಪೀಳಿಗೆಗೆ ಶುಭವಾಗುತ್ತದೆ.

ಬೂದಿಯ ಸೂಪ್ ಹೇಗೆ ಮಾಡಲಾಗುತ್ತದೆ?

ಮೃತ ವ್ಯಕ್ತಿಯ ಮರಣದ ಸಮಯಕ್ಕನುಸಾರವಾಗಿ ಎರಡು ಬಗೆಯಲ್ಲಿ ಈ ವಿಧಿ ಆಚರಿಸಲಾಗುತ್ತದೆ. ಇವರ ವಿಶೇಷ ಹಬ್ಬ ಹತ್ತಿರವಿದ್ದರೆ ದೇಹವನ್ನು ಸುಮಾರು ನಲವತ್ತೈದು ದಿನ ಎಲೆಗಳ ಅಡಿ ಕೊಳೆಯಲು ಬಿಟ್ಟು ಬಳಿಕ ಕೊಳೆತ ಈ ದೇಹವನ್ನು ಸುಟ್ಟು ಬೂದಿಯನ್ನು ಕೊಳೆಸಿದ ಬಾಳೆಯಹಣ್ಣಿನ ತಿರುಳಿನ ಜೊತೆಗೆ ಹಬ್ಬದ ದಿನ ಎಲ್ಲರೂ ಜೊತೆಗೂಡಿ ಸೇವಿಸುತ್ತಾರೆ ಜೊತೆಗೆ ಮೂಳೆಯನ್ನೂ ತಂದು ಅಂಟಿದ್ದ ಮಾಂಸವನ್ನೂ ತಿನ್ನುತ್ತಾರೆ. ಇತರ ವೇಳೆಯಲ್ಲಿ ಮೃತ ವ್ಯಕ್ತಿಯ ಶರೀರವನ್ನು ಸುಟ್ಟು ಮೂಳೆಗಳನ್ನು ಹಾಗೇ ಬಿಟ್ಟು ಬೂದಿಯನ್ನು ಮಾತ್ರ ಸೇವಿಸುತ್ತಾರೆ.

ಈ ಸೇವನೆಗೆ ಇಡಿಯ ಹಳ್ಳಿಯೇ ಆಗಮಿಸುತ್ತದೆ

ಈ ವಿಧಿಯನ್ನು ಒಂದು ಪವಿತ್ರ ವಿಧಿಯಂತೆ ಆಚರಿಸುವ ಈ ಜನರು ಈ ಸಮಯದಲ್ಲಿ ಇಡಿಯ ಹಳ್ಳಿಯ ಒಬ್ಬರನ್ನೂ ಬಿಡದಂತೆ ಸ್ಥಳಕ್ಕೆ ಆಗಮಿಸಿ ಪಾಲ್ಗೊಳ್ಳುತ್ತಾರೆ. ಅಲ್ಲದೇ ಈ ಬೂದಿಯ ಸೂಪ್ ಅನ್ನು ನಾಳೆಗೆ ಬಿಡುವಂತಿಲ್ಲ, ಅಂದೇ ಪೂರ್ಣವಾಗಿ ಖಾಲಿ ಮಾಡಬೇಕಾದುದು ಅಗತ್ಯ.