ಆಡು ಮುಟ್ಟದ ಸೊಪ್ಪಿಲ್ಲ, ಮನುಷ್ಯ ತಿನ್ನದ ಆಹಾರವಿಲ್ಲ!

ಸ್ಟಿಂಕ್ ಬಗ್ಸ್

ಗಬ್ಬುನಾತದ ಹುಳವನ್ನು ಹಿಡಿದಾಗ ಇದು ಸೂಸುವ ಗಬ್ಬುನಾತದ ಪರಿಣಾಮವಾಗಿ ಇವನ್ನು ಎಸೆಯುವವರೇ ಹೆಚ್ಚು. ಈ ವಾಸನೆಗೆ ಐಯೋಡಿನ್ ಕಾರಣ. ಈ ಕೀಟಗಳು ಆತ್ಮರಕ್ಷಣೆಗೆ ಐಯೋಡಿನ್ ಅನ್ನು ತಮ್ಮ ದೇಹದಿಂದ ವಿಸರ್ಜಿಸುತ್ತವೆ. ಆದರೆ ಈ ಆತ್ಮರಕ್ಷಣೆಯ ವಿಧಾನವೇ ಇವುಗಳಿಗೆ ಮುಳುವಾಗಿದೆ. ಈ ವಾಸನೆ ಇರುವ ಹುಳಗಳನ್ನು ವಾಸನೆ ಬರದೇ ಇರಲು ಸೇಬಿನ ರುಚಿ ಸೇರಿಸಿ ಫ್ರೈ ಮಾಡಿ ತಿಂದರೆ ಕೆಲವಾರು ರೋಗಗಳು ಗುಣವಾಗುತ್ತವೆ ಎಂದು ಪ್ರಚಾರ ಮಾಡಲಾಗುತ್ತಿದೆ.

ಮಿಡತೆ, ಚಿಮ್ಮುಂಡಿ ಹಾಗೂ ಶಲಭ

ಮಿಡತೆ ಹಾಗೂ ಮಿಡತೆಯನ್ನೇ ಹೋಲುವ ಶಲಭ (ಇದರ ಆಕಾರವನ್ನೇ ಪರಿಗಣಿಸಿ ಶಲಭಾಸನ ಎಂಬ ಯೋಗಾಸನವೂ ಇದೆ) ಹಾಗೂ ರಾತ್ರಿಯಾಗುತ್ತಿದ್ದಂತೆ ಟ್ರರ್ರ್ರ್..ಟ್ರರ್ರ್.. ಎಂಬ ಶಬ್ದ ಹೊರಡಿಸುವ ಚಿಮ್ಮುಂಡಿ (chirping cricket) ಕೀಟಗಳು ಈಗ ಹೋಟೆಲಿನ ತಟ್ಟೆಗಳ ಮೇಲಿನ ದುಬಾರಿ ಖಾದ್ಯಗಳಾಗಿ ಪರಿಗಣಿಸಲ್ಪಡುತ್ತಿವೆ. ಅದರಲ್ಲೂ ಶಲಭಗಳು ದೊಡ್ಡ ಗುಂಪಿನಲ್ಲಿ ಮೋಡದಂತೆ ಹೊಲದ ಮೇಲೆ ಧಾಳಿಇಟ್ಟು ಕೆಲವೇ ನಿಮಿಷಗಳಲ್ಲಿ ರೈತನ ತಿಂಗಳುಗಳ ಪರಿಶ್ರಮದ ಬೆಳೆಯನ್ನು ತಿಂದು ಮತ್ತೆ ಮೋಡದಂತೆ ಹಾರಿ ಹೋಗುತ್ತವೆ. ಹೀಗೆ ಮಾಡುವುದರಿಂದಲಾದರೂ ರೈತರನ್ನು ಆತ್ಮಹತ್ಯೆಯಿಂದ ಉಳಿಸುವ ಇರಾದೆ ವಿಶ್ವಸಂಸ್ಥೆಗೆ ಇರಬಹುದೇ?

ಇರುವೆ

ಇರುವೆಗಳ ಮೊಟ್ಟೆಗಳನ್ನು ಸಾಮಾನ್ಯವಾಗಿ ಕಾಡಿನ ಪರಿಚಯವಿರುವವರೆಲ್ಲರೂ ರುಚಿ ನೋಡಿದ್ದಾರೆ. ಮಲೆನಾಡಿನಲ್ಲಿ ಇದನ್ನು ಚಟ್ನಿ ಮಾಡಿ ತಿನ್ನುತ್ತಾರೆ. ಈ ಚಟ್ನಿಯ ಪೋಷಕಾಂಶಗಳನ್ನು ಅಧ್ಯಯನ ಮಾಡಿದವರಿಗೆ ನೂರು ಗ್ರಾಂ ಕೆಂಪಿರುವೆ ಚಟ್ನಿಯಲ್ಲಿ ಸುಮಾರು ಹದಿನಾಲ್ಕು ಗ್ರಾಂ ಪ್ರೋಟೀನ್ ದೊರಕಿದ್ದು ಇದು ಮೊಟ್ಟೆಗಿಂತಲೂ ಹೆಚ್ಚು ಪೌಷ್ಟಿಕವಾಗಿದೆ. ಸುಮಾರು ನಲವತ್ತೆಂಟು ಗ್ರಾಂ ಕ್ಯಾಲ್ಸಿಯಂ, ಉತ್ತಮ ಪ್ರಮಾಣದ ಕಬ್ಬಿಣ ಹಾಗೂ ಇತರ ಪೋಷಕಾಂಶಗಳಿರುವ ಆಹಾರವಾಗಿದ್ದು ಇದಕ್ಕೆ ಸರಿಸಾಟಿಯೇ ಇಲ್ಲ.

ಜೇನ್ನೊಣ ಮತ್ತು ಕಣಜ

ಕಚ್ಚದ ಜೇನುನೊಣ ಹಾಗೂ ಭಾರೀ ಉರಿಯುಂಟು ಮಾಡುವ ಕಣಜದ ಹುಳಗಳನ್ನೂ ಈ ಕೀಟಪ್ರಿಯರು ಬಿಟ್ಟಿಲ್ಲ. ಇವನ್ನು ಹುರಿದು ತಿನ್ನುವವರು ತಮಗೆ ಹುರಿದ ಶೇಂಗಾಬೀಜ ಅಥವಾ ಬಾದಾಮಿ ತಿಂದಂತೆಯೇ ಅಯಿತು ಎಂದು ತಿಳಿಸುತ್ತಾರೆ. ಅದರಲ್ಲೂ ಕಣಜದ ಹುಳಗಳು ಕೊಂಚ ಹುಳಿಯಾಗಿದ್ದು ಹೆಚ್ಚು ರುಚಿಕರ ಎಂದು ಚಪ್ಪರಿಸುತ್ತಿದ್ದಾರೆ.

ಚಿಟ್ಟೆ ಮತ್ತು ಪತಂಗ

ಆಫ್ರಿಕಾದಲ್ಲಿ ಈ ಕೀಟಗಳು ಹೆಚ್ಚು ಜನಪ್ರಿಯವಾಗಿದ್ದು ವಿಶೇಷವಾಗಿ ಮಕ್ಕಳಿಗೆ ಮತ್ತು ಗರ್ಭಿಣಿಯರಿಗೆ ಪೌಷ್ಟಿಕ ಆಹಾರದ ಕೊರತೆಯನ್ನು ನೀಗಿಸುವ ಆಹಾರವಾಗಿವೆ. ಯಾವಾಗ ಮನೆಯಲ್ಲಿ ಆಹಾರದ ಕೊರತೆ ಇರುತ್ತದೆಯೋ ಆಗ ಇವರು ಚಿಟ್ಟೆ ಮತ್ತು ಪತಂಗಗಳನ್ನು ಹುಡುಕಿಕೊಂಡು ಹೊರಡುತ್ತಾರೆ. ಮೆಕ್ಸಿಕೋದಲ್ಲಂತೂ ಇವುಗಳನ್ನು ಸಂಗ್ರಹಿಸಿ ಕೊಳೆಸಿ ಮೆಸ್ಕಾಲ್ ಎಂಬ ಹೆಸರಿನ ಮದ್ಯವನ್ನೂ ತಯಾರಿಸಿ ಕುಡಿಯುತ್ತಾರೆ.

ಜೀರುಂಡೆ

ಸಾಮಾನ್ಯವಾಗಿ ಸೆಗಣಿಯನ್ನೇ ಆಹಾರವಾಗಿಸಿರುವ ಜೀರುಂಡೆಗಳನ್ನೂ ಈ ಜನರು ಬಿಟ್ಟಿಲ್ಲ. ವಿಶ್ವದಲ್ಲಿ ಅತಿ ಹೆಚ್ಚು ಸಾಮಾನ್ಯವಾಗಿ ತಿನ್ನಲ್ಪಡುವ ಕೀಟವೂ ಜೀರುಂಡೆ. ಇವುಗಳಲ್ಲಿ ನೂರಾರು ಬಗೆಗಳಿದ್ದು ವಿಶೇಷವಾಗಿ ದಕ್ಷಿಣ ಅಮೇರಿಕಾದ ಅಮೆಜಾನ್ ಅರಣ್ಯಗಳಲ್ಲಿ, ಆಫ್ರಿಕಾದ ಹೆಚ್ಚಿನ ಭಾಗಗಳಲ್ಲಿ ಮತ್ತು ಅರಣ್ಯಪ್ರದೇಶ ದಟ್ಟವಿರುವ ಪ್ರದೇಶಗಳಲ್ಲಿ ಇವುಗಳನ್ನು ಹೆಚ್ಚಾಗಿ ಆಹಾರದ ರೂಪದಲ್ಲಿ ಸೇವಿಸಲಾಗುತ್ತದೆ.