ಸಂಸಾರದಲ್ಲಿ ಸುಖ-ಶಾಂತಿ, ನೆಮ್ಮದಿ ಇರಬೇಕೆಂದರೆ ಗಂಡ-ಹೆಂಡತಿ ಹೇಗಿರಬೇಕು? ಚಾಣಕ್ಯ ಹೇಳಿದ ಗುಟ್ಟುಗಳು

ಮಹಿಳೆಯರಲ್ಲಿ ಇರಬೇಕಾದ ಗುಣಗಳು

ಹೆಂಡತಿಯು ಕೆಲವೊಂದು ಗುಣಗಳನ್ನು ಮೈಗೂಡಿಸಿಕೊಂಡಿದ್ದರೆ ಮಾತ್ರ ಸುಖ ಸಂಸಾರ ನಡೆಸಲು ಸಾಧ್ಯ ಅವುಗಳೆಂದರೆ..

1. ಧಾರ್ಮಿಕ ನಂಬಿಕೆಗಳು

ಚಾಣಕ್ಯನ ಪ್ರಕಾರ ಗೃಹಿಣಿಯಾದವಳು ಮನೆಯನ್ನ ಬೃಂದಾವನದಂತೆ ಇಟ್ಟುಕೊಳ್ಳಬೇಕು. ಬೆಳಗ್ಗೆ ಎದ್ದ ತಕ್ಷಣ ಮನೆ ಬಾಗಿಲಿಗೆ ನೀರು ಹಾಕಿ ರಂಗೋಲಿ ಬೆಳಗಬೇಕು. ಅಷ್ಟೇ ಅಲ್ಲ, ಬೆಳ್ಳ ಬೆಳಗ್ಗೆ ಮನೆಯಲ್ಲಿ ಪೂಜಾ ಕೈಕರ್ಯಗಳನ್ನು ಕೈಗೊಳ್ಳಬೇಕು. ಆಗ ಮನೆಯಲ್ಲಿ ಮನಶಾಂತಿ ನೆಲೆಸುತ್ತದೆ. ಇನ್ನೂ ಹಬ್ಬ ಹರಿದಿನಗಳಲ್ಲಿ ಕಟ್ಟು ನಿಟ್ಟಾಗಿ, ಮಡಿವಂತಿಕೆಯಿಂದ ಪೂಜಾ ಕಾರ್ಯ ನೆರವೇರಿಸಬೇಕು. ಮನೆಯೇ ಮೊದಲ ಪಾಠಶಾಲೆ ಅಂತಾರೆ ಕ್ರಮೇಣ ತಾಯಿಯ ಸಂಸ್ಕಾರವನ್ನು ಮಕ್ಕಳು ಕೂಡ ಕಲಿಯುತ್ತಾರೆ.

2. ಮಾತು ಮಧುರವಾಗಿರಬೇಕು

ಚಾಣಕ್ಯನ ಪ್ರಕಾರ ಹೆಂಡತಿಯಾದವಳು ಗೈಯಾಳಿಯಂತಿರಬಾರದು. ಗಂಡ ಹಾಗೂ ಮಕ್ಕಳ ಜೊತೆಗೆ ಮಧುರವಾಗಿ ಮಾತನಾಡಿ ಉತ್ತಮ ಒಡನಾಟ ಹೊಂದಿರಬೇಕು. ಕೆಲಸದಿಂದ ಸಂಜೆ ಮನೆಗೆ ಬಂದ ಗಂಡನ ಜೊತೆ ಒಂದೆರಡು ಪ್ರೀತಿಯ ಮಾತನಾಡಿದರೆ ಅಷ್ಟೇ ಸಾಕು ಆತ ಅದಕ್ಕಿಂತ ಹೆಚ್ಚು ಬೇರೇನನ್ನೂ ಆತ ಬಯಸೋದಿಲ್ಲ. ಒಟ್ಟಿನಲ್ಲಿ ಹೆಂಡತಿ ಎಲ್ಲವನ್ನೂ ಸರಿದೂಗಿಸಿಕೊಂಡು ಹೋಗುವ ಗುಣ ಹೊಂದಿರಬೇಕು.

3. ಉಳಿತಾಯ

ಪತ್ನಿಗೆ ಉಳಿತಾಯ ಮಾಡುವ ಗುಣ ಇರಬೇಕು ಎಂದು ಚಾಣಕ್ಯ ಹೇಳುತ್ತಾರೆ. ಗೃಹಿಣಿಯಾದವಳು ಸಿಕ್ಕಾಪಟ್ಟೆ ಖರ್ಚು ಮಾಡಬಾರದು. ಎಲ್ಲೆಲ್ಲಿ ಉಳಿತಾಯ ಮಾಡಲು ಸಾಧ್ಯವೋ ಅಲ್ಲೆಲ್ಲ ಹಣ ಕೂಡಿಡಬೇಕು. ಈ ದುಡ್ಡು ಖಂಡಿತ ಕಷ್ಟಕಾಲದಲ್ಲಿ ಉಪಯೋಗಕ್ಕೆ ಬರುತ್ತದೆ. ಗಂಡನ ಸಂಕಷ್ಟವನ್ನು ಅರ್ಥ ಮಾಡಿಕೊಂಡು ಆತನಿಗೆ ಹೊಂದಿಕೊಂಡು ಹೋಗುವ ಗುಣ ಇರಬೇಕು.

ಪುರುಷರಲ್ಲಿ ಇರಲೇಬೇಕಾದ ಗುಣಗಳು

ಸಂಸಾರದಲ್ಲಿ ಹೆಂಡತಿ ಮಾತ್ರ ಹೊಂದಿಕೊಂಡು ಹೋದರೆ ಸಾಲುವುದಿಲ್ಲ ಅದರಲ್ಲಿ ಗಂಡನ ಪಾಲು ಇರಬೇಕು. ಸುಖ ಸಂಸಾರಕ್ಕೆ ಪುರುಷರಲ್ಲಿ ಇರಬೇಕಾದ ಗುಣಗಳೆಂದರೆ..

1. ತೃಪ್ತಿ ಇರಬೇಕು

ಕೆಲವೊಂದು ಮನೆಗಳಲ್ಲಿ ಗಂಡಂದಿರಿಗೆ ಏನು ಮಾಡಿದರೂ ತೃಪ್ತಿ ಅನ್ನೋದು ಆಗೋದೇ ಇಲ್ಲ. ಹೆಂಡತಿ ಮಾಡಿದ ಪ್ರತಿಯೊಂದು ಕೆಲಸದಲ್ಲೂ ತಪ್ಪು ಹುಡುಕಿ ಕೊಂಕು ತೆಗೆಯುತ್ತಾರೆ. ತನ್ನ ಪ್ರಾಬಲ್ಯವನ್ನೇ ಹೇರಲು ಬಯಸುತ್ತಾರೆ. ಚಾಣಕ್ಯನ ಪ್ರಕಾರ ಇದು ಸರಿಯಲ್ಲ, ಗಂಡನಾದವನು ಹೆಂಡತಿಯ ಕಷ್ಟಗಳನ್ನು ಅರಿತುಕೊಂಡು ಆಕೆಯ ಜೊತೆಗೆ ಪ್ರೀತಿಯಿಂದ ಸಂಸಾರ ನಡೆಸಬೇಕು.

2. ಪ್ರಮಾಣಿಕನಾಗಿರಬೇಕು

ಪುರುಷನಾದವನು ಒಂದೇ ಸಂಸಾರಕ್ಕೆ ತೃಪ್ತಿ ಪಟ್ಟುಕೊಳ್ಳಬೇಕು. ಅದನ್ನು ಬಿಟ್ಟು ಬೇರೆ ಮಹಿಳೆಯೊಂದಿಗೆ ಅನೈತಿಕ ಸಂಬಂಧ ಇಟ್ಟುಕೊಳ್ಳಬಾರದು. ಆಗ ಸಂಸಾರ ಧೂಳಿಪಟವಾಗುತ್ತದೆ. ಚಾಣಕ್ಯನ ಪ್ರಕಾರ ಅನೈತಿಕ ಸಂಬಂಧ ಇಟ್ಟುಕೊಳ್ಳುವುದು ತಪ್ಪು. ಹೆಂಡತಿ ಹಾಗೂ ಮಕ್ಕಳೊಂದಿಗೆ ಸುಖ ಸಂಸಾರ ನಡೆಸಬೇಕು.

3. ಈ ವಿಚಾರಗಳ ಬಗ್ಗೆ ಗಮನವಿರಬೇಕು

ಪುರುಷನಾದವನು ಪತಿಯ ಕರ್ತವ್ಯಗಳನ್ನು ನಿಭಾಯಿಸಬೇಕು. ತನ್ನ ಹೆಂಡತಿ ಹಾಗೂ ಮಕ್ಕಳನ್ನು ಶತ್ರುಗಳಿಂದ ರಕ್ಷಿಸಬೇಕು. ಎಲ್ಲೆ ಹೋದರು ಮನೆಯ ಮೇಲೆ ಒಂದು ಕಣ್ಣು ಇರಲೇಬೇಕು. ಹೊರಗಿನವರಿಂದ ತನ್ನ ಕುಟುಂಬಕ್ಕೆ ಯಾವುದೇ ತೊಂದರೆ ಆಗದಂತೆ ಜಾಗರೂಕತೆ ವಹಿಸಬೇಕು.

4. ಲೈಂಗಿಕ ಸಂತೃಪ್ತಿ ನೀಡಬೇಕು

ಪುರುಷನಾದವನು ಕೇವಲ ಗಂಡನ ಕರ್ತವ್ಯ ನಿಭಾಯಿಸಿದರೆ ಸಾಲದು. ತನ್ನ ಪತ್ನಿಗೆ ಲೈಂಗಿಕ ಸಂತೃಪ್ತಿಯನ್ನು ನೀಡಬೇಕು. ಒಂದು ವೇಳೆ ಆಕೆಗೆ ಮನೆಯಲ್ಲಿ ಲೈಂಗಿಕ ಸಂತೃಪ್ತಿ ಸಿಗದೇ ಹೋದರೆ ಆಕೆ ಬೇರೆ ಕಡೆ ಆಕರ್ಷಿತಳಾಗುವ ಸಾಧ್ಯತೆ ಹೆಚ್ಚಾಗಿರುತ್ತದೆ. ಆಗ ಮಾತ್ರ ದಾಂಪತ್ಯ ಜೀವನ ಸುಖಕರವಾಗಿರುವುದಿಲ್ಲ. ಅನೈತಿಕ ಸಂಬಂಧಕ್ಕೆ ಕಟ್ಟು ಬಿದ್ದ ಪತ್ನಿಯ ಜೊತೆ ಬಾಳ್ವೆ ಕಷ್ಟ ಎನಿಸಬಹದು. ಹೀಗಾಗಿ ಮುಂಜಾಗೃತೆಯಿಂದಿರಿ.

ಕೆಲವೊಂದು ಸಾರಿ ಸಂಸಾರದಲ್ಲಿ ಅಡ್ಜಸ್ಟ್‌ಮೆಂಟ್‌ ಮಾಡಬೇಕಾಗಿರುತ್ತದೆ ಆ ಸಮಯದಲ್ಲಿ ಪತಿ-ಪತ್ನಿ ಇಬ್ಬರೂ ಕೂಡ ಹೊಂದಿಕೊಳ್ಳಲೇಬೇಕಾಗುತ್ತದೆ. ಚಾಣಕ್ಯನ ಈ ಸೂತ್ರಗಳನ್ನು ಪತಿ-ಪತ್ನಿ ಇಬ್ಬರು ಪಾಲಿಸಿದ್ರೆ ಸಾಕು ಸುಖ ಸಂಸಾರಕ್ಕೆ ಬೇರೇನೂ ಬೇಕಿಲ್ಲ.