ವರ್ಷಾಂತ್ಯ ಸಂಭವಿಸಲಿರುವ ಕಂಕಣ ಸೂರ್ಯಗ್ರಹಣದ ವಿಶೇಷತೆ ಏನು?

ಕಂಕಣ ಅಥವಾ ಫೈರ್‌ ರಿಂಗ್‌ ಸೂರ್ಯಗ್ರಹಣ

ಈ ಬಾರಿ ಗೋಚರಿಸಲಿರುವ ಸೂರ್ಯಗ್ರಹಣವನ್ನು ಕಂಕಣ ಅಥವಾ ಫೈರ್‌ರಿಂಗ್‌ ಎಂದು ಕರೆಯಲಾಗುವುದು. ಸಾಮಾನ್ಯವಾಗಿ ಸೂರ್ಯಗ್ರಹಣ 3 ವಿಧದಲ್ಲಿ ಸಂಭವಿಸುವುದು. ಸೂರ್ಯ ಪೂರ್ಣ ಮರೆಯಾದಾಗ ಅದನ್ನು ಪೂರ್ಣ ಸೂರ್ಯಗ್ರಹಣ, ಭಾಗಶಃ ಮರೆಯಾದರೆ ಪಾರ್ಶ್ವ ಸೂರ್ಯ ಗ್ರಹಣ, ಸೂರ್ಯನ ಅಂಚುಗಳು ಗೋಚರಿಸಿದರೆ ಕಂಕಣ ಸೂರ್ಯಗ್ರಹಣವೆಂದು ಕರೆಯಲಾಗುವುದು. ಸೂರ್ಯಗ್ರಹಣದ ಸಮಯದಲ್ಲಿ ಚಂದ್ರನ ಅಂಚಿನಲ್ಲಿ ಉಂಗುರ ಆಕಾರದಲ್ಲಿ ಗೋಚರಿಸಲಿದ್ದು ರಿಂಗ್‌ಫೈರ್ (ಬೆಂಕಿ ಉಂಗುರ) ಎಂದು ಕರೆಯಲಾಗುತ್ತದೆ. ಅಂದರೆ ಸೂರ್ಯನನ್ನು ಚಂದ್ರ ಮರೆ ಮಾಡಿದರೂ ಕೂಡ ಸೂರ್ಯನ ಅಂಚುಗಳು ಸುತ್ತಲೂ ಉಂಗುರಾಕಾರದಲ್ಲಿ ಗೋಚರಿಸಲಿದೆ. ಇದಕ್ಕೆ ಕಂಕಣ ಸೂರ್ಯಗ್ರಹಣ ಎಂದು ಕರೆಯಲಾಗುವುದು.

ಸೂರ್ಯಗ್ರಹಣ ಎಲ್ಲೆಲ್ಲಿ ಗೋಚರಿಸಲಿದೆ

ಭಾರತದ ಕೆಲವಡೆ ಭಾಗಶಃ ಸೂರ್ಯಗ್ರಹಣ ಗೋಚರಿಸಲಿದೆ. ಮದುರೈ, ಕೊಯಮತ್ತೂರು, ಚೆರವತ್ತೂರು, ಕೋಯಿನಾಡ್‌ನಲ್ಲಿ ಸಂಪೂರ್ಣ ಸೂರ್ಯಗ್ರಹಣ ಗೋಚರಿಸಲಿದೆ, ಬೆಂಗಳೂರಿನಲ್ಲಿ ಭಾಗಶಃ ಸೂರ್ಯಗ್ರಹಣ ಗೋಚರಿಸಲಿದೆ.

ಸೌದಿ ಅರೇಬಿಯಾ, ಕತಾರ್, ಓಮನ್, ಶ್ರೀಲಂಕಾ, ಮಲೇಷಿಯಾ, ಸಿಂಗಪೂರ್ ಹೀಗೆ ವಿವಿಧ ದೇಶಗಳಲ್ಲಿಯೂ ಸುರ್ಯಗ್ರಹಣ ಗೋಚರಿಸಲಿದೆ.

ಸೂರ್ಯಗ್ರಹಣದ ಸಮಯ

ಸೂರ್ಯಗ್ರಹಣ ಬೆಳಗ್ಗೆ 8 ಗಂಟೆ 7 ನಿಮಿಷದಿಂದ ಪ್ರಾರಂಭವಾಗಿ 11 ಗಂಟೆ 8 ನಿಮಿಷಕ್ಕೆ ಮುಗಿಯುತ್ತದೆ. ಬೆಳಗ್ಗೆ 9.31ಕ್ಕೆ ಪೂರ್ಣಪ್ರಮಾಣದ ಸೂರ್ಯಗ್ರಹಣ ಕಾಣಬಹುದು. ಸೂರ್ಯಗ್ರಹಣ ಉತ್ತರ ಹಾಗೂ ದಕ್ಷಿಣ ಭಾರತದಲ್ಲಿ ಗೋಚರಿಸಲಿದೆ. ಸುಮಾರು ಮೂರು ಗಂಟೆ ಒಂದು ನಿಮಿಷ ಸಂಭವಿಸುವ ಈ ಸೂರ್ಯಗ್ರಹಣದಲ್ಲಿ ಸೂರ್ಯನನ್ನು ಚಂದ್ರ ಶೇ. 91ರಷ್ಟು ಆವರಿಸಿಕೊಳ್ಳಲಿದ್ದಾನೆ.

172 ವರ್ಷಗಳ ನಂತರ ಯುಎಇನಲ್ಲಿ 'ಫೈರ್‌ ರಿಂಗ್‌' ಸೂರ್ಯಗ್ರಹಣ

172 ವರ್ಷಗಳ ನಂತರ ಇದೇ ಮೊದಲ ಬಾತಿಗೆ ಯುನೈಟೆಡ್ ಅರಬ್ ಎಮಿರೇಟ್ಸ್‌ನಲ್ಲಿ ಉಂಗುರಾಕಾರದಲ್ಲಿ ಸೂರ್ಯಗ್ರಹಣ ಗೋಚರಿಸಲಿದೆ ಎಂದು ದುಬೈನ ಖಗೋಳ ವಿಜ್ಞಾನಿಗಳು ಹೇಳಿದ್ದಾರೆ. ಈ ರೀತಿಯ ಸೂರ್ಯಗ್ರಹಣ 1847ರಲ್ಲಿ ಸಂಭವಿಸಿತ್ತು. ಈ ಬಾರಿ ಅಬು ಧಾಬಿಯ ಕೆಲವು ಭಾಗಗಳಲ್ಲಿ ಅಷ್ಟೇ ಗೋಚರಿಸಲಿದೆ.