ಗಮನಿಸಿ.. ಡಿಸೆಂಬರ್ 1 ರಿಂದ ಬದಲಾಗುತ್ತಿವೆ ಈ ಪ್ರಮುಖ ನಿಯಮಗಳು! ನಿಮ್ಮ ಜೇಬಿಗೆ ಭಾರೀ ಹೊಡೆತ

ಗಮನಿಸಿ.. ಡಿಸೆಂಬರ್ 1 ರಿಂದ ಈ 5 ಪ್ರಮುಖ ನಿಯಮಗಳು ಬದಲಾಗಲಿವೆ! ನಿಮ್ಮ ಜೇಬಿಗೆ ಬೀಳುವ ಭಾರೀ ಹೊಡೆತ. ಹೌದು, ಡಿಸೆಂಬರ್ 1ರಿಂದ (December 1) ಹಲವು ನಿಯಮಗಳು (Rules Change) ಬದಲಾಗಲಿವೆ. ಅವುಗಳಲ್ಲಿ ಕೆಲವು ನಿಮ್ಮ ಆರ್ಥಿಕ ಸ್ಥಿತಿಯ ಮೇಲೆ ಪರಿಣಾಮ ಬೀರಬಹುದು. ಆಧಾರ್ ಕಾರ್ಡ್‌ನಿಂದ ಹಿಡಿದು ಎಲ್‌ಪಿಜಿ ಬೆಲೆಗಳವರೆಗೆ ಹಲವು ಪ್ರಮುಖ ಬದಲಾವಣೆಗಳು 2025ರ ಡಿಸೆಂಬರ್ 1ರಿಂದ (Rule Changes December 2025) ಜಾರಿಗೆ ಬರಲಿವೆ.

ನವೆಂಬರ್ ತಿಂಗಳು ಮುಗಿಯುತ್ತಿದ್ದಂತೆ, ಡಿಸೆಂಬರ್ ಹೊಸ ನಿಯಮಗಳೊಂದಿಗೆ ಬರಲು ಸಿದ್ಧವಾಗಿದೆ. ಯುಐಡಿಎಐ ಆಧಾರ್ ಕಾರ್ಡ್‌ಗೆ ಹೊಸ, ಹೆಚ್ಚು ಸುರಕ್ಷಿತ ಸ್ವರೂಪವನ್ನು ಪರಿಚಯಿಸಲು ಸಿದ್ಧತೆ ನಡೆಸಿದೆ. ಜೊತೆಗೆ, ಯುಪಿಐ ಸ್ವಯಂ-ಪಾವತಿ ಮತ್ತು ಭದ್ರತಾ ವೈಶಿಷ್ಟ್ಯಗಳಲ್ಲಿ ಬದಲಾವಣೆಗಳು ಬರಲಿವೆ. ಎಸ್‌ಬಿಐ ಎಂಕಾಶ್ ಸೇವೆಯನ್ನು ಸ್ಥಗಿತಗೊಳಿಸಲಿದೆ. ಸರ್ಕಾರಿ ನೌಕರರಿಗೆ ಯುಪಿಎಸ್ ಆಯ್ಕೆ ಮಾಡುವ ಗಡುವು ಮುಕ್ತಾಯವಾಗಲಿದೆ. ಎಲ್‌ಪಿಜಿ ಮತ್ತು ಎಟಿಎಫ್ ಬೆಲೆಗಳನ್ನು ಸಹ ಈ ದಿನ ಪರಿಶೀಲಿಸಲಾಗುವುದು. ಇದು ನಿಮ್ಮ ಜೇಬಿಗೆ ನೇರವಾಗಿ ಪರಿಣಾಮ ಬೀರಬಹುದು.

Photo Credit: AI

ಆಧಾರ್ ಕಾರ್ಡ್‌ನಲ್ಲಿ ಏನು ಬದಲಾವಣೆ?

ಯುಐಡಿಎಐ (ಭಾರತೀಯ ವಿಶಿಷ್ಟ ಗುರುತಿನ ಪ್ರಾಧಿಕಾರ) ಆಧಾರ್ ಕಾರ್ಡ್ ವಿನ್ಯಾಸದಲ್ಲಿ ಮಹತ್ವದ ಬದಲಾವಣೆಗಳನ್ನು (Aadhaar New Rules) ತರಲು ಯೋಜಿಸುತ್ತಿದೆ. ಹೊಸ ಸ್ವರೂಪದಲ್ಲಿ, ಆಧಾರ್ ಕಾರ್ಡ್ ಕೇವಲ ಹೋಲ್ಡರ್‌ನ ಫೋಟೋ ಮತ್ತು ಕ್ಯೂಆರ್ ಕೋಡ್ ಅನ್ನು ಮಾತ್ರ ಪ್ರದರ್ಶಿಸುತ್ತದೆ. ಹೆಸರು, ವಿಳಾಸ ಮತ್ತು 12 ಅಂಕಿಯ ಆಧಾರ್ ಸಂಖ್ಯೆಯಂತಹ ವೈಯಕ್ತಿಕ ವಿವರಗಳನ್ನು ಕಾರ್ಡ್‌ನಿಂದ ತೆಗೆದುಹಾಕಲಾಗುತ್ತದೆ.

ಈ ಹೊಸ ನಿಯಮಗಳು ಡಿಸೆಂಬರ್ 2025ರ ಹೊತ್ತಿಗೆ ಜಾರಿಗೆ ಬರಲಿವೆ. ಈ ಬದಲಾವಣೆಯು ಡೇಟಾ ದುರ್ಬಳಕೆಯನ್ನು ತಡೆಗಟ್ಟಲು ಮತ್ತು ಹೋಟೆಲ್‌ಗಳು, ಈವೆಂಟ್ ಆಯೋಜಕರು ಮತ್ತು ಇತರ ಸಂಸ್ಥೆಗಳು ಬಳಸುವ ಅನಧಿಕೃತ ಆಫ್‌ಲೈನ್ ಪರಿಶೀಲನಾ ವಿಧಾನಗಳನ್ನು ನಿಲ್ಲಿಸುವ ಉದ್ದೇಶ ಹೊಂದಿದೆ.

ಯುಪಿಐನಲ್ಲಿ ಏನೆಲ್ಲಾ ಬದಲಾವಣೆ?

ಡಿಸೆಂಬರ್‌ನಲ್ಲಿ ಯುಪಿಐ ನಿಯಮಗಳಲ್ಲಿ ಪ್ರಮುಖ ಬದಲಾವಣೆಗಳು (UPI Rule Update) ಬರಲಿವೆ. ಡಿಸೆಂಬರ್ 31 ರಿಂದ ಜಾರಿಗೆ ಬರುವ ಹೊಸ ಯುಪಿಐ ನಿಯಮಗಳು ಬಳಕೆದಾರರಿಗೆ ತಮ್ಮ ಎಲ್ಲಾ ಸ್ವಯಂ-ಪಾವತಿ ಆದೇಶಗಳನ್ನು (ಚಂದಾದಾರಿಕೆಗಳು ಮತ್ತು ಇಎಂಐಗಳಂತಹವು) ಒಂದೇ ಯುಪಿಐ ಅಪ್ಲಿಕೇಶನ್‌ನಿಂದ ನಿರ್ವಹಿಸಲು ಅನುವು ಮಾಡಿಕೊಡುತ್ತವೆ.

ಎನ್‌ಸಿಪಿಐ (ನ್ಯಾಷನಲ್ ಪೇಮೆಂಟ್ಸ್ ಕಾರ್ಪೊರೇಷನ್ ಆಫ್ ಇಂಡಿಯಾ) ಪ್ರಕಟಿಸಿದ ಈ ಬದಲಾವಣೆಯು ಬಳಕೆದಾರರಿಗೆ ಈ ಆದೇಶಗಳನ್ನು ಒಂದು ಅಪ್‌ನಿಂದ ಇನ್ನೊಂದಕ್ಕೆ ವರ್ಗಾಯಿಸಲು ಸಹಕರಿಸುತ್ತದೆ. ಅಲ್ಲದೆ, ಕೆಲವು ವಹಿವಾಟುಗಳಿಗೆ ಮುಖ ಮತ್ತು ಬಯೋಮೆಟ್ರಿಕ್ ದೃಢೀಕರಣದಂತಹ ಹೊಸ ಭದ್ರತಾ ವೈಶಿಷ್ಟ್ಯಗಳನ್ನು ಸಹ ಪರಿಚಯಿಸಲಾಗುವುದು.

ಎಸ್‌ಬಿಐ ಎಂಕಾಶ್ ಸೇವೆ ಸ್ಥಗಿತ

ಡಿಸೆಂಬರ್ 1 ರಿಂದ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ (ಎಸ್‌ಬಿಐ) ತನ್ನ ಡಿಜಿಟಲ್ ಬ್ಯಾಂಕಿಂಗ್ ಸೇವೆಗಳಲ್ಲಿ ಪ್ರಮುಖ ಬದಲಾವಣೆಯನ್ನು ತರಲಿದೆ. ಬ್ಯಾಂಕಿನ ಆನ್‌ಲೈನ್ ಎಸ್‌ಬಿಐ ಮತ್ತು ಯೋನೋ ಲೈಟ್ ಪ್ಲಾಟ್‌ಫಾರ್ಮ್‌ಗಳಲ್ಲಿ ಎಂಕಾಶ್ ಸೇವೆಯನ್ನು (SBI Mcash Service End) ಸ್ಥಗಿತಗೊಳಿಸಲಾಗುವುದು.

ಎಸ್‌ಬಿಐ ಡಿಸೆಂಬರ್ 2025ರ ಅಂತ್ಯದ ವೇಳೆಗೆ ತನ್ನ ಹೊಸ ಯೋನೋ 2.0 ಅಪ್ಲಿಕೇಶನ್ ಅನ್ನು ಪ್ರಾರಂಭಿಸುವ ನಿರೀಕ್ಷೆಯಿದೆ. ಎಂಕಾಶ್ ಸೇವೆಯ ಮೂಲಕ, ಗ್ರಾಹಕರು ಫಲಾನುಭವಿಗಳನ್ನು ನೋಂದಾಯಿಸದೆ, ಕೇವಲ ಸ್ವೀಕರಿಸುವವರ ಮೊಬೈಲ್ ಸಂಖ್ಯೆ ಅಥವಾ ಇಮೇಲ್ ಐಡಿ ಬಳಸಿ ಹಣವನ್ನು ಕಳುಹಿಸಬಹುದಾಗಿತ್ತು. ಈ ಸೇವೆಯನ್ನು ಈಗ ಸಂಪೂರ್ಣವಾಗಿ ಸ್ಥಗಿತಗೊಳಿಸಲಾಗುತ್ತಿದೆ.

ಯುಪಿಎಸ್ ಕೊನೆಯ ದಿನಾಂಕ

ಡಿಸೆಂಬರ್ 1 ರಿಂದ ಸರ್ಕಾರಿ ನೌಕರರಿಗೆ ಯೂನಿಫೈಡ್ ಪಿಂಚಣಿ ಯೋಜನೆ (ಯುಪಿಎಸ್) ಆಯ್ಕೆ ಮಾಡಲು ಅವಕಾಶ ಕೊನೆಗೊಳ್ಳಲಿದೆ. ಇದಕ್ಕಾಗಿ ಸರ್ಕಾರವು ನವೆಂಬರ್ 30 ರ ಗಡುವನ್ನು ನಿಗದಿಪಡಿಸಿದೆ. ಈ ಹಿಂದೆ, ಕೊನೆಯ ದಿನಾಂಕವನ್ನು ಸೆಪ್ಟೆಂಬರ್ 30 ಎಂದು ನಿಗದಿಪಡಿಸಲಾಗಿತ್ತು. ಅದನ್ನು ನಂತರ ವಿಸ್ತರಿಸಲಾಯಿತು.

ಯೂನಿಫೈಡ್ ಪಿಂಚಣಿ ಯೋಜನೆಯು ಈಗಾಗಲೇ ಕಾರ್ಯನಿರ್ವಹಿಸುತ್ತಿರುವ ರಾಷ್ಟ್ರೀಯ ಪಿಂಚಣಿ ವ್ಯವಸ್ಥೆ (ಎನ್‌ಪಿಎಸ್)ಗಿಂತ ಭಿನ್ನವಾದ ಮಾದರಿಯಾಗಿದೆ. ಯಾವುದೇ ಉದ್ಯೋಗಿ ಯುಪಿಎಸ್ ಅಡಿಯಲ್ಲಿ ಬರಲು ಬಯಸಿದರೆ, ಅವರಿಗೆ ನವೆಂಬರ್ 30 ಕೊನೆಯ ದಿನಾಂಕವಾಗಿದೆ.

ಪಿಂಚಣಿದಾರರಿಗೆ ಜೀವ ಪ್ರಮಾಣಪತ್ರ

ನವೆಂಬರ್ 30 ರ ನಂತರ, ಪಿಂಚಣಿದಾರರಿಗೆ ಜೀವ ಪ್ರಮಾಣಪತ್ರ (ಲೈಫ್ ಸರ್ಟಿಫಿಕೇಟ್) ಸಲ್ಲಿಸುವುದು ಕಷ್ಟಕರವಾಗಬಹುದು. ಡಿಸೆಂಬರ್ 1 ರಿಂದ ಜೀವ ಪ್ರಮಾಣಪತ್ರ ಸಲ್ಲಿಸಲು ಅವಕಾಶವಿರುವುದಿಲ್ಲ. ನಿಗದಿತ ದಿನಾಂಕದೊಳಗೆ ಯಾವುದೇ ಪಿಂಚಣಿದಾರರು ತಮ್ಮ ಬ್ಯಾಂಕ್‌ಗೆ ತೆರಳಿ ತಮ್ಮ ಜೀವಂತಿಕೆಯ ಪ್ರಮಾಣಪತ್ರವನ್ನು ಸಲ್ಲಿಸದಿದ್ದರೆ, ಅವರ ಪಿಂಚಣಿ ನಿಲ್ಲಬಹುದು. ಪಿಂಚಣಿದಾರರು ಈ ಕಾರ್ಯವನ್ನು ಮನೆಯಿಂದಲೇ ಡಿಜಿಟಲ್ ರೂಪದಲ್ಲಿಯೂ ಮಾಡಬಹುದು. ಸಮಯಕ್ಕೆ ಸರಿಯಾಗಿ ಪ್ರಮಾಣಪತ್ರ ಸಲ್ಲಿಸದಿದ್ದರೆ ಪಿಂಚಣಿ ಸ್ಥಗಿತಗೊಳ್ಳುವ ಸಾಧ್ಯತೆ ಇದೆ.

ಆದಾಯ ತೆರಿಗೆ ನಿಯಮಗಳು

ಡಿಸೆಂಬರ್ ಆರಂಭದಿಂದಲೇ ಆದಾಯ ತೆರಿಗೆ ನಿಯಮಗಳಲ್ಲಿ ಬದಲಾವಣೆಗಳು ಬರಲಿವೆ. ಅಕ್ಟೋಬರ್ 2025ರಲ್ಲಿ ನಿಮ್ಮ ಟಿಡಿಎಸ್ ಕಡಿತಗೊಂಡಿದ್ದರೆ, ಆದಾಯ ತೆರಿಗೆ ಕಾಯಿದೆಯ ಸೆಕ್ಷನ್ 194-ಐಎ, 194-ಐಬಿ, 194ಎಂ ಮತ್ತು 194ಎಸ್ ಅಡಿಯಲ್ಲಿ ನಿಮ್ಮ ಹೇಳಿಕೆಯನ್ನು ಸಲ್ಲಿಸುವುದು ಕಡ್ಡಾಯ. ಇದಕ್ಕಾಗಿ ಕೊನೆಯ ದಿನಾಂಕ ನವೆಂಬರ್ 30 ಎಂದು ನಿಗದಿಪಡಿಸಲಾಗಿದೆ.

ಅಲ್ಲದೆ, ಸೆಕ್ಷನ್ 92ಇ ಅಡಿಯಲ್ಲಿ ವರದಿಯನ್ನು ಸಲ್ಲಿಸಬೇಕಾದ ತೆರಿಗೆದಾರರು ತಮ್ಮ ಐಟಿಆರ್ ಅನ್ನು ನವೆಂಬರ್ 30ರೊಳಗೆ ಸಲ್ಲಿಸಬಹುದು. ಇದಲ್ಲದೆ, ಅಂತರಾಷ್ಟ್ರೀಯ ಗುಂಪಿನ ಘಟಕ ಸಂಸ್ಥೆಗಳಿಗೆ ಫಾರ್ಮ್ 3ಸಿಇಎಎ ಸಲ್ಲಿಸಲು ಕೊನೆಯ ದಿನಾಂಕವನ್ನು ಸಹ ನವೆಂಬರ್ 30 ಎಂದು ನಿಗದಿಪಡಿಸಲಾಗಿದೆ. ಡಿಸೆಂಬರ್ 1ರ ನಂತರ ನೀವು ಫಾರ್ಮ್ 3ಸಿಇಎಎ ಅನ್ನು ಸಲ್ಲಿಸಲು ಸಾಧ್ಯವಾಗುವುದಿಲ್ಲ.

ಎಲ್‌ಪಿಜಿ ಬೆಲೆ ಹೆಚ್ಚಳ ಅಥವಾ ಇಳಿಕೆ?

ಭಾರತದಲ್ಲಿ ಪೆಟ್ರೋಲಿಯಂ ಉತ್ಪನ್ನಗಳನ್ನು ಮಾರಾಟ ಮಾಡುವ ಕಂಪನಿಗಳು ಪ್ರತಿ ತಿಂಗಳ ಮೊದಲ ದಿನ ಎಲ್‌ಪಿಜಿ ಸಿಲಿಂಡರ್‌ಗಳ ಬೆಲೆಗಳನ್ನು (LPG Cylinder) ಪರಿಶೀಲಿಸುತ್ತವೆ. ಆದ್ದರಿಂದ, ಪ್ರತಿ ತಿಂಗಳ ಮೊದಲ ದಿನ ಅಡುಗೆ ಅನಿಲ ಬೆಲೆಗಳಲ್ಲಿ ಬದಲಾವಣೆ ಮಾಡಲಾಗುತ್ತದೆ. ಡಿಸೆಂಬರ್ 1 ರಂದು ಅಡುಗೆ ಅನಿಲ ಬೆಲೆಗಳಲ್ಲಿ ಬದಲಾವಣೆ ನಿರೀಕ್ಷಿಸಲಾಗಿದೆ.

ಇದು ವಾಣಿಜ್ಯ ಮತ್ತು ಗೃಹಬಳಕೆಯ ಸಿಲಿಂಡರ್‌ಗಳ ಬೆಲೆಗಳನ್ನು ಒಳಗೊಂಡಿರುತ್ತದೆ. ನವೆಂಬರ್ 1 ರಂದು, ಪೆಟ್ರೋಲಿಯಂ ಕಂಪನಿಗಳು ವಾಣಿಜ್ಯ ಎಲ್‌ಪಿಜಿ ಸಿಲಿಂಡರ್‌ಗಳ ಬೆಲೆಯನ್ನು (LPG Price) ಸುಮಾರು 6.50 ರೂ. ಇಳಿಕೆ ಮಾಡಿದ್ದವು. ಈ ಬಾರಿ ಬೆಲೆ ಹೆಚ್ಚಳ ಅಥವಾ ಇಳಿಕೆ ಎರಡೂ ಆಗಬಹುದು.