ದೆಹಲಿಯಲ್ಲಿ ವಿಷಕಾರಿ ಗಾಳಿ: ಶಾಲೆಗಳಿಗೆ ಸುಪ್ರೀಂ ಕೋರ್ಟ್‌ ದೊಡ್ಡ ನಿರ್ಧಾರ..! ಮಕ್ಕಳ ಆರೋಗ್ಯ ರಕ್ಷಣೆ ಹೇಗೆ?

ದೆಹಲಿ-ಎನ್‌ಸಿಆರ್‌ನಲ್ಲಿ ವಿಷಕಾರಿ ಗಾಳಿ! ಶಾಲೆಗಳಿಗೆ ಸುಪ್ರೀಂ ಕೋರ್ಟ್ ಮಹತ್ವದ ನಿರ್ಧಾರ ಪ್ರಕಟ.. ಮಾಲಿನ್ಯದಿಂದ ಮಕ್ಕಳ ಆರೋಗ್ಯ ರಕ್ಷಣೆ ಹೇಗೆ? ಹೌದು, ದೆಹಲಿ-ಎನ್‌ಸಿಆರ್ ಪ್ರದೇಶದಲ್ಲಿ ವಾಯು ಮಾಲಿನ್ಯದ (Air pollution Delhi NCR) ಮಟ್ಟ ಗಂಭೀರ ಹಂತ ತಲುಪಿದೆ. ಎಕ್ಯೂಐ (ಏರ್ ಕ್ವಾಲಿಟಿ ಇಂಡೆಕ್ಸ್) 400 ಅಂಕಗಳನ್ನು ಮೀರಿ ಆತಂಕ ಸೃಷ್ಟಿಸಿದೆ. ಈ ಪರಿಸ್ಥಿತಿಯಲ್ಲಿ ಮಕ್ಕಳ ಆರೋಗ್ಯದ ಬಗ್ಗೆ ಕಾಳಜಿ ಹೆಚ್ಚಾಗಿದೆ.

ಸುಪ್ರೀಂ ಕೋರ್ಟ್ (Supreme Court) ಮತ್ತು ವಾಯು ಗುಣಮಟ್ಟ ನಿರ್ವಹಣಾ ಆಯೋಗದ (CAQM) ನಿರ್ದೇಶನಗಳ ಅನ್ವಯ, ದೆಹಲಿ ಸರ್ಕಾರವು ಮಹತ್ವದ ನಿರ್ಧಾರ ಕೈಗೊಂಡಿದೆ. ಶಾಲೆಗಳು, ಕಾಲೇಜುಗಳು ಮತ್ತು ಎಲ್ಲಾ ಶೈಕ್ಷಣಿಕ ಸಂಸ್ಥೆಗಳಲ್ಲಿ (Delhi schools) ನಡೆಯುವ ಎಲ್ಲಾ ಹೊರಾಂಗಣ ಕ್ರೀಡೆ ಹಾಗೂ ದೈಹಿಕ ಚಟುವಟಿಕೆಗಳನ್ನು ಮುಂದಿನ ಆದೇಶದವರೆಗೆ ತಕ್ಷಣವೇ ಸ್ಥಗಿತಗೊಳಿಸುವಂತೆ ಆದೇಶಿಸಿದೆ.

ಶಾಲೆಗಳಲ್ಲಿ ಹೊರಾಂಗಣ ಚಟುವಟಿಕೆ ಸ್ಥಗಿತ

ಮಕ್ಕಳನ್ನು ಹೊರಾಂಗಣ ಚಟುವಟಿಕೆಗಳಿಂದ ದೂರವಿಡುವಂತೆ (No outdoor activities in Delhi schools) ಸೂಚಿಸಲಾಗಿದೆ. ಈ ನಿರ್ಬಂಧ ಸರ್ಕಾರಿ ಶಾಲೆಗಳಿಗಷ್ಟೇ ಅಲ್ಲದೆ ಖಾಸಗಿ ಶಾಲೆಗಳಿಗೂ ಅನ್ವಯಿಸುತ್ತದೆ. ಮಕ್ಕಳ ಆರೋಗ್ಯ ಮತ್ತು ಸುರಕ್ಷತೆಗೆ ಹೆಚ್ಚಿನ ಆದ್ಯತೆ ನೀಡುವ ದೃಷ್ಟಿಯಿಂದ ಸುಪ್ರೀಂ ಕೋರ್ಟ್ ಈ ಮಹತ್ವದ ನಿರ್ಧಾರವನ್ನು (Schools outdoor activities suspended) ಕೈಗೊಂಡಿದೆ.

ದೆಹಲಿ ಸರ್ಕಾರದ ಶಿಕ್ಷಣ ಮತ್ತು ಕ್ರೀಡಾ ನಿರ್ದೇಶನಾಲಯವು ಈ ಆದೇಶವು ಸರ್ಕಾರಿ, ಸರ್ಕಾರಿ ಅನುದಾನಿತ, ಖಾಸಗಿ ಮಾನ್ಯತೆ ಪಡೆದ ಶಾಲೆಗಳು, NDMC, MCD, ಮತ್ತು ಕಂಟೋನ್ಮೆಂಟ್ ಬೋರ್ಡ್ ಶಾಲೆಗಳು, ವಿಶ್ವವಿದ್ಯಾಲಯಗಳು, ಕಾಲೇಜುಗಳು ಹಾಗೂ ಮಾನ್ಯತೆ ಪಡೆದ ಕ್ರೀಡಾ ಸಂಘಗಳನ್ನು ಒಳಗೊಳ್ಳುತ್ತದೆ ಎಂದು ಸ್ಪಷ್ಟಪಡಿಸಿದೆ.

ಮಕ್ಕಳಿಗೆ 'ರೆಡ್ ಅಲರ್ಟ್' ಪರಿಸ್ಥಿತಿ

ತಜ್ಞರ ಪ್ರಕಾರ, ಹೊರಾಂಗಣದಲ್ಲಿ ಆಡುವಾಗ ಮಕ್ಕಳು ಹೆಚ್ಚು ವೇಗವಾಗಿ ಉಸಿರಾಡುತ್ತಾರೆ. ಇದರಿಂದ ಅಪಾಯಕಾರಿ PM 2.5 ಮತ್ತು PM 10 ಕಣಗಳು ಶ್ವಾಸಕೋಶವನ್ನು ಹೆಚ್ಚಿನ ಪ್ರಮಾಣದಲ್ಲಿ ಪ್ರವೇಶಿಸುತ್ತವೆ. ಇದು ಅಸ್ತಮಾ, ಕೆಮ್ಮು, ಬ್ರಾಂಕೈಟಿಸ್ ಮತ್ತು ಶ್ವಾಸಕೋಶದ ಸೋಂಕುಗಳಂತಹ ಗಂಭೀರ ಆರೋಗ್ಯ ಸಮಸ್ಯೆಗಳಿಗೆ ಕಾರಣವಾಗಬಹುದು.

ಮಕ್ಕಳನ್ನು ಶಾಲೆಗೆ ಕಳುಹಿಸಲು ಸಿದ್ಧರಿಲ್ಲ!

ಎಕ್ಯೂಐ 400+ 'ಗಂಭೀರ' ವರ್ಗಕ್ಕೆ ಸೇರಿದ್ದು, ಇದು ಆರೋಗ್ಯವಂತರಿಗೂ ಅಪಾಯಕಾರಿ. ಹಾಗಾಗಿ, ಮಕ್ಕಳ ಪಾಲಿಗೆ ಇದು ಅತ್ಯಂತ ಅಪಾಯಕಾರಿ ಸನ್ನಿವೇಶವಾಗಿದೆ. ಇದೇ ಕಾರಣದಿಂದ ದೆಹಲಿಯ ಹೆಚ್ಚಿನ ಶಾಲೆಗಳಲ್ಲಿ 5ನೇ ತರಗತಿವರೆಗಿನ ಮಕ್ಕಳಿಗೆ ಹೈಬ್ರಿಡ್ ಮೋಡ್‌ನಲ್ಲಿ ಪಾಠ ನಡೆಯುತ್ತಿದೆ. ಸಣ್ಣ ಮಕ್ಕಳ ಪೋಷಕರು ಸದ್ಯಕ್ಕೆ ಮಕ್ಕಳನ್ನು ಶಾಲೆಗೆ ಕಳುಹಿಸಲು ಸಿದ್ಧರಿಲ್ಲ.

ಮಾಲಿನ್ಯದಿಂದ ಮಕ್ಕಳ ಆರೋಗ್ಯ ರಕ್ಷಿಸುವುದು ಹೇಗೆ?

1. ಅತ್ಯವಶ್ಯಕವಾಗಿದ್ದಲ್ಲಿ, ಬೆಳಗ್ಗೆ ಅಥವಾ ಸಂಜೆ ಬದಲಿಗೆ, ಮಧ್ಯಾಹ್ನದ ಸಮಯದಲ್ಲಿ ಹೊರಾಂಗಣಕ್ಕೆ ಹೋಗಲು ಅವಕಾಶ ನೀಡಿ. ಈ ಸಮಯದಲ್ಲಿ ಸ್ಮಾಗ್ ಸ್ವಲ್ಪ ಕಡಿಮೆಯಾಗಿರುತ್ತದೆ.

2. ಹೊರಗೆ ಹೋಗುವಾಗ ಮಕ್ಕಳಿಗೆ N95 ಅಥವಾ N99 ಮಾಸ್ಕ್ ಧರಿಸುವಂತೆ ಮಾಡಿ, ಏಕೆಂದರೆ ಸಾಮಾನ್ಯ ಬಟ್ಟೆಯ ಮಾಸ್ಕ್‌ಗಳು ಮಾಲಿನ್ಯವನ್ನು ತಡೆಯಲು ಸಮರ್ಥವಾಗಿಲ್ಲ.

3. ಬೆಳಿಗ್ಗೆ ಅಥವಾ ಮಧ್ಯಾಹ್ನ ಕಡಿಮೆ ಸಮಯದವರೆಗೆ ಮನೆಯ ಕಿಟಕಿಗಳನ್ನು ತೆರೆಯಿರಿ. ಕೊಠಡಿಯಲ್ಲಿ ಏರ್-ಪ್ಯೂರಿಫೈಯರ್ ಇದ್ದರೆ ಉತ್ತಮ.

4. ಮಕ್ಕಳ ಆಹಾರದ ಬಗ್ಗೆ ಗಮನ ಕೊಡಿ. ವಿಟಮಿನ್ ಸಿ ಮತ್ತು ಆ್ಯಂಟಿಆಕ್ಸಿಡೆಂಟ್‌ಗಳಿರುವ ನಿಂಬೆ ಪಾನಕ, ಕಿತ್ತಳೆ, ಪೇರಲ, ಟೊಮ್ಯಾಟೊ, ಕ್ಯಾರೆಟ್, ಅರಿಶಿನ ಹಾಲು ಮುಂತಾದವುಗಳನ್ನು ನೀಡಿ. ದೇಹದಿಂದ ವಿಷಕಾರಿ ಅಂಶಗಳನ್ನು ಹೊರಹಾಕಲು ಹೆಚ್ಚು ನೀರು ಕುಡಿಸಿ.

5. ಮಕ್ಕಳಿಗೆ ಅಸ್ತಮಾ, ಅಲರ್ಜಿ ಅಥವಾ ಕೆಮ್ಮಿನ ಸಮಸ್ಯೆ ಇದ್ದರೆ, ಮಾಲಿನ್ಯದ ಗಾಳಿಗೆ ಅವರನ್ನು ಒಡ್ಡಬೇಡಿ. ಅವರ ಇನ್ಹೇಲರ್/ಔಷಧಿಯನ್ನು ಯಾವಾಗಲೂ ಹತ್ತಿರ ಇರಿಸಿಕೊಳ್ಳಿ.

6. ಶಾಲೆಗಳು ಹೈಬ್ರಿಡ್ ಅಥವಾ ಆನ್‌ಲೈನ್ ತರಗತಿಗಳನ್ನು ನೀಡುತ್ತಿದ್ದರೆ, ಮನೆಯಿಂದಲೇ ಪಾಠ ಕೇಳಲು ಅವಕಾಶ ನೀಡಿ. ಎಕ್ಯೂಐ 400+ ಆಗಿದ್ದರೆ, ಮಗುವನ್ನು ಶಾಲೆಗೆ ಕಳುಹಿಸುವ ಮೊದಲು ಅವರ ಆರೋಗ್ಯಕ್ಕೆ ಆದ್ಯತೆ ನೀಡಿ.

7. ಮನೆಯಲ್ಲಿ ತುಳಸಿ, ಸ್ನೇಕ್ ಪ್ಲಾಂಟ್, ಅಲೋವೆರಾ ನಂತಹ ಸಸ್ಯಗಳನ್ನು ಇರಿಸಿ. ಇವು ಗಾಳಿಯನ್ನು ಶುದ್ಧೀಕರಿಸಲು ಸಹಾಯ ಮಾಡುತ್ತವೆ.

8. ಗಾಳಿಯಲ್ಲಿರುವ ಧೂಳು ಮತ್ತು ಮಣ್ಣು ಚರ್ಮ ಮತ್ತು ಕಣ್ಣುಗಳಿಗೆ ಹಾನಿ ಮಾಡಬಹುದು. ಹೊರಗಿನಿಂದ ಬಂದ ನಂತರ ಮುಖ ಮತ್ತು ಕೈಗಳನ್ನು ಚೆನ್ನಾಗಿ ತೊಳೆಯುವುದು ಮುಖ್ಯ.

9. ಯೋಗ, ಸ್ಟ್ರೆಚಿಂಗ್ ಮತ್ತು ಒಳಾಂಗಣ ಆಟಗಳಿಂದ ಮಕ್ಕಳು ಚಟುವಟಿಕೆಯಿಂದ ಇರುತ್ತಾರೆ ಮತ್ತು ಶ್ವಾಸಕೋಶದ ಮೇಲೆ ಪರಿಣಾಮ ಬೀರುವುದಿಲ್ಲ.

10. ನಿರಂತರ ಕೆಮ್ಮು, ಉಸಿರಾಟದ ತೊಂದರೆ, ಕಣ್ಣುಗಳಲ್ಲಿ ಉರಿ, ಆಯಾಸ ಇವೆಲ್ಲವೂ ಗಂಭೀರ ಮಾಲಿನ್ಯದ ಲಕ್ಷಣಗಳು.