ಕಲಿಯುಗ ಅಂತ್ಯದವರೆಗೂ ಬದುಕಿರುತ್ತಾರೆ ಈ ಸಪ್ತ ಚಿರಂಜೀವಿಗಳು

1. ಪರಶುರಾಮ

ಪರಶುರಾಮನನ್ನು ವಿಷ್ಣುವಿನ ಐದನೇ ಅವತಾರವೆಂದು ನಂಬಲಾಗಿದೆ. ಶಿವನು ಪರಶುರಾಮನ ಪ್ರಾಮಾಣಿಕತೆಗೆ ಮೆಚ್ಚಿ ಆತನಿಗೆ ಚಿರಂಜೀವಿಯಾಗಿರು ಎಂದು ವರವನ್ನು ನೀಡಿದನು. ಪರಶುರಾಮನು ಸಪ್ತ ಋಷಿಗಳಲ್ಲಿ ಒಬ್ಬರಾದ ಜಮದಾಗ್ನಿಯ ಮಗನಾಗಿದ್ದು ಆತ ಭೂಮಿಯ ಮೇಲಿರುವ ಎಲ್ಲಾ ಕ್ಷತ್ರಿಯರನ್ನ ಕೊಲ್ಲೋದಾಗಿ ಪ್ರತಿಜ್ಞೆ ಮಾಡಿರುತ್ತಾನೆ. ಕಾರಣ ಕ್ಷತ್ರಿಯ ರಾಜನೊಬ್ಬ ಆತನ ತಂದೆ ಜಮದಾಗ್ನಿಯನ್ನು ಕೊಂದು ಹಾಕಿದ್ದನು. ಅಂದಿನಿಂದ ಪರಶುರಾಮ ಪ್ರತಿಜ್ಞೆ ಕೈಗೊಂಡು ಕ್ಷತ್ರಿಯರ ಸಂಹಾರಕ್ಕೆ ಮುಂದಾಗುತ್ತಾನೆ. ಪರಶುರಾಮನು ಭೂಮಿಯ ಮೇಲಿರುವ ಕ್ಷತ್ರಿಯರನ್ನು ಕೊಲ್ಲುವುದಕ್ಕೆ ಇಂದಿಗೂ ಭೂಮಿಯ ಮೇಲೆ ಬದುಕಿದ್ದಾನೆ ಎಂಬ ನಂಬಿಕೆ ಇದೆ.

2. ವಿಭೀಷಣ

ಲಂಕಾದ ರಾಜನಾಗಿದ್ದ ರಾವಣನ ಕಿರಿಯ ಸಹೋದರನೇ ವಿಭೀಷಣ. ಈತನು ರಾಮ ಹಾಗೂ ರಾವಣನ ಕದನದಲ್ಲಿ ಮಹತ್ವದ ಪಾತ್ರ ವಹಿಸಿದ್ದನು. ರಾವಣನಿಂದ ಅವಮಾನಕ್ಕೆ ಒಳಗಾದ ವಿಭೀಷಣ ರಾಮನ ಸಂಗಡ ಸೇರಿಕೊಂಡಿದ್ದನು. ಹಾಗೂ ರಾವಣನ ಬಲಾಢ್ಯತೆಯ ಕೆಲವೊಂದು ಗುಟ್ಟುಗಳನ್ನು ರಾಮನಿಗೆ ತಿಳಿಸಿದ್ದನು. ಮತ್ತು ಸೀತೆಯನ್ನು ಲಂಕೆಯಿಂದ ಕರೆದುಕೊಂಡು ಬರಲು ಸಹಾಯ ಮಾಡಿದ್ದನು. ರಾಮನು ರಾವಣನ ಸಂಹಾರ ಮಾಡಿದ ನಂತರ ವಿಭೀಷಣನಿಗೆ ಲಂಕಾಧಿಪತಿಯ ಪಟ್ಟ ನೀಡಲಾಗಿತ್ತು. ಅಷ್ಟೇ ಅಲ್ಲ, ವಿಭೀಷಣನ ಆಡಳಿತದಲ್ಲಿ ಪ್ರಜೆಗಳು ಸುಖವಾಗಿದ್ದರು ಎಂಬ ಉಲ್ಲೇಖವು ಇದೆ. ಈತನು ರಾಮನಿಂದ ಚಿರಂಜೀವಿಯಾಗಿರು ಎಂಬ ವರವನ್ನು ಪಡೆದಿದ್ದನಂತೆ. ಇಂದಿಗೂ ವಿಭೀಷಣನು ಲಂಕಾವನ್ನು ಕಾಯುತ್ತಿದ್ದಾನೆ ಎಂದು ನಂಬಲಾಗಿದೆ.

3. ವೇದವ್ಯಾಸ

ಮಹಾಭಾರತದ ಸೃಷ್ಟಿಕರ್ತನೇ ವೇದವ್ಯಾಸ. ಹಾಗೂ ಇವರೇ ವೇದಗಳನ್ನು ಸೃಷ್ಟಿಸಿದ್ದಾರೆ ಎಂದು ನಂಬಲಾಗಿದೆ. ವೇದಗಳ ಸಂಯೋಜನೆಯ ನಂತರದ ಕಾಲದಲ್ಲಿ ನಾರದ ಮುನಿಗಳ ಸಲಹೆಯ ಮೇರೆಗೆ ವ್ಯಾಸರು ಶ್ರೀಮದ್‌ ಭಗವತವನ್ನು ಬರೆದಿದ್ದಾರೆ ಎಂಬ ಉಲ್ಲೇಖವಿದೆ. ಪುರಾಣಗಳ ಪ್ರಕಾರ ವೇದವ್ಯಾಸರು ದ್ವಾಪರ ಕಾಲದಿಂದ ಕಲಿಯುಗ ಅಂತ್ಯದವರೆಗೂ ಬದುಕಿರುತ್ತಾರೆ ಎಂದು ನಂಬಲಾಗಿದೆ.

4. ಬಲಿಚಕ್ರವರ್ತಿ

ಬಲಿಚಕ್ರವರ್ತಿಯು ವಿರೋಚನನ ಮಗ ಹಾಗೂ ಪ್ರಹಲ್ಲಾದನ ಮೊಮ್ಮಗನಾಗಿದ್ದನು. ಬಲಿಯು ಅಸುರರ ಅರಸ ಹಾಗೂ ಉತ್ತಮ ರಾಜನಾಗಿದ್ದನು. ಒಂದು ಸಲ ವಿಷ್ಣುವು ಬಲಿಚಕ್ರವರ್ತಿಯ ಪ್ರಮಾಣಿಕತೆಯನ್ನು ಪರೀಕ್ಷಿಸಲು ವಾಮನನ ವೇಷದಲ್ಲಿ ಅವತರಿಸಿ ಬರುತ್ತಾನೆ. ಹಾಗೂ ಬಲಿಚಕ್ರವರ್ತಿಯಲ್ಲಿ ಮೂರಿಂಚು ಜಾಗವನ್ನು ಕೇಳುತ್ತಾನೆ. ಆಗ ಬಲಿಯು ಮೂರಿಂಚು ತಾನೇ ಎಂದು ಅದಕ್ಕೆ ಒಪ್ಪಿಕೊಳ್ಳುತ್ತಾನೆ. ಆಗ ವಾಮನನ ರೂಪದಲ್ಲಿದ್ದ ವಿಷ್ಣುವು ದೈತ್ಯ ಆಕಾರವನ್ನು ತಳೆದು ಒಂದು ಹೆಜ್ಜೆಯನ್ನು ಭೂಮಿಯಲ್ಲಿ ಮತ್ತೊಂದು ಹೆಜ್ಜೆಯನ್ನು ಆಕಾಶದಲ್ಲಿ ಇಡುತ್ತಾನೆ ಹಾಗೂ ಮೂರನೇ ಹೆಜ್ಜೆಯನ್ನು ಎಲ್ಲಿಡಲಿ ಎಂದು ಕೇಳಿದಾಗ ಬಲಿಚಕ್ರವರ್ತಿ ತನ್ನ ತಲೆಯಲ್ಲಿ ಇಡುವಂತೆ ಸೂಚಿಸುತ್ತಾನೆ. ವಿಷ್ಣು ಆತನ ಹೆಜ್ಜೆಯನ್ನು ಬಲಿಚಕ್ರವರ್ತಿಯ ತಲೆಯ ಮೇಲೆ ಇಟ್ಟಿದ್ದೇ ತಡ ಬಲಿಯು ಪಾತಾಳಕ್ಕೆ ಹೋಗುತ್ತಾನೆ. ನಂತರ ಬಲಿಯ ಪ್ರಾಮಾಣಿಕತೆಗೆ ಮೆಚ್ಚಿದ ವಿಷ್ಣುವು ಆತನಿಗೆ ಚಿರಂಜೀವಿಯಾಗಿರು ಎಂಬ ವರವನ್ನು ನೀಡುತ್ತಾನೆ.

5. ಅಶ್ವಥಾಮ

ಅಶ್ವಥಾಮನು ದ್ರೋಣಾಚಾರ್ಯರ ಮಗ ಹಾಗೂ ಮಹಾ ಪರಾಕ್ರಮಿ. ಕುರುಕ್ಷೇತ್ರ ಯುದ್ಧದಲ್ಲಿ ಪಾಂಡವರ ವಿರುದ್ಧವಾಗಿ ಕೆಚ್ಚೆದೆಯಿಂದ ಹೋರಾಡುತ್ತಾನೆ. ಯುದ್ಧದ ವೇಳೆ ಅರ್ಜುನನ ವಿರುದ್ಧ ಪ್ರಯೋಗಿಸಿದ ಬ್ರಹಾಸ್ತ್ರವನ್ನು ಹಿಂಪಡೆಯಲಾಗದೇ ಆ ಬ್ರಹ್ಮಾಸ್ತ್ರ ಉತ್ತರೆಯ ಗರ್ಭವನ್ನು ಹೊಕ್ಕು ಮಗುವಿನ ಸಾವಿಗೆ ಕಾರಣವಾಗುತ್ತದೆ. ನಂತರ ಕೃಷ್ಣ ಆ ಮಗುವನ್ನು ಬದುಕಿಸುತ್ತಾನೆ. ಅಶ್ವಥಾಮನ ನಡೆಯಿಂದ ಕೋಪಗೊಂಡ ಕೃಷ್ಣನು ಆತನಿಗೆ ಕಲಿಯುಗ ಅಂತ್ಯದವರೆಗೆ ರಕ್ತಕಾರಿ ನರಳಾಡುತ್ತಾ ಅಲೆದಾಡು ಎಂದು ಶಾಪ ನೀಡುತ್ತಾನೆ.

6. ಕೃಪಾಚಾರ್ಯ

ಕೃಪಾಚಾರ್ಯರನ್ನು ಬ್ರಹ್ಮನ ನಾಲ್ಕನೇ ಅವತಾರವೆಂದು ನಂಬಲಾಗಿದೆ. ಕೃಪಾಚಾರ್ಯರು ಕೂಡ ಕುರುಕ್ಷೇತ್ರ ಯುದ್ಧದಲ್ಲಿ ಪಾಂಡವರ ವಿರುದ್ಧ ಹೋರಾಡಿದ್ದರು. ಈತ ಮಹಾಪರಾಕ್ರಮಿಯಾಗಿದ್ದು, ಕುರುಕ್ಷೇತ್ರ ಯುದ್ಧದಲ್ಲಿ ಕೆಚ್ಚೆದೆಯಿಂದ ಹೋರಾಡಿ ಕೊನೆಯವರೆಗೂ ಉಳಿದುಕೊಂಡಿದ್ದರು. ಇವರಿಗೆ ಶ್ರೀ ಕೃಷ್ಣನು ಅಮರತ್ವದ ವರವನ್ನು ಕರುಣಿಸಿದ್ದನು. ಈ ಯುದ್ಧದ ಬಳಿಕ ಕೃಪಾಚಾರ್ಯರು ಪಾಂಡವರಿಗೆ ಶರಣಾಗಿ ಅವರ ಜೊತೆಗೆ ಹಸ್ತಿನಾಪುರಕ್ಕೆ ತೆರಳುತ್ತಾರೆ. ನಂತರ ಅರ್ಜುನನ ಮೊಮ್ಮಗನಾದ ಪರೀಕ್ಷಿತನಿಗೆ ಮಾರ್ಗದರ್ಶಕರಾಗಿ ಕಾರ್ಯ ನಿರ್ವಹಿಸಿದ್ದರು ಎಂದು ನಂಬಲಾಗಿದೆ.

7. ಹನುಮಂತ

ಅಂಜನಾದೇವನ ಮಗ ರಾಮನ ಭಂಟನೇ ಹನುಮಂತ. ಈತ ಶ್ರೀ ರಾಮನ ಮಹಾನ್‌ ಭಕ್ತ. ರಾವಣನ ಸಂಹಾರದ ನಂತರ ಹನುಮಂತನು ರಾಮನ ಹೇಳಿಕೆಯಂತೆ ಆಯೋಧ್ಯೆಗೆ ತೆರಳುತ್ತಾನೆ. ಲಂಕಾ ಯುದ್ಧದಲ್ಲಿ ಹನುಮಂತನ ಸಹಾಯಕ್ಕೆ ಮೆಚ್ಚಿದ ಶ್ರೀ ರಾಮನು ಹನುಮಂತನಿಗೆ ಉಡುಗೊರೆಯನ್ನು ಕೊಡಲು ಮುಂದಾಗುತ್ತಾನೆ. ಆದರೆ ಹನುಮಂತನು ಆ ಉಡುಗೊರೆಗಳನ್ನು ಸ್ವೀಕರಿಸಲು ನಿರಾಕರಿಸುತ್ತಾನೆ ಮತ್ತು ನಿನ್ನ ಪಾದದಲ್ಲಿ ನನಗೆ ಜಾಗ ಕೊಟ್ಟರೆ ಸಾಕು ಅಂತ ಹನುಮಂತ ಕೇಳಿಕೊಳ್ಳುತ್ತಾನೆ. ಆಗ ಹನುಮಂತನ ಭಕ್ತಿಗೆ ಮೆಚ್ಚಿದ ರಾಮನು ಭೂಮಿಯಲ್ಲಿ ರಾಮನ ಭಕ್ತರಿರುವವರೆಗೆ ಚಿರಂಜೀವಿಯಾಗಿರು ಎಂದು ವರ ಕರುಣಿಸುತ್ತಾನೆ.

ಇವರೇ ಇಂದಿಗೂ ಬದುಕಿರುವ ಸಪ್ತ ಚಿರಂಜೀವಿಗಳು. ಈ ಏಳು ಜನ ಇಂದಿಗೂ ನಮ್ಮೊಂದಿಗೆ ಬದುಕಿದ್ದಾರೆ ಎಂಬ ಉಲ್ಲೇಖವಿದೆ. ಸತ್ಯಯುಗದ ಭೇಟಿಯ ನಂತರವೇ ಇವರ ಅಂತ್ಯ ಎಂಬ ನಂಬಿಕೆಯಿದೆ.