ಶಿವಲಿಂಗದ ಮಹತ್ವ

ಮೂಲ

ಅಥರ್ವಣ ವೇದ ಮತ್ತು ಶಿವ ಪುರಾಣದ ಪ್ರಕಾರ ವಿಶ್ವದಲ್ಲಿ ಅಂಧಕಾರ ತುಂಬಿದ್ದಾಗ ಅಲ್ಲಿದ್ದದ್ದು ಉರಿಯುತ್ತಿದ್ದ ಅಂತ್ಯವಿಲ್ಲದ ಕಂಭವೊಂದು ಮಾತ್ರ. ಈ ಕಂಬವೇ 'ಪುರುಷ' ಅಥವ ಪುರುಷ ಶಕ್ತಿ ಇದೇ ಶಿವ. ಆದ್ದರಿಂದಲೇ ಶಿವ ಅಥವ ಈ ಪುರುಷ ಶಕ್ತಿಯನ್ನು 'ಲಿಂಗ' ರೂಪದಲ್ಲಿ ಆರಾಧಿಸಲಾಗುತ್ತದೆ.

ಶಿವನ ಸಂಕೇತ

ಲಿಂಗವು ಶಿವನ ಸಂಕೇತ. ಇದು ದೇವರ ನಿರಾಕಾರ ಸ್ವರೂಪವನ್ನು ಸಂಕೇತಿಸುತ್ತದೆ. ಇದು ಪ್ರಕೃತಿಯ ನಿರಾಕಾರ ತತ್ವವನ್ನು ಸೂಚಿಸುತ್ತದೆ ಮತ್ತು ಮೌನದ ಮೂಲಕ ಮಾತಾಡುತ್ತದೆ. ಶಿವನನ್ನು ಪೂರ್ಣಸ್ವರೂಪಿ ಎಂದು ಹೇಳಲಾಗುತ್ತದೆ. ಆದ್ದರಿಂದಲೇ ಶಿವನನ್ನು ಲಿಂಗ ರೂಪದಲ್ಲಿ ಪೂಜಿಸಲಾಗುತ್ತದೆ. ಲಿಂಗವು ವಿಶ್ವವು ಅಂಡಾಣು ರೂಪದಲ್ಲಿ ಅಂದರೆ ವಿಶ್ವವು ಮೊಟ್ಟೆಯ ರೂಪದಲ್ಲಿರುವುದನ್ನು ಸೂಚಿಸುತ್ತದೆ.

ಮೂರು ಭಾಗಗಳು

ಶಿವ ಲಿಂಗದಲ್ಲಿ ಮೂರು ಭಾಗಗಳಿವೆ. ಕೆಳಗಿನ ಭಾಗವನ್ನು 'ಬ್ರಹ್ಮ ಪೀಠ' ಎಂದು ಕರೆಯಲಾಗುತ್ತದೆ, ಮಧ್ಯಭಾಗವನ್ನು 'ವಿಷ್ಣು ಪೀಠ' ಎಂದೂ, ಮೇಲ್ಭಾಗವನ್ನು 'ಶಿವ ಪೀಠ'ವೆಂದು ಕರೆಯಲಾಗುತ್ತದೆ.

ಸ್ಪಟಿಕ ಲಿಂಗ

ಸ್ಪಟಿಕ ಲಿಂಗವನ್ನು ಪೂಜಿಸುವುದು ಬಹಳ ಶ್ರೇಷ್ಠ ಎಂದು ಹೇಳಲಾಗುತ್ತದೆ. ಏಕೆಂದರೆ ಇದಕ್ಕೆ ಬಣ್ಣವಿರುವುದಿಲ್ಲ. ಇದು ತನ್ನ ಸಂಪರ್ಕಕ್ಕೆ ಬಂದ ಯಾವುದೇ ವಸ್ತುವಿನ ಬಣ್ಣವನ್ನು ತೆಗೆದುಕೊಳ್ಳುತ್ತದೆ. ಆದ್ದರಿಂದ 'ನಿರ್ಗುಣ ಬ್ರಹ್ಮ' ತತ್ವವನ್ನು ಪ್ರತಿಪಾದಿಸುತ್ತದೆ. ಇದು ನಿರಾಕಾರ ಶಿವ ತತ್ವದ ಗುಣ.

ಲಿಂಗದ ಮಹತ್ವ

ಶಿವ ಲಿಂಗದಲ್ಲಿ ಹೇಳಲಾಗದ ಹಲವು ನಿಗೂಢ ಅಲೌಕಿಕ ಶಕ್ತಿಗಳಿವೆ. ಶಿವ ಮತ್ತು ಶಕ್ತಿಯರ ಮಿಲನದಿಂದಾಗಿ ಇದರಲ್ಲಿ ಅದ್ಭುತ ಶಕ್ತಿಗಳು ಅಡಕವಾಗಿದೆ. ಇದು ಮನಸ್ಸಿನ ಗಮನಕೇಂದ್ರಿಕರಿಸುವ ಶಕ್ತಿಯನ್ನು ಮತ್ತು ಆಧ್ಯಾತ್ಮಿಕ ಶಕ್ತಿಯನ್ನು ಹೆಚ್ಚಿಸುತ್ತದೆ. ಇದು ಕೇವಲ ಕಲ್ಲಲ್ಲ. ಭಕ್ತ ತನ್ನೆಲ್ಲ ಪ್ರಜ್ಞೆಯೊಂದಿಗೆ ಆದಿಭೌತಿಕ ಶಕ್ತಿಯೊಂದಿಗೆ ಅಥವ ದೇವರೊಂದಿಗೆ ನೇರ ಸಂಬಂಧವನ್ನು ಹೊಂದುವ ಒಂದು ಮಾಧ್ಯಮ.