ಜ್ಯೋತಿಷ್ಯ ಪ್ರಕಾರ ಈ ಸಮಸ್ಯೆಗಳಿದ್ದರೆ ಅದಕ್ಕೆ ಕಾರಣ ಪಿತೃದೋಷ, ಪರಿಹಾರವೇನು?

ಪಿತೃದೋಷವಿದ್ದರೆ ಈ ವ್ಯಕ್ತಿಗೆ ಈ ರೀತಿಯ ಸಮಸ್ಯೆಗಳು ಎದುರಾಗುವುದು:

• ಪಿತೃದೋಷ ಇರುವ ವ್ಯಕ್ತಿಗೆ ತನ್ನ ಸಂತಾನ ಮುಂದುವೆರೆಸಲು ಪುತ್ರ ಸಂತಾನ ಉಂಟಾಗುವುದಿಲ್ಲ.
• ಪಿತೃದೋಷ ಇರುವ ವ್ಯಕ್ತಿಗೆ ಸಂತಾನ ಭಾಗ್ಯ ಇರುವುದಿಲ್ಲ
• ಪಿತೃದೋಷವಿದ್ದರೆ ಮಕ್ಕಳ ಪ್ರಗತಿಗೆ ಅಡಚಣೆ ಉಂಟಾಗುವುದು
• ಪಿತೃದೋಷ ಇದ್ದರೆ ವೈವಾಹಿಕ ಜೀವನವೂ ಕೂಡಿ ಬರುವುದಿಲ್ಲ
• ಪಿತೃದೋಷ ಇರುವ ವ್ಯಕ್ತಿ ತನ್ನ ಸಂತಾನವನ್ನು ನೋಡುವ ಮೊದಲೇ ಸಾವನ್ನಪ್ಪುತ್ತಾನೆ
• ಪಿತೃದೋಷದಿಂದ ಹುಟ್ಟುವ ಮಕ್ಕಳಲ್ಲಿ ಶಾರೀರಿಕ ಹಾಗೂ ಮಾನಸಿಕ ನ್ಯೂನತೆ ಕಂಡು ಬರುವುದು
• ಪಿತೃದೋಷದಿಂದ ವ್ಯಾಪಾರದಲ್ಲಿ ನಷ್ಟ ಉಂಟಾಗುವುದು, ಸಾಲದಲ್ಲಿ ಮುಳುಗುತ್ತಾನೆ
• ಪಿತೃದೋಷವಿದ್ದರೆ ಮನೆಯಲ್ಲಿ ನೆಮ್ಮದಿ ಇರಲ್ಲ
• ಇನ್ನು ಒಂದು ಒಳ್ಳೆಯ ಮನೆ ಕಟ್ಟಲು ಸಾಧ್ಯವಾಗುವುದಿಲ್ಲ



ಜ್ಯೋತಿಷ್ಯ ಪ್ರಕಾರ ಯಾರಿಗೆ ಪಿತೃದೋಷ ಉಂಟಾಗುವುದು

• ಶುಕ್ರ, ಶನಿ, ರಾಹು ಮೂರು ಗ್ರಹಗಳು ಅಲ್ಲದಿದ್ದರೆ ಎರಡು ಗ್ರಹಗಳು ಪಂಚಮ ಭಾವದಲ್ಲಿದ್ದರೆ ರವಿ ಪಾಪಗ್ರಹವಾಗಿ ಬದಲಾಗುವುದರಿಂದ ಅಂಥ ವ್ಯಕ್ತಿಗೆ ಪಿತೃದೋಷ ಉಂಟಾಗುವುದು.
• ಜನ್ಮಕುಂಡಲಿ ನಾಲ್ಕನೆಯ ಭಾವದಲ್ಲಿ ಕೇತುವಿದ್ದರೆ ಆ ಜಾತಕದವರಿಗೆ ಪಿತೃದೋಷ ಉಂಟಾಗುವುದು.
• ಬುಧ, ಕೇತು ಒಂದೇ ಲಗ್ನದಲ್ಲಿ ಅಥವಾ ಎಂಟನೇ ಭಾವದಲ್ಲಿ ಇದ್ದರೆ ಪಿತೃದೋಷ ಉಂಟಾಗುವುದು.
• ಜನ್ಮ ಕುಂಡಲಿಯಲ್ಲಿ ಚಂದ್ರ ಮೂರನೇಯ ಭಾವದಲ್ಲಿದ್ದರೆ ಆ ವ್ಯಕ್ತಿ ಕೂಡ ಕಷ್ಟಗಳನ್ನು ಅನುಭವಿಸಬೇಕಾಗುತ್ತದೆ.
• ಜನ್ಮ ಕುಂಡಲಿಯಲ್ಲಿ ಚಂದ್ರ ಮೂರನೇಯ ಅಥವಾ ಆರನೇಯ ಭಾವದಲ್ಲಿದ್ದರೆ ಆ ಜಾತಕದವನಿಗೆ ಬುಧನ ಕೆಟ್ಟ ದೃಷ್ಟಿ ಬೀಳುವುದು.
• ಶುಕ್ರ, ಬುಧ, ರಾಹು ಈ ಮೂರು ಗ್ರಹಗಳಲ್ಲಿ ಯಾವುದಾದರೂ ಎರಡು ಗ್ರಹಗಳು ಎರಡನೆಯ ಭಾವದಲ್ಲಿ, ಐದನೆಯ ಭಾವದಲ್ಲಿ, ಒಂಭತ್ತನೆಯ ಭಾವದಲ್ಲಿ ಅಥವಾ ಹನ್ನೆರಡನೆಯ ಭಾವದಲ್ಲಿದ್ದರೆ ಆ ಜಾತಕದವನು ತುಂಬಾ ತೊಂದರೆಗೆ ಒಳಗಾಗುತ್ತಾನೆ.
• ಜಾತಕದಲ್ಲಿ ರವಿ, ಚಂದ್ರ, ರಾಹು ಇವುಗಳಲ್ಲಿ ಯಾವುದಾದರೂ ಎರಡು ಗ್ರಹಗಳು ಅಥವಾ ಮೂರು ಗ್ರಹಗಳು ಏಳನೆಯ ಭಾವದಲ್ಲಿ ಇದ್ದರೆ ಅಂಥ ಜಾತಕದವರು ಶುಕ್ರನ ಕೆಟ್ಟ ದೃಷ್ಟಿ ಅನುಭವಿಸುತ್ತಾರೆ.
• ರವಿ, ಚಂದ್ರ ಹಾಗೂ ಕುಜ ಇವುಗಳಲ್ಲಿ ಎರಡು ಅಥವಾ ಮೂರು ಗ್ರಹಗಳು ಹತ್ತನೇಯ ಅಥವಾ ಹನ್ನೊಂದನೆಯ ಭಾವದಲ್ಲಿದ್ದರೆ ಅವನ ಮೇಲೆ ಶನಿಯ ಕೆಟ್ಟ ದೃಷ್ಟಿ ಬೀಳುವುದು.
• ಚಂದ್ರ ಅಥವಾ ಕುಜ ಆರನೇಯ ಭಾವದಲ್ಲಿದ್ದರೆ ಆ ಜಾತಕದವರು ಕೇತುವಿನಿಂದ ತೊಂದರೆ ಅನುಭವಿಸುತ್ತಾರೆ.



ಪಿತೃದೋಷಕ್ಕೆ ಸನಾತನ ಜ್ಯೋತಿಷ್ಯ ಶಾಸ್ತ್ರದಲ್ಲಿ ಪರಿಹಾರವೇನು?

• ಕೆಲಸಕ್ಕೆ ಹೋಗುವಾಗ ಅಥವಾ ಹೊಸ ಕಾರ್ಯ ಪ್ರಾರಂಭಿಸುವಾಗ ತಂದೆ-ತಾಯಿಯ ಆಶೀರ್ವಾದ ಪಡೆದು ಪ್ರಾರಂಭಿಸಬೇಕು.
• ಸಾವನ್ನಪ್ಪಿರುವ ಹಿರಿಯರಿಗೆ ಸರಿಯಾದ ರೀತಿಯಲ್ಲಿ ಶ್ರಾದ್ದ ಮಾಡಬೇಕು. ಇದರಿಂದ ಹಿಂದಿನ ಜನ್ಮದ ಪಾಪಗಳಿಗೆ ಪ್ರಾಯಶ್ಚಿತ್ತ ಮಾಡಿದಂತೆ ಆಗುವುದು.
• ಅನಾಥರಿಗೆ, ದುರ್ಬಲರಿಗೆ ಸಹಾಯ ಮಾಡಬೇಕು.
• ಹುಣ್ಣಿಮೆ, ಅಮವಾಸ್ಯೆಗೆ ಉಪವಾಸವಿರಬೇಕು ಹಾಗೂ ಅರಳಿ ಮರಕ್ಕೆ ನೀರು ಹಾಕಬೇಕು.
• ಬಡ ಹುಡುಗಿಗೆ ಮದುವೆ ಮಾಡಿದರೆ ಪುಣ್ಯ ಉಂಟಾಗುವುದು.



ಪಿತೃದೋಷದಿಂದ ಮುಕ್ತಿ ಪಡೆಯಲು ಪಿತೃಪಕ್ಷದಲ್ಲಿ ಶ್ರಾದ್ದ

ಪಿತೃಪಕ್ಷದಲ್ಲಿ ಗತಿಸಿದ ಹಿರಿಯರು ತರ್ಪಣಕ್ಕಾಗಿ ಕಾಯುತ್ತಿರುತ್ತಾರೆ. ಶ್ರಾದ್ದ ಮಾಡುವುದರಿಂದ ಅವರಿಗೆ ತೃಪ್ತಿ ಉಂಟಾಗುವುದು ಹಾಗೂ ಅವರ ರಕ್ಷೆ ದೊರೆಯುವುದರಿಂದ ಜೀವನದಲ್ಲಿದ್ದ ಕಷ್ಟಗಳು ದೂರವಾಗುವುದು.