ದೆಹಲಿ ಮಳೆ: ಗುಡುಗು-ಮಿಂಚಿನಿಂದ ನಿಮ್ಮ ಎಲೆಕ್ಟ್ರಾನಿಕ್ ವಸ್ತುಗಳನ್ನು ರಕ್ಷಿಸಲು ಈ 15 ನಿಮಿಷದ ಟಿಪ್ಸ್ ಪಾಲಿಸಿ!

ದೆಹಲಿ-ಎನ್‌ಸಿಆರ್‌ನಲ್ಲಿ ಇಂದು ಭಾರಿ ಮಳೆ ಮತ್ತು ಗುಡುಗು ಅಬ್ಬರಿಸುತ್ತಿದೆ. ಜೋರಾಗಿ ಮಿಂಚು ಹೊಡೆದರೆ ಮನೆಯಲ್ಲಿರುವ ಎಲೆಕ್ಟ್ರಾನಿಕ್ ಉಪಕರಣಗಳು ಕ್ಷಣಾರ್ಧದಲ್ಲಿ ಸುಟ್ಟು ಹೋಗಬಹುದು. ಹಾಗಾಗಿ, ಟಿವಿ ಮತ್ತು ರೂಟರ್‌ಗಳಂತಹ ಗ್ಯಾಜೆಟ್‌ಗಳನ್ನು ರಕ್ಷಿಸಲು ಈಗಲೇ ಎಚ್ಚೆತ್ತುಕೊಳ್ಳಿ. ಹವಾಮಾನ ಇಲಾಖೆ ಅಲರ್ಟ್ ನೀಡಿರುವ ಬೆನ್ನಲ್ಲೇ, ಕೇವಲ 15 ನಿಮಿಷಗಳ ಈ ಸುರಕ್ಷತಾ ಕ್ರಮಗಳನ್ನು ಪಾಲಿಸಿ ನಿಮ್ಮ ಮನೆಯನ್ನು ಸೇಫ್ ಮಾಡಿಕೊಳ್ಳಿ.

ಮಿಂಚು ಹೊಡೆದಾಗ ಪವರ್ ಸರ್ಜ್ (ವೋಲ್ಟೇಜ್ ಏರಿಳಿತ) ಉಂಟಾಗುವುದು ಸಾಮಾನ್ಯ. ಕೇವಲ ಸ್ವಿಚ್ ಆಫ್ ಮಾಡಿದರೆ ಹೈ ವೋಲ್ಟೇಜ್ ತಡೆಯಲು ಸಾಧ್ಯವಿಲ್ಲ. ಆದ್ದರಿಂದ, ನಿಮ್ಮ ರೂಟರ್ ಮತ್ತು ಪಿಸಿಯನ್ನು ಸಾಕೆಟ್‌ನಿಂದ ಪೂರ್ತಿಯಾಗಿ ಅನ್‌ಪ್ಲಗ್ ಮಾಡಿ. ಸರ್ಜ್ ಸ್ಟ್ರಿಪ್‌ಗಳನ್ನು ಬಳಸುವುದು ಹೆಚ್ಚುವರಿ ಸುರಕ್ಷತೆ ನೀಡಿದರೂ, ಭಾರಿ ಮಳೆ-ಗುಡುಗಿನ ಸಮಯದಲ್ಲಿ ಕೇಬಲ್‌ಗಳನ್ನು ಕಿತ್ತು ಇಡುವುದೇ ಅತ್ಯಂತ ಪರಿಣಾಮಕಾರಿ ಮಾರ್ಗ.

ದೆಹಲಿ-ಎನ್‌ಸಿಆರ್ ಮಳೆ: ನಿಮ್ಮ ಎಲೆಕ್ಟ್ರಾನಿಕ್ ಉಪಕರಣಗಳ ಸುರಕ್ಷತೆಗೆ ಇಲ್ಲಿವೆ ಟಿಪ್ಸ್

ಮನೆಯ ಯಾವುದಾದರೂ ಮೂಲೆಯಲ್ಲಿ ನೀರು ಸೋರುತ್ತಿದ್ದರೆ ಅಲ್ಲಿ ಇನ್ವರ್ಟರ್ ಇಡಬೇಡಿ. ತೇವಾಂಶ ಅಥವಾ ಮಳೆ ಹನಿಗಳು ಬಿದ್ದರೆ ಶಾರ್ಟ್ ಸರ್ಕ್ಯೂಟ್ ಆಗುವ ಅಪಾಯವಿರುತ್ತದೆ. ತಕ್ಷಣ ಇನ್ವರ್ಟರ್ ಅನ್ನು ಒಣ ಹಾಗೂ ಸುರಕ್ಷಿತ ಜಾಗಕ್ಕೆ ಸ್ಥಳಾಂತರಿಸಿ. ಹಾಗೆಯೇ, ಎಸಿ (AC) ಔಟ್‌ಡೋರ್ ಯೂನಿಟ್‌ನ ಡ್ರೈನ್ ಪೈಪ್‌ಗಳಲ್ಲಿ ಕಸ ಸಿಲುಕಿದೆಯೇ ಎಂದು ಪರೀಕ್ಷಿಸಿ. ಇದರಿಂದ ಅನಗತ್ಯ ರಿಪೇರಿ ಖರ್ಚು ಮತ್ತು ಬೆಂಕಿ ಅವಘಡಗಳನ್ನು ತಪ್ಪಿಸಬಹುದು.

ಜೋರಾದ ಗಾಳಿ ಬೀಸಿದಾಗ ಬಾಲ್ಕನಿಯಲ್ಲಿರುವ ಗಿಡದ ಕುಂಡಗಳು ಹಾರಿ ಬೀಳುವ ಸಾಧ್ಯತೆ ಇರುತ್ತದೆ. ಹಾಗಾಗಿ, ಗಿಡಗಳನ್ನು ಭದ್ರಪಡಿಸಿ ಮತ್ತು ಹೊರಗಿರುವ ವಸ್ತುಗಳನ್ನು ಕಟ್ಟಿ ಹಾಕಿ. ಕಿಟಕಿಗಳ ಸಂದಿನಿಂದ ನೀರು ಒಳಬರದಂತೆ ದಪ್ಪ ಟವಲ್‌ಗಳನ್ನು ಬಳಸಿ. ಈ ಸಣ್ಣ ಮುನ್ನೆಚ್ಚರಿಕೆಗಳು ನಿಮ್ಮ ಮನೆಯ ಫ್ಲೋರಿಂಗ್ ಮತ್ತು ವಸ್ತುಗಳನ್ನು ಹಾನಿಯಿಂದ ರಕ್ಷಿಸುತ್ತವೆ. ಮಳೆ ಸುರಿಯುವಾಗ ಟೆರೇಸ್ ಅಥವಾ ವಾಟರ್ ಟ್ಯಾಂಕ್ ಹತ್ತಿರ ಹೋಗಬೇಡಿ.

ಮಳೆ ನಿಂತ ಮೇಲೆ ಈ ವಿಷಯಗಳ ಬಗ್ಗೆ ಗಮನವಿರಲಿ

ಮಳೆ ನಿಂತ ನಂತರವೂ ಕೆಲವು ಎಲೆಕ್ಟ್ರಿಕಲ್ ಸಮಸ್ಯೆಗಳು ಗುಪ್ತವಾಗಿ ಉಳಿದಿರಬಹುದು. ಮಳೆ ಸಂಪೂರ್ಣವಾಗಿ ನಿಂತ ಮೇಲೆಯೇ ಎಂಸಿಬಿ (MCB) ರಿಸೆಟ್ ಮಾಡಿ. ಮನೆಯಲ್ಲಿ ಪ್ಲಾಸ್ಟಿಕ್ ಸುಟ್ಟ ವಾಸನೆ ಅಥವಾ ಬೇರೆ ಯಾವುದಾದರೂ ವಿಚಿತ್ರ ವಾಸನೆ ಬರುತ್ತಿದೆಯೇ ಎಂದು ಗಮನಿಸಿ. ಒಂದು ವೇಳೆ ಏನಾದರೂ ಹಾನಿಯಾಗಿದ್ದರೆ, ಇನ್ಶೂರೆನ್ಸ್ ಕ್ಲೈಮ್ ಮಾಡಲು ಫೋಟೋಗಳನ್ನು ತೆಗೆದಿಟ್ಟುಕೊಳ್ಳಿ. ಹವಾಮಾನ ತಿಳಿಯಾದ ನಂತರವೂ ಎಚ್ಚರಿಕೆಯಿಂದ ಇರುವುದು ಉತ್ತಮ.